Bè-wénia 1

O Yeesu dó mí ɲii nɔn le le Dónbeenì Hácírí á à lii

1-2Tiofiile,#1.1 Tiofiile: Le yèni mu kúará lé bìo kà «Yìa le Dónbeenì wa.» Yìa ó o Luki von lè le yèni mu á bìo yí tà yí zũ sese. bìo ó o Yeesu hĩ́a wee wé làa bìo ɓúenɓúen na ó o hĩ́a wee kení lè ɓa nùpua mí tonló ɲúhṹ ɓúaró pã̀ahṹ à vaa ɓúe bìo le Dónbeenì ɓuan wo yòoraráa ho wáayi á ĩ bía bìo ĩ nín-yání vũahṹ yi. Sã́ni ò o yòo ho wáayi, ó o bía mí sòobá-bíoní lè le Dónbeenì Hácírí pànká á nɔn ɓa nùpua na ó o hĩ́a hueekaa wó lè mí tonkarowà yi. 3Bìo ó o húrun bĩnía vèera ó o zéeníkaa míten làa ba hã wizooní ɓúará-ɲun yi á wó bìo cɛ̀rɛ̀ɛ à ɓa zũń ká a yìo wi lua bìo bon. Hɔ̃́n wizooní so yi ká ɓa páanía wi mín wán, ó o wee bío le *Dónbeenì bɛ́ɛnì bìo na ɓa yi.

4Wizonle ɓúi ká a làa ba wee dí, ó o henía bìo kà nɔn ɓa yi: «Mi yí lé ho Zeruzalɛɛmu yi. Mi kɛɛní bĩ́n à pa bìo á ĩ fèra bía bìo làa mia, mu hãmu na á ĩ Maá dó mí ɲii le mí ì na. 5O Zãn hĩ́a wee bátízé lè mu ɲumu ká minɛ́n bán á à bátízé lè le Dónbeenì Hácírí hen làa wizooní bìo yɛn.»

O Yeesu ɓuan yòora ho wáayi

6Á bìa làa wo páanía kará tùara a yi: «Ɲúhṹso, lé hón pã̀ahṹ so á fo ò wíoka a *Isirayɛɛle nìpomu bìo á ɓa à kɛń míten le?» 7Ó o Yeesu bía nɔn ɓa yi: «Ho pã̀ahṹ lè le wizonle á mi yí ko mi tùa zũń. O Maá mí dòn lé yìa bàrá mu míten. 8Ɛ̀ɛ ká pã̀ahṹ na le Dónbeenì Hácírí á à lii mi wán yi, á mi ì yí ho pànká. Mi ì wé ĩ sɛɛ́ràsa á à bío ĩ bìo ho Zeruzalɛɛmu yi, lè ho *Zudee lè ho *Samarii kãna ɓúenɓúen yi, lè ho dĩ́míɲá kùaráa ɓúenɓúen yi mún.»

9Bìo ó o bía hɔ̃́n bíoní so vó, ó o ɓuan yòó wà ho wáayi ká ɓa dĩ̀n wee loń. Á le dùndúure ɓúi ló ɓueé tun wo yi, á ɓa yí máa mi a. 10Bìo ɓa dĩ̀n fá mí yìo ho wáayi, hen na ó o Yeesu yòó wà yi, yìo ɓueé tĩ à báawa nùwã ɲun na zã́ hã sĩ̀-poa á dĩ̀n ɓa nìsã́ní, 11á wee bío làa ba: «Kalileesa, mi dĩ̀n hen wee loń ho wáayi lée webio? O Yeesu mu na le Dónbeenì léra mi tĩ́ahṹ á ɓuan yòoraráa ho wáayi á khíi bĩní ì ɓuen làa bìo mi mɔnnáa wo ká a yòó wà bìo síi.»

O Yeesu tonkarowà kuure

12Bṹn mɔ́n á ɓa tonkarowà ló le ɓúee na ɓa wee ve làa Oliivewa vĩ̀nsĩ̀a ɓúee wán á bĩnía lion ho Zeruzalɛɛmu. Le ɓúee mu lè ho lóhó á à yí kilomɛɛtere dà-kéní síi. 13Bìo ɓa lií zon ho Zeruzalɛɛmu yi, á ɓa vaá yòora ho nɔ́nwíohṹ na ɓa lá wee wé kúee mín wán yi. Bìa kɛra bĩ́n lé o Piɛre, o Zãn, o Zaaki là a Ãndere, o Filiipu là a Toma, o Baatelemii là a Matiye, o Alifee za Zaaki, o Simɔn na ɓa le Zeloote#1.13 Mi loń Matiye vũahṹ 10.4, là a Zaaki za Zudaa. 14Ɓa ɓúenɓúen fù wó mí yilera làa dà-kéní, á wee kúee mín wán túntún à páaní fìo le Dónbeenì yi lè ɓa hã́awa ɓúi, là a Yeesu ɓàn zàwa lè ɓàn nu Mari.

Yìa zon o Zudaa lahó

15Wizonle ɓúi, ká bìa tà a *Krista bìo na kúaa mín wán á à yí lòn nùpua ɓúará-hèzĩ̀n síi, ó o Piɛre hĩ́nɔn yòó dĩ̀n ɓa tĩ́ahṹ ò o bía: 16«Wàn zàwa, bìo le Dónbeenì Hácírí bía là a *Daviide ɲii le Dónbeenì bíonì vũahṹ yi á lá ko à mu wé. Le fèra bía mu ho vũahṹ mu yi o Zudaa dã́ní yi, wón na dú bìa wìira a Yeesu yahó. 17O Zudaa lá lé wa kuure nùpua nì-kéní, á níi lá wi ho tonló dà-kéní yi làa wɛn.» 18-19Ho Zeruzalɛɛmusa ɓúenɓúen zũ mu le o wékheró wárí na ɓa sàánía làa wo, lé dìo ó o yà lè ho mɔhṹ. Hón mɔhṹ so lé hìa ó o lion yi lè mí yahó, á píohó nà, á fĩn-sãníwà ló kúaará ho tá yi. Lé bṹn te bìo ɓa wee veráa ho mɔhṹ mu làa «Hakɛlidama.» Ɓàn bíonì yi á mu kúará le «cãni mɔhṹ.»

20Ó o Piɛre bĩnía bía: «Bìo túara hã lení vũahṹ yi lé bìo kà: ‹O zĩi ko le dĩ̀n coon à nùpue yí zo›#1.20 Mi loń Lení vũahṹ (Psaumes) 69.26 Mu mún pá bĩnía túara: ‹O ɓúi ko ò o zo a lahó›.#1.20 Mi loń Lení vũahṹ (Psaumes) 109.8 21-22Lé bṹn nɔn ó o nùpue ɓúi ko ó o dé wa wán à wé o Ɲúhṹso Yeesu vèeró sɛɛ́ràso. Bìa ó o nùpue mu ko ò o lé tĩ́ahṹ, lé bìa làa wɛn páanía bò mín ho pã̀ahṹ ɓúenɓúen na ó o Ɲúhṹso Yeesu làa wɛn vará yi, à lá pã̀ahṹ na ó o Zãn Batiisi bátízéra wo ɲii wán, à vaa ɓúe pã̀ahṹ na ó o ɓuan yòora ho wáayi.» 23Á ɓa wã́a zéenía ɓa nùpua nùwã ɲun, o Matiasi là a Zozɛɛfu na ɓa wee ve làa Baasabaasi tàá Zusituusi. 24Bṹn mɔ́n á ɓa ɓúenɓúen páanía fìora kà síi: «Ɲúhṹso, ũnɛ́n lé yìa zũ ɓa nùpua ɓúenɓúen sĩa. Zéení yìa á ũ léra ɓa nùwã ɲun na kà tĩ́ahṹ làa wɛn, 25yìa á à zo a Zudaa lahó ũ tonkarowà tonló yi, hón na á wón ló día ò o van hen na ó o ko ò o va yi.» 26Á ɓa wó le ɲún-sĩni bìo à zũńnáa yìa le Dónbeenì léra, ó o Matiasi lé yìa á mu tò wán. Lé wón dó ɓa tonkarowà pírú dòn na ká wán.

ప్రస్తుతం ఎంపిక చేయబడింది:

Bè-wénia 1: box

హైలైట్

షేర్ చేయి

కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Dónbeenì páaníi fĩnle vũahṹ గురించి మరింత తెలుసుకోండి

Bè-wénia 1
నుండి ప్రసిద్ధ బైబిల్ శ్లోకాలు

వినండి Bè-wénia 1

Bè-wénia 1 కోసం వీడియో

అపొ.కా. 1-12

BibleProject

Bè-wénia 1

Bè-wénia 1
నుండి ప్రసిద్ధ బైబిల్ శ్లోకాలు

వినండి Bè-wénia 1

Bè-wénia 1 కోసం వీడియో

అపొ.కా. 1-12

బైబిల్:

Bwamu

వర్షన్: Dónbeenì páaníi fĩnle vũahṹ - box

Bè-wénia 1

Bè-wénia 1

Bè-wénia 1 నుండి ప్రసిద్ధ బైబిల్ శ్లోకాలు

వినండి Bè-wénia 1

Bè-wénia 1 కోసం వీడియో

అపొ.కా. 1-12

బైబిల్:

Bwamu

వర్షన్: Dónbeenì páaníi fĩnle vũahṹ - box

Bè-wénia 1

Bè-wénia 1
నుండి ప్రసిద్ధ బైబిల్ శ్లోకాలు