Lukas 4

Jesus tentadu

(Mat 4.1-11; Mar 1.12-13)

1Jesus riba di riu Jordon. Spiritu Santu staba nel, i lebal#Kap 4.14; 2.27 pa lala. 2Diabu tental la duranti korenta dia. Na ki tempu tudu i ka kume#Lei 9.9,18; 1 Re 19.8 nada. Oca ki kompleta ki dias, i tene fomi.

3Diabu falal: “Si abo i Fiju di Deus, manda e pedra pa i bida pon.” 4Jesus ruspundil: “I sta skritu kuma i ka son kumida#Lei 8.3; Jon 6.35 ku ta da omi vida.”

5Dipus, diabu lebal pa un kau altu, i mostral di un bias tudu renus di mundu. 6I falal: “N ta dau tudu e puder ku si garandesa, pabia N ntregadu#Jon 12.31; 14.30; Apok 13.2,7 el, N ta dal pa kin ku N misti da. 7Asin, si bu adoran, tudu ta sedu di bo.” 8Jesus ruspundi, i falal: “I sta skritu kuma bu na adora Siñor#Lei 6.13; 10.20 bu Deus; son el ku bu na sirbi.”

9Diabu lebal pa Jerusalen, i pul na lugar mas altu di kasa di Deus, i falal: “Si abo i Fiju di Deus, larga bu kurpu pa bas, 10pabia i sta skritu kuma, Deus na da si anjus#Sal 91.11-12 ordi pa e guardau. 11E na nguentau na se mon pa ka bu pe maja na nin un pedra.” 12Jesus ruspundi i falal: “I faladu: ‘Ka bu tenta#Lei 6.16 Siñor bu Deus.’ ”

13Oca ku diabu kaba tudu koldadi#Eb 4.15 tentason, i bai, i disal inda un bokadu.

Jesus na Galileia

(Mat 4.12-17; Mar 1.14-15)

14Jesus riba pa Galileia na puder di Spiritu. Si fama laga pa tudu ki reẑion. 15I ta nsinaba na se kasas di juntamentu; tudu jinti ta ngabal.

Jesus serkadu na Nazaré

(Mat 13.53-58; Mar 6.1-6)

16Oca ki ciga na Nazaré#Mat 2.23; Jon 1.46 nunde ki kriadu nel, i yentra na kasa di juntamentu na dia di diskansu suma ki kustuma ta fasi, i lanta pa lei. 17E ntregal libru di anunsiadur Isaias. Oca ki yabril, i oja lugar nunde ki staba skritu:

18“Spiritu di Siñor#Is 61.1-2 sta riba di mi,

pabia i unjin#At 4.27; 10.38 pa N konta Bon Noba pa pobris;

19I mandan pa N anunsia liberdadi pa katibus;

pa N pui segus torna oja;

pa da liberdadi pa kilis ku sta kalkadu;

pa anunsia anu di fabur di Siñor.”

20I fica libru, i tornal pa kil ku ten konta del, i sinta. Uju di tudu kilis ku staba na kasa di juntamentu sta riba del. 21I fala elis: “E Skritura i sedu bardadi aos suma ku bo obil.”

22Tudu jinti na papiaba ben del; e fika dimiradu#Kap 2.47 ku bon palabra ku na saiba na si boka; e punta: “Nta es i ka fiju#Jon 6.42 di José?”

23Jesus fala elis: “N ten sertesa bo na lembrantan e ditu ku fala: ‘Mediku, kura bu kabesa.’ Bo na falan pa N fasi li na ña prasa tudu ku bo obi i fasidu na#Mat 11.23 Kafarnaun.” 24I fala elis inda: “Na bardadi N konta bos kuma nin un anunsiadur ka ta setadu na si propi tera.#Jon 4.44

25“N na konta bos bardadi kuma, i tenba manga di viuva#1 Re 17.1,9; Tia 5.17 na Israel na tempu di Elias, oca ku seu fica, i ka cubi tris anu ku seis mis; i tenba garandi fomi na tudu tera, 26ma Elias ka mandadu pa nin un delis; son pa un viuva na Sarepta, na tera di Sidon. 27Tambi i tenba manga di jinti ku mpincu#2 Re 5.1-14 na Israel na tempu di anunsiadur Eliseu, ma nin un delis ka kuradu; son Naaman, un omi di Siria.”

28Tudu jinti na kasa di juntamentu, oca ke obi ki palabra, e paña raiba, 29e lanta, e tiral fora di prasa, e lebal riba di monti nunde ku se prasa kumpudu nel, pa e pudi pincal di la pa bas, 30ma i pasa#Jon 8.59; 10.39 na se metadi, i bai si kamiñu.

Omi ku spiritu mau

(Mar 1.21-28)

31I bai pa Kafarnaun, prasa di Galileia; i na nsinaba elis na dia di diskansu. 32E fika dimiradu#Mat 7.28-29 ku si nsinamentu, pabia i ta fala palabra ku tudu sertesa. 33I staba na kasa di juntamentu un omi ku teneba spiritu di un dimoniu mau; i grita ku vos altu, 34i fala: “E! Ke ku bu misti ku nos, Jesus di Nazaré? Bu bin pa kaba ku nos? N sibi diritu kin ki abo; abo i ki algin santu#Kap 4.41 di Deus.”

35Jesus raprindil, i fala: “Kala, bu sai nel!” Dimoniu bati omi na con na metadi di jinti, i sai nel sin fasil mal.

36Tudu jinti fika spantadu, e punta ŋutru: “Es i kal koldadi di palabra? I ta da spiritu mau ordi ku otridadi ku puder; e ta sai!” 37Si fama laga pa tudu parti di ki reẑion.

Kura di mame di minjer di Pedru

(Mat 8.14-17; Mar 1.29-34)

38Jesus lanta, i sai na kasa di juntamentu, i yentra na kasa di Simon. Mame di minjer di Simon staba duenti ku febri altu. E pidil pa i judal. 39I mpina riba del, i raprindi febri; kila sai nel. Na ki ora minjer lanta, i sirbi elis.

40Oca ku sol na kai, tudu kilis ku teneba jinti ku na sufri ku manga di koldadi duensa e leba elis pa Jesus. I pui si mon riba di kada un, i kura elis. 41Dimonius tambi fika e na sai na manga delis, e na grita, e na fala: “Abo i Fiju di Deus.” Jesus raprindi#Kap 4.34; Mar 3.11 elis, i ka disa pa e papia, pabia e sibiba kuma el i Mesias.

Jesus konta palabra na kasas di juntamentu

(Mar 1.35-39)

42Oca ku sol mansi, i bai pa un lugar dingidu. Manga di jinti na buskal, e bai pa el, e mistiba tujil pa ka i bai i fika elis, 43ma el i fala elis: “I pirsis pa N bai konta Bon Noba di renu di Deus na utru prasas tambi, pabia i el ku N mandadu pa el.” 44I fika i na konta palabra di Deus na kasas di juntamentu di Galileia.

ప్రస్తుతం ఎంపిక చేయబడింది:

Lukas 4: povB

హైలైట్

షేర్ చేయి

కాపీ