Mateus 6
6
Jesu i boii bern asu Pharisi.
1Hian gobgulue meluamu. Mbue hinen longu hian le bormarsu ndramed, mu lengi su masi su ilndri longu ademu, su gabmugueni mu leri. Be mu bo hian dagara, Damu ber lang i de danen surien longu ademu hian bui. 2Mbue hengen le ndro su gle memrad adem le bormarsu masi. Mbue loholo leri dege su holel asu Pharisi su hinen i le skul asu, le sal asu, le bormarsu ndramed masi. Su ie lengi, su ndramed masi su lele i, su gabmugueni su leri. Ndangen io boi le ndro mu. Surien asu gina boen. 3Mbue hinen dagara ar mu hengen le ndro su gle memrad ademu. Nemen sengen de danen i bui, she longu nemem gameao gin hengen le ndro homo. 4Gorni memrad adem uo da beg hengen le ndro homo, debosan su ilndri i. Damen le lundielang, i ge, i gin ilndri i, i danen leri, i surien longu adem hian gle memrad ber lang.
Heb nongen le lodu asu.
5Be mu lodu, mbue hinen i dege su Pharisi. Su da lodu le skul asu, su da dendrai, su da raring le sal lie le bormarsu masi. Su ha lengi su masi, su ilndri su, raring asu dagara molhege. 6Be uo lodu, beg raring le ndro Jehova, al le lundieum adem, vadi babi, lodu le ndro Damen le lundieum. Damem i lele uo, i delengan le raring adem, i surien lodu adem gle hian ge. 7Be mu raring, mbue absou nongen mabosanged molhege dege su Haiden masi su hinen i. Su hanguruen, be su bosoui nongen dsoln, be su raring eluen ge, su beld su hirong i. 8Mbue hinen dagara lie. Damu i da lundielang i danen longu masigane mu ie lengi. 9Ar mu raring absoui nongen ogoro: Damu le lundielang, hian su hangurueni, ngarn Jehova Helian. 10Gor adem i gmehere, su lao dandendegei adem ber boan, su gob mburer adem, dege su lao dandendegei adem ber lang su hinen i. 11Eruar u ob gan me anu masi mosen, 12Esbui longu adu momen, dogoro io gol de la ri bugane longu momen su hinen ndro io. 13Or gulue du le longu momen. Rumburdi du le longu masi momen. 14Ar golmu de la ri bugane longu momen asu su gin hinen ndro mu, Damdu ber lang i hinen i dagara le ndro mu lie. 15Ar golmu de ndud longu asu momen, su gin hinen ndro mu, bugane, Damu ber lang de esbui longu ademu momen bugane lie.
Heb nongen le bandri
16Ar mu bandri, bormarmu de gosusngo leri bui, dege bormarsu Pharisi, su da lengi, su ndramed masi, su ilndri bandri asu, su gabmugueni su leri. Ndangen io boi le ndro mu: Surien le bandri asu i gina boen le ndro su. 17Uo ge, ar uo leng bandri, daui ndrelgei ngohondonreen le borbalem, surhi manderm. 18Sie i danen malabo uo da bandri i? Bugane. Damen ge le lang, i ge, i danen ilndri bandri adem i gsurien i le longu ber lang.
Heb nongen le memrad adu.
19Mbue ilgi memrad ber boan le goure, ul ma rosd i gieni i, su ndremda behena, su mbuserei um, su behena memrad adem. 20Memrad adem gle lang, ul e rosd de danen ieni bui, su ndremda behena de dansu mbuserei lundielang bui, su de dansu behena memrad adem bugane. 21Bergolmu e hanguruen ademu i da sidesi baghege le memrad ademu. 22Begmarm danen lele mandern masi, ar begmarm i horuan, i danen lele hian. 23Ar begmarm i med, mandern masi i ndrogum ge. Be sul adem i da ndirem i gina ndrogum uo derbe muren, le ndrogmoan manden ge. 24Homo i de danen bo mburer le sor ndorlaben marmou bui. Ar ndrnen i irgu le homo i golnisden homo lie, le bergoln i voaniso homo, i mburen homo. Mu dagara lie, danmu bo mburer ad Jehova, ma mburer le memrad molhe ber boan bersi bugane.
Heb nongen le gan e salo.
25Io boi le ndro mu: Mbue hanguruen sidesi longu le mandrmu ge. Mbue bai: Du gien sa, du gilmui sa, mbue hanguruen salo le mandrmu ge, mandrmu i hian hanu le gan anmu, i hian hanu le salo ademu lie. 26E lele su ndorgan ber lang, su de lug gan le numen asu bui. Su de daui gan le goure le um asu bugane. Damu ber lang i hengen gan me ansu masi. Mu hian hanu le su dorgan ber lang de bui? 27Sie ademu i danen daui heb rang gle rang aden, be i da hanguruen leri sidesi, de danen hinen i bui. 28Desa mu hanguruen sidesi salo ademu ie? E lele nonou ber lonhou i reg derbe. I de bo mburer bui, i de hanguruen salo aden bugane. 29Ndangen io boi le ndro mu: Salo ad Salomo i hian, hian ge, salo ad nonou, i da lonhou i hian hanu le salo ad Salomo. 30-31Be Jehova i hanguruen lomondriu ber lonhou dagara, i da range ge, mo i gina meng, su bieni i le moan, ar Jehova i hengen salo hian le ndro su, i de danen hengen salo de la ndro mu bugane, mu ndramed momen, desa umu danmu boro ndoui ad Jehova bui? Mbue hanguruen, mbue vong: Du gien sa, du gilmui sa, du hedi salo gle oho? 32Su Haiden masi su hanguruen dagara. Damu le lang i danen longu ademu masigane, i hengen i le ndro mu. 33Hian hanguruen hanu memrad masi ber lang, longu ber gor ad Jehova, aga memrad hian ge. Muren longu ogo molhe ber boan i gmeher ndro mu lie. 34Mbue hanguruen gan anmu ber mo mu da gien sa. Bing si rang si mu ghanguruen gan le rang si ge.
ప్రస్తుతం ఎంపిక చేయబడింది:
Mateus 6: LLENT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Published by the British and Foreign Bible Society 1956
