Luk 7
7
Jisɔs agban mingban wu mine eri wu banɔgag ba bera
(Mat 8:5-13)
1Yi Jisɔs amaning ekɔang bane ba ali wogag we nggom bifa feb. We awei mpam yu Kapanɔm. 2Ekwe mine eri wu banɔgag ba bera wu ali kɛmag afa. We afɔning mingban wu anunag we gbɔg, ayɔ ta ale ekwɔang. 3Yi etɛmi mine wufa awoging abangang Jisɔs afong ebe bakonang ba Ju ɔmɔ Jisɔs, atɔ we abag aba gban mingban owu. 4Yi bakonang bafa aban ɔmɔ Jisɔs, aledi we gbɔg arɔ, mine eri banɔgag ba bera wufa akɔnɔkɔn wu we ɔnyangag we, 5wantagi we akwe enun yi mpam oyuda we erɔng atɛb sɔ nju efugi yu bane ba Ju. 6Ka Jisɔs aloag yi bɔ.
Yi we ale kped yi nju we mine eri wu banɔgag ba bera awun afong erong eyi arɔ atɔ Jisɔs arɔ “Minfɔni, ka ke lɔ efegayɔ, wantagi me nkɔning wu we ɔweag wa eboi yi ebunju ema. 7Yi ala me nrɔn lɔ ala mine wu akan kɔning wu abag mɔ ɔwa. Ekinging we kpei elem, mingban ama beke ting bekori we. 8Wa ebad ema me nle mine wu nle eboi ɔsa, yi banɔgag ba bera ba ale eboi ema. Ntɔrag owubɔ wud ndɔ chog alo; nhɔ tɔ wuntad ndɔ, ‘Bag,’ aba, Me ntɔ mingban ama ndɔ, ‘Lem yifa,’ alem yi.”
9Yi Jisɔs awoging balem mafa, beke beman we yi mine eri wu banɔgag ba bera wufa, ahɔ kpedi amɔn ekakab yi bane ba ali nyedag we, we arɔ, “Me nsidi nyɔ, nkan ndɔ npɛdi etɛm ochorekpo lafa kpe wa Isrel.” 10Nyining bane ba afonging bɔ atisɛm wa nju abarɔ arɔ mingban awun beke bekori we.
Jisɔs anyimi mmɔn wu minkai ekud wa eko
11Eken erabing, Jisɔs aloag wa mpam yu ayenag yu arɔ Nen. Bane ba ali nyedag we yi etɛmi ekakab alo yi we. 12Yi Jisɔs asin kpedikpedi yi minyɔfu ɔkɔ wu mpam, we arɔn bane akaring minkoko atɛbag yi we. Minkoko awun ale ebibi mmɔn minine wu nyen akwe. Ka nyen eyi ale minkai ekud. Bane jugijugi wa mpam ayua anyedi we arɔ aka kɛn mmɔn awun. 13Yi Minfɔni arɔn minkani awun, nsɔn akɔ we yi we, atɔ we arɔ, “Kɔngɔ bei.”
14We aba lo aka gbi mkpokpo minkoko yu bɔ akaring, bane ba akaring yu acha belag. We arɔ, “Esad, me ntɔ we, lo belag!” 15Minkoko alo belag ato minchɔd ɔchɔd, Jisɔs akun we ajog ake nyen eyi.
16Bane feb boted bosoi yi botig ka bɔ akag Ɔsɔwɔ. Bɔ arɔ, “Etɛmi minrɔag eyammɛd yi Ɔsɔwɔ atɛb wa erɔng eyida! Ɔsɔwɔ aba abanyangi bane abi!” 17Nsidi yufa abangang Jisɔs asai afari Judia yi bɔpam bu bole bɔfari yu.
Jɔn Minpogag mmai afong Bakamag ba befong ɔmɔ Jisɔs
(Mat 11:2-19)
18Banyedag ba Jɔn minpogag mmai aba sidi we abangang nggom bifa feb bi Jisɔs aleming. Jɔn ayen bafai wa erɔng eyibɔ, 19afong bɔ ɔmɔ Minfɔni arɔ aka beb we arɔ, “We ole mine wu anɔngɔ ba lale emɔn mmɛd wa wuntad?”
20Yi banine bafa aban ɔmɔ Jisɔs, bɔ arɔ, “Jɔn minpogag mmai afonging sɔ ɔmɔ ɔwa arɔ ebeb we arɔ, ‘We ole we wu anɔngɔ ba a, lale emɔn mmɛd wa mine wuntad?’ ”
21Wa nten ayua Jisɔs agban jugijugi ba akwe bekɔn, ba ayɔgɔyɔ yi ba akwe bebe bi bɔnyɔganyɔ, agban jugijugi ba acheging mmɛd arɔ nnen. 22Ka abɔri bɔ ba Jɔn afonging arɔ, “Tisɛm anyɔng nyɔ ka sidi Jɔn yi nyɔ ɔmarɔ ɔrɔ, yi yi nyɔ owog. Bachegag ba mmɛd ali rɔag nnen, bɔbɛni baken, ba akwe bafon agban bɔ, bakɛnag ba baroi awog, ba akwɔn anyimi ka etingi nsidi akwɔri ake bakpak. 23Enɔb yi kpewun wu akan tuning wantag ama.”
24Yi bakamag ba befong ba Jɔn ahɔ lo, Jisɔs ato ɔchɔd yi ekakab yi bane abangang Jɔn: “Ye yi we ochin efi wa ekpen yi bane chang akɛmag ɔka rɔ? Emei enyingag nkeri mpeb afugag a? 25Ebu chang, ye yi we ochin efi ɔka rɔ? Minine asɔbing lɔ yi betingi bi nfɔ a? Chang, bane ba alangag nfɔ bi bekon efɛn yi ba akwenag ekwen yi efangane akɛmag wa boju bu balen bibi. 26Ka ye yi nyɔ ochin efi ɔka rɔ? Minrɔag eyammɛd yi Ɔsɔwɔ a? Ee-ee, me nsidi nyɔ, Jɔn aking minrɔag eyammɛd yi Ɔsɔwɔ. 27We ale mine wu asenging abangang:
“ ‘Me nting nfong minkamag me befong ara we nnen,
wu ting aloni nnen anungi we.’ #7:27 Mal 3:1
28Me nsidi nyɔ, mine chang wu atɔn aking Jɔn wu minkani amarɔ ogwe; ka kpe nkeri ele ala wu akebing aking wa bɔlen bu Ɔsɔwɔ atɔ aking Jɔn.”
29(Feb bane, kpe bɔ baramag ba ntɛbatɛba yu mpam, yi bɔ ba awoging balem ma Jisɔs, akam arɔ nnen yu Ɔsɔwɔ ale ekonekon, wantagi Jɔn ale mine wu apoging bɔ mmai. 30Ka bɔ Farisi yi bakɔag ba eben akebing yi Ɔsɔwɔ areming abangang bɔ bafɔni, wantagi bɔ akaming arɔ Jɔn apog bɔ mmai.)
31Jisɔs achag boso yi minchɔd owu arɔ, “Yi ye, nyining, Me nkanag bane ba nggon yufa? Ba ale ala ye? 32Bɔ ale ala mbɔnibɔni ba akig ekpen efɛn ayenag bolom,
“ ‘Sɔ efɔd ntangtang eke nyɔ,
ka nyɔ okeb ebɛnang;
sɔ ekɔn eben yi eko,
ka nyɔ okeb ebeang.’
33Yi Jɔn minpogag mmai aban, alin beliang ayɔn barog, ka nyɔ ɔrɔ, ‘Akwe ebe nyɔganyɔ.’ 34Ka Mmɔn wu Mine aba ayag ayɔg, ka nyɔ ɔrɔ, ‘Wufa ale nchɔg yi minyɔg barog, nnum wu baramag ba ntɛbatɛba yu mpam yi balemag ba bobe.’ 35Ka ɔmanyum ɔtɔngi ekonekon wa mbɔn abi feb.”
Minlemag bobe minkani apog Jisɔs Bakwu
36Wud wu Farisi alaging Jisɔs aka li beliang wa nju oyu. We alo achag nju Farisi aka kɛmi awegi lɔ ebad yid ali wa okpokoro. 37Nyining minkani wu ale wa mpam ayua, wu ekwen eyi enɔbing, yi we awoging arɔ Jisɔs ali yag beliang wa nju yu Farisi, we aba yi otu bakwu ma achobag mmu. 38Ka we alami nsɛm yu Jisɔs abɔgag bako ami, abeag, we ato ɔbedi bako ma Jisɔs yi babɛdag ami. We asiri mɔ yi ndi eyi, akug mɔ minyɔ, ka apog mɔ bakwu ma achobag mmu.
39Yi Farisi wu alaging Jisɔs arɔn yifa, we atɔ lɔ arɔ, “Ebu minine wufa ale minrɔag eyammɛd yi Ɔsɔwɔ, we ka amain npedi minkani wu ali gbirag we yi ekani minkani wu we ale, wantagi we ale minlemag bobe.”
40Jisɔs abɔri we arɔ, “Saimɔn, Me nkwei nyum yi nɔngɔ nsidag we.”
We abɔri arɔ, “Minkɔkɔi, sidi me.”
41“Banine bafai akwe minfɔg bakpoga barɛm. Wud barɛm ami ale ekpa dinari erɛm nged erɛm nsɛm esɔn ka wu wag ekpa bakpoga erɛm befai nsɛm ɔfɔ. 42Bɔ bafaibafai akwe bakpoga ma bɔ ajogag, we afɔ bɔ arɔ bɔ ali bakpoga amɛn. Fafa nene wa erɔng eyibɔ wu ka minfɔg bakpoga anunag we aking?”
43Saimɔn abɔri arɔ, “Nkering ndɔ we wu barɛm ami atin aking ka afɔ we.”
Ka Jisɔs abɔri we arɔ, “We osob mpem gɔgigɔgi.”
44Nyining we akpedi amɔn minkani awun atɔ Saimɔn arɔ, “Ɔrɔ minkani wufa? Me nban nju ɔya, we oken me mmamai me nso bako angama ka we abedi bako angama yi babɛdag ami asiri mɔ yi ndi eyi. 45We okobing me yi ekugang minyɔ, ka minkani wufa, to nten yu me nwen wa nju ɔya akan gɔ ekugang bako angama. 46We ɔlanging me bakwu wa eri ema, ka we apog me bakwu ma achobag mmu wa bako angama. 47Wantagi yifa, Me nsidi we, we wu bobe obu botinoti alo acha we, waoye we akwe enun yi jugijugi. Ka mine wu alon acha ninsed akwe enun yi ninsed.”
48Jisɔs atɔ minkani awun arɔ, “Bobe ɔgwa alo acha we.”
49Bolom bakenken ato ɔkpen yi bolom arɔ, “Nene la wu akwe ɔsa wu afɔg mine bobe?”
50Ka Jisɔs atɔ minkani awun arɔ, “Ochorekpo ɔwa ɔnyangi we; chog wa ekunakuna.”
ప్రస్తుతం ఎంపిక చేయబడింది:
Luk 7: NBB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©️2024 Luke Initiative for Scripture Translation
