Luk 4
4
Nkan yu Jisɔs
1Nyining Jisɔs, esoang yi Nyɔganyɔ yu Ɔsɔwɔ we acha baya ma Jɔdan ka Nyɔganyɔ yu Ɔsɔwɔ akari we achag wa ekpen yi bane chang akɛmag, 2ekpen yi wa berɛm bi ndu befai minen ejiri akaning we. Ka we alin kpenyum wa ndu ayiafa, wa nkurikuri ndu yifa nsɔng alom we.
3Minen ejiri atɔ we arɔ, “Obu we ole Mmɔn wu Ɔsɔwɔ, tɔ ndinda yufa akpedi beliang.”
4Jisɔs abɔri we arɔ, “Asenging arɔ, ‘Mine chang akwenag wa beliang bibi.’ ”
5Minen ejiri akun we achag esɔ ekpen yi echiming nlag aka atɔngi we wa ekpri nten feb bɔpam bu bole wa nggon. 6Nyining minen ejiri atɔ Jisɔs arɔ, “Me ting nke we feb ɔsa wu bɔlen yi bɔnɔ; yi ake me, ka me mmanag nke mine kpewun wu me nken ndɔ nke. 7Obu we ting ɔtɛb bedungdung oke me, bi feb ting bekɛmi egwa.”
8Jisɔs abɔri arɔ, “Asenging wa botiti bu balem ma Ɔsɔwɔ arɔ: ‘Tɛb bedungdung egwa oke Minfɔni Ɔsɔwɔ ɔwa yi etugang we bibi.’ ”
9Minen ejiri akun we achag Jerusalim aka chori we wa ntari nju yu Ɔsɔwɔ ka atɔ we arɔ, “Obu we ole Mmɔn wu Ɔsɔwɔ, bu afa ɔchɔ wa nsi. 10Wantag asenging yi wa botiti bu balem ma Ɔsɔwɔ arɔ:
“ ‘Ɔsɔwɔ ting atɔ bakamag ba befong ebi
bɔ ababi we degere;
11bɔ ting atam we esɔ wa babɔ amibɔ,
eru afa we ɔkan som oko ɔwa wa ndinda.’ ”#Bakag 91:11,12.
12Jisɔs abɔri arɔ, “Botiti bu balem ma Ɔsɔwɔ bɔchɔding arɔ: ‘Kan kan Minfɔni, Ɔsɔwɔ ɔwa.’ ”
13Yi minen ejiri amaning ekanang yifa, we achai we tata nten yu we ahɔ fɔn efed.
Akeb Jisɔs wa Nasaret
14Jisɔs atisɛm wa Galili wa ɔsa wu Nyɔganyɔ yu Ɔsɔwɔ, ka bosidi bɔbangang we bɔsai bɔkɔni feb mpam. 15We ali akɔag wa boju bu efugi bu bane ba Ju, ka kpeichamine akag we.
16Jisɔs alo achag Nasaret, wa ekpen yi alen we tata we akoi, ka wa Epo yi Ewealɔ we alon achag nju efugi yu bane ba Ju, nkeri ele egweni eyi. We alo belag ayen, 17ka afag alang we babɔ ekpa botiti yi Aisaya minrɔag eyammɛd yi Ɔsɔwɔ asenging. Erɛbang yu, we arɔ ekpen yi asenging arɔ:
18“Nyɔganyɔ yu Minfɔni ale yi me,
wantagi we asang me
arɔ me nkwɔri etingi nsidi nke bakpak.
We afong me arɔ nsidi bane ba ale wa mgbakɔbɔ ndɔ bɔ afri,
ka bɔ ba acheging mmɛd ting ahɔrɔ nnen,
bɔ ba ale wa anyei asem,
19nsidi ndɔ nten asi yu Minfɔni anɔngɔ nyangi bane abi.”
20Nyining we apɛd ekpa botiti, atisɛm ake mintɔbag erom ka we akɛmi nged. Mmɛd ma bane feb ba ale wa eteng yi nju efugi yu bane ba Ju afag ammɔnag we. 21Ka we ato osidi bɔ arɔ, “Elei botiti bu balem ma Ɔsɔwɔ bu nyɔ owog bɔtɛb ekonekon.”
22Feb achɔd gɔgigɔgi abangang we ka beke beman bɔ wantag yu betingi bi balem bi betɛbing wa minyɔ owu. Bɔ abeb arɔ, “Mmɔn wu Josef asid la?”
23Jisɔs atɔ bɔ arɔ, “Ekonekon nyɔ orobag ekan yifa nyɔ oke me: ‘Mingbanag bane, gban lɔ!’ Ka nyɔ ting ɔtɔ me ɔrɔ, ‘Lem fa wa mpam ɔya ala nkeri ewoging feb bi we oleming wa mpam yu Kapanɔm.’ ”
24Achag boso yi minchɔd owu arɔ, “Me nsidi nyɔ ekonekon, minrɔag eyammɛd yi Ɔsɔwɔ chang wu afɔnnag ejeg wa mpam oyu. 25Me nsidi nyɔ ekonekon ndɔ wa nten yu Elaija minrɔag eyammɛd yi Ɔsɔwɔ, bakai ba nkud atinoti wa mpam Isrel, nteni esɔ ekebing ɔna mmbuta wa nya isia yi ebad ka esɔnga ɔgba ele wa bɔpam feb. 26Ka Ɔsɔwɔ afonging Elaija achag ɔmɔ minkai ekud kpewud wa mpam yu Isrel otoke afonging we ɔmɔ minkai ekud wa mpami Sarefat yu ale eboi yi Sidɔn. 27Ka jugijugi wa Isrel ale yi bafon nteni Elisia minrɔag eyammɛd yi Ɔsɔwɔ, ka Ɔsɔwɔ agbaning owubɔ kpewud ekinging Neman wu arun Siria.”
28Feb bane wa nju efugi yu bane ba Ju aroi yi bɔsangag bu nted yi bɔ awoging yifa. 29Bɔ alo belag, atu we atɛb wa mpam, akun we achag wa minyɔ mpub ekpen yi atɛbing mpam, enung eru afa anyɔng we alang wa ɔdimgborong. 30Ka we aken aking wa ekakab eyibɔ aloag eyi ebad.
Jisɔs akeb ebe Nyɔganyɔ
(Mak 1:21-28)
31Nyining we alo eboi wa Kapanɔm, mpam yu ale wa Galili, ka wa Epo yi Ewealɔ ato ɔkɔi bane. 32Beke beman bɔ wa ɔkɔag nyum owu, wantagi achɔding yi ɔsa ala we akwe minchɔd awun.
33Wa nju efugi yu bane ba Ju efɔning mine wu akwe ebe nyɔganyɔ. We abeg balem esɔesɔ, 34“Chog awa, ɔkeag ye yi sɔ, Jisɔs wu arun Nasaret? We ɔban ɔrɔ ɔbajɔgi sɔ a? Me nji ekani mine yi we ole, we wu Asang anungi Ɔsɔwɔ!”
35Jisɔs anyan nkɛminkɛm, “Foi minyɔ! Tɛb beke ebi!” Nyining ebe nyɔganyɔ erob minine awun wa nsi boso bu bɔ feb ka etɛb we wa beke eleming we.
36Bane feb beke beman bɔ ka bɔ ali tɔrag bolom arɔ, “Icha bachɔd la! Yi erug yi ɔsa arob enyan ake bebe bi bɔnyɔganyɔ bi erɔng betɛb!” 37Ka nsidi abangang we akɔni feb bɔmpam afari.
Jisɔs agban bane jugijugi
(Mat 8:14-17; Mak 1:29-34)
38Jisɔs atɛb wa nju efugi yu bane ba Ju achag wa nju yu Saimɔn. Fafa nyeni minkai Saimɔn beke beli sɔngag we, ka bɔ atɔ Jisɔs arɔ atɔb we. 39We alami wa nkpɔgi nnɔng oyu anyan esɔng ayia etɛb, ka ebuyid beke bekɔri we. We alo belag ato bɔ otug.
40Wa nten yu nsoi eko, bane aban yi bayɔg ba bekɔn belibeli ɔmɔ Jisɔs, ka we achori bɔ babɔ wudug wudug, agban bɔ. 41Erɔng, bebe bi bɔnyɔganyɔ betɛb beke bi bane jugijugi, bebegag arɔ, “We ole mmɔn Ɔsɔwɔ!” Ka we akpɛdi bɔ akaming arɔ bɔ achɔd, wantagi bɔ amai arɔ we ale Krais ayin.
42Kayi epo ehɔche, Jisɔs alo achag ekpen yi we akɛmag bibi. Bane ali keag we ka nten yu bɔ aban ekpen yi we ale anɔg arɔ alem we akan lo acha bɔ. 43Ka we arɔ, “Me nkwɔrag balem ma nnɔ abangang bɔlen bu Ɔsɔwɔ nke bɔmpam buntad erɔng, wantag yufa Ɔsɔwɔ afonging me.” 44Ka we acha akwɔrag wa boju bu efugi bu bane ba Ju wa Judia.
ప్రస్తుతం ఎంపిక చేయబడింది:
Luk 4: NBB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©️2024 Luke Initiative for Scripture Translation
