I LUKASI 24
24
1Sine mo'o-mo'oru ntu'u a oleo amba-ambano minggu atuu melako ira a ngkaburu mpowawa rampa-rampa anu domempatindaomo. 2Domehaweo watu telundiomo inso a ngkaburu atuu, 3ka mansado mpewinso nahi domehaweo wata ngkoroi-Do i Yesu. 4Kontongaado mpentade ntekokodoho hangano anu gagi atuu, borono hinao orua mia mentade umpeda ndi ondae mesangkaako sangka anu tesosangkilo. 5Mpetuundu ira hangano tedoa ira medoito, sine mia orua ira atuu motaeako ira, ”Tembio ka ime'ungke Ira anu tuwu, i olodo mia mate? 6#Mat. 16:21; 17:22-23; 20:18-19; Mrk. 8:31; 9:31; 10:33-34; Luk. 9:22; 18:31-33 Nahi Dokongko i ndi'ai, mewangu Iramo. Impewowoloomo hapa anu Dopauakomiu, tempono da kongko Ira i Galilea, 7onaemo nine i Ana Manusia asalakono pineweengako a ngkaedo mia ntehala ka Dopinaso a ngkeu pinotamba, ka Ira mewangu a oleo anu ko'otolu.” 8Ka dopasimpewowoloomo pau-Do i Yesu atuu. 9Ka mansado mpekule inso a ngkaburu, domentutuluomo luwuno atuu a hopulu ka aasa ana guru ka a luwuno pepaekompo anu mehano. 10Beine atuudo onaemo i Maria inso i Magadala, ka i Yohana, ka i Maria ineno i Yakobu. Ka beine mbo'u mehano anu mperonga saru ondae pauako ira tinena. 11Sine ndi ondae pau atuu butu kana pau mooa ka nahi dompe'ala-ala ira beine atuudo. 12Maupo kanandio i Peturu mewangu, ka i'amba montuturako lumako a ngkaburu atuu. Mansano melungaako i larono, ikitao butumo koa sawu tongo-Do. Ka i'amba lumako, ka ipesikeno i laro aroano hapamo anu umari gagi.
Ondae i Yesu mepopokita a nsala lumako i Emau
24:13-35
13 #
Mrk. 16:12
A oleo koa mbo'u atuu orua mia inso a ana guru-Do i Yesu lumako a aasa inia meneeako Emau, anu po'iangano bara'ura opitu mili olaino inso i Yerusale, 14ka mepau-pau ira mongkona luwuakoano anu gagiomo. 15Tempono kontongaado mepau-pau ka metobo-tobosi pinewowolo, hawe Iramo i Yesu isa'a rumangkuhi ira, ka Dopelempa merongaako ira. 16Sine hinao ba hapa anu rumereio matado, onaemo ka nahi doto'ori Ira. 17Dopotaeako ira i Yesu, ”Hapake ipepau-pauako kontongaamiu melempa?” Ka menaa-naa iramo ka rupado mompemasusa. 18Asa mia inso ndi ondae, neeno i Keleopa, sumangki Ira, ”Bara'ura butu asa-asamiu mia hawe i Yerusale anu nahi to'orio hapa anu gagi i tu'ai ba opia oleo telalo andio?” 19Dopotaeako ira, ”Hapake atuu?” Sumangki ira, ”Hapa anu gagi mongkona Ondae i Yesu to Nasare. Ondaemo asa nabi, anu pabawa a mpo'anggaa ka pepaua i aroDo Ue Ala ka i arodo luwuno tongkumami. 20Sine petewawado sando mpesomba ka petewawamami mpeweengako Iramo ka Dohinuku mate ka domempaso Iramo a ngkeu pinotamba. 21Kahinaano i ndi'upua mpomperorohi kami, nine Ondaemo anu hawe Ira motolao tongku Isaraeli. Sine kontongaano atuu laloomo otolu oleo, mompu'u igagi luwuno atuu. 22Sine ba opia ira beine inso ndi omami dompodengke kamimo: Mo'o-mo'oru ntu'u melako iramo a ngkaburu, 23ka nahi domehaweo wata ngkoroiDo. Ka do'amba me'aiwa mpowawa lele, nine mpokita iramo mala'eka, anu pauo, nine tuwu Ira. 24Ka ba opia ira walimami melako iramo a ngkaburu atuu ka domehaweo, nine lano mentee anu pinaudo beine atuudo, sine Ondae nahi domengkita Ira.” 25Ka Do'amba motaeako ira, ”Hei omiu mia benge-benge, momalu lahi aroamiu, ranta nahi mpe'ala-ala ira luwuakoano anu domempauomo nabi! 26Kombake i Mesia asalakono tebobarasaiako luwuno atuu ka Dopewinso a marambaa-Do?” 27Ka Do'amba mokomanasaako ira hapa anu teburi mongkona Ondae a Wunta Mempori, mompu'u inso a wuntano i Musa ka luwuno wuntado nabi.
28Umpeda iramo a inia anu lakoado, ka Do'amba me'inungako kana Ira motilaloakono pelempaa-Do. 29Sine tedoa dodadai Ira, dopotae, ”Ipo'iamo meronga saru omami, hangano tamo ronga wongi ka oleo tamo sumoo.” Ka i'amba mewinso Iramo ka Dopo'ia meronga saru ondae. 30Tempono Dopentoro mongkaa saru ondae, Do'alao roti, rumonsoo, ka Do'amba sumiba-sibao ka Doweeako ira. 31Tempo atuu tewileomo matado ka doto'ori Iramo, sine moliu Ira inso i tonga-tongado. 32Motae iramo pada ondaedo, ”Kombake moroso aroato, tempono Dopepauakita a nsala ka tempono Dopopoto'oriakita ihino Wunta Mempori?”
33 #
Mrk. 16:13
Ka i'amba mewangu iramo ka dopekule i Yerusale. I tu'ai dohawe ira hopulu ka aasa ana guru atuu. Kontongaado mpepumpu meronga saru wali-walido. 34Dompotae, ”Mentee ntu'u Ondae i Ue mewangu Iramo ka mepopokita Iramo ndi Simo.” 35Ka i'amba mia orua ira atuu tumutuluo hapa anu gagi a nsala ka kana'umpe doto'ori Ira tempono Dosiba-sibao roti.
Ondae i Yesu mepopokita a luwuno ana guru
24:36-49
(Yoh. 20:19-23)
36Ka kontongaado mpepau-pau mongkona anu gagi atuu, borono Dopentade i Yesu i tonga-tongado ka Dopotaeako ira, ”Rodoa ndi omiu!” 37Ntededengke ira ka medoito ka potaedo mpongkita ira onitu. 38Sine Dopotaeako ira, ”Tembio ka imentededengke ka hapa pu'uno ka inanta-nata i laro aroamiu? 39Imengkitaomo kae-Ku ka karu-Ku: Ongkuemo isa'a andio; imerare Akumo ka imengkitao, hangano onitu nahina ihino ka wukuno, kana anu kinitamiu ndi Ongkue.” 40Kontongaa-Do mepau kanandio, Dopopokitaako ira kae-Do ka karu-Do. 41Ka tempono nahi dompompe'ala-ala hangano po'undedo ka da mengkohali-hali, Dopotaeako ira, ”Hinao kaangake ndi omiu i ndi'ai?” 42Ka do'amba mpoweeako Ira asa mpole bou ginore. 43Do'alao ka Dokaano i arono matado. 44Dopotaeako ira, ”Ndiomo pau-Ku, anu Kupauakomiumo tempono da Kuperonga-ronga saru omiu, onaemo nine asalakono inihii luwu anu hinao teburi mongkona Ongkue a wunta Taurano i Musa ka wuntado nabi ka wunta Penani Po'unde-unde.” 45Ka Do'amba umungkahio pinewowolodo, onaemo ka dompokonto'orio ihino Wunta Mempori. 46Dopotaeako ira, ”Hinao teburi kanandio: I Mesia asalakono tebobarasai ka mewangu inso i olodo mia mate a oleo anu ko'otolu, 47ka mbo'u: a nee-Do lele mongkona tepidia ka po'ampunia hala asalakono pinohawe a luwuno tongku, mompu'u inso i Yerusale. 48Omiumo sakosii inso a luwuno andio. 49#Tin. 1:4 Ka Aku umoliwio ndi omiu hapa anu dinandi-Do Ama-Ku. Sine asalakono ka impo'ia a laro ngkota andio hawe ka imempinokorosoako pabawa inso i wawono.”
Pewuatako-Do i Yesu
24:50-53
50 #
Tin. 1:9-11
Ka Do'amba i Yesu wawa ira mpeluarako inso a ngkota hawe umpeda i Betania. I tu'ai Dotandeo kae-Do ka Doronso ira. 51Ka tempono Ondae tekonai rumonso ira, Dopensuaako ira ka tetande lumako i suruga. 52Mpenggolontu iramo mpesombai Ira, ka do'amba mpekule i Yerusale tedoa memawongko. 53Mekongko ira mpiha a laro Raha-Do Ue Ala ka dome'unde-unde Ira Ue Ala.
ప్రస్తుతం ఎంపిక చేయబడింది:
I LUKASI 24: XMZ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
