LÚKAS 4
4
Ujabël ateen-teenan Yeesu
(Mat 4.1-11; Mar 1.12-13)
1Yeesu, bi na cum bi Uwejats-ujënts, na pëni di kajara bërëk Jordan pëwitsee. Uwejats tsëpandul ulaalats; 2Ujabël kë teen-teenanul rul, ko undo wi ngënu ngëntaaja ngëbaakër. Yeesu reets ko, ngënu ngan bëlieng. A nguu ba, a na bonats. 3Ujabël jaul: “Uci bi m ci bank Abuk Nasien-batsi, jaan-e pëlaak pi, pa witsa pëpom.” 4#Ulú 8.3Yeesu ja : “Ko wi, picana wun: Cits pëpom din ka pun ñaan kë yafënts.” 5Ujabël tsëpandul ruëts. Ucar umënts wun, u pibanul msien bëlieng tsi umundu. 6U jaul: “Mán wëlu uyëlan wi bëlieng, ni përëmb msien mi. Par mawëla pul, a ndu n wël pul ni n ŋali. 7Uci m jintëlain, pë ci piicu bëlieng.” 8#Ulú 6.13Yeesu ja : “Ko wi, picana wun: Jintëlaan Ajug, nul nan cii Nasien-batsiu, kuu leemparul, nul koorul.” 9A Ujabël tsëpandul Jerusalem. U jutanul di ruëts kato-kayëman, u jaul: “Uci bi m ci bank Abuk Nasien-batsi, jucan-e tsi utsia. 10#Iya 91.11,12Par ko wi, picana wun: ‘Ka ja ngëwaanjuul përim, ulekau, pa nga waayu;’ 11ni ko wi bëts: ‘Ngul, ka tsiju tsi iñan ngul, pa pëtsiimu rits júnk pëlaak.’” 12#Ulú 6.16Yeesu ja : “Ko wi, picana wun: Cats teen-teenan Ajug, nul Nasien-batsiu.” 13Bi Ujabël teen-teenan bi Yeesu aa u ba, u pën alawanul te bëlon bëyaas.
Yeesu akur uleempul di Galileeya
(Mat 4.12-17; Mar 1.14-15)
14Yeesu witsee Galileeya ni uyëlan Uwejats, katimul kë ñakanaana tsi ngëjara bëlieng ngan fay ngunk tsul. 15Nuu jukan di ito-ijúki bëkul, a bañaan bëlieng kë bëndanul.
Yeesu niiranaatsa di Nasaret
(Mat 13.53-58; Mar 6.1-6)
16Bi na tsëp bi Nasaret, di na kusëna ri, tsi Unu-pënaakësa a na niaj kato-kajúki, bi na ja bi na roon nuu ro, a na natsa bëlayir. 17Na wëla ulibëru Isaaya, nayëlia. Na waants, a na win tsëko tsi përim pi picana tsi:
18 #
Isa 61.1,2 “Uwejats Ajug aci tsi nji,
par aratin pa pëleents baranj, Upetsan-uwar;
ayëliin pa pëleents bamoba pëfacana,
ni bakuel pëkak pëwin,
ni pëwëtan ban tsua biki tsi unoor ba fac,
19ni pëleents uwal Ajug, u wara wi.”
20Yeesu lëm ulibëru, na kakan wul naleemp, na tsoar. Bañaan bëlieng di kato-kajúki kaŋanul këkës. 21Din, na ja bëkul: “Ind te bakank; përim pan abaar pëci ntsari.” 22Bañaan bëlieng ci tsi pëñakan uwar tsi ulekaul. Ba pikra, undo irim iwar i kan pëni yi di mtumul. A bu kë ja: “Cits iink abuk Juse ci-un namëntsi?” 23Yeesu ja bëkul: “Ane ndu tibin ank përim pi: Nacuunkan, cuunkandari-e! Doon tsi ucaaku tsi, ko wi wund te wi m do bëlieng di Kafarnaum.” 24#Joŋ 4.44Na ja bëkul kak: “Mán leents ind ucär: Kaats nayëlia na niiranee tsi ucaakul. 25#1Bas 17.1Tsi ucär, ma n ja ind: tsi uwal Eliyas, nayëlia, a usubal subats ngëwaanu ngëwaants ni këlí paaj, a ubon uwiak yëri tsi ucaak bëlieng, bakaats ban cätsëndan biki bayën bëkul cum tsi Israel. 26#1Bas 17.8-16Maa Eliyas yëlaatsa di nin nalon tsi bëkul, ucits ba di ŋaats nan catsëndani ayënul, nan ciinee untab Sarepta, tsi pëboos Sidon. 27#2Bas 5.1-14Tsi uwal Elisaaya, nayëlia, ba maak biki kantsewul-kajankal cum tsi Israel. Maa kaats na yësanee tsi bëkul, ucits ba Naaman, nan pënë-nii Siiria.” 28Bi ba te bi ko wan, ba cum bëlieng ni uriab di kato-kajúki. 29Ba natsa, ba pënanul tsi përaasa. Ba payandaul untunda wi përaasa bëkul ro pi ciina, pa pëpambarul utsia. 30Maa na par tsi pëncuaf bëkul, na tsëp bëgaul.
Nalon ñaan ni ucaay niaji
(Mar 1.21-28)
31A Yeesu juŋa pëtsëp Kafarnaum, un ci wi pëlon përaasa di Galileeya. A nuu jukan bañaan tsi Unu-pënaakësa. 32#Mat 7.28,29Ba pikra tsi uleka bëjukanul, par përimul aka uyëlan. 33Aka nalon ñaan di kato-kajúki, ni ucaay ujuatsal niaji. Na lië mak, aja: 34“Wi ko-e! Wee m ŋal wun ni wund, wi Yeesu, Kanpënë-ni-nasaret? M bi pa pëniaman wund-a? Wi, man me ni m ci; wi ci-un nayëman, nan pënë-nii tsi Nasien-batsi.” 35Yeesu leentsar wul, aja: “Yëŋandari, kë pën tsi nul!” Tsi pëncuaf bañaan, ucaay wat ni u niaj unk; awatul tsi utsia, a u pën tsi nul, maa rootsul ko. 36Bañaan bëlieng pikra, bu kë jaalar tsi ba ci tsi: “Pëom përim ci pun pëmënts pi koon? Par, aja na ja ngëcaay ngëjuatsal përim ni uyëlan ni pëyëlan, din ngë pën.” 37Katim Yeesu kë ñakanaana tsi ngëjara bëlieng ngan fay ngunk tsul.
Yeesu ayësan anin aar Per
(Mat 8.14-17; Mar 1.29-34)
38A Yeesu kë pën di kato-kajúki, na tsëp ee niaj kato Simon. Anin aar Simon amaak, uliaful ayëkan mak; ba buara Yeesu na tsënkul. 39A në jíntsanul, na leentsar pëmaak, a pa pën tsi nul; na natsa uyëk umënts wun, na mob pëkëmand bëkul. 40Uyër pëcaal, bañaan bëlieng, ban ka biki bamoj ba maak biki mmaak mcumal, rëŋan bëkul di Yeesu. Yeesu kë paf bëkul iñan naloole-naloole; na yësan bëkul. 41Ngëcaay pën bëts tsi bañaan bacumal, a nguu lie, koo ja: “Wi ci-un Abuk Nasien-batsi!” Maa, Yeesu leentsar ngul, na laaŋ ngul pëja ko. Par ngul, ame nul ci-un Këristu.
Yeesu yaana Judeeya, a nuu leents Upetsan-uwar di ito-ijúki
(Mar 1.35-39)
42Unu kë fa, Yeesu pën atsëp ulaalats. Bañaan bacumal mak kë tsasul; bi ba band bi tsi nul, ba ŋal pëlaaŋaraul, pa na rits pën tsi bëkul. 43Maa, na ja bëkul: “Man ka bëts pëleents Upetsan-uwar tsi uleka pësien Nasien-batsi, di ilon iraasa. Par, wul ka wun n yëlee.” 44A na yaana Judeeya, a nuu leents Upetsan-uwar di ito-ijúki.
ప్రస్తుతం ఎంపిక చేయబడింది:
LÚKAS 4: KPKNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Le Nouveau Testament en langue Manjaku © Alliance Biblique du Sénégal, 2020.
