GENESIS 9
9
Pathian le Noah Biakamnak
1Pathian nih Noah le a fapa hna cu thluachuah a pek hna i, “Fa tampi in ngei hna u law nan fale cu vawlei cung khuazakip ah khat hna seh. #Gen 1.28 2Vawlei cung saram vialte, va hna le saram hna phun hna le nga hna zong nih an in ṭih hna lai. Annih cu an dihlak in nanmah kut tangah chiah an si. 3Saram vialte le thlaihring vialte cu nan ei khawh hna lai; an dihlak in rawl caah kan pek hna; 4asinain sa kha a chung i thi a um lioah cun nan ei lai lo, zeicahtiah nunnak cu thi cu a si. #Lev 7.26-27; 17.10-14; Lev 19.26; Deu 12.16,23; 15.23 5Pakhatkhat nih an in thah hna ahcun, thihnak in dan ka tat hna lai. Nanmah an thattu hna saram cu ka thah hna lai i ahohmanh a minung hawi a thatmi cu dan ka tat hna lai.
6Minung cu Pathian mui keng in
sermi a si caah,
minung a thatmi cu,
a minung hawi nih an thah ve lai. #Gen 1.26; Exo 20.13
7Nannih cu fa tampi ngei u law nan tefa hna kha vawlei cung khuazakip ah khat dih hna seh,” a ti. #Gen 1.28
8Cun Pathian nih Noah le a fapale cu a thawh hna i, 9“Nanmah le nan hnu i a um lai ding nan tefa hna sinah, atu ah biakamnak ka tuah, 10cun nan sin i a ummi thilnung vialte — va si hna seh, saṭil si hna seh, saram si hna seh — lawng chungin a chuakmi paohpaoh sinah khan ka tuah. 11Ka biakamnak cu hihi a si: Thilnung vialte kha buanchukcho in hrawh an si ti lai lo. Zeitikhmanh ah buanchukcho nih vawlei hi a hrawk ti lai lo, tiah bia kaa kam,” a ti.
12Cun Pathian nih cun, “Nanmah le saram vialte hna sin i ka sermi ka biakamnak zungzal in a hmunmi hmelchunhnak caah, 13ka chuncha cu minmei chungah khin ka chiah. Vawlei he biakamnak ka sermi hmelchunhnak a si lai. 14Minmei cu vawlei cung i ka zaamter i minmei chung i chuncha a langh fate, 15buanchukcho nih thilnung vialte kha a hrawk ṭhan ti hna lai lo ti in nanmah le saram vialte hna sin i biakamnak ka tuahmi kha ka hngalh ṭhan lai. 16Chuncha cu minmei chung i a hung langh tikah ka hmuh lai i nanmah le vawlei cung thilnung vialte sin i zungzal hmunmi biakamnak ka sermi kha ka hngalh ṭhan lai,” a ti.
17Pathian nih Noah cu a thawh i, “Hi hmelchunhnak hi vawleicung thilnung vialte hna sin i biakamnak ka tuahmi hmelchunhnak a si,” a ti.
Noah Zu A Ri
18Lawng chungin a chuakmi Noah fapa hna cu Shem, Ham le Jafeth an si (Ham cu Kanaan pa a si). 19Hi Noah fapa pathum hi vawlei cung mi vialte a hringsortu hna an si.
20Noah cu lothlo a si i amah cu mitsur dum a ser hmasa biktu a si. 21Mitsur zu cu a din i a ri, a thilpuan vialte kha aa phoih dih i a thlam chungah taklawng in a it. 22Kanaan pa Ham nih khan a pa taklawng in a rilh ko cu a hmuh tikah a unau pahnih kha a va chimh hna. 23Cu tikah Shem le Jafeth nih cun puan pakhat kha an i lak i an kenglei ah an chiah i an liang le an liang in an i zawn. Cun hnulei chit in thlam chungah cun an va lut i an pa cu an va khuh; an pa taklawng in a um cu an hmuh nakhnga lo khattelei kha an zoh peng. 24Noah cu a zuritnak khan a hung fim i a fapa a hniang bik nih a cung i a tuahmi kha a hngalh tikah, 25aa thawh i,
“Kanaan cungah chiat tlung ko seh;
a unau hna sal a si lai,” a ti.
26Cun aa thawh ṭhan i,
“Shem Pathian Bawipa cu
thangṭhat ko u.
Kanaan cu Shem sal a si lai.
27Pathian nih Jafeth cu karhter seh law
A tefa hna cu Shem tefa hna he
um ṭi hna seh.
Kanaan cu Jafeth sal a si lai,” a ti.
28Buanchukcho hnuah Noah cu kum za thum le sawm nga a nung i 29kum za kua le sawm nga a si ah a thi.
ప్రస్తుతం ఎంపిక చేయబడింది:
GENESIS 9: HCL06
హైలైట్
షేర్ చేయి
కాపీ
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
