Genesis 14
14
Nina fisyupïtam Lotta salbaycun
1Ñatac chay timpum Sinar malcap mandacünin Amrafel cala; Elasar malcapañatacmi Arioc; Elam malcapañatacmi Quedorlaomer; Goim malcapañatacmi Tidal cala. 2Paycunam allacaycälila maꞌanacuyta Sodoma malcap mandacünin Berawan, Gomorrap mandacünin Birsawan, Admap mandacünin Sinabwan, Zeboimpa mandacünin Semeberwan, chaynütac Belap mandacünin Zoarwanpis. 3Cay picha mandacücunämi Sidimpa pampanćhu lluy juntunacälälin. Chay cala “Puchucü Lamar” nishan lädućhümi. 4Ćhunca ishcayniyu watam Quedorlaomerpa maquillanćhu sirbipäcula. Ćhunca quimsayu watacta liyalñatacmi cuntran śhalcuyta allacaycälila.
5Ñatac ćhunca tawayu wataćhümi Quedorlaomer maquinćhu cä mandacücunäwan Astarot Carnaimćhu Refai nunacunäta llallïlälin. Ham lädućhüñatacmi Zuzi nunacunäta, Save-quiriat lädućhüñatacmi Emi nunacunäta llallïlälin. 6Seirpa ulꞌunpïta aśhta Paran chunyä pampäcamam Horeo läducunätapis llallïlälila. 7Chaypïta cutipämulpis En-mispat nishan Cades läduman ćhälälil Hazezon-tamarćhu Amalec, Amhor lädu yaćhäcunätapis malcantinta-camam lluy camacaycälälila.
8Chaymi Sodomap, Gomorrap mandacünin Adma, Zeboim, jinaman Belap mandacünin Zoarpis Sidim pampaman yalapämula supayapachinaculcänanpä. 9Chay juc partiñatacmi yalapämula Elamcunap mandacünin Quedorlaomerwan, Goimpa mandacünin Tidal, Sinarpa mandacünin Amrafel, Elasarpa mandacünin Ariocpis. Chayurá tawa mandacücunämi picha mandacücunäwan chalanaculcäla.
10Ñatac chay Sidim pampaćhu püsucuna ućhcüśham cacula. Chaymanmi ayipäcuśhanćhu Sodomap, Gomorrap mandacünincuna jiꞌacalpälila. Juccunäñatacmi ulꞌucunäman ayiculcäla.
11Chay llallïcunämi Sodoma Gomorra malcacunap lluy ima cänincunactapis, micuynincunactapis waycälälila. 12Ñatac Abrampa subrinun Lottapis chay Sodomaćhu yaćhaptinmi lluy imapis cänintinta puśhaculcäla. 13Chaypi jucnin ayimücällam Hebreo caśhta Abramta willaycü śhamula. Pay Amhor lädu Mamre nunap sircanćhu encinas nishan muntinćhümi yaćhayäla. Mamrep wawꞌi-caśhanmi Escolwan Aner capäcula; paycuna Abrampa limanacuśhanmi capäcula.
14Chaynu subrinun Lotta puśhaculcäśhanta uyalïlulmi Abram quimsa paćhac ćhunca pusäniyu (318) sumä ishpisha-cama nunancunacta aclalcul Dan malcäcama aticulcäla. Awari, paycunam uchuchällanpi wasinćhu ishpipäcula. 15Chay tuta Abram lluy nunancunawan wicpa-caypa cunćhacaycälilmi llallïlälila. Jinalculmi Damascop chimpan Hobacama atïlälila. 16Chaynüpa llallilculmi ayllun Lotta, lluy cänintinta, walmincunactapis, lluy nunancunactapis cutichimula.
Abram allin cananpämi Melquisedec niycun
17Chay Quedorlaomerta lluy mandacü-masintinta llallilcul cutiyämuptinmi Sodomap mandacünin Save nishan pampaman yalamula ćhasquïnin. Chaytam “Mandacücäpa pampan” nipäcula.
18Chaynütac Salempa mandacünin, sumä munayniyu Tayta Diospa puydï sasirdütin Melquisedecmi tantactawan bïnucta uycula. 19Chayćhümi Abram allin cananpä nin:
“Cay pachäta janay pachäta lulä sumä munayniyu
Tayta Diospa allinpä licaycuśham canqui.
20Ćhïnicüniquita maquiquiman uycuśhüniqui
sumä munayniyu Tayta Dios
altuman juluycuśha cachun” nil.#Heb 5.6—7.17.
Chaymi chayćhu Abram lluy apaśhancunäpïta ćhuncapi-cama jucta uycula.
21Chaypïtam Abramta Sodomap mandacünin nin: “Nunäcunallacta cutiycächimay, lluy ima cäninpis amwanña quïdacuchun” nil.
22-23Niptinmi Abram nin: “Cay pacha janay pacha lulä quiquin sumä munayniyu Tayta Diostam limaliculá juc puchcallactapis, nï sapatunpa watacullantapis, nï imallantapis apaycunäpä. Chayćha ‘yaꞌa-laycum Abram alli cäniyu cayan’ nimänayqui canꞌachu. 24Manam imactapis yaꞌa munächu; liwshimäní nunäcuna micuśhallanñam caycun. Ñatac liwshimäní Aner, Escol, Mamreꞌa tincüninmanmi ćhasquiycälinan” nil.
ప్రస్తుతం ఎంపిక చేయబడింది:
Genesis 14: QVW
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú
