JOHAN 3
3
Jesuh hoi Nikodemu
1Judah kami pahoikung kacoeta longto, ahmin Nikodemu naa pae o ih to a oh, anih loa Farasi kangkom thungih kami ni. 2Duemto loa Jesuh khaeah a caeh moa, “Rabbi, nang loa Sithaw mah patoeh ih patukkung longto ni tito kang panoek o. Dawnraihaih na sak ihnawk hae Sithaw mah ohhaih ai nahaeloa amimah doeh sah thaih mak ai,” tiah a naa pae.
3Jesuh mah, “Loktang ta-ah kang thuih: Ami doeh zah let aialoa Sithaw Poenghaih to hnuh thaih mak ai,” tiah a pathim.#3:3,7 Let tihae ranuibang hoitoah tiah doeh thuih thaih.
4Nikodemu mah, “Kawbangmaw kami kacoeh pui boah to loa za let thaih tih? Amno ih zok thungah akun moa vai hnetto zah let to angcoeng thaih mak ai roeroe,” tiah a pathim.
5Jesuh mah, “Loktang ta-ah kang thuih: Ami doeh tui hoi Pakhra hoiah zah let aialoa Sithaw Poenghaih thungah akun thaih mak ai. 6Kami hae thingan bangah loa amno hoi ampa thung hoi-ih zah ih ni; to-e pakhra bangah loa Pakhra ih zah ih ni. 7‘Na zah let bae han oh,’ tiah kang thuih ih hae a dawnrai hmah. 8Takhi loa a koeh naabangah a songh; a tuenh to na thaih o, to-e naabanghoiah maw angzoh moa naabangah maw caeh tito na panoek o ai. Pakhra hoiah kaza kami boih loa ato batiah ni a oh,” tiah a naa.
9Nikodemu mah, “Kawbangmaw ato to om thaih tih?” tiah a duengh.
10Jesuh mah, “Nang hae Israel kami thungah patukkung kalen longto ah na oh e ahi boe doeh na panoek ai maw? 11Loktang ta-ah kang thuih: Kaicae loa panoek ih to ka thuih o moa ka hnuk o ih to taphong; to-e kang thuih o ih tamthang lok hae mita mah doeh tapom han koeh o ai. 12Hi longnui hmuen kawng kang thuih na-ah na taang o ai; totibaloa van hmuen kawng kang thuih na-ah kawbangmaw na taang o thaih tih loa? 13Van hoitoah kanghum tathuk Kami Capa tiaialoa ami doeh van ah ka daw om ai,” tiah a naa.
14Mosi mah praetanghaeng ah rahumngan pahui to cungkui pongah a bangh ih batiah Kami Capa doeh bangh ah om toengh tih;#Nam 21:9 15topongah angmah to ka taang kami boih loa dungzan hinghaih to tawn tih. 16Sithaw mah long kaminawk hae palung duekduek pongah a capa longto khueh tawnh ih to a paek kik, topongah ami doeh angmah ka taang boih loa dueh mak ai, to-e dungzan hinghaih to tawn tih. 17Kawmawtiah Sithaw mah a Capa to hae long ah lokcaekkung ah oh hanah patoeh ai, long pahlongkung ah oh hanah ni a patoeh.
18Capa to ka taang kami boih loa lokcaek ah om mak ai; to-e ka taang ai kami loa lokcaek tangcae ah oh boah, kawmawtiah Sithaw ih Capa longto ta khueh tawnh ih to taang ai pongah lokcaek ah oh boah. 19Lokcaekhaih ih loa hitiah a oh: Aanghaih loa long ah hae angzoh boah, to-e kaminawk mah aanghaih pongloa vinghaih to palung o lat, kawmawtiah anihcae sakhaih ih to hoih ai pongah ni. 20Hmuen kahoih ai ka sah kaminawk boiboih loa aanghaih to a hnukmaa o moa aanghaih thungah to caeh o ai, kawmawtiah hmuen kahoih ai sak ih to amtuengsak han koeh o ai. 21To-e hmuen katoeng ka sah kaminawk loa Sithaw koehhaih ih pazui hoiah a sak o ih to aanghaih mah amtuengsak hanih ah aanghaih thungah to angzoh o.
Jesuh hoi Johan
22Ato pacoengah Jesuh hoi a hnukbangnawk loa Judea prae ah a caeh o, toah anihcae hoiah nawnetta thungah a oh moa baptisma doeh a paek. 23Johan mah doeh Salim vang hoitoah anghla parai ai, Aenon hmuenh ah to baptisma a paek toengh, kawmawtiah ato hmuenh ah to tui zetpui a oh. Kaminawk to anih khaeah angzoh o moa baptisma to a paek pae. 24(Ahi loa Johan to thongim ah khrah ai nahlanah hmuen ka om ni).#Mat 14:3; Mrk 6:17; Luk 3:19-20
25Johan ih hnukbang thoemto loa bokhaih bangih thoengcaihaih kawng pongah Judah kami longto hoiah angaek o.#3:25 Judah kami longto tihae thoemto banrikcabu ah loa Judah kami thoemto tiah a oh. 26Topongah Johan khaeah a caeh o moa, “Patukkung, Jordan tuiva niangzae bangih nang hoiah nawnto ka om vaih, anih kawng na thuih tuek ih kami longto to na panoek vop maw? Vaihi ah baptisma to a paek li moa mi boih mah anih khaeah to a caeh o,” tiah a thuih pae o.
27Johan mah, “Sithaw mah paek ih tiaialoa mimah doeh tita doeh tawn thaih mak ai. 28Kaimah, ‘Kai hae Messiah na ai ni; to-e anih hma-ah patoeh hmaloe iah ni ka oh,’ tiah kang thuih ih panoekkung saksi loa nangcae hae ni.#Jhn 1:20 29Zulakung thendoeng loa a lak ih tangla ih ni; to-e zulakung thendoeng ih ampui, kangdoe moa a lok ka tahngai kami to, zulakung thendoeng ih a lok thaih na-ah paroeai palung anghoe. Tobatiah ni kai kanghoehaih acunghaih ih loa a oh. 30Anih loa amtueng tahang aep tih, to-e kai loa krumh tathuk tih,” tiah a naa.
Van Hoi-ih Kangzo Kami
31Ranui bang hoitoah kangzo loa mi boiboih pongdoeh a lensawk. Long hoitoah kangzo kami loa long iah a oh moa longnui kawng to a thuih, to-e van bang hoitoah kangzo kami loa cungriboih nuiah a oh. 32Anih loa a hnuk hoi a thaih ih to a thuih, to-e mita mah doeh anih ih tamthang lok to tapom o ai. 33To-e ami doeh anih ih tamthang lok ka tapom loa totiah tapom ranghoiah Sithaw loa loktang ni tito a caksak. 34Sithaw mah patoeh ih kami mah Sithaw lok to taphong, kawmawtiah Sithaw mah a Pakhra to kacung ta-ah a paek. 35Ampa mah a Capa to palung moa cungriboih to anih ih hmuensak thaihaih ih ban thungah a suek king.#Mat 11:27; Luk 10:22 36Ami doeh Capa to ka taang loa dungzan hinghaih a tawnh; ami doeh Capa lok ka tahngai ai loa dungzan hinghaih to tawn ai moa Sithaw ih raekhaih to a nuiah om poe tih.
ప్రస్తుతం ఎంపిక చేయబడింది:
JOHAN 3: AKNT2023
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Asang Khongso New Testament in Eastern Khumi © Bible Society of Myanmar, 2023.
