Лука 11
11
Озномадо
1Весть Иисус ознось ве таркасо. Зярдо Сон прядызе озноманзо, тонавтницятнень эйстэ вейкесь энялдозевсь икелензэ: «Азоро, Тонгак тонавтомизь минек озномо, эдь Иоанн тонавтынзе эсензэ тонавтницянзо». 2Иисус мерсь тенст: «Ознодо вана истя:
Менелень минек Тетянок,
иневаньксэкс улезэ Тонь леметь!
Сазо Тонь Инязорксчить,
топавтовост Тонь мелеть-арсемат
масторлангсояк, кода менельсэ!
3Макст миненек эрьва чистэ
эрявикс кши-сал.
4Нолдыть минек теевть пежетенек,
эдь миньгак нолдтнетяно
минек икеле чумосотненень.
Илямизь нолда снартнемас-варчавтнемас,
мекевланк – менстямизь Апародонть».
5-6Мейле Иисус мерсь сыненст: «Мерьсынек, кинь-бути тынк эйстэ ули ялгазо, ды вана тон сыть сонензэ пелевене ды кортат: “Ялгай, монень апак учо совась вакска ютамсто оям, андомс сонзэ а мезде. Секскак вешан кедьстэть колмо кшить, конатнень мейле пандсынь теть”. 7Ялгась мери теть кудосто: “Илямак талновто. Монь кенкшем пекстазь, ды монськак эйкакшон марто удома таркасан. Секскак а стяван тонеть кшинь максомо”. 8Кортан тенк: бути сон натой ялгаксчинь кисэ а сти ды а максы кши, сонензэ ялатеке стяма ды максома тонеть весементь, мезе эряви, бути стардозь, апак пота кармат вешеме. 9Секскак Мон кортан тыненк: вешеде ды максозь ули тенк; вешнеде ды мутадо; вачкоеде ды панжить тенк. 10Эдь эрьва вешицянтень – максови; вешницясь – муи; вачкоицянтень – панжозь ули. 11Арази муеви тынк ютксто истямо тетя, конась, зярдо цёразо веши кедьстэнзэ кши – максы сонензэ кев, эли зярдо цёразо веши кал – калонь таркас максы сонензэ гуй? 12Эли бути цёразо веши ал – арази тетясь максы сонензэ пупиця шанжав? 13Бути натой тыньгак, берянь ломанть, машттадо эсь эйкакшонк туртов вадря казнень макснеме, нама, менелень Тетянк седеяк максы Иневанькс Оймеялтонть сетненень, кить вешить кедьстэнзэ».
Виесь максозь Иисуснэнь Пазонть пельде
14Весть Иисус пансь ве ломаньстэ идемевсь, кона тейсь те ломаненть акортыцякс. Зярдо идемевсесь лиссь, а кортыця ломанесь кармась кортамо. Перька аштицятне дивсесть. 15Ансяк конат-конат кортнесть: «Иисус Вельзевулонь, идемевстнень прявтост, вийсэ панси идемевсть». 16Лиятнень ульнесть мелест снартнемс-варчавтнемс Иисусонь, ды секскак вешсть Сонзэ пельде менельстэ тамашань тешкс. 17Иисус жо содыль сынст мельдест ды мерсь: «Вана мастороськак а ванстови, бути ушодовить эйсэнзэ тюремат, ды кудоськак калады, бути тосо свал ютыть сёвномат-пелькстамот. 18Бути Сатанаськак сти тюреме эсензэ каршо, арази сестэ сонензэ кирдеви инязорксчизэ? Тынь ялатеке кортнетядо: мон, келя, пансян идемевстнень Вельзевулонь вийсэ. 19Бути Мон идемевстнень пансян Вельзевулонь вийсэ, сестэ тынк сетне кинь вийсэ пансить эйсэст? Сынст тевесткак невтить: тынк чумондоманк а виде. 20Мекевланк, бути Мон пансян идемевстнень Пазонь вийсэ, сестэ Пазонть Инязорксчизэ уш пачкодсь тенк. 21Зярдо виев ломань вадря кедьёнкс марто вансты эсензэ кудонзо, сестэ сонзэ ули-парозо ванстови. 22Зярдо жо кодамояк седе виев каяви сонзэ лангс ды изнясы, сестэ сон нельгсынзе весе кедьёнксонзо, конатнень лангс сон кемсь, сайсы ды явсы ули-паронзо. 23Кие аволь Монь кисэ, се Монь каршо, ды кие Монь марто а пурны, се ёртни-ёмавтни».
Аванькс оймеялтонть мекев самозо
24«Зярдо аванькс оймеялтось лиси ломаньстэнть, сон яки ведтеме таркава, ды вешни эстензэ оймамо тарка, ансяк а муи. Сестэ мери: “Велявтан ташто кудозон, косто лисинь”. 25Самсто сон мусы сонзэ тенсезь ды пурназь-сэрнязь. 26Сестэ сон моли ды саи мартонзо лия сисем оймеялт, эстедензэяк кежейть, весе совить се ломаненть потс ды кармить эрямо тосо. Ды теде мейле се ломаненть ёжомарямозо карми улеме седеяк берянь икеленсенть коряс».
Алкуксонь уцяска
27Зярдо Иисус теде кортась, ломантнень ютксто вейке ава серьгедсь тензэ: «Уцяскав те авась, конась пекесэнзэ кандтнинзеть ды потесэ андынзеть Тонь!» 28Иисус тень каршо мерсь: «Седеяк уцяскавт сеть, конат марить ды топавтыть Пазонь валонть!»
Ломантне вешить тешкс
29Ломантнеде кармасть пурнавомо ламодояк ламо, ды Иисус кортась: «Кодат берянть неень пингень ломантне! Сынь вешить тешкс, ансяк Иона пазмарицянть тешкстэнть* башка кодамояк лия тешкс сыненст максозь а ули. 30Кода Иона ульнесь тешксэкс Ниневиянь эрицятнень туртов, истя Ломантнень Цёраськак карми улеме тешксэкс неень пингень эрицятнень туртов. 31Лембе ёнксонь инязоравась* сти Пазонь судс неень пингень ломантнень марто ды чумондсынзе сынст. Эдь сон масторонь пестэ сакшнось Соломононь превейчинзэ кунсоломо. Ды вана ней тынк икеле Се, кона Соломондояк ине! 32Ниневия ошонь ломантне стить Пазонь судс неень пингень ломантнень марто ды чумондсынзе сынст. Эдь Ниневиянь эрицятне Ионань кулянть марямодо мейле велявтсть Пазонтень, ды вана ней тынк икеле Се, кона Ионадояк ине».
Сельмесь – ломаненть туртов валдонь максыця
33«Кияк кирвазтезь лампанть а кекшсы каськас эли кедьге алов. Мекевланк, путсы лампань кирдема таркас, кадык весе совицятне неить валдонть. 34Тонь сельмесь – рунгот туртов валдонь максыця. Секскак улиндеряй тонь сельмесь шумбра, сестэ весе рунготкак ули пештязь валдосо. Улиндеряйть сельметне сэредицят, сестэ рунготкак ули пештязь чоподасо. 35Секскак вант: валдось, конась тонь эйсэ, илязо уле чоподакс! 36Улиндеряй тонь рунгось пештязь валдосо ды а улиндеряй тоньсэть кодамояк чоподачи, сестэ тонь рунгось прясто пильгес валдомгады, кода лампась эсензэ валдосо валдомтовлинзеть тонь».
Иисус тарги лангс фарисейтнень ды Койс тонавтыцятнень
37Зярдо Иисус прядызе кортамонзо, вейке фарисей тердизе Сонзэ эстензэ ярсамо. Иисус сась ды озась столь экшс. 38Фарисеесь дивазевсь, зярдо неизе, мекс Сон ярсамодо икеле эзинзе шля кедензэ. 39Ансяк Азорось мерсь сонензэ: «Вана тынь, фарисейтне, ванськавтнетядо кечень ды ваканонь ушо ёнкстнэнь, тынсенк потмонк эцезь апештевемадо ды зыяндо. 40Превтеметь! Арази аволь Се, кона теизе ушо ёнксонть, Се теизе потмо ёнксонтькак? 41Явшеде кажовтненень сень, мезенк ули вакантнэсэ, сестэ весемесь карми улеме ванькс тынк туртов. 42Зыян тенк, фарисейть! Тынь пандтадо Пазонтень кеменце пелькс натой мята ды копёр тикшестэ ды пирень лия эмежстэяк. Ансяк тынь стувтынк вечкемс Пазонть ды эрямс видечисэ! Нама, эряви теемс теньгак ды а стувтомс тонаньгак. 43Зыян тенк, фарисейть! Тынь вечктядо синагогасо икельце таркатнесэ озадо аштеманть, ошкужосо мартонк шумбракстнеманть. 44Зыян тенк, Койс тонавтыцят ды фарисейть, чачонь полавтницят! Тынь прок апак тешкста калмот, конатнень ланга якить ломанть ды а содыть сынст улемадост». 45Сестэ Койс тонавтыцятнень эйстэ вейкесь мерсь: «Тонавтыця, те кортамосонть Тон минеккак покордат!»
46Иисус каршонзо мерсь: «Тыненккак, Койс тонавтыцят, зыян! Тынь вачкатадо ломантнень лангс а кандовикс сталмот, тынсь жо сурсояк а лыкавтадо неть сталмотнень кандомост. 47Зыян тенк! Тынь стявтнетядо пазмарицятнень калмост ланга кевстэ теезь ледстнема тешкст. Неть пазмарицятнень кить маштнекшнызь? Тынк покштянк! 48Теньсэ тынь тынсь невттядо, кода шнатадо эсенк покштятнень тевест: покштятне маштнесть пазмарицятнень, тынь стявтнетядо сынст калмост ланга ледстнема тешкст. 49Секскак Пазонь Превейчись корты: “Кучан сыненст пазмарицят ды апостолт, ансяк сынст эйстэ веенстнэнь маштнесызь, омбонстнэнь паньсызь”. 50Теньстэ лисни: тыненк, неень пингень ломантнень, пандома весе пазмарицятнень верест кисэ, кона валозель менель-масторонь теемастонзо саезь: 51Авелень верьстэ саезь Захариянь верьс, кона маштозель Пазонь кудонть ды икелензэ аштиця алтаренть ютксо. Алкукскак, кортан тенк: неень пингень ломантнень кедьстэ пандовтови пазмарицятнень валозь верест. 52Зыян тенк, Койс тонавтыцят! Тынь салынк содамочис кенкшень панжоманть. Тынськак тов эзиде сова ды сетненьгак, кить тов совиксэльть, эзинк нолда». 53Зярдо Иисус кортась сыненст тень, кежейгадозь фарисейтне ды Койс тонавтыцятне кармасть педсеме Сонензэ ламо кевкстема марто. 54Сынь пштистэ кунсолость Иисусонь эрьва валонть ды снартнесть кундамс Сонзэ вал лангсо чумондомс Сонзэ.
ప్రస్తుతం ఎంపిక చేయబడింది:
Лука 11: ОВ
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Библиянь ютавтомань институтось,
Хельсинки 2006
