Mateus 11
11
Heb nongen asu lao ad Johanes.
1Nongen boan, Jesu i bieni gor ogo i irgai le gor hoger hoger, i henunuen su gor masi, i bohernou le ndro su le longu ber lang. 2Johanes, ndremda surhi su, i do da le kalabus, i gin hirong le longu ad Jesu, i rendegien su lao aden, 3su endemani Jesu, su boi: Uo ge ndangen, i da beg mehere, de iou belengen le homo ber muren? 4Jesu i bode: Al ndro Johanes, gobharni le ndro i longu masi, begmarsu i lele i, nongen masigane delengamu hirong i: 5Begmarsu bui, dansu lele hian, degesu momen, dansu irgai monen, mandrsu momen, legen ge, su rosan lie, delengasu bui, dansu hirong monen, su da gin mad, su gin ndne lie. Nongen hian, longu ber lang gle ndro su ndramed molhe ber boan. 6Hian horuan ge, be homo ndrnen i de irgu le ordo bugane. 7Su loa ad Johanes be su gin hirong nongen ad Jesu, su ilndri longu masi, i da gin hinen i, su iao mul. Malabo Jesu i vong le ndro su ndramed heb nongen le Johanes, i vong, i bai: Mu leng ilndri sa goru, ar mu gin irgai le marboga, mu leng ilndri heb lomondriu, hai i ndounen i? 8Desa mu gin dogi la born ndro i mu leng ilndri hom ndramed salo aden hian silik ge? Su ndramed salo asu hian mabosanged, su da le um asu ndurhian ge. 9Desa mu gin dogi le ndro i? Mu leng ilndri hom Provet? Ndangen io boi le ndro mu: Aga i Provet molhege bugane, i ogo i hom manden ge. 10Dege nongen i da le Buk Helian ogoro: E lele io rendegien hom lao ordo le sal hanu, i gob sal ordo hian monen ge. 11Ndangen io boi le ndro mu: Hom bihin ber boan i de gini ndurn dege Johanes bugane, homo ber gor lundielang homo molhege, i manden hanu le ad Johanes. 12Le rang, be Johanes gin me mabenan malabo, gor lundielang i gmehere roud, su ge, su dansu boro i ndoun ndoun, gor lundielang i asu. 13Su Provet masi ber goru, ma Mose dagara lie, su gin vong mahanu le rang ad Johanes. 14Heb nongen le ndro mu lie: Aga Elias i da beg meher, danmu somui leri de bui. 15Delengamu hian ha hirong nongen ordo.
Heb nongen dohongein ad Jesu.
16Su ndramed ber range su dege sa? Su dege mbunana su da bo ndroud, su vong le ndro su mbunana, su boi: 17Iou gin bo demi, mu mbure bo ndan, du gin bo demi, mu mbure ndang. 18Johanes gin me, i de gin ien gan hian bui, i de gin ilmui ndrunvain bugane su gin vong, su gin bai: I hom ndramed gou i da ndrnen. 19Malabo ndurndramed gin me, i da ien gan, i ilmui ndrunvain, su vong, su bai: E lele i hom ndramed momen ge, i da ien gan, i da ilmui ndrunvain, i de bandri bui, i hom gous asu ndramed momen ge. Hanguruen asu momen beg dieni su.
Jesu i boii su gor masi.
20Boen Jesu i boii su gor masi i da gin bo gelman ndoun le ndro su, mburer mabosanged ge, su de gin belueni bern asu bui. 21I vong i bai: Gorasim uo momen ge, gor Betsaida uo gina momen. Be su ber Sidon e Tirus su gin ilndri gelman dagara, su belueni bern asu, bergolsu i dang, ndrnesu i gosusngo le longu asu momen, su da gin hinen i. 22Ndangen io boi le ndro mu: Tirus e Sidon su hian hanu le ademu le gord ad Jehova. 23Gor Kapernaum uo hian hanu le su gor masi? Buio, Jehova i gbieni uo le gor moan le gord aden na gmehere. Ndangen io boi le ndro mu: Su ber gor Sodom e Gomora su ilndri goru gelman manden uo da gin ilndri Sodom e Gomora de gin lol bui su da range lie. 24Ndangen io boi le ndro mu: Gor Sodom i hian ge, hanu le adem, be gord ad Jehova i gmeher.
Jesu bamugueni Damen.
25Le rang ogo Jesu i dendrai, i lug bohon, i vong, i boi: Io bamugueni uo Bo Domo Ndorlaben ber boan, e ber lang, uo da gin nhui longu ordo le ndro su labenen le ndro su ndramed hian ber boan, uo gin boharni i le ndro su ndramed molhege. 26Ndangen Bo Domo, bern adem dagara sidegesi. 27Bo Domo gin hengen longu masigane me ndro io, homo ber boan i de danen ndurn bui, Damen ge ber lang, i danen i. Homo ber boan i de danen Damen bugane, ndurn ge, i danen i, ma homo e homo, ndurn i da boharni i le ndro i.
Jesu i loh su, su da sab longu beruan.
28Mu gam ndro io, mu masi mu da sab le ngundun beruan, io beg sobani mu. 29Ibdi mburer ordo longu ordo hian ber lang, io beg henunuen mu idbi bern ordo e lele io da belengen su, su heb ndoa bui, bergolo i de hanguruen longu manden ge asu ndramed bui. Ar mu hanguruen bern ordo hian ge bergolmu i horuan ge i hengang hian. 30Mburer ordo i de beruan bui, longu ordo i de ndounen su ndramed bugane.
ప్రస్తుతం ఎంపిక చేయబడింది:
Mateus 11: LLENT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Published by the British and Foreign Bible Society 1956
