LÚKAS 2
2
Ubukara Yeesu
(Mat 1.18-25)
1Tsi uwal umënts wun, Agustu, nasien nawiak tsu ulua pa bañaan bëlieng pëmarkaara. 2Bi bëmarkaar bëcak bëmënts kë roa bi, Kiriinius sienun ucaak Siiria. 3Uja kara ñaan në witsa përaasaul pii markaara. 4Unk, Juse pën di përaasa Nasaret, pul pan ciina pi Galileeya; na kata pëtsëp përaasa Dawid, pi kanjaka pi Betëleem, pan ciina pi Judeeya. Juse tsëp rul, undo apënëni kato Dawid, ni pëka Dawid. 5Atsëp pii markaara ni nampëliul, Maaria, nul nan seempee. 6Bi ba wama bi ci rul, unu Maaria wi kak band. 7Na k napätsul nacak, niints. A na atsul ni iŋi, na piintsanul di bërialanaani ngëncaam, par bë kaats tsëko di bametsu kato-pëtsooŋ.
Bayafan ni ngëwaanju
8A u ka bayafan ban ci biki di kajara ucak umënts wun, bu kë fër bëreeŋ, pëteen ngëncaam bëkul. 9A ka uwaanju Ajug, un pibandar wi tsi bërun bëkul, a përëmb Ajug fiets bëkul afayësan, ba lënk mak. 10Maa, uwaanju ja bëkul: “Ind tsë lënk, par man bi pëleents ind Upetsan-uwar, wi kan tsu wi bañaan-ucaak bëlieng tsi ulílan uwiak. 11Nabuëran, un ci wi Kristo, Ajug, abëkara ind ntsari di përaasa Dawid. 12Iink di ndu meena run u ciul: ndu tsënk napäts nandu bëka bëatsa ni iŋi, na piintsana di bërialanaani ngëncaam.” 13Ucar umënts wun, ngëwaanju ngëcumal pëni di batsi ee tsënki ucak wun. Nga ci tsi pëbëndan Nasien-batsi, koo ja: 14“Përëmb pa ciin pa Nasien-batsi di tsëko tsan pe tsi pëci di ruets, a pëfac pa ciin tsi bañaan biki na lílandër biki tsi umundu.” 15Bi ngëwaanju ruk bi bayafan a nga tsëp batsi, ba jaalar përim pi: “Bi u ci bank, nda ju ngë kata pëtsëp Betëleem, nja kee win ko un jaka wank abaandi, ko wi Ajug tsu wi nja wank pëme.” 16A Bayafan míint pëtsëp, ba tsënk Maaria ni Juse, ni napäts nandu bëka a na piintsana di bëntsian bërialanaani ngëncaam. 17Bë winul, ba leents ko wi ba jaka wi tsi uleka napäts namëntsi. 18Bañaan bëlieng, ban cikëndën biki bëkul, pikra, tsi uleka ko wi bayafan ci wi tsi pëleents bëkul. Maa, ngëko ngan jaka ngank bëlieng, 19Maaria gaang ngul uwar tsi uwaasul, nuu wejats ngul. 20A Bayafan pën awitsa, bu kë rëmban Nasien-batsi, koo bëndanul, undo ngi ba te ngi bëlieng, te ba winand ngul, nga ci bi ba jaka bi.
Napats atsua katim
21 #
Ija 12.3
Lúk 1.31
Bi u band bi unu uwasantsan, pa napäts pëwelana kambac, na tsua katim, Yeesu. Aci katim ki uwaanju tsuul ki, bi aninul netse bi seempaul.
Yeesu atsëpanda kato-kayëman tsi bërun Ajug
22Uba ngënu mjëntsandar bëkul, bi ulua-Moises tsu bi, ba tsëpand Yeesu Jerusalem pii pibanul tsi bërun Ajug — 23#Pëp 13.2,12Bëro ank, bi u picana bi tsi ulua Ajug aja: Kara napäts niints nacak nan bëkee, ka patsandara Ajug— 24#Ija 12.6-8Pëtsëp bëkul rul, aci bëts pa pii wël bëjakan, bi ko unjaka wi tsi ulua Ajug: Ngëtúuba ngëtëb, oo ngëtuuba bëreeŋ ngëtëb nga wam ngi ngëpats.
25A u ka nalon ñaan di Jerusalem, katimul Simeon; aci namabal, na lënk Nasien-batsi, nuu lip kajuabëtsana-uwaas Israel; Uwejats ujënts ci tsi nul. 26Uwejats-ujënts apibanul na ri ka cäts, te winats Këristu Ajug, bërun. 27Uwejats tsëpandul kato-kayëman. Juse ni Maaria kë baandandi napäts, un ci wi Yeesu, pa përoul ko wi ulua tsu wi, 28a Simeon yankul aret tsi iñan, na ja ngëwar pa Nasien-batsi, aja: 29“Nawiak! Kë wëtan nalueku inkri ni pëfac, bi m do bi ja. 30Par, këkës nji win pëbuër, 31pi m yecis pi tsi bërun bañaan bëlieng: 32#Isa 42.6; 49.6; 52.10ufac pa upiban bañaan ban cits biki Bajudeu, ni përëmb Israel, bañaanu.” 33Asin napäts, ni aninul pikra, tsi undo irim injaka yi tsi ulekaul. 34Simeon ja ngëwar, na ja Maaria, anin napäts: “Teenan-e! Napatsi atsua pëci ni kan kai bañaan Israel bacumal kë yër, bacumal kë natsa; na tsuunda pëci upibanaani wi kan pokaa wi, 35—a wi bërieru, ulaac ka lúŋanu uwaas, unk ngëwejats bañaan bacumal ka pibanaa.”
36A u ka bëts nayëlia, ŋaats, katimul, Aana. Aci abuk Fanuel, tsi pëka Aseer. Nul Aana, aruka tsaf mak. Anima bi na ci bi nampëli, na ci ni ayënul, ngëwaanu paaj ni ulon, 37ayënul cäts. Na ruka unk, aa na ka ngëwaanu ngëntaaja këwas ni ngëbaakër. Nul, di ka pën di kato-kayëman; aja na roon, bërëm ni pënak, nuu bëndan Nasien-batsi, nuu ci tsi kabër-mlik, ni bëñaan. 38Na baandi tsi uyëk umënts wun, na baran Nasien-batsi, na ci tsi pëleents uleka napäts, pa bañaan ban ci biki bëlieng tsi pëlip Jerusalem da pënana tsi pëluëk.
Pëwitsa Nasaret
39 #
Mat 2.23
Bi Juse ni Maaria ba bi përo ko wi ulua Ajug tsu wi bëlieng, ba witsa Galileeya, di përaasa kul, un ci wi Nasaret. 40Napats kë wiaka, nu jëŋand, nu pe këpe pëme ko, Nasien-batsi tsuunkarul. Bi Yeesu ka bi ngëwaanu untaaja ni ngëtëb, na niaj kato-kayëman.
Yeesu di kato-kayëman, bi na ka bi ngëwaanu untaaja ni ngëtëb
41 #
Pëp 12.1-27; Ulú 16.1-8 Aja kara uwaanu, ubaandi #2.41 Ufesta-pëër: aci Ufesta unja wi u baandi kara uwaanu, kara pëka Bajudeu ka fiŋ uk-unkaanel, pa pëlesëna upënari kul di EjipëtUfesta-pëër, bák Yeesu ka tsëp Jerusalem. 42Bi na ka bi ngëwaanu untaaja ni ngëtëb, ba kata pëtsëp rul, bi u ja bi u roon u rolaa tsi ufesta. 43Ngënu ufesta kë ba, ba pën pëtsíis; a Yeesu, ndëpaas, rukee di Jerusalem te bákul meets. 44Bë ci tsi pëja ne, akurëlar ni bacints kul. Ba yandaar aro unu tsi bëga, a ba ru ci tsi pëtsasul tsi bayëts kul, ni tsi bañaan biki ba meelar biki. 45Maa winatsul, ba pën pëwitsa Jerusalem, kë tsasul. 46A uu ro ngënu ngëwaants, ba ru winul, bi na tsoar bi di kato-kayëman tsi pëncuaf bajukan-bëga, a nu cikëndën kul, na ci tsi pëyepar kul irim. 47Biki kan cikëndënul biki pikra bëlieng, uleka bëlipalul, ni irim i na yank yi kul. 48Bi anin Yeesu ni asinul winul bi, ba pikra mak. Aninul jaul: “Napats, we ka wun m do wund iink? Nji ni asinu, wund a cäts pëtsasu.” 49Yeesu ja kul: “We ka wun nda ro ka tsasin? Nda roots me n ka pëci tsi ngëko Asin nji-a?” 50Maa përim pi na ja pank kul, meets ko wi pa pac wi. 51Na juŋa ni kul pëtsëp Nasaret; na mob tsi përim kul; aninul gaang irim yan bëlieng di uwaasul. 52#1Sam 2.26; Kat 3.4Yeesu kë pe këpe pëme ko, ni pëwiaka; a Nasien-batsi, ni bañaan, tsuunkarul.
ప్రస్తుతం ఎంపిక చేయబడింది:
LÚKAS 2: KPKNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Le Nouveau Testament en langue Manjaku © Alliance Biblique du Sénégal, 2020.
