Maatiyos 22
22
Marcat aymassal
(Luukas 14:15-24)
1Yeesus lel malammih tahe arhxuk aymassalah aalih waanishe: 2“Carshi nigsinna wuli nugus ishi barhah marca abeyah higgida, 3usuk amaa marcah yimciddime marah deecimoona ishi garuuza fare, usun laakin yamaatoona mifarhinnooni. 4Malammih: ‘Amaa yimciddimeh yane marak: “Taykinna, dirar isqirribeh aniyo, yi becar kee kulus laa yumruxxudeh yane, ummanna lel tinqirribeh tane. Marcah amowa” akko erhexa’ yerhxeh aki ishi garuuza fare. 5Usun laakin macalah adde mirabinnooni, gari sinni dhageg fanah, gari lel sinni bicishra fanah yedeyin. 6Gari kaa garuuza yibbirhiinih, umammaatih ten xoolaysheenih ten yigdifin. 7Nugus kurrayeh, ishi caskar fareyaako amaa nabsi-wannun yeyleeh ten daafo xararishe. 8Sarrah ishi garuuzak: ‘Marca tinqirribeh tane, yimciddime marah laakin akah meedda. 9Amaydo, naba shawaaricille tedeynih geyinnan mara marcah iciddima’ akko yerhxe. 10Amaa garuuza lel tsirogulle yewciinih, akah suginnan mara uma-tiya kee mece tiyah inkoh yeskettin. Amaymih marcat reedi gerhah yemmeege.
11Amaa nugus amaa gerha yablo yemeete gedda, amadde marcat sara aallinnixe xiyawto yuble. 12‘Nangali, marcat sara hinnim tadde aaginah orobte?’ akko yerhxe. Usuk lel yarhxem waye. 13Sarrah amaa nugus amaa garuuzakke: ‘Gabub kee lakukuh turhuynih irot ditelle kaa cida. Amadde lel weeca kee ikokti xarqam yakko kinni’ akko yerhxe. 14Amayim lel mango mari yimciddimin, dago mari lel doorimeenimhi sabbatah kinni.”
Roomaati naba nugusuh gibre yakfiliinim
(Markos 12:13-17; Luukas 20:20-26)
15Sarrah Faarisiin yedeyinyaako kaa waanih aaginah kaa yabbarhiinimidde zatteyen. 16Sinni katattaynit lel Heerodesti maraalih tahe yerhxinyaako alle dhirhiyen: “Mudarris, atu rummadde tanitom kee Yallih arax rummah taydurusem, xiyaw mablodde macal malitom kee xiyaw nif tableh mitanqiyyirem naarhige. 17Amaydo, noh warish, aymih kolle higgida? Roomaati naba nugusuh miiri yakfiliinim arax kinni maki?” 18Yeesus laakin ten siixo yeerhegeh: “Aymih cakanadde yi sayishshaana, ko munaafiqhiino? 19Amaa miirit tacriifa yi uybulluwa” akko yerhxe. Usun le diinaar alle baahen. 20Yeesus lel: “Miyatti gina kee kataaba alle tane?” akko yerhxe. 21Usun: “Roomaati naba nugus-him” yerhxin. Sarrah usuk: “Amaydo, Roomaati naba nugus-him, Roomaati naba nugusuh uxuwa, Yallihim lel Yallah uxuwa” akko yerhxe. 22Tayim yoobbin gedda, cibrah raben. Kaa xabeenih lel akko yedeyin.
Tsadduuqhiim rabaako hi ugut esseriman
(Markos 12:18-27; Luukas 20:27-40)
23Amaa lellecidde: “Rabaakohi ugut miyane yarhxe” Tsadduuqhiim alle yemeetiinih: 24“Mudarris, Moosa: ‘Xiyawti cindham xabekkah rabemko, kaa sacal amaa gubna nagareh ishi sacalah dhalaa akah carisha’ yerhxeh yine. 25Amaydo, nottaalih malxina sacal yinin. Aftiti marcishiteh, dhalaa hinnim rabeyaako ishi numa ishi sacalah xabe. 26Amayim balih lel, malamma, maddaxaako malxin gufteh dhalaa hinnim raben. 27Umman tenko sarrah lel amaa numa rabte. 28Amaydo, rabiikohi ugutulle, inkoh tee luuk yiniinimhi sabbatah, miyatti numa takko kinni?” arhxuk kaa esseren.
29Yeesus laakin: “Kutuub kee Yallih xayla mitaarhigiinimhi sabbatah, aqhlithuk tanin. 30Amayim lel rabaakohi ugutulle, mimarcishitaana, mimarcishimaanaaki, carshelle malaykutuh kinni yammingidiinim. 31-32Rabaakohi ugut hi zacabah yekkemko, Yalli: ‘Anu Abraahim Yalla, Isxaaq Yalla kee Yacqoob Yalla kiyo’#Muuca 3:6 sinak yerhxeh yinem maqhrayinnitiini? Amaydo, usuk yane marih Yalla kibah rabe marih Yalla maki” yerhxeh alle yedebbe. 33Amaa mango xiyaw tayim yoobbin gedda, kaa aydarasalle cibrah raben.
Naba amre
(Markos 12:28-34; Luukas 10:25-28)
34Faarisiin, usuk Tsadduuqhiim sik-ishem yoobbin gedda, inkille yekettin. 35Tenko wuli sercat dhiiceeni lel kaa yacakkano essero kaa essere: 36“Mudarris, Sercatadde ummanimko naba amri awlih tiya kinni?” 37Usuk lel: “Maddara ishi Yalla, inkoh ishi afcaadooko, ishi rooxeeko kee ishi xangalko takxano kolle tane.#Gabbaacime Sercat 6:5 38Tati naba tiya kee afti amre kinni. 39Amah higgidin malammi lel: ishi zoobatto ishe balih ikxin.#Leewiiti Sheekhino 19:18 40Sercat kee Nobowa inkoh ta lamma amrelle cikkishittem kinon” akko yerhxe.
Masiix miyatti Barha kinni?
(Markos 12:35-37; Luukas 20:41-44)
41Faarisiin inkidde yekettiinih anuk, Yeesus: 42“Masiix zacabah ayim sinalle higgida? Miyatti barha kinni?” yerhxeh ten essere. Usun lel: “Dawud barha” akko yerhxin. 43Usuk lel: “Aymihi Dawud, Ufayeh waanishe gedda:
44‘Maddari yi Maddarak:
“Ku nacabtoolit ku ibih guba ten hayandah,
yi mizgaako defee Maddara akko yerhxem?”’#Zaabur 110:1
45Amaydo, Dawud Maddara akko yerhxemko, aaginah kaa barha yakke?” akko yerhxe. 46Walaa inketti inki waanitta alle maadabbo, amaa maxko sarrah lel walaa inketti kaa essero mafdabo.
ప్రస్తుతం ఎంపిక చేయబడింది:
Maatiyos 22: SCC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©2024 Wycliffe Ethiopia
