Vakatekivu 8
8
Sa Oti na Waluvu
1A sa nanumi Noa na Kalou, kei na ka bula kecega, kei na manumanu kecega sa tiko vata kaya e waqa; a sa vakaliwava na cagi na Kalou e dela i vuravura; a sa cegu na wai; 2a sa sogoti nai vurevure ni wai titobu, kei nai sogo kei lomalagi, a sa tarovi na uca mai lomalagi; 3a sa lesu tikoga na wai mai dela i vuravura. Ia ni sa oti e dua na drau ka limasagavulu na bogi, sa qai lailai sobu na wai. 4A sa kasa na waqa e dela ni veiulunivanua mai Ararata, e na kenai kavitu ni vula, e na kenai katinikavitu ni siga ni vula. 5A sa lako sobu tiko na wai, ka yacova nai katini ni vula; ia e na kenai katini ni vula, e nai matai ni siga ni vula, sa qai rairai na dela ni veiulunivanua.
6Ia sa bogi vasagavulu, sa qai dolava ko Noa na katubaleka ni waqa ka cakava ko koya; 7a sa vakatala e dua na reveni, a sa lako yani ka dauveivukayaki, ka me maca mada na wai mai dela i vuravura. 8A sa vakatala e dua na ruve, ka me raica se sa lailai sobu na wai mai na dela ni vanua, se segai; 9ia na ruve sa sega ni kunea e dua na vanua me ro kina, a sa lesu tale vua ki waqa, ni sa tiko na wai e dela i vuravura taucoko. A sa dodoka na ligana, ka taura, ka kauta tale vua ki loma ni waqa. 10A sa bogi vitu tale, sa vakatala tale na ruve mai na waqa; 11a sa lesu tale mai vua na ruve e na yakavi, ka raica, sa tiko e gusuna e dua na drau ni olive, sa miniki; a sa kila kina ko Noa ni sa lailai sobu na wai mai dela ni vanua. 12A sa wawa tiko ka bogi vitu tale, a sa vakatala tale na ruve, a sa sega ni lesu tale mai vei koya.
13Ia e na kenai kaono na drau ka dua na yabaki, e nai matai ni vula, e nai matai ni siga ni vula, sa qai maca na wai mai dela i vuravura; a sa luvata tani nai ubi ni waqa ko Noa, a sa vakararai voli, ka kunea ni sa mamaca na vanua. 14Ia e na kenai karua ni vula, e na kenai karuasagavulu ka vitu ni siga ni vula, sa qai mamaca sara na vanua. 15A sa vosa vei Noa na Kalou, ka kaya, 16“Mo lako tani e na waqa, ko iko, kei na watimu, kei iratou na luvemu, kei na watidratou na luvemu. 17Mo kauta vata mai kei iko na ka bula kecega sa tiko kei iko—na mataqali manumanu kecega, na manumanu vuka, kei na manumanu e yavai va, kei na ka kecega sa qasi voli e dela i vuravura—me ra roboti vuravura, ka vakaluveni, ka me ra tubu vakalevu e vuravura.” 18A sa lako yani ko Noa, kei iratou vata kaya na luvena, kei na watina, kei na watidratou na luvena. 19Sa vakakina na manumanu e sega ni lasa kecega, a ka kecega sa qasi voli, kei na manumanu vuka kecega, kei na ka kecega sa bula voli e dela i vuravura, me vaka na kedra mataqali, era sa lako tani mai na waqa.
Na Vosa ni Yalayala ni Kalou Vei Noa
20A sa cakava ko Noa e dua nai cabocabo-ni-soro vei Jiova; a sa taura eso vei ira na manumanu kecega e yavai va sa savasava, ka so vei ira na manumanu vuka kecega sa savasava, a sa vakacabora nai soro kama e nai cabocabo-ni-soro. 21A sa boica nai boi ni veivinakati ko Jiova, a sa kaya e lomana ko Jiova, “Sa dina sa ka ca e nanuma na loma ni tamata mai na gauna sa cauravou kina, ia ka'u na sega ga ni vakarusai vuravura tale e na vuku ni tamata; ka'u na sega talega ni cudruva na ka kecega sa bula, me vaka na ka ka'u sa kitaka oti.
22Ni se tiko ga ko vuravura,
ena sega ni mudu na vula i teitei kei na vula i kelikeli,
kei na liliwa kei na katakata,
kei na vula i katakata kei na vula i liliwa,
kei na siga kei na bogi.”
ప్రస్తుతం ఎంపిక చేయబడింది:
Vakatekivu 8: FRV21
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
