Madiu 18
18
Ora ririna bi wi aliri apiyapae lea ei
(Maka 9:33-37; Luka 9:46-48)
1Go naarena ande Yesuna kou nane rali alinu ipulu ara Yesu epa lopa pulu ara gupi lisimiya. Godena Yaa Nane Wia Ki Rambuao-aya Eina rupare andaa aliri apiyapae lisimiya. 2Go lameya ei pangomare nipumi onge nakisi menda wi la mumare nimuna lee rona epa reka ainya lisaya. 3Gupuma Yesumi gupi lisaya. Neme nimi para la gialo lisaya. Nimi wala pena nakisi manda na-lekedemendare gore nimi Godena Yaa Nane Wia Ki Rambuao-aya Ei para na-peleme lisaya. 4Godena Ki Rambuao-aya Ei para andaa ali au li auri panda punyaoma go nongo nakinu manda alimi wenaali komea manda peleme lisaya. 5Gupuma menda api go nongo nakisinu para ipulupa loma pora lombo sialimindare gore ni pange ipu loma pora lombo siademe lisaya.
6Menda apimi go nongo nakinu nimuna ni repara kone rulaeme ei ma-bembolalimindare gore go ali nipu nipuna maa para kana kopena andi lopaoma go ali no ipa lee para lopalimindare ora epedea. 7Go suna aeme wenaali yarae. Akepeare nimumi menda ma-lopae aunu kama puaeme. Gurupa aunuri ora pulu peapare go aunu pinyaya ma-rimbuyada ali komea kama koma yarae, lisaya.
8Nena kimi pange nena angeme lekeyoma koae aunu piliandare gore rungulu rumbape lisaya. Endoaya eina kondo pambelendare go ki pange ange lapo na-aoma pelendare ale menda dia. Nena ki ange laapome pipi auna nee repana ralae para pe auri kolea. 9Gupuma nena leeme koae aunu piliandare ale menda diale go lee yoko rumbape. Endoaya eina lee na-aoma pelendare ale menda diale. Go lee lapome nee no repana rala aya para yolori peleandare koleale.
Sipisipi mena alu paisaya eina siapi angele lisaya ei
(Luka 15:3-7)
10Waru andere-alepa. Nimi nongo nakisinu pa alenda kone wilimiya gupi lalo. So epeni nane eindiolo alinumi andambao-aeme pange nina Apana lee angaana ao-peme. 11Alina Si Naki epe auri alu pae sipisipi rambamulameyanda epea lisaya. 12Ali mendame 100 sipisipi mena andere-ayapare komea alu piliandare nipumi ake pilia kone sialemepae. Nipumi 99 sipisipi menanuri pa noma nalo-ainyalomare monde alu pae sipisipi mena komea wasuma pelea. 13Neme nimi para la gialo. Nipumi go ei anda suma raname ora waru komelea. Gupuma monde 99 sipisipi menanuri raname komola peapare go alu pae sipisipi mena komeare ora rana andaaimi komelea. 14Go pea rupa mandare nena Apa so epeni nane aya alimiri go nongo nakisinu manda na-alupina dea.
Ame menda koae aumi ma-lopalianda pape au
15Nena ame mendame nee repara koae aunu piliandare gore nee puma nena ame rapu pua pirape. Neeme kundiripu nipuna koae aunu walape. Go au pilindare gore nena ame wala apo anda mealenda.
16Go peapare nena angele na-pangeleandare gore ali komea o laapo karu puma pua angele dapape. Akepeare ande Godena angele wia bukamere gupi lea.
Ali menda koso laluamere ali laapo o repona
lee rona lala pilimi aunu komea
koso lala pipape, lea.
17Nipumi go ei ora na-pangeleandare gore Keriso wenaali raayo repara dapape. Go ei pange ora na-pangeleandare gore go ali nipuri kamane ae ali manda ma-aulalepape.
18Neme nimi raayo para lalo. Wenaali mendame nidi pape aunu menda wademendare gore epeni nane Godeme manda dea. Nimimi go suna ara e loma deme angelenuri gore epeni nane Godeme pange e da.
19Go peanda nimi para wala lalo. Go peandare ali laapo menda go suna ara angele lo koraoma suma yainya pilipindare gore nina Apame pange sone ara ora pange lea. 20Gupuma ali laapo o repome nina bi loma na bina mombedemendare ni go para epa alua.
Rundu ae ali laapona siapi Yesumi laisaya ei
21Pidame Yesu para ipuma lora pulu ara lalore gupi lisaya. Andaa alio, nina ameme ni para koae au rana akepurapo pinya loma gialuapae, lisaya. Mendane ki pereyaoma mendane kina laapopu pinya gialuapae lisaya.
22Dia lisaya. Rana 490 rupa ora pa pinya giape lisaya. 23Akepeare so Godena Yaa Nane Wia Ki Rambuao-aya Eiri gurupa manda lisaya. Ambaisena kini ali menda nipuna pupudengi nao-aisimiya alinumi nipu repara kana rundu misimiya ei ma-rendepoyainyayanda ipisaya. 24Muni 10 milioni kina rundu mi ali menda karu ipisimiya. 25Go au pisimiyapare monde alimi alape kana menda ora dia lisayandare monde kini alimi nipuna olemole raayosi yodo mipa lisaya. Nipu pange nipuna nongo naki wenanu raayo pange muni mula kone wisaya. Gupumare nina rundu manda kone wisaya. 26Monde pupudengi noae alimi ande kini ali rumu yaruaoma pua panda pulu ara lalore gupi lisaya. Nena muni yangore mandana ambuduale ni para yarame koma ae lisaya. 27Go ei pangomare monde kini alimi yarame komalo ara lalore gore go rundu na-ambulape lisaya.
28Go lisaya ei pangoma monde alimi raname koma paisayapare porana nipuna menda pupudengi nao-aepe ali menda mandaisaya. Go mandaisaya alimiri mo ali nipu repara 100 kina rundu misaya. Go ali nipuna pendopu pua ripinyuma dekepeminyu siamba ara lalore Nina kana kili ande rundu meande ei ambe ambula lisaya. 29Mo nipuna menda para pupudengi noaisipiya alimi kongeyalo ara lalore Nena rundu ambuduale ni naarele gi, lisaya. 30Go lisayapare monde ali yolomea pua no dipula anda para pua ma-piraomare nipuna rundu raayo pereyalindare gore nee gurupa manda kama epele lisaya. 31Go au pisaya ei monde nimuna menda para pupudengi noaisimiya alinumi andomare nimumi kendame ora waru komalo ara monde kini ali pua lisimiya. 32Gupuma monde kini alimi go ali wi loma lalore gupi lisaya. Neere ora koae ali ae lisaya. Ande neeme ni repara meande runduri ora andaa kana meaendepare neme ni para epa kongeyalo ara ni kana dia laendare gore pinyale na-ambulape lawande alimi gole pele ae lisaya. 33Neme nee repara yarame komawande rupa nena yangosi para pange go au na-pi auri akepea paepae, lisaya. 34Mo kini alimi rono waru pangoma lalore Monde pupudengi noaisaya ali nipu dipula pua lopalepa lisaya. Gupuma nipuna meande kana raayo ambulu pereyaliandare gore gurupa epena lisaya. 35Go angele lo pereyado arare Yesumi gupi lisaya. Go ei mandare nimimi nimina yangonumi nimi para koae aunu menda pilimindare nimimi ale menda diapi na-demendare gore go kini alimi go ali repara pisaya au pilia lisaya. Go au pi auri nina Apa Godeme pilia, lisaya.
ప్రస్తుతం ఎంపిక చేయబడింది:
Madiu 18: POLENT23
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
