Madiu 6
6
Wenaali rambamuaya ei walisaya ei
1Nimimi Godena aunu wenaalinumi andainya rupa aunu na-pipape. Nimimi wenaalinumi andainya aunu pilimindare gore nena Apa Gode Epeni nane aya alimi yangi menda na-gilia. 2Go einare rana menda neeme narali wenaali andoma rambamula kone suma alenda alenda nimu para adendare mo Godena angele pakama pangoma na-puaya wenaali puaya rupa na-pape, lisaya. Anda wenaalinumi wenaali rambamulame kone wilimindare nimumiri mo yainya puae anda rupara pange mo ree anda porana pange wenaali mendanu nimuna aloaya ei andainyayanda wenaalina lee angana olemole menda narali wenaali para aloaeme, lisaya. Nimumiri wenaali mendanumi nimuna binu minyasiainyayanda narali wenaalinu rambamuaeme, lisaya. Neme nimi para ora lalo, lisaya. Nimumiri nimuna yangi raayo ambala meamende, lisaya. 3Go pisimiyapare neeme mo alenda alenda na-wi narali wenaali rambamula kone wilindare gore nena ora repara ameme gole nena rambamuaya eiri na-andena pange pangenalape, lisaya. 4Go einare neeme wenaali rambamula pilindare go rambamuaya eiri kundiripu pape, lisaya. Gurupa nena Apame nena epe kundiripu rambamuaya auri andeleandare nena yangi ora gilia, lisaya.
Yainya pi ei walisaya ei
(Luka 11:2-4)
5Yesumi lala ara lalore, Rana menda nimimi yainya pilimindare mo payapo angele loaeme alinumi puaeme rupa na-pipape, lisaya. Nimumi mo yainya anda ruparanu pange mo ree anda para porana wenaali raayo andena kone suma rekala ara yainya puaeme, lisaya. Ora lalo. Nimumi nimuna yangi raayo ora ambala meamende, lisaya. 6Gurupa puaemepare neeme nena Apa para yainya pulame kone wilindare nena kunuma nena anda panda rupara kondo pamboma pora gape poma neeme nena Apa na-andape ali nipu para yainya pape, lisaya. Gupuma nena Apa neeme kunuma puali einu andoaya alimi kunuma yainya pili eiri andoma yangi gilia, lisaya.
7Go einare nimimi Gode para yainya pilimindare mo Isaraelimi na-mandu rangala pae wenaalinumi yainya puaeme rupa na-pipape, lisaya. Akepeandare nimumiri kone sialore, Neme pakama angele andapu doandare Godeme na yainya pi angele waru andapu ora pange lea, kone wiminda, lalo lisaya. 8Go einare nimimi nimu mandana na-alepape, lisaya. Nimimi nimina Apa para ambe lora na-pula-ainya nipumi nimina rana pi einu ambala kone wia, lisaya.
9Gore nimimi yainya pilimindare gurupa yainya pula ara lalore,
Naana Apa nee epeni andasu ale,
wenaali raayome nena bi yaako pi ei minyasiainya.
10Nena Ki Rambuao-aya Einu naa para epenalape.
Nena rana pi ei epeni nane puaeme rupa
suna wenaali raayome pange
nena rana pi ei raayo pinyalape.
11Go naarena naana nape endanu anana giapee.
12Naana koae aunu repara kone na-siapeae.
Akepeare naame pange naana yangonumi naa para
koae aunu pimi einu repara kone na-wilimi.
13Sadanimi o wenaali mendame koae kone suma
la andala einu naa para epapana
go pora neeme sese papee.
14Pangalepa. Wenaali mendame nimi para koae koae aunu pilimindare nimimiri nimuna koae au pimi einu kone na-sialepape. Gore nimina Apa yaa para aya alimi nimina koae koae einu raayo kunalia, lisaya. 15Go peapare nimimi mo wenaali mendana koae koae einu repara kone pa wilimindare gore nimina Apamere nimina koae aunu pimi einu na-gilia, lisaya.
Enda na-ne eina walisaya ei
16Yesumi lala ara lalore, Rana menda nimimi Gode para kone sulame enda na-nelemendare yarame komala ei andena au na-pipape, lisaya. Akepeandare mo makirada au pimi wenaalinu yarame komala au pimi eimi wenaali makirao-aya, lisaya. Go enda na-ne wenaalinumi wenaali mendanumi nimuna enda na-ne eiri andainyayanda nimuna donu epe rupa na-andere-aeme, lisaya. Nimi para ora lalo. Nimumi nimuna yangi raayo ambala meamende, lisaya. 17-18Gurupa puaemepare neeme enda na-nala ara wenaali mendanumi neeme Gode para kone sulame enda na-ne eiri kone na-winya nena lee angaa randepeape pange nena iri yolo pape, lisaya. Nena na-andea Apa komeare nena au andoma kone wilia, lisaya. Nena Apame nena kunuma pi ei andoma nee para yangi gilia, lisaya.
Godena Aya Lena amo einu walisaya ei
(Luka 12:33-34)
19Yesumi lala ara lalore, Nimimi go suna amo alenu waru andapu na-mombe sialepape, lisaya. Go suna mombe wilindare go suna piri koae koae alenumi pange alenda alenda ma-koyada einumi pange nena amo alenu ma-koyalia, lisaya. Pake noaya alimi pange mo anda pora gape lomboma epa milia, lisaya. 20Go einare nimimi rando rando amo ale waru andapu Godena Aya Lena mombema sialepape, lisaya. So para go suna piri koae koae alenumi pange alenda alenda ma-koyada einumi pange nena amo alenu koyape-na-ya, pange pake noaya alinumi pake nape-na-ya, lisaya.
21Akepeare nena pu romba raayo mo nena amo alenu wia para kone pualia, lisaya.
Do paa pi eina walisaya ei
(Luka 11:34-36)
22Yesumi lala ara lalore, Nena leere nena dona lamepa mandana. Nena leenda ora epedeandare, nena do raayo paa pi eimi rumbilia, lisaya. 23Nena leenda kodeandare gore nena runane pia endoaya remo ora rimbale para aoma ora rimbadea, lisaya. Mo nena rupara paa pi ei rimbaleandare gore mo rimbada ei andaai wilia, lisaya.
Ali komeame andaa ali laapona pupudengi nape eina walisaya ei
(Luka 16:13; 12:22-31)
24Yesumi lala ara lalore, Ali komeame mo andaa ali laapona pupudengi nape ana na-pea, lisaya. Go eiri nipumi ali menda giada ara ali menda parare raname komelea, lisaya. Gupumare nipumi ali menda parare lo romba para kendame komeleapare menda para raname komelea, lisaya. Go einare nimimi Gode nimina Reali ma-auloma muni pange nimina reali mendaa dina ma-ape-na-ya, lisaya.
25Go peandare nimi komapeyanda nola peme enda pange ipa laapona pu kendame na-komalepape. Gurupa pange nimina akanu meape eina kone na-sialepape, lisaya. Enda noaya eiri epeleapare nimina endoaya eiri ora ririna, lisaya. Gurupa pange aka yamola eiri epeleapare nimina endoaya eiri ora ririna, lisaya. 26Go ria pamualeme yaanu andalepa. Nimu e mapu menda na-peme pange endanu na-muamu peme. Go aunu na-pemepare nimina Apa Gode yaa nane aya alimiri go yaanu waru andere-ao-aya. Go einare Godeme kone sialore, Yaanuri ora epeleapare wenaali raayore pumi ora waru komoma amo ale mandana aeme, kone suayo, lisaya. 27Nimimi go alenu repara kone wilimi eimi nimina go suna endoma aeme ei na-ma-andalu palimi, lisaya.
28-29Gurupa pange nimina akanu para akepeanda kone kendame komoaemepae, lisaya. Nimimi repana kilinu nipuna au kone sialepape, lisaya. Neme nimi para la gialo, lisaya. Nimumi mo muni pupudengi na-noaeme pange nimuna gole akanu na-rambudamepare ora ambaisenande amo ali Kini Solomono nipuna yamaya akanu epelisayapare mo palawasinu nimuna auleme eimi lu rambuaya. 30Mo rilipunuri pa riambo komea ao-aeme. Ambia aomare ruliri mo kiruaeme. Go pape rilipunuyapare Godena epe aulao-aya. Godeme go rilipunu go au piliandare nimiri manda epe rupa na-andere-alia kone widamepae. Nimina kone rulaeme eiri ongeisiyana-ae, lisaya. 31Go einare naana enda pange ipa laapore a para milimayapae, kone sialo ara kendame na-komalepape. 32Go suna aeme wenaalinumiri go suna aunu repara kone andapu waru siala ara nimumi go suna alenu waru aisa puma pamuaeme, lisaya. Nimimi go olemolenu muaya eiri nimina yaa para Apamere ambala kone wia, lisaya. 33Go einare nimimi go suna aunu kone na-suma ririnare Godena Ki Rambuao-aya Ei komea waru aisa puma alepape pange nipuna rana pi ei komea pilimindare go alenu raayo nimi para gilia, lisaya. 34Go einare ruli epola pea aunu para kone na-sialepape. Ruli kendanuri ruli yapi di nipuna komea kone wilia. Yapi di menda nipuna epola pilia kendanuri pa go yapi di nipuna kone sialipinya.
ప్రస్తుతం ఎంపిక చేయబడింది:
Madiu 6: POLENT23
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
