Madiu 9
9
Yesumi ki ange lupawi ali menda ma-epeaisaya ei
(Maka 2:1-12; Luka 5:17-26)
1Yesu kawaso mendana pua kondo pambomare ande Galili ipa lee kenaomare nipuna ree anda para wala paisaya. 2Gone paisayandare nipu repara mendane alinumi ki ange lupawi ali menda rekena ria ipisimiya. Yesumi nimuna kone rulaisimiya ei andomare monde ki lupawi ali parare gupi lisaya. Na nakio, neme nena koae einu raayosi pereyadole neeme kone konenu na-siape, lisaya.
3Yesumi gupi lisaya ei pangomare monde para aisimiya Rudule Angele waloaisimiya alinumiri gupi lisimiya. Koae einu pereyaya auri Godeme komea manda pereyala peapare Yesumi go da eiri gore Gode ero lada ara da piri nimuna gole lainyaisimiya.
4Yesumi nimuna kone wisimiya ei ambala kone sumare gupi lisaya. Nimimi go koae konenu akepea kone widamepae, lisaya. 5Go angele laapona yapa pi eiri aiyapae, lisaya. Nena koae einu pele ei pereyado lape ei yapa peapae o rekoma pu lape ei yapa peapae, loma angaa misaya. 6Neme Alina Si Naki go suna ara wenaalina koae einu pereyape eina puri wiae loma neme nimi ambia wado ae lisaya. Go einare monde ki ange lupawi ali parare gupi lisaya. Nee rekoma nena reke ma-ruma nee anda pue, lisaya.
7Go lisayandare ande ali rekoma anda paisaya. 8Monde para aisimiya wenaalimi go ei andomare paalame komala arare Godena bi minyasiaisimiya. Akepeare gurupa purinuri Godeme su ali repara aleandare raname komisimiya.
Yesumi Madiu misaya ei
(Maka 2:13-17; Luka 5:27-32)
9Yesu go anda minyapalaoma pulu-ainyalomare dakisi muni muaisaya ali menda nipuna bi Madiu le ali menda nipuna dakisi muni muaisaya anda para pirina andisaya. Yesumi nipu para lalore Ni raluma ipue, lisaya. Go lisaya ei pangomare Madiumi Yesuna kou nane raluma paisaya.
10Yesu pange nipuna kou nane raluaisimiya alinu rapu Madiuna anda para rapulumana piri enda nalo pirisimiya. Mendaa dinare dakisi muni muaisimiya alinu pange wenaalimi raname na-komoaeme alinu pange ipuma monde alinu piri enda nala pirisimiya rapulumana epa piri enda epa nisimiya. 11Parisi alinumi gupisimiya ei andomare Yesuna kou nane raluaeme alinu para angaa mealo arare gupi lisimiya. Nimina waloae alimiri gurupa alinu rapu piriri enda akepea noaeyapae, lisimiya.
12Yesumi mo alinumi lameya angele pangomare gupi lisaya. Yainya na-kome pa aeme wenaaliri dokeda alinumi manda na-andeleme lisaya. Go peapare yainya komeme wenaali komea dokeda alimi manda andapeya ae lisaya. 13Godena angele wia bukamere gupi lea. Gode repara alinau pulu arare mena arinu liada eiri Godeme rana na-komea. Godeme rana komea eiri menda menda repara epepe au pia auri ora nipuna rana komea au. Go angeleme go lea eina ree komea nimimi pua waidapape ae lisaya. Go angele lomare Yesumi gupi lisaya. Ni go suna epe auri neme wenaali yarepedoameyanda na-epawae lisaya. Ni epe auri wenaalimi rana na-komeme wenaalinu mulameyanda epawa lisaya.
Gode repara kone sulameyanda koro mendame enda na-noaisimiya eina angele angaa misimiya ei
(Maka 2:18-22; Luka 5:33-39)
14Gupuma Dioni Baparaisi nipuna kou nane raluaisimiya alinu ipuma Yesu epa angaa misimiya. Naa pange Parisi alinu naame naare raayo Gode repara kone sialo ara endanu na-nala puaema lisimiya. Go pemapare naame pema rupa nena kou nane raluaeme alinumi go au na-pemele akepea pemepae lisimiya.
15Yesu nipumi nimuna angele pangoma nimuna angele yango liada arare gupi lisaya. Ali menda nipuna wena pena lamuma nipuna repaa rapu pidiandare nipuna repaa nimumiri pu kendame na-kome pa epe kone komea sia pidimi lisaya. Go peapare werepe nane mo ali nipu pane karu pelemendare mo alina repaame mandana nipu kone sialo ara enda na-neleme, lisaya.
16Ali menda nipuna ambalana aka liripidiandare pena aka runguli mendame na-rambudia. Akepeare go pena aka runguli randepedeandare wala ongeda puma mo akana manda wia pondea wala ma-andayalia. 17Mendaa rupa ali mendame pena waini ipa ambalana waini ipa mandu ae nu para na-mandia. Go au piliandare monde pena waini ipame monde ambalana nu raakupima kama epelea. Go au puma monde waini ipa mandu ae ari yongole liripidia. Go au na-piri pena waini ipa ora pena ari yongoleme wari nuna mandimi. Go aunda pilimindare gore raidipuna na-kodea.
Diu wenaalinuna kalu alina wane pange wee pupuaisaya wena Yesumi ma-epeaisaya ei
(Maka 5:21-43; Luka 8:40-56)
18Go dina Yesu nipumi go angele lada ara mo Diu wenaalinuna kalu ali komea ipuma epa Yesu andoma nipuna ange para epa panda punyao piri kongeyala ara lalore, Nina nongosi ambia gosi ora komande, lisaya. Go peapare ma-endainya nee ipuma nipuna dona nena ki epa sia, lisaya. 19Gupuma Yesu rekoma mo ali laapo paisipiya, pange nipuna kou nane raluaisimiya alinu nipu rapu paisimiya.
20Go para wena menda nipuri wee waru pupuae wena aisaya. Mo wenana kuni gipa ki laapo pereyaoma angena laapo rupara go wee pa pupuaisaya. Mo wename Yesuna kou nane puma Yesuna aka kuni epa waraisaya. 21Mo wena nipuna koneme gole lalore, Nipuna aka waraluandare ni epealia, kone wisaya.
22Gupisaya ei Yesu nipumi perekeyoma mo wena andoma nipu para lalore, Na waneo, paalame na-komape. Nena kone ni para rulale eimi nee ma-epearipa, lisaya. Go dinare go gole nipuna wee rungulisaya.
23Gupuma Yesu nipumi mo Diu alinuna kalu alina anda para konda pamboma wenaali waru andapumi ree lala ara wi waru lala-ainya andisaya. 24Go einare Yesu nipumi mo wenaalinu para lalore, Nimi raayo kama nane pulupa, lisaya. Go nongore ora na-komeapare pa u palialo ara pea, lisaya. Go ei pangoma nimu raayome Yesu ero laisimiya. 25Go lisimiyandare alinu mendame mo wenaali raayosi kama nane ralu lisimiyandare Yesu mo nongo koma pa wia lena paisaya. Gupuma Yesumi mo nongona ki muma mo nongo endoma reka pamulopisaya. 26Go einare mo Yesumi pisaya ei mo wenaalimi su kuni kuni raayo para lari pamisimiya.
Yesu nipumi lee rumbu pi ali laapona lee ma-kiyaisaya ei
27Gupuma Yesu nipu go andasu minyapalaisaya dinare nipu pula-ainya lee rumbu pi ali laapome nipu raluma paisipiya. Gupuma niipu laapome wi lala ara lalore, Deipidina Nakio,#9:27 Diu wenaali nimuna kone wimi eiri gore mo nimu wala kambominyaya Godeme ma-aya aliri Deipidina repaa alimi pilia kone sua maisambao-aisimiya. Mo lee rumbu pi ali laapome Yesu ipisayandare Deipidina Nakio lisipiya. saa para yarame komala ara rambameae, lisipiya. 28Go einare Yesu nipu anda menda para ipuma konda pambisayandare mo lee rumbu pi ali laapo pange epa konda pambisipiya. Gupisipiyandare Yesu nipumi mo ali laapo para angaa meala ara lalore, Niipimi neme niipi ma-epeanoya kone ruladepepae, loma angaa misaya. Mo ali laapome lalore, Realio, e, saame kone ruladepa, lisipiya. 29Go eina Yesu nipumi nipuna kimi mo ali laapona lee warada ara lalore, Niipimi kone ruladepe einare go au niipi para pinya, lisaya. 30Goleme niipuna lee kilisipiya. Gupuma Yesu nipumi niipu laapo para puri pale angele menda lala ara lalore, Neme niipinya lee ma-kiyado ei wenaali para ambe na-dapape, lisaya.
31Go lisayapare niipumi Yesumi lisaya angele runguluma kone waru na-wi ara andasu raayo para wenaali menda para lari pamisipiya.
Yesu nipumi angele na-le ali ma-epeaisaya ei
32Gupuma monde ali laapo minyapalada ara wenaali mendame ali menda Yesu para karu ipisimiya. Mo alina lo romba rupara koae remo pa pirisayanda nipumi angele lape-na-lisaya. 33Go peapare Yesu nipumi mo koae remo kama ma-opalumboma popenaya lisayandare mo koae remo puma go aliri angele lisaya ei kini pisaya. Go einare go au andisimiya wenaalinumi rungulu mealo pamuala ara lalore, Go Isaraeli andasu para koro mendanda go au na-andema, lisimiya.
34Go einare mo Parisi alinumi Yesumi pisaya ei andoma lalore, Yesu nipumi go koae remonu kama opalumba pupu da eiri koae remonuna purimi pia loma, lisimiya.
Yesu nipumi wenaali para yarame komisaya ei
35Gupuma Yesu nipu go andaa ree andanu pange enge ree andanu raayo para kimisu paisaya. Nipumi mo Godena angele kuruaisimiya anda paranu puma angele mongeriaisaya. Gupuma ande Godena Ki Rambuao-aya Eina epe angele walo pisaya. Go au pulu ara one mone yainyanu ae wenaali ma-epeaisaya. 36Yesu nipumi mo wenaali waru andapu andala ara nipuna pumi nimu para ree lo pisaya. Yesu nipumi mo wenaali andoma kone sialore, Go wenaalinuri sipisipi menanu mandana aemepare nimuna andere-ape ali menda dia ae, kone wisaya. Go einare go wenaalinu kendame waru komoaeme pange ora epe rupa na-ao-aeme, kone wisaya. 37Go ei andoma Yesu nipumi nipuna kou nane raluae alinu para lalore, Mo e mapuna enda porei waru andapu wiapare mo enda mulame pupudengi nape wenaali andapu na-ao-aeme, lisaya. 38Go peandare nimimi mo e mapu reali para nipumi ali andapu mo e mapu para rapaoma nimumi pupudengi noma mo endanu minya yainya palepape, lisaya.
ప్రస్తుతం ఎంపిక చేయబడింది:
Madiu 9: POLENT23
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
