Acts 4
4
Kiyowis Ches Peter Tan Si John
1Nontan a man-eesel pay si Peter tan si John ired ma tothoo, sema iren papari, Sadducees, #4:1 Sema iren Pharisees tan Sadducees, chegwen gropo na Hodjos a iyanpan-achal. Sema iren Sadducees, naiyonoran chiy toro-toro bengat a gwared dimen dibchon insolat Moses (Genesis, Exodus, Leviticus, Numbers, tan Deuteronomy). Sema iren Pharisees, naiyonoran chiy toro-toron iyaysolat ired ma dibcho, nem naiyonoran cha ngoy toro-toron in-elbat iren ma afo-afo ra la maypangkep na mapteng a panbiyag.Maypangkep na napiyati iren ma Hodjos, napiyati na Pharisees i manpawil i iyangketiy, nem enchiy Sadducees. Napiyati ngo na Pharisees i no metiy miy too, kongkonaan Afo Chiyos no napiyatin ma tooy bili-bilin to, tan chosaen Afo Chiyos no nat napiyati tho ma bili-bilin to. Nem nat napiyati iren ma Sadducees iwan. Tan napiyati ngo iren ma Pharisees i gwares Satanas, anghilis, dimonyos, tan ispiritos, nem enchiy Sadducees. tan kapitan na kowadja na timplo, mimothok ired kad-an cha. 2Bimonget ira tep niyan-itoron Peter tan si John i iyanpawil si Jesus et si-kathoy kapaneknekan a emiin a iyangketiy, manpawil ngo ira. 3Et chinmet ches Peter tan si John, et kagol a emangkesalingawngaw ma, inkalebos cha ira ingkathod megwa-gwa. 4Nem sema chakel a engiki-ngel na kigwan Peter tan si John maypangkep Jesus, emati ira. Et sema karakel na dalekin emati wed Jesus, chanchanin dimen dibo.
5Idi gwa-gwa tho, sema iren naengibalbalnay na Hodjos, iyangkaama, tan mamaistoro na dinteg, esa-sa-nop ired Jerusalem. 6Gwara ngod man si Annas a kahejangan a pari tan echom ton Caiaphas, si John, si Alexander, tan bobonat na kahejangan a pari. 7Tiya-gway ches Peter tan si John, et inpaakgwat cha ired sangoanan cha. Et binistigal cha iren kigwan cha i “Toy engalaan jo na panakabalin jon mengipamapteng nitha epilay a too i? Siyay ngaran a iyosal jon engamag niwan?”
8Et si Peter, iyapno na panakabalin na Ispirito Santon insongbat to i “Si-kayon naengibalbalnay na too tan iyangkaama, 9no jowan bistigala kawi niman maypangkep na mapteng a epasamak chiya epilay a too tan sema inpasing ton mimapteng, 10si-kayo tan emiin a poli-polin Israel, mesepol a egwathan jo i seja dahin man-ak-akgwat cha sangoanan jo, mimapteng men kosto kagol na panakabalin Jesu Criston i-Nazareth a indansa yod koros, nem inpanpawil Afo Chiyos. 11Si Jesus i engibanagan Afo Chiyos nonta kigwan to i
‘Si-kayon naengamag, sema bathon kigwan jo i:
nagwariy silbi tho,
si-kathoy iyanbalin a kapategan a bathon
naengibahed na baliy.’ #4:11 Psalm 118:22
12Si Jesus bengat i mebedin a mengisalakan na too. Tep nagwariy echom chiya dobong a into-non Afo Chiyos a mengisalakan cha si-kathayo, malaksid si-katho.”
13Et iyasdaaw iriy naengibalnay na Hodjos cha inpasing Peter tan si John a iyan-esel. Tep si Peter tan si John, angken ebabay kasasaad cha tan nat iyan-achal ira, etoled iren simongbat. Et igwathan iren ma naengibalnay i sema kagol na ingkatoled cha, si-kariy naiyay-olo-olop na olay cha Jesus. 14Et nagwariy mebedin a konen ched Peter tan si John tep sema dahin mimapteng, man-ak-akgwat cha askang cha. 15Et inpabtik ches Peter tan si John cha esa-nofan na naengibalbalnay say mantathabal ira ma naengibalbalnay. 16Et kigwan cha i “Nengoy pesing tayo ired ma too? Tep emiin a toon gwared ja Jerusalem, amta riy kaskasdaaw a milagron imag cha. Et nat mebedin a konen tayo i nat agpayso. 17Sema pesing tayo kitdi, banchaanan tayo ira say isalcheng chen man-istoriya maypangkep Jesus, et say sema toon mahaamta maypangkep cha si-katho, nat onda-to ira.”
18Et sema iren naengibalnay na Hodjos, tiya-gway cha mowan si Peter tan si John, et binidin cha ira i mesepol a nat itolo-toloy chen man-esel ono mantoro maypangkep Jesus. 19Nem si Peter tan si John, insongbat cha i “Nemnem jo kechi jay. Cha nemnem Afo Chiyos, mapteng aya no a-magen miy piyan jo, no diket sema piyan to? 20Tep si-kawi, nat mebedin a onsalcheng kawin man-istoriya ired toon ma sini-neng min ima-imag Jesus tan sema inki-ngelan min kigwa-kigwan to.”
21Idi inki-ngelan iren ma naengibalnay iwan, karkaron biyanchaanan ches Peter tan si John i chosaen cha ira no itolo-toloy chen man-istoriyed too maypangkep Jesus. Idi iyakcheng iwan, inpabtik cha ira met laeng tep nat mahanemnem chiy pesing chen memosed si-kara nontan a timpo tep emiin a too, chiyan chaya-chayawes Afo Chiyos kagol niwa epasamak a milagro. 22Tep sema dahin iya-kal i pilay to, esolok malen epat a poloy tawen to.
Sema Kararag Iren Ma Ematid Jesus
23Apaman a iyaybolos si Peter tan si John, kimowan ired kad-an iren ma echom chen ematid Jesus, et ingwanggwang chiy kigwan iren ma aafo na papari tan iyangkaamed si-kara. 24Idi inki-ngelan iren ma ematiy kigwan cha, iyansa-ki iren mankararag a kigwan cha i “Afo Chiyos a Afo thayo, si-kam i emarsowa na iyaykayang tan dobong tan baybay tan emiin a gwared man. 25Si-kam i engowan iren ma inpasolat na Ispirito Santod afo wi len si David a bagaen mon kigwan to i:
‘Niyana kebonget iriy Gentiles
cha Afo Chiyos?
Niyana iyannemnem iriy too
na planon nagwariy silbi tho?
26Sema iren aarid dobong,
iyansagana iren mekidaban.
Tan sema iren naiyantoray,
esa-sa-nop iren mengontred
Afo Chiyos tan si Criston
pinispis to.’ #4:25-26 Psalm 2:1-2
27Et niman, Afo Chiyos, sema inpadton David, etongpal ma. Tep si Ari Herod tan si Gobirnador Pontius Pilate pati Gentiles tan echom tayon Hodjon poli-polin Israel, esa-sa-nop ired ja Jerusalem et iyantothodag iren mengontred Jesus a esantoan mon bagaen a pinispis mon sema Cristo. 28Et agpayson biyono ra. Nem kagol a si-kam i naiyantoray, idi biyono res Jesus, tiyongpal chiy niyemnem mo nonta bayag da i piyan mon mepesamak. 29Et niman, Afo, iki-ngelim ira ma kigwa-kigwan cha say ta-kothen cha kawi, et tolongim kawin bagaen mo say ontoled kawin mantoro na esel mo. 30Et ibiybiy moy panakabalin mo say mebedin a pemapteng miy mansekit tan mengemag kawi na milagro tan echom a kaskasdaaw babaen na panakabalin Jesus a esantoan mon bagaen.”
31Et idi iyakcheng ira ma ematin iyankararag, ejegjeg i baliy a esa-nofan cha, et iyapno iren emiin na panakabalin na Ispirito Santo, et timoled iren iyantoro na esel Afo Chiyos.
Iyanbibingay Ira Ma Emati Na Kokowa Ra
32Emiin a emati, iyansa-sa-kiy nemnem cha. Nagwariy maikot, no diket naiyanbibingay ira na emiin a gwared si-kara. 33Tan sema iren apostolis, etoled iren enistigo i iyanpawil si Afo Jesus. Tan banay i kinamapteng Afo Chiyos ired emiin a emati. 34Nagwariy ematin kolang i mesepol to tep sema iren gwariy payow to tan sema iren gwariy baliy to, indaho ra, et sema pilak niwa indaho ra, intolod ched apostolis 35a in-i-kan ched si-kara say iap-ap na apostolis ired ma ematin kolang i mesepol cha. 36Si Joseph a polin Levi a i-Cyprus, inges ngon man iwa imag to. Ngiyaranan na apostolis si Joseph na Barnabas a piyan ton a-seden i naengikedsang na nemnem. 37Sema imag Joseph, iyandaho na payow, et intolod toy pilak na payow ired ma apostolis, et in-i-kan tod si-kara.
ప్రస్తుతం ఎంపిక చేయబడింది:
Acts 4: KAR
హైలైట్
షేర్ చేయి
కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 Wycliffe Bible Translators, Inc. All rights reserved.