Mateo 3
3
Kushimikila kwa Yowano Mukakuzubilisha
(Mako 1:1-8; Luka 3:1-18; Yowano 1:19-28)
1Ha matena ayo Yowano Mukakuzubilisha wezile, wabalikile kushimikila mu libelelengwa lya mu Yundeya, wambile ngayi, 2#Mat 4:17; Mak 1:15. “Tengulukenu, ndaba Wene wa muyilu uli hahepi!” 3#Isha 40:3. Yowano wengile muntu uya atoyelenga muluwe wa Nyambi Ishaya oho ambile ngayi,
“Lizu lya mukakubilika mu libelelengwa ngayi,
‘Wahishenu mukwakwa wa Mwene,
ololenu zinzila zendi.’ ”
4 # 2 Mye 1:8. Bivwalo bya Yowano byatungiwile ha wushako wa kamela, kami walimangile mukunzi wa shitembe mu lukanda lwendi. Byakulya byendi byengile mikumbi na wushi. 5Bantu bafumine ku Yelushalema, na ku Yundeya nimwako, na ku litunga nimwalyo lya hahepi na Mushinzi wa Yondana, bayile kukwendi. 6Balitabilile wubi wabo, pe wabazubilishile mu Mushinzi wa Yondana.
7Ngoboni oho amonene Bafwalishi* babengi na Bashanduki* hibeza kukwendi mukubazubilisha, wambile kukwabo ngayi, “Enu bana babipili! Kati yani unamishiwululu ngayi mupanze ku wukali ukeza? 8Yimenu mikabo yakufwanina muntu unatenguluku. 9Kami hinga mwamba mu mitima yenu ngayi, ‘Tuli na tatiyetu Abulahama.’ Haya nikumitongweza ngayi Nyambi ukutwesha kushimba ku nawa mamanya nakuwafutula kwinga bana ba Abulahama. 10#Mat 7:19. Kazembe kayakiwa kale ku mipishi ya mitondo, nohobene mutondo nimwawo uya ukubula kuyima mikabo yayiwahe ukatemiwa nakuyumbiwa mu mundilo. 11Nikumizubilisha na mema kumonesha ngayi munatenguluku, ngoboni ou ukeza munyima yami uli na ngovu kumpitakana, kufwanina kushimba hinge makatulo wendi nifwako. Niye ukamizubilisha na Moyo Wakuyela na mundilo. 12Luhebe lwendi lwakupepesha luli mu liboko lyendi, ukapepa mbuto yendi.#3:12: Luhebe lwendi lwakupepesha: Baishalela mwaka baliyavwishilenga mushako wawutali uli na mpangwa hakupepa loto yabo ngoboni lelo etu twaliyavwishanga kupepa na kukwatila. Ukabungika loto mu shishete, pe ukahokesha muzungu na mundilo wakubula kuzima.”
Kuzubilishiwa kwa Yeshu
(Mako 1:9-11; Luka 3:21-22)
13Niho Yeshu wafumine ku Ngalileya, pe wayile ku Yondana kuli Yowano mukumuzubilisha. 14Ngoboni Yowano wakanine ngayi, “Ami nafwanini kuzubilishiwa kukwobe, kati kami unezi kukwami?”
15Ngoboni Yeshu wamukumbwile ngayi, “Yitabila ngayi shitendiwe noho wuluno. Ndaba mu nzila eye tukatenda nimwabyo mukwoloka.” Nohobene Yowano wetabilile.
16Wanguwangu oho Yeshu azubilishiwile wafumine mu mema. Pe liyilu lyamushinkulukile, wamonene Moyo wa Nyambi hiwushulumuka ngonehe litela, pe wamunikile hahendi. 17#Shit 22:2; Nyi 2:7; Isha 42:1; Mat 12:18, 17:5; Mak 1:11; Luk 9:35. Niho lizu lyafumine muyilu lyambile ngayi, “Ou niye Mwanami nahaka, wangwahililishanga shikuma.”
ప్రస్తుతం ఎంపిక చేయబడింది:
Mateo 3: KK2008
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
New Testament in Nkoya © The Bible Society of Zambia, 2008.
