創世記 1
1
上帝的創造
1起頭，上帝創造天及地。#1.1 「起頭，上帝創造天及地。」嘛通譯做「起頭，上帝創造天及地的時，」抑是「上帝開始創造天及地的時，」 2地是渾沌，猶未成形；深淵的頂面烏烏暗暗；上帝的神#1.2 「上帝的神」嘛通譯做「上帝的大能」、「對上帝發出的風」，抑是「互人驚畏的風」。運行佇水面。 3上帝講「著有光」，就有光。 4上帝看光是好；上帝將光及暗分開。 5上帝叫光做日時，叫暗做暝時。有下昏有早起，是頭一日。
6上帝講：「諸個水的中間著有穹蒼，將水頂下隔開。」 7上帝就造穹蒼，將穹蒼下面的水及穹蒼頂面的水分開；代誌就按呢完成。 8上帝叫穹蒼做天。有下昏有早起，是第二日。
9上帝講：「天下面諸個水著集中佇一所在，互焦地出現。」代誌就按呢完成。 10上帝叫焦地做地，叫集中的水做海；上帝看這做好。 11上帝講：「地著有植物：會結籽的菜蔬，及會結果子內面有籽的樹；各照𪜶的種類。」代誌就按呢完成。 12地就照種類生出植物，就是會結籽的菜蔬，及有種籽的果子樹；上帝看這做好。 13有下昏有早起，是第三日。
14上帝講：「天頂的穹蒼著有光體，來分別日及暝，嘛做季節#1.14 「季節」嘛通譯做「節期」。、日、年的記號， 15閣佇穹蒼發光照地面。」代誌就按呢完成。 16上帝就造兩個大的光體，大的管日時，細的管暝時；嘛造星辰。 17上帝將𪜶下佇天頂的穹蒼，互𪜶照地面， 18嘛管日及暝，分別光及暗；上帝看這做好。 19有下昏有早起，是第四日。
20上帝講：「水內著生湠真多生物；地的頂面、天裡的穹蒼著有鳥仔啲飛。」 21上帝就創造海裡的大魚，及水內生湠真多的生物，各照𪜶的種類；閣創造逐款飛鳥，各照𪜶的種類；上帝看這做好。 22上帝賜福𪜶，講：「著生湠，著加添，互海裡充滿生物，互地上的鳥仔生湠真多。」 23有下昏有早起，是第五日。
24上帝講：「地著生出生物，各照𪜶的種類；有牲生、啲爬的動物、走獸，各照𪜶的種類。」代誌就按呢完成。 25上帝就照𪜶的種類造地上的走獸、牲生，及一切啲爬的動物；上帝看這做好。
26上帝講：「咱著照咱的形像，照咱的款式造人#1.26 「咱著…造人」嘛通譯做「咱來造人，互𪜶及咱相親像，及咱仝款」。，互𪜶管理海裡的魚、天裡的鳥、地上的牲生及野獸#1.26 「野獸」是照古譯本翻譯；原文是「全地」。，以及佇地上啲爬的動物。」 27上帝就照伊家己的形像創造人#1.27 「上帝…創造人」嘛通譯做「對按呢，上帝創造人，互𪜶及伊相親像」。；伊照伊的形像創造𪜶，有男有女。 28上帝賜福𪜶，對𪜶講：「著生湠，加添真多，充滿全地，閣治理全地，嘛著管理海裡的魚、天裡的鳥，及地上所有會振動的生物。」 29上帝閣講：「我將全地所有會結籽的菜蔬，及一切有種籽的果子樹，攏互恁做食物。 30地上逐種的走獸、空中一切的鳥仔，及佇地上所有啲爬的活物，我將青色的菜蔬互𪜶做食物。」代誌就按呢完成。 31上帝看伊所造的一切真好。有下昏有早起，是第六日。
ప్రస్తుతం ఎంపిక చేయబడింది:
創世記 1: TTVH
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society in Taiwan, 2021
