मर्कुस 5
5
भुत लाग्ल मानुस निक भइल
(मति ८:२८-३४; लुका ८:२६-३९)
1येसु आफ्न चेलासबसाङ गालिल तालक ओपारपटि गेरासेनससब्क मुलुकयँ पुगिकेभइल। 2येसु डोङाकमाटे बाहार निस्किकेभइल बिथिकइ, चिहानकमाटे एक जेना भुत आत्मा लाग्ल मानुस ओनेन्के भेटिके अइल। 3उसे भुत लाग्ल मानुस चिहानघारियँ बोस्ते रहइ। उख्राके कोलोउयेइ पुनु साङ्लाइ बाधिकुन राखिके नइजेसक्ते रहत, 4किकेकने उख्राके धेरइ पल्ट फालामक किला र साङ्लासबेइ बाधिकुन राख्ते पुनु उहाइ हत्कडि र साङ्ला दुहइ टुटाइकुन भाग्ते रहइ। कोलोउयेइ पुनु उख्राके काबुयँ राखिके नइजेसक्ते रहत। 5उहाइ रातदिन आफ्निके पाथरेइ चित्थ्रेतिन, चिहानघारि र डाँडाइ-डाँडा चिच्चेतिन् हिड्ते रहइ।
6जब उहाइ टाढोहिँसे येसुके देख्ल, तब दुघ्रते आइकुन ठेउनो धसिकुन ओनेन्के सेवा लाग्ल, 7र उहाइ बड्क सोरेइ चिच्चेतिन् कहल, “हे येसु, माहान परमेसोरक छावा! तोहे मेह्राके किति कारिके खोज्ते बाटउ? मोइ परमेसोरक नाउयँ किरिया खाइकुन बिन्ति कर्तम, कि मेह्राके दुख झुनदेओ।” 8किकेकने ओनेनेइ उख्राके, “ए भुत आत्मा, उसे मानुसकमाटे निस्किकुन बाहार आउक्!” कहिकेभइल रहत।
9उपाछु येसुइ उख्राके पुछिकेभइल, “तेर नाउ किति हखइ?”
हसे उहाइ कहल, “मेर नाउ फउज हखइ, किकेकने हामे धेरइ जेना बाटिहिँ!” 10हसे भुत आत्मासबेइ इसे ठाउकमाटे हाम्राके झुनपाठाओ कहतिन् येसुसाङ घरिघरि बिन्ति कर्ल।
11उछिका नजिकइक डाँडायँ एक बथान सोरसब चह्रिराख्ते रहइ। 12उसे भुत आत्मासबेइ येसुसाङ यस्न कइकुन फेरि बिन्ति कर्ल, “हाम्राके सोर भितर पोसिके देओ।” 13जब ओनेनेइ उसब्के जाइके आग्या देइकेभइल, तब भुत आत्मासब उसे मानुसकमाटे निस्किकुन सोरभितर पोस्ल बिथिकइ लगभग दुइ हजार जत्का सोरसब हुत्तिथिन भिरकमाटे खस्ल र तालयँ बुडिकुन मोर्ल। 14इसे देखिकुन सोर चरुहासब भाग्ल, हसे गाउ र सहरयँ जाइकुन घटना सुनालपाछु, उछिका किति भइल हखइ कइकुन चाहिके मानुससब अइल। 15जब उसब येसुलघि अइल, तब धेरइ भुतसब लाग्ल मानुसके निक भइकुन लुगा लागाइकुन बोसिराख्ल देख्ल पाछु उसब सभइ जेना डाराल। 16हसे उछिका अइलाहारसब्के भुत लाग्ल मानुस र सोरसब्के किति भइल रहइ कइकुन जोनेइ देख्ल, उहाइ सभइ बाताइदेल। 17इसे कुरासब मानुससबेइ सुनिसक्लपाछु, उसबेइ येसुके हाम्र ठाउ छाडिकुन जाइहालउ कइकुन बिन्ति कर्ल।
18हसे येसु डोङायँ चढिकुन जाइके खोज्तेखना उसे भुत लागिकुन निक भइल मानुसेइ, “मेह्राके पुनु तेउह्रसाङ लेजउ” कइकुन बिन्ति कर्ल। 19तर ओनेनेइ आफ्नसाङ आइकेलागि रोकिकुन, उख्राके यस्के कहिकेभइल, “तोइ आफ्न घर जाइकुन परमप्रभुइ तेर लागि करिके भइल माहान काम र तेह्राके देखाइके भइल दयाक बारेयँ आफन्तसब्के सुनाउक।” 20तुरुन्तइ उसे मानुस उछिकमाटे जाइकुन येसुइ उक्र लागि करिकेभइल कामक बारेयँ दसोटा सहरयँ#५:२० दसोटा सहरयँ डेकापोलिस प्रचार करिके थाल्लपाछु, उछिका सुन्लाहार जत्का सभइ मानुससब छक्क पोर्ल।
मन्देलि बेटि र मोर्लि छउडि
(मति ९:१८-२६; लुका ८:४०-५६)
21येसु फेरि डोङायँ चढिकुन तालक एपारपटि नइ फर्किकेभइल। जब येसु तालक छेओ पुगिकेभइल, तब उछिका धेरइ मानुससब्क भिड ओनेन्क चारिओर जम्मा भइल। 22उहइ बेलाके सभाघरक सासकसबमद्धे एक जेना याइरस कलाहार मानुस पुनु उछिका आइपुग्ल, हसे येसुके देख्ल बिथिकइ ओनेन्क गोडयँ घोप्टो पोरिकुन, 23बिन्ति कर्तिन कहल, “मेर नान्हि छाहिम् सिकिस्तइ भइलि बाटि, पाउ आइकुन उक्रउप्र हाथ राखि देनेपार, उसे निक भइकुन बाच्लाहारि।”
24हसे येसु याइरससाङ जाइकेभइल। उछिका धेरइ मानुससब येसुक पाछु लाग्लगुनेइ, ओनेन्क चारिओर भिडेइ धक्ला-धक्लि करिके थाल्ल। 25उसे मानुससब्क भिडयँ बाह्र बर्स आघुहिँसे नइ रकत बोहलाहार रोगेइ दुख पाउलि एक्टि बेटि पुनु रहि। 26उहाइ धेरइ बइधेसब्कलघि जाइकुन आफ्नसाङ भइल सभइ पइसा खर्च करिकुन उपचार कर्लि, तर निक भइके साटोयँ झन धेरइ मन्देल रहि। 27उहाइ पुनु येसुक बारेयँ सुन्लि रहि, उहइगुनेइ मानुससब्क भिडयँ जाइकुन ओनेन्क लुगा पाछुकमाटे छिउलि, 28किकेकने उहाइ आफ्न मनयँ सोच्लि रहि कि, “मोइ ओनेन्क लुगा मत्रइ छिइके पाउने पुनु निक भइलारम्।”
29ओख्निहिँ उक्र देहिकमाटे रकत बुहिके छाड्ल, र आफ्नि उसे रोगकमाटे निक भइल कुरा उहाइ थाहा पाउलि। 30हसे येसुइ आफ्नसे सक्ति निस्किकुन जइल थाहा पाउल बिथिकइ मानुससब्क भिडके फर्किकुन पुछिकेभइल, “मेर लुगा कोनेइ छिउल?”
31ओनेन्के चेलासबेइ कहल, “इछिका मानुससब्क भिडेइ धक्ला-धक्लि करिरहल तोहे पुनु देख्तिन बाटउ, फेरि तोहे नइ कोनेइ मेह्राके छिउल कहतिन् बाटउ?”
32तर येसुइ चाहिँ आफ्नेन्के कोनेइ छिउल कइकुन चारिओर चाहिके थाल्ल। 33हसे उसे बेटिइ आफ्निके जिति भइल रहइ, उहइ थाहा पाइकुन डरेइ काप्तिन आइकुन येसुक आघु घोप्टो पोरिकुन सभइ सत्ते कुरा बातालि। 34उपाछु येसुइ उख्राके कहिकेभइल, “ए बाबि, तेर बिस्वासेइ नइ तेह्राके निक पार्ल बाटइ। आबे सान्तिसे जाउक्। तेर रोग निक भउस्।”
35ओनेन यस्न बोरातिनखना सभाघरक सासक्क घरसे मानुससब आइकुन याइरसके कहल, “तेउह्र छाहिउ त मोरिसक्लि। आबे गुरुके किके दुख देताहाउ?”
36तर येसुइ उसब्क कुरा नसुनिकुन सासक्के कहिकेभइल, “झुनडाराउक्, बिस्वास मत्रइ करुक्।” 37हसे ओनेनेइ पत्रुस, याकुब र उक्र भाहिक् युहन्नाके बाहेक अरु कोलोउके पुनु आफ्नसाङ जाइके नइजेदेइके भइल। 38जब ओनेन्सब सासक्क घरयँ पुगिकेभइल, तब ओनेनेइ उछिका खइला-बइला कर्लाहारसब, रोउलाहारसब र बड्क सोरेइ बिलउना कर्लाहार मानुससब देखिकेभइल। 39उपाछु येसु भितर पोसिकुन उसब्के कहिकेभइल, “तोहेसब किके खइला-बइला कर्तिन रोउते बाटउ? छउडि नइजे मोर्लि, तर निन्दालि हखि।”
40तर ओनेन्क कुरा सुनिकुन उसब खिसि कर्तिन होस्लपाछु, ओनेनेइ सभइ जेनाके बाहार निस्काइकेभइल। हसे छउडिक उइया, बुबा र आफ्नेन्क चेलासब्के लेइकुन छउडि भइल कोठाभितर जाइकेभइल। 41हसे ओनेनेइ छउडिक हाथ धरिकुन कहिकेभइल, “तालिता कुमि!” जोक्र अर्थ “ए छउडि उठुक्!”
42हसे छउडि ओख्निहिँ उठिकुन हिठिके थाल्लि। उसे बाह्र बर्सक रहि। उसे देखिकुन उसब छक्कइ पोर्ल। 43उपाछु येसुइ उसब्के इसे कुरा कोख्राहुके पुनु झुनकहउ कइकुन कडा आग्या देतिन्, छउडिके केहाउ खइलाहार कुरा खाइके देओ कइकुन आह्राइके भइल।
ప్రస్తుతం ఎంపిక చేయబడింది:
मर्कुस 5: DRY
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2024 (Active), Mother Tongue Translators Society and Wycliffe Bible Translators, Inc. All rights reserved.
