1Mos. 13
13
Si Abram samba si Lot pasara'
1Kaddiuakenangan si Abram Misir samba einia ka isit ka bare, masiailiake ka isit ka kaiaman Kanaan pasamba sisnanalepnia samba sangamberi bakkatnia, samba si Lot leuet masitut si Abram. 2Si Abram simakayo; ai biribirinia, kambingnia, jauinia, samba leuet perak samba masnia. 3Iageti einia barania ka laggai sisara ka laggai bagei, masiailiake Betel. Segenia kasara kudduat kapaoggangan Betel samba Ai, ka kudduat simakeramat, kapusapongotnia siburu 4samba masirioake kudduat pasibuluat. Sedda panindounangan kai Tuhan.
5Si Lot leuet ai keluargania samba pagugulet samba leu biribiri, kambing samba jaui. 6Lulut nenda su'su simaparounia ta'iaili rakudduijinia ruadda, aipoi tarimeura makope le igi. 7Lepa bara pagolukat katalagat sipasijajago tarimeu Abram samba sipasijajago tarimeu Lot. (Kateteret nenda tai Kanaan samba tai Feris aipeile rakukudduiji polak nenda.)
8Kuanangan si Abram kai Lot, “Sita nene sipusasaraina, tamaeru sirimanuangku samba sirimanuam pagolu. 9Lulut nenda maeru peile pasara sita. Sausau le rubeiat ka polak nene kaipa siobanu. Ke'bai mei ekeu ka isit sene, ei aku geti ka isit sedda.”
10Si Lot masikinere kasangalionia samba itconangan, kasangamberi peleu leleu Jordan, teret ka laggai Zoar maigi oinannia, kele monen Tuhan ele kele laggai Misir. (Kasedda te pagalaiatnia ta'pei aipakatai si Tuhan laggai Sodom samba Gomora.) 11Kalepakatnia sausaunangan si Lot sangamberi peleu leleu Jordan nenda, lepa tuituinia ka isit kabelaiat sulu. Kise te arapasara karua sirimanua nenda. 12Si Abram mukuddu ka laggai Kanaan, si Lot musapou sangamberi laggai ka peleu leleu teret kebebet Sodom. 13Sipulaggai ka laggai Sodom bulat makatai samba majo kai Tuhan.
Si Abram mujaujau ka Hebron
14Lepat ai tuitui si Lot, kuanangan si Tuhan kai Abram, “Kakudduat puriokatnu nenda, kinere le simakolou ka isit kabelaiat sulu samba ka belekat sulu, ka isit ka bare samba ka kaiaman, 15#Pugap. 7:5 Kuaake te geti katubum samba kasapunuteteunu sangamberi polak siitconu nenda bule ibailiu bakkatnu teret buru-buru. 16Kuaake le geti katubum sapunuteteunu simakope igi, pat berisara sirimanua leu moi masiadde sia. Kele taiooina raadde sirimanua abu ka polak, kisedda leuet sapunuteteunu ta'momoi tuadde geti. 17Kineiget, gejengingan sangalio polak nene, aipoi katubum te geti kuaake polak nene.” 18Lepa nenda otcaakenangan pusapougatnia, iageti kuddunia kabebet loina simakaramat kakudduat panindogat ka Mamre kabebet Hebron, samba sedda rioakenangan kudduat pasibuluat kai Tuhan.
ప్రస్తుతం ఎంపిక చేయబడింది:
1Mos. 13: MWV
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
