GENESIS 6
6
Minung Ṭhat Lonak
1Cu tikah cun vawlei cung khuazakip ah minung tampi an um cang i fanu kha an hrin hna. #Job 1.6; 2.1 2Cu fanu hna an i dawh cu pathian fapa hna nih khan an hmuh hna i cucaah an duhmi kha an i thim hna i an ṭhit hna. 3Cun Bawipa nih aa thawh i, “Minung hi zungzal in nun cu ka sianh hna lai lo, zeicahtiah titsa an si. Atu thawk in kum za le kum kul nak tam an nung ti lai lo,” a ti. 4Cu caan le cu hnu zongah cun, vawlei cungah hin Nefilim mingan pipi kha an rak um i annih cu minung fanu hna le pathian fapa hna tefa kha an si. Annih cu hlanliomi mi ralṭha le mi minthang kha an si. #Nam 13.33
5 Bawipa nih minung cu khuazakip ah an ṭhat lo tuk hringhran le an lungchung cu ruahnak ṭhalo lawnglawng a khah kha a hmuh tikah, #Mat 24.37; Luk 17.26; 1Pet 3.20 6minung a rak ser hna i vawlei cung i a rak umter hna kha a ngaih a chia. Aa ngaichih i, 7“Ka sermi minung vialte hna hi vawleicung in ka hloh dih hna lai. Saram vialte le va vialte he ka hloh dih hna lai, ka rak ser hna hi kaa ngaichih,” a ti. 8Asinain Noah nih cun Bawipa kha a lung a ton.
9-10Noah tefa hna cu hihi an si: fapa pathum a ngeih hna, Shem, Ham le Jafeth an si. Noah cu miṭha a si i amah lawnglawng kha cu caan ah cun Pathian lung a tongmi a si; Pathian he i hawikomh in a nungmi a si. #2Pet 2.5 11Sihmanhsehlaw midang vialte cu Pathian mithmuh ah miṭhalo an si dih i an ṭhat lonak cu khuazakip ah a karh. 12Pathian nih vawlei cu a zoh tikah a ṭha hrimhrim lo ti kha a hmuh, zeicahtiah minung kha an dihlak in sual in an nung.
Noah Nih Lawng A Ser
13Cun Pathian nih Noah cu a thawh i, “Minung hi an dihlak in hrawh awkah ka ruah cang. An dihlak in ka hrawh hna lai, zeicahtiah vawlei hi sualnak an tuahmi in a khat. 14Cucaah cun lawng pakhat in i ser, thing ṭha kha hmang hna law a chungah a khaan ser hna, cun lawng cu a chunglei he a lenglei he kahtazasi thuh dih. 15A tung pe za li le sawm nga, a vang pe sawm sarih le pe nga, a san pe sawm li le pe nga in na sak lai. 16Lawng cu a cungkhuh na ser lai i a cungkhuh le a vampang karah lehhmah hleiriat na awnter lai. Dot thum in na sak lai i a kam ah innka na ser lai. 17A nungmi thil vialte hrawhnak ding caah vawlei cungah buanchukcho ka tlunter lai. Vawlei cung i a ummi thil vialte an thi dih lai, 18sihmanhsehlaw nangmah he cun biakamnak tu ka ser lai. Lawng chungah cun na nupi le na fapa hna le an nupile hna kha na luhpi hna lai i 19saram chungin a nu le a pa cio nung tein chiah dingah na luhpi ve hna lai. 20Nung tein chiah dingah va phun dihlak chungin pahnih cio, saram phun chungin, a hme he a ngan he, pahnih cio, lawng chungah cun luhpi an si lai. 21Cun nanmah ca le anmah caah rawl phun zakip na lak hna lai i na khon hna lai,” a ti. 22Cun Noah nih khan, Pathian nih a fialmi vialte cu a tuah dih. #Heb 11.7
ప్రస్తుతం ఎంపిక చేయబడింది:
GENESIS 6: HCL06
హైలైట్
షేర్ చేయి
కాపీ
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006