MARKU 16
16
Yeesu anatsee di pëcӓts
(Mat 28.1-8; Lúk 24.1-12; Joŋ 20.1-10)
1Bi Unu-pënaakësa par bi, a Maaria kanpënë-ni Magëdala, ni Salome, ni Maaria anin Jakob, weel ulicar pa pëtsëp pii kër tsi puum Yeesu. 2Kafa-unu tsi unu ucak kanëm, ukatee unu, a ba pën pëtsëp di pëbuk. 3A bu kë yepëlar tsi ba ci tsi koo ja: “Yën ka këlar nja un pëlaak na pënan tsi mtum pëbuk?” 4Maa, ukat bukul këkës, a ba win pëlaak pando pi sëtsëna pëbuk këla pënëna, te pul aci pëwiak pan. 5Bi ba niaj bi pëbuk, a ba win ulon upaas tsoar tsi kajara kariir, atiema iŋi ifaacal; a bakaats pikra, ba lënk mak.
6Maa, na ja bukul: “Ind tsë lënk. Ndu tsas Yeesu Kanpënë-ni-nasaret, nul nan doi rieŋa di kruus. Anatsee di pëcӓts; nul cits tsi. Nda teenan-e tsëko tsi na ro tsi piintsana. 7#Mat 26.32; Mar 14.28Maa nda tsëpan dii leents bafetsul ni Per; nul ayër ind bërun pëtsëp Galileeya; dul di ndu winënul run, bi na ro bi ja ind.”
8A bakaats cili, ba túk alawan pëbuk, par bu pikra bëlieng, a ngëliaf bukul kë lënk. Maa bë jaats ñaan ko, par bë lal.
Yeesu apibandar tsi këkës Maaria kanpënë-ni Magëdala
(Mat 28.9-10; Joŋ 20.11-18)
9Bi Yeesu natsee bi di pëcӓts tsi unu ucak kanëm, a na pibandar ucak tsi këkës Maaria Magëdala, ni na pënanii ngëcaay paaj ni ulon. 10A na tsëp ee leents ko wan bando biki ci ni Yeesu. Bu ro juatsan a bu kë kaan. 11Maa bi ba te bi u jaka Yeesu ci nayësal, te Maaria Magëdala awinul, bu Uwakats.
Yeesu apibandar tsi bafetsul batëb
12Upar ko wan, a Yeesu kaka pibandar ni bëlon bënaam tsi balon batëb tsi bafetsul, bi ba ci bi tsi bëga pëtsëp ngëntab ireeŋ. 13A ba witsee ee leents banduka bukunk; maa, ŋal bukul batëb bukun, bu Uwakats.
Yeesu apibandar tsi bafetsul untaaja ni naloole
(Mat 28.16-20; Lúk 24.36-49; Joŋ 20.19-23; Ngë 1.6-8)
14Tsi utuami, a Yeesu pibandar tsi bafetsul untaaja ni naloole, bi ba ci bi tsi bariala. A na leentsar bukul, undo kakaats-uwak ni katamb-ngëwaas bukul; par bë Uwakats ba winul bukunk, bi na natsee bi di pëcӓts. 15#Ngë 1.8A na ja bukul: “Nda tsëpan tsi umundu bëlieng, nda leentsan bañaan bëlieng Upetsan-uwar. 16Ñaan na Uwaki a na mijana, në buerana. Maa na Uwakatsi, në lacana. 17A ngëpibanaani ngi, ka ci ngun ni ba Uwak biki: Tsi katim nji, bu koo ruak ngëcaay, bu koo ñakan mleents mwalu, 18bu koo mob ngëko-pëtsats ni iñan bukul; uci ba raan ko wi kan fiŋ wi, di ka ro bukul ko; uja ba paf iñan tsi bamoj, bamoj ka yës.”
Yeesu apaya batsi
(Lúk 24.50-53; Ngë 1.9-11)
19 #
Ngë 1.9-11
Bi Yeesu, Ajug ba bi pëñakanaan bukul, a na tsëpanda batsi, a na tsoar tsi kariir Nasien-batsi. 20A bafetsul tsëp ee ka leents Upetsan-uwar di ngëleka bëlieng. Ajug kë leemp ni bukul; a tsi ngëpibanaani ngan ci ngi tsi përolaa, a nuu piban përim baaraan pëci.
ప్రస్తుతం ఎంపిక చేయబడింది:
MARKU 16: KPKNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Le Nouveau Testament en langue Manjaku © Alliance Biblique du Sénégal, 2020.
