मरकुस 4

बिहीन बुनाइया केर उदाहरन

(मत्ती 13:1-9; लूका 8:4-8)

1यीशु फिन गलील झील केर किनारे उपदेस देवेक लगलक, आउर उकर ठिना एतना बगरा भीड़ जमा होई गेलक कि उके झील में एगो डोंगा में चाइढ़ के बइठेक पड़लक, आउर भीड़ केर सोउब आदमीमन यीशु बटे मुँहराय के झील केर किनारे भूंई में ठड़ाय रहलैं। 2यीशु उमन के उदाहरन देई के ढेइर हें गोइठमन के सिखाएक लगलक, आउर उमन से कहलक, 3“सुना, एगो किसान बिहीन बुनेक लगिन निकललक। 4आउर बुनते-बुनते थोरेक बिहीन डहर केर किनारे गिरलक, आउर चरईमन आय के उके खाय देलैं। 5आउर थोरेक बिहीन रुगड़ी भूंई केर उपरे गिरलक, हूवाँ माटी ढेइर कम रहे सेले जल्दी ओंकइर आलक। 6आउर जब बेइर उगलक तो उकर गरमी से उ मुरझाय गेलक, आउर जाइर नी धारेक केर चलते सूइख गेलक। 7आउर थोरेक बिहीन काँटा झूँड़ में गिरलक आउर काँटा झूँड़ बाइढ़ के उके दबाय देलक, आउर उ नी फारलक। 8लेकिन थोरेक बिहीन उपजाऊ भूंई उपरे गिरलक, आउर उ ओंकइर के फूललक-फारलक, आउर केऊ तीस गुणा, केऊ साठ गुणा, आउर केऊ सौ गुणा फार लानलक।” 9आउर यीशु कहलक, “जे केऊ मोर इ गोइठ के धेयान से सुनाथा, उमन इकर बारे में समझेक केर कोशिश करा।”

उदाहरन केर मकसद

(मत्ती 13:10-17; लूका 8:9-10)

10जब यीशु एकले रहे, तो उकर संगमन आउर उकर बारहों झन खास चेलामन, यीशु ठिना आय के इ उदाहरन केर बारे में पूछलैं। 11यीशु उमन के जबाब देलक, “तोहरेमन के तो परमेश्‍वर केर राइज केर भेद के जानेक केर समझ देवल जाय हे, मगर उमन के जेमन मोर उपरे बिसवास नी करैना सोउब गोइठमन के उदाहरन से बताल जायला। 12जइसन पवितर किताब में लिखल अहे, ‘उमन देखेक तो पारबैं मगर उमन के कोनों ना सुझोक, सुनेक तो पारबैं मगर कोनों ना बुझोक, कहीं एइसन ना होवोक कि उमन मोर बटे घुरबैं, आउर उमन के क्षमा करल जाई।’ ”

बिहीन बुनाइया केर बखाइन

(मत्ती 13:18-23; लूका 8:11-15)

13सेकर पाछे यीशु उमन से कहलक, “का तोहरेमन इ उदाहरन के नी बुझेक पारला? तो फिन आउर उदाहरन केर अर्थ कइसन बुझबा, जेके मोंय बताएक वाला अहों?” 14तब यीशु कहलक, “इ उदाहरन केर अर्थ इ हेके, बिहीन बुनेक वाला आदमी उ हेके, जे परमेश्‍वर केर बचन के परचार करेला। 15थोरेक आदमीमन उ डहर किनारे केर भूंई नियर अहैं, जेकर उपरे बिहीन गिरलक, उमन परमेश्‍वर केर बचन के तो सुनैना, मगर शैतान तुरते आय के उ मनक मन से बचन के मेटाय देवेला, जे बचन के उमन सुइन रहैना। 16एहे लेखे थोरेक आदमीमन उ रुगड़ी भूंई नियर अहैं जेकर उपरे बिहीन गिरलक, उमन बचन के सुइन के तुरते रिझे-रिझे अपनाय लेवैना। 17मगर उमन बचन के अपन मन में भीतरे तक बसेक नी देवैना, सेले उमन थोरे हें दिनमन लगिन रहैना। इकर पाछे जब बचन केर चलते उ मनक उपरे बिपइत या ससइत आवेला, तो उमन तुरते परमेश्‍वर केर बचन उपरे बिसवास करेक छोइड़ देवैना। 18एहे लेखे थोरेक आदमीमन उ भूंई नियर अहैं जहाँ काँटा झूँड़ अहे, जेकर उपरे बिहीन गिरलक, उमन बचन के तो सुनैना। 19मगर दुनिया केर चिंता-फिकिर, आउर धन केर मोह-माया, आउर चीज-बसूत केर लोभ, उ मनक मन में भाइर जायला आउर बचन के दबाय देवेला, आउर उमन बेगर फार केर जिंदगी जियैना। 20आउर एहे लेखे थोरेक आदमीमन उ उपजाऊ भूंई नियर अहैं, जेकर में बिहीन बुनल गेलक, उमन बचन सुइन के उके अपनाय लेवैना आउर अपन जिंदगी में बढ़ियाँ फार लानैना, केऊ तीस गुणा, केऊ साठ गुणा, आउर केऊ सौ गुणा।”

दीया केर उदाहरन

(लूका 8:16-18)

21यीशु उमन से आगे कहलक, “आदमीमन दीया के बाइर के पइला से नी ढपैना चाहे खटिया केर हेंठे नी रखैना, उके चौखट में रखैना, होले उकर इंजोत सोउब के दिसोक। 22एहे लेखे परमेश्‍वर हर उ गोइठमन के दिस्तार करी, जेके आदमीमन अब तक नी जानैना। आउर उ सोउब भेद केर गोइठमन के दिस्तार करी, जे अब तक लुकल अहे। 23अगर केऊ मोर इ गोइठ के धेयान से सुनाथा, उमन इकर बारे में समझेक केर कोशिश करा।”

24उकर पाछे यीशु उमन से कहलक, “जे कुछ तोहरेमन सुनाथा, धेयान से सुना। जेतना बगरा तोहरेमन धेयान से सुनबा, ओतनेहें बगरा समझ तोहरेमन के देवल जाई, बल्कि तोहरेमन आउर हें बगरा समझबा। 25काले कि जेके समझेक केर इच्छा अहे, परमेश्‍वर उके आउर समझ देई, मगर जे समझेक केर इच्छा नी रखेला कि मोंय का सिखाथों, तो उकर ठिना जे समझ अहे, परमेश्‍वर उखो उकर से लेई लेवी।”

ओंकरेक वाला बिहीन केर उदाहरन

26फिन यीशु उमन से कहलक, “परमेश्‍वर केर राइज उ किसान जइसन अहे, जे खेत में बिहीन बुनेला। 27आउर बुइन के उके छोइड़ देवेला आउर बे फिकिर होई के अपन काम करते रहेला आउर बिहीन एइसन ओंकइर के बढ़ेला, जेके उ नी जानेला कि इ एइसन कइसन होवाथे। 28जमीन तो खुद से फसल उपजायला आगे नोगजा, तब बाइल, आउर उकर पाछे बाइलमन में पोठ माँजी। 29आखरी में जब कटनी केर समय आवेला आउर फसल पाइक जायला, तब किसान आय के हसुँवा से इके काइट लेवेला।”

राई माँजी केर उदाहरन

(मत्ती 13:31-32,34-35; लूका 13:18-19)

30फिन यीशु कहलक, “मोंय तोहरेमन के एगो आउर उदाहरन बताथों, इ देखाएक लगिन कि परमेश्‍वर केर राइज कइसन अहे। 31उ राई केर माँजी लेखे अहे, आउर भूंई केर सोउब बिहीनमन में से छोट अहे। 32मगर जब बुनल जायला, तो उ ओंकइर के सोउब बुदामन में से बड़का होई जायला, आउर उकर में एइसन बड़का-बड़का डाइरमन निकलेला कि आकाश केर चरईमन उकर में खोंता बनाय के रहेक पारैना।”

33यीशु एहे नियर ढेइर उदाहरन देई-देई के उमन केर बुझेक केर मोताबिक बचन सुनात रहे। 34यीशु आदमीमन के परमेश्‍वर केर राइज केर बारे में बताएक लगिन सोउब बेरा उदाहरन देई के बतात रहे, मगर अलगे अपन चेलामन के सोउब गोइठमन केर अर्थ बतात रहे।

आँधी के शांत करेक

(मत्ती 8:23-27; लूका 8:22-25)

35ओहे दिन जब साँझ होलक, तो यीशु चेलामन से कहलक, “आवा, हमरे गलील झील केर उ पाखी जाब।” 36आउर भीड़ के ओहे ठिना छोइड़ के चेलामन यीशु के जइसन रहे, तइसनेहें अपन संगे डोंगा में तुरते लेई गेलैं, आउर उ मनक संगे आउर हों डोंगा रहे। 37जब उमन झील के पार करत रहैं, तब एगो जोरदार आँधी-धुका आलक, आउर पानी केर लहरा एतना उठलक कि उ डोंगा से टकरात रहे आउर डोंगा पानी से भाइर जात रहे। 38यीशु डोंगा केर पिछे बटे मुड़सिरवा लगाय के निंदात रहे, तब चेलामन उके जगाय के उकर से कहलैं, “हे गुरु, हमरे डुबेक वाला अही, का तोके इकर फिकिर नखे?” 39तब यीशु उइठ के आँधी-धुका के डाँटलक आउर लहरा से कहलक, “स्थिर रह, थइम जा,” आउर आँधी-धुका थइम गेलक आउर सोउब कुछ स्थिर होई गेलक। 40यीशु चेलामन के देइख के कहलक, “तोहरेमन काले डराला? का तोहरेमन के एखन तक हों बिसवास नखे?” 41इ घटना के देइख के उमन आउर हें बगरा डराय गेलैं आउर एक-दोसर से कहलैं, “इ केहर हेके? आँधी-धुका आउर पानी केर लहरा हों इकर आगया के मानैना।”

ప్రస్తుతం ఎంపిక చేయబడింది:

मरकुस 4: SCK

హైలైట్

షేర్ చేయి

కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Sadri Bible by The Love Fellowship is licensed under Creative Commons Attribution-ShareAlike 4.0 License.

सादरी नवाँ नियम గురించి మరింత తెలుసుకోండి