Gẹnẹsis 3
3
Iyin Ehọ Ọmwa
1Ẹyẹn kegha re ne ọ ghi ru ero sẹ vbe uwe aranmwẹ ne Nọyaẹnmwa Osanobua yi hia. Ẹyẹn keghi nọ okhuo nii wẹẹ, “Te Osanobua gele wẹ ne uwa ghẹ rri ọmọ erhan ni rre uwe ogba na rhọkpa ra?” 2Okhuo nii keghi wanniẹn, “Ma sẹtin rri ọmọ erhanikerhan vbe uwe ogba na, 3sokpan a ma wẹ erhan ne ọ rre adesẹneva ẹre. Osanobua wẹ ne ima ghe rri ọmọ erhan nii ra ne a ye obọ kan rẹn, ọ wẹ ma gha ruẹe, ma gha wulo.” 4Ẹyẹn keghi wanniẹn wẹẹ, “Ọnii i re ẹmwata; wa i wulo. 5Te Osanobua tae vberriọ, rhunmwuda, ọ rẹnrẹn wẹ, wa gha rriọe wa gha do gha ye vbe Osanobua, wa ghi do gha rẹn emwi ne ọ maa ke nẹ i maa zẹ vbene irẹn ye.”
6Okhuo nii keghi miẹn vbene erhan nii ma egbe hẹ, kevbe ne ọmọ rẹn vbe rhie aro re hẹ, kevbe wẹ emwi esi gha nọ adeghẹ ọmwa waan. Ẹre ọ na rhie vbe ọmọ erhan nii, ọ na rri ọe. Ọ keghi rhie ne ọdọ ẹre vbọ, rẹn keghi vbe rri ọe.
7Ọwarọkpa vbe iran ghi wa rri ọe nẹ, a keghi rhie irẹnmwi ne iran, iran keghi do rẹn wẹ te iran bannuan; iran keghi sele ebe ne ọ yevbe ọghe ohọ kugbe, iran ke yae gue egbe iran.
8Vbe ota nii, iran keghi họn vbe Nọyaẹnmwa Osanobua khian vbe uwe ogba, iran keghi mu erhan gue egbe ya lẹre ne ẹn. 9Sokpan e Nọyaẹnmwa Osanobua keghi datie okpia nii wẹẹ, “Wẹ vbo?” 10Okpia nii keghi wanniẹn wẹẹ, “I họn ẹmwẹ ruẹn vbe uwe ogba, ohan kegha mu mwẹ, I keghi lẹre nuẹn rhunmwuda ighẹ irhunmwirhun ọre I ye.” 11Osanobua ke nọ rẹn wẹẹ, “Gha ọ tama ruẹn yi ighẹ irhunmwirhun ọre u ye, te u wẹ ghi rri ọmọ erhan ne I tama ruẹn wẹ ne u ghẹ re ra?” 12Okpia nii ke wanniẹn wẹẹ, “Okhuo ne u ma rhie ke mwẹ, ọre ọ rhie ọmọ erhan nii mẹ, mẹ keghi rriọe.” 13E Nọyaẹnmwa Osanobua keghi nọ okhuo nii wẹẹ, “Vbọzẹ ne u na ru emwi na yi?” Rẹn ke wanniẹn wẹẹ, “Ẹyẹn ọre ọ rẹrẹ mwẹ rriọe.”
Osanobua rri iran oya
14Ẹre Nọyaẹnmwa Osanobua na tama ẹyẹn wẹẹ, “A gha rri uwẹ oya ye ọna; wẹ ọkpa ọre ọra ya uhunmwu hẹ irrioya ne ọ rrọọ vbe uwe aranmwẹ hia: ke eban kpao, ẹko u ghi ya gha hiọrọ, ekẹn ọre u ghi vbe gha re vbe ẹdẹ agbọn ruẹn hia. 15I gha ruẹe ne uwẹ kevbe okhuo nii gha ya eghian so egbe, eghian egbe ẹdẹdẹmwẹdẹ ọre ivbi ẹre ke ivbi uwẹ ra gba gha khin; ivbi ẹre gha lọkọ uhunmwu uwẹ, wẹ ghi vbe gha sa iran ighinghianwẹ.”
16Rẹn keghi vbe tama okhuo nii wẹẹ, “I gha rhie ba ọlọghọmwa ruẹn vbe u a gha hanmwa, ke obalọ ruẹ vbe ẹghẹ ubiẹmwẹ. Sevba, te u gha ye gha rhikhan lele ọdafọn, ọdafọn ọre ọ gha kha yan ruẹn.”
17Rẹn keghi tama okpia nii wẹẹ, “Wẹ ke danmwehọ ọvbokhan-an, u na rri ọmọ erhan ne I wẹ ne u ghẹ re. Rhunmwuda emwi ne u ru na, otọ gha khian ne a fi ẹre unu. Ẹsọn u gha ya ẹdagbọn ruẹn hia miẹn, ne ọ miẹn ehe na mọ ọmọ ne ọ gha suẹ re. 18Ogigban ke irunmwu ọre ọ gha zọ ladian nuẹn, u ghi vbe gha rri erhan noha. 19Te ọfọ gha fọọ ne u ya miẹn ẹsọn ne otọ miẹn ehe na mọ ọmọ ladian, u te dọlegbe ghe ekẹn ne a ya ma an, ekẹn nii u gha vbe dọlegbe khian.”
20Adam keghi he amwẹ ọnrẹn Ivi, rhunmwuda rẹn ọre iye emwa hia. 21E Nọyaẹnmwa Osanobua keghi ya ohian se ukpọn ne Adam ke amwẹ ọnrẹn, ọ ke viọ rhuan iran.
A Khulo Adam ke Ivi Hin Uwe Ogba Rre
22Ẹre Nọyaẹnmwa Osanobua na kha wẹẹ, “Banbanna nian, te okpia na ghi ye vbe ọkpa vbe uwe ima rhunmwuda, te ọ ghi rẹn emwi ne ọ maa ke nẹ i maa. A i kue nẹẹn ne ọ ya re vbe erhan arrọọ, ne ọ do gha rrọọ ẹdẹdẹmwẹdẹ.” 23Rhunmwuda ọnii, e Nọyaẹnmwa Osanobua ke khu ẹe hin uwe ogba Idẹni rre, ọ na wẹ ne ọ ya gha kọ emwiokọ ye otọ ne a ke rhie ẹre rre.
24Vbe odẹ ahọ ọghe ogba nii, rẹn keghi viọ emwi ne a yi ni ma he wu eso yọ, ke iran ke umozo ne erhẹn ne ọ baa ne ọ vbe gbe lẹga egbe hia. Wẹẹ ne iran ghẹ gie ọmwarhọkpa sikẹ erhan arrọọ nii.
ప్రస్తుతం ఎంపిక చేయబడింది:
Gẹnẹsis 3: EDO96
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
@ The Bible Society of Nigeria, 1996
