John 20
20
Iyanpawil Si Jesus
(Matthew 28:1-8; Mark 16:1-8; Luke 24:1-12)
1Idi ag-agsapa na Domingkon enbolinget pay, kimowan si Mary Magdalene cha kad-an na iyaybekaan Jesus. Idi mimothok, mita thon iya-kal iwa bathon iyaysa-din chiwa sakepan na dohang. 2Et iyamtik a engiistoriyed Simon Peter tan sema sa-kin disipolon ensemek Jesus. Kigwan tod si-kara i “Ida riy angel na Afo thayod ma bekaan, et nat amta wi no toy engikowanan cha la i.”
3Et si Peter tan sema kadgwa thon disipolo, kimowan iren chakos cha dohang. 4Bintik chen chegwa, nem mahedkedsang iwa kadgwen Peter, et si-kathoy edagwas a mimothok chiwa dohang. 5Et jimekok a eni-neng na sekep na dohang, et sini-neng toy dofot a iyayseped man a indibot ched Jesus, nem nat simekep. 6Et mimothok ngos Simon Peter, et diritson simekep chiwed dohang, et sini-neng to ngo ma dofot a iyayseped man. 7Sini-neng to ngoy dofot a inbengel ched toktok Jesus. Sema dofot, ekofikop et iyaydasin chiwa echom a dofot. 8Et sema kadgwen Peter a disipolon edagwas a mimothok cha dohang, simekep ngo, et mita tho ngo ira man a emiin, et piyati tho i iyanpawil si Jesus. 9Tep nat igwathan cha nin iwa iyaysolat cha esel Afo Chiyos a kigwan to i mesepol a manpawil si Jesus. 10Et bimetik ira ma chegwen disipolos.
Iyanparang Si Jesus Cha Mary Magdalene
(Matthew 28:9-10; Mark 16:9-11)
11Nem si Mary Magdalene, man-ak-akgwat pay nin a mannanangis cha awas na dohang. Nonta mannanangis, jimekok a eni-neng na sekep na dohang. 12Et gwariy mita thon chegwen anghilis a iyanbaro na polaw a ketinokkong cha sigod a iyaysepaan na angel Jesus. Sema sa-kin anghil, mantoktokkong cha petek na toktok den Jesus, tan sema sa-ki pay a anghil, mantoktokkong cha petek na seki len Jesus. 13Et kigwan iren ma anghilis cha Mary i “Niyana mannanangis ka?” Insongbat Mary i “Mannanangisak tep ida riy angel na Afok, et nat amtak no toy engikowanan cha la i.”
14Idi kigwan Mary iwan, iyanboli-neg et mita thos Jesus a man-ak-akgwat chiwan, nem eg to piyeschian. 15Et kigwan Jesus i “Niyana mannanangis ka? Siyay mowan anafa?” Kin Mary i si-kathoy naengajo na garden a kad-an na dohang, isonga kigwan tod si-katho i “Afo, no si-kam i engala na angel Jesus, kowan mod si-kak no toy engikowanan mo i say a-daen ko di.” 16Et kigwan Jesus i “Mary,” et iyansangos Mary cha si-kathon kigwan to i “Rabboni!” a say piyan ton a-seden, maistorod esel na Hodjos. 17Kigwan Jesus i “Enogak i iyagchian tep anengak nin on-olid Awak. Tahed ma aahik et kowan mod si-kara i on-oliak cha Awak a Awejo ngo tan Chiyos kon Chiyos jo ngo.” 18Et bimetik si Mary Magdalene a kigwan to ired ma disipolos i “Mitak i Afo.” Et kigwan tod si-kariy kigwan Jesus cha si-katho.
Iyanparang Si Jesus Ired Ma Disipolos To
(Matthew 28:16-20; Mark 16:14-18; Luke 24:36-49)
19Idi kalebiyan niwa Domingko, esa-sa-nop ira ma disipolos Jesus cha baliy. Et intolbek chiy bengbeng tep entahot cha ira ma naengibalnay na Hodjos. Biglen man-ak-akgwat si Jesus cha kad-an cha, et kigwan to i “Sapay koma gwariy talned si-kayo.” 20Idi kincheng ton engowan niwan, inbiybiy tod si-kariy diwa tho tan tagdang to. Et imimdeng a pasiya ira ma disipolos to nonta mita riy Afo ra. 21Et kigwan Jesus mowan i “Sapay koma gwariy talned si-kayo. Into-no thoak na Awak a mengemag na piyan to. Sema inpangito-non Awak cha si-kak a mengemag na piyan to, inges niwan ngoy pengito-nok cha si-kayo.” 22Et idi kigwan Jesus iwan, sini-pok to iren kigwan to i “Awat joy Ispirito Santo. 23Si-kathoy mengipaamted si-kayo iren ma toon piyakawanan Afo Chiyos say pekawanan jo ngo ira, et mepekawanan ngo ira. Ipaamta ngo na Ispirito Santod si-kayo ira ma toon nat piyakawanan Afo Chiyos say nat pekawanan jo ngo ira, et nat mepekawanan ngo ira.”
Iyanparang Si Jesus Cha Thomas
24Si Thomas a iyanngaran na Epin, si-kathoy sa-ki iren ma sawal na chegwen disipolos Jesus, nem nagwara nonta iyanparang si Jesus ired ma echom ton disipolos. 25Isonga, sema iren echom Thomas a disipolos, ingwanggwang ched si-katho i “Sini-neng miy Afo thayo.” Nem insongbat Thomas i “No nat si-nengen ko tan kapkafen koy kabat cha diwa thon iyaydansa, tan no nat kapkafen koy kabat cha tagdang ton iyatbekan to, nat patien kon iyanpawil.”
26Idi epalabas i sa-kin domingko, esa-sa-nop mowan ira ma disipolos Jesus chiwa baliy, et gwara ngos Thomas chiwan. Intolbek cha mowan i bengbeng, nem biglen man-ak-akgwat si Jesus cha kad-an chen kigwan to i “Sapay koma gwariy talned si-kayo.” 27Et kigwan tod Thomas i “Si-neng moy diwak. Ikapkap moy kalomot mod ja kabat. Kapkap mo ngoy kabat cha tagdang ko. Enog i chegwa-chegwa, no diket pemati ka wa.” 28Et insongbat Thomas i “Si-kam i Afok tan Chiyos ko!” 29Et kigwan Jesus i “Memati ka wa tep sini-neng moak. Magesat ira ma toon naemati angken nat sini-neng chaak.”
30Chakel ira ma ima-imag Jesus a milagron sini-neng iren ma disipolos ton nat iyaysolat chiya dibcho. 31Nem sema iren milagron insolat kod jay, insolat ko say memati kayo i si Jesus i Criston Anak Afo Chiyos, tan say gwariy biyag jon nagwariy pengingkaan to kagol na pamati yod si-katho.
ప్రస్తుతం ఎంపిక చేయబడింది:
John 20: KAR
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 Wycliffe Bible Translators, Inc. All rights reserved.
