Luk 8
8
Batu betse ne sukudze Zezu
1Yumana, Zezu atse se bingundu ne membuka ne utandaka unsisili unve nwen ukani ve Nzambi. Betuma bedzi iku ne bole bedze konedzi. 2Yedze ne va baatu boko be Zezu epanza mimbiti, ne boko bedzi esaka mebedzu, Maliya we Mangidala wedzi epanza mimbiti untsami. 3Zani nwadzi we kuza, undzandzi we Elodi, Suzani bane boko nedzi bekaba untanvu nwen bangu ne uyamene Zezu bane bebingi bedzi.
Ngana ye unkuni
4Batu beyitsi be bingundu byesi bakukene ne uya kwele ye Zezu. Wangu ate bangu ngana mbotu ati: 5«Vusa votu mutu atse se buka ne unwasa mbulu, ndili yedzi edze ne nwasa mbulu, mbulu mboko ya nawen se peyi, ye batu bidzankite, benyodzi badza yesi. 6Mbulu mboko ya nawen se sendze ye memanyan, ya mene, ni bimeni bya kanye ne nde mangu. 7Mboko ya nawen tima ye mindzila. Ne mindzila ne mbulu byesi bya mene unsamba, ni mindzila mya lutimise bila. 8Ni mbulu mboko ya nanwen se sendze yi nve, bimeni bya nene, meni yotu ya buta mbulu unkama (100).» Ye Zezu evele wowe ne singa ati: «Bidzi ne meluyi me uyuka, bayuka.»
Ye Zezu iwowe ne mengana niyi
9Bebingi be Zezu nedzi ati: «Ngana yowe mete besu yi ye tanda nati yi?» 10Zezu akalule ne bangu ati: «Nzambi akaba beyi utsengu ve uyiba mamvu medzi midzi isolo se Ukani ve Nzambi, ni milinvile myedzi ni mye batu boko, mewowe ne bangu ni ne milinvile.»
«Ni bangu bewaya, bangu nde yene,
bangu bedzi ne meluyi me uyuka, ni bangu nde yuka me bitanda.»
Zezu asilile ngana ye unkuni
11Zezu ne bebingi bedzi ati: «Yene mengana yayu itanda, mbulu ni iwowe dze Nzambi. 12Unkolo nwen peyi, ni batu biyuka iwowe dze Nzambi. Ni Satan taya, yedzi ipinule iwowe dze Nzambi se milima mye batu toko bangu bamekidze iwowe dze Nzambi bangu balunga. 13Sendze ye memanya ni batu biyuka iwowe dze Nzambi ne itsisa, ni bangu nde bata dzangu se milima mye bangu. Bangu bevukidze ne mendili moko, ni ndili ye mamvu meneni mikwa bangu baya nde ivukidze. 14Mbulu mboko yanawen se midzila. Yedzi ni batu biyuka iwowe dze Nzambi ye bangu biyakwe. Ni menyongo, ne unta nvu, ne meve me se ilongo, me simba iwowe dze Nzambi dzidzi se milima mye bangu ne unene. Ni bangu nde tuka nene, nde yele se iwowe dze Nzambi. 15Mbulu mboko yina nwen se sendze yi mve, yedzi ni batu biyuka iwowe dze Nzambi, bibata se unlima u mve ne nwen telee. Bangu bebata iwowe dze Nzambi, ye bangu bibomo milima mive.»
Ngana ye iba nvu
16«Mutu nde takise ibamvu asodze se mbiya, na asomo sina ilaka, ni bedzika ibamvu ni ikulu, yayu binyindzile se ndaku bayene kwalala. 17Mesi midzi isolo metse pulene, ne mamvu midzi isole se milima betse yiba mangu. 18Dzayi ne utsengu ne me beyi biyuka, yayu mutu widzi ne yila yotu betse velise wangu byoko biyitsi, ni we nde yila betse nanguse va yila yedzi itsimene ati, adzi ne yangu.»
Yali amene ye Zezu
19Vusa votu mama ne bandzi be Zezu baya yene wangu, ni bangu beke tuka yene wangu utsina ne batu uyitsi. 20Batanda Zezu ati: «Mama wowe ne bandzi bowe baya ituna befumba yene we.» 21Ni Zezu atanda ne bangu ati: «Mama wami ne bandzi bami ni biyuka iwowe dze Nzambi, ne bikuuna dzangu.»
Zezu atabise ipepe dzineni
22Vusa votu Zezu abita se mbungu bane bebingi bedzi, Zezu ne bangu ati: «Yakayi betse ngulu ye dzanga.» Ye bangu betse. 23Ndili ye misavili, Zezu ananga mbula se mbungu. Palikise ipepe dze singa dzakukudze se dzanga, mangu manyindzile se mbungu, mbungu ya fumba yina, bangu bayene bongo. 24Ye bebingi be Zezu betsindene kone dzi ne unyusile wangu ati: «Kunwu, Kunwu bebe bawele.» Zezu anyuse, akamve ne ipepe, ne mipukise mineni, ne ipepe ne mipukise byesi bya taba. 25Zezu ne bebingi bedzi ati: «Ivukidze dze beyi dzawayi?» Ni bangu bedze ne bongo viyitsi, ye bangu bekima. Ye bangu bewowe tima ye bangu ati: «Ayu mutu niza? Wiwowe ne ipepe ne, ne mangu, ye byangu bikuuna wangu.»
Zezu asaka mutu wedzi ne mimbiti
26Zezu ne bebingi bedzi basave dzanga, bakalwe ilongo dze Zelasene, dzidzi busu ve Galile. 27Ndili ye Zezu epula se mbungu, mutu motu we ngundu yayu aya kwanye nedzi. Mutu mene edze ne mimbiti miyitsi se nyulu, edze ne mikanda ande uswa, nde nanga ne se mendaku. Ni wangu adze si se mesongo. 28Yedzi eyene Zezu, wangu awula unsima, avuna mebongo busu ve Zezu, yedzi ewowe ne singa ati: «Yowe ifumba nami ni yi? Zezu Nwana we Nzambi we ikulu, kolokolo yowe dzika nyokile me.» 29Wangu ewowe vavu, ni ne Zezu etanda ne umbiti ati: «Umbiti nwen pula se nyulu yedzi.» Ni mimbiti myedze ne sabise wangu. Bedze ne kuta wangu bitseyi se meboko ne mekulu, ni wangu edze ne tsitaka byangu. Ye umbiti nwen bapa wangu se ikanye. 30Zezu asunwule wangu ati: «Kumvu yowe niza?» Mutu mene akalule nedzi ati: «Ku nvu yami ni beyitsi.» Wangu etanda vavu ni ne mimbiti miyitsi myedze se nyulu yedzi. 31Mimbiti myedze ne bondo Zezu ati: «Kolokolo yowe, we nde luma besu se ibila dze nde sele.»
32Yedze ne dzinvu dze bingu dze dze ne fumba bila kule kudzi. Mimbi tine Zezu ati: «Dzika besu benyindzile se bingu.» Ye Zezu eluma mimbiti se bingu. 33Ye mimbiti mye pula se mutu ne unyindzile se bingu. Dzi nvu dze bingu dzayinga kule kudzi ne mbangu, dzanawen se dzanga, bingu byesi bya yinaka. 34Batu bedze ne bata bingu beyene vavu, ye bangu betanga ne utse tanda se ngundu ne be se membuka. 35Ye batu bepula ne utse yene ma nvu mesuta. Bangu bekalwe kone Zezu, bangu bayene mutu we Zezu epanza mimbiti untsitsi sina mekulu me Zezu, alunga, aswa mikanda. Ye bangu beyene bongo. 36Bangu beyene ma nvu mamu mesi, batanda ne boko nda mutu wedze ne mimbiti elunga. 37Batu besi be ngundu ye Zelasene, batanda ne Zezu ne uteme ilongo dze bangu, ne bangu bedze ne bongo. Zezu abita se mbungu ne utse. 38Mutu we Zezu epanza mimbiti nedzi ati: «Tumbeke benu.» Ni Zezu nedzi ati: 39«Vutse sombo yowe, we tanda mesi me Nzambi mepika we.» Ye mutu mene etse ne tanda se ngundu yesi me Zezu epika wangu.
Nwana we nwatu we Zayiluse ne nwatu we betime ne ingoyi dze Zezu
40Ye Zezu evutse ngulu ye dzanga, batu bayamba wangu, ne bangu besi bedze ne buka wangu. 41Mutu we kumvu Zayiluse aya, wangu edze ni kunwu we ndaku ye umbondu. Wangu ananwen sina mekulu me Zezu, yedzi ebondo Zezu ne utse ndaku yedzi. 42Nedzi edze ne nwana we nwatu we itsika, we bisiwu iku ne byole wedze se liku. Ndili ye Zezu edze netse, unkuka nwen batu nwedze ne upinyeke wangu me kwele mesi. 43Yedze ne nwatu wedze ne ubedzu ve ndaku ye kayi, yedze ne upula wangu unkomo, se bisiwu iku ne byole. Wangu amana untanvu nwesi ne ukaba besaki be mebedzu, ni nde mutu we saka wangu. 44Wangu atsindene mbisa ye Zezu, abetime ilembe dze ingoyi dzedzi. Palikise, unsu wedze ne pula nwa kanye. 45Zezu asunwule ati: «We me betime nami ni nza?» Batu besi basuna. Pyeli nedzi ati: «Kunwu batu badzendze we me kwele mesi.» 46Ni Zezu ati: «Mutu abetime nami, ma yene miti singa yotu ya pula se nyulu yami.» 47Nwatu ayiba ati, wangu nde tuka solime, yedzi eya ne tsikite, ananwen sina mekulu me Zezu. Wangu atanda busu ve batu besi utsina vedzi ebetime ilembe dze ingoyi dze Zezu, ne nda vedzi elunga sina ne sina. 48Zezu ati: «Nwana wami we nwatu ivukidze dzowe dzalungise we, tseke ne itavu.»
49Ndili ye Zezu edze ne uwowe, mutu motu ayinga sombo ye Zayiluse kunwu we ndaku ye umbondu, nedzi ati: «Dzika vele dambise Kunwu, nwana wowe we nwatu awaa.» 50Zezu ayuka vavu, wangu ne Zayiluse ati: «We nde yene bongo, somo ivukidze, nwana wowe alungele.» 51Ye Zezu ekalwe ndaku ye Zayiluse, wangu eke tondo ati, batu boko benyindzile nedzi se ndaku, ni benyindzile nedzi ni Pyeli, Zan, Zaaki, tata ne mama we nwana. 52Batu besi bedze ne lila, ne unyongo utsina ne nwana we waa. Zezu ne bangu ati: «Dzika lilayi, nwana asa nde waa, ni wangu adzi ni bembula.» 53Ni bangu bedze ne sewe Zezu, ne bangu beyiba ati, nwana awaa. 54Ye Zezu ekwata boko ye nwana we nwatu, awowe ne singa ati: «Nwana wami nyuse.» 55Nwana anyuse, nda tsanwen atelime. Zezu atanda ne bangu ne singa yesi ati: «Kabayi nwana bila.» 56Yali ye nwana ya kima kate kima amene, ni Zezu asikidze ne bangu ati: «Beyi nde banda batanda ne mutu tine motu me me suta.»
ప్రస్తుతం ఎంపిక చేయబడింది:
Luk 8: WUM
హైలైట్
షేర్ చేయి
కాపీ
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
