Matius 6
6
Jangan bogoyap hormat doi' urakng bukai
(6:1-18)
1“Boboi'cam timpu kaitn molabuhan porbuatan boi' inyo sosuai agatn agama. Jangan molabuhan porbuatan nantai di hadapan urakng oca' ditiat sia'. Obai aman kaitn bulah sama'an nian, Bopai kaitn di sorugo kinyo paca'an moonji'i upah ko kaitn obai porbuatan boi' nantai.
Tujuan sumbakan pakai' urakng jaro
(6:2-4)
2Contohnyo, timpu kaitn moonju' sumbakan pakai' urakng jaro, jangan buhau agatn hal nantai. Boko urakng inyo pompadah boi' inyo bulah sama'an nantai. Sia' gala' moonji'i sumbakan pakai' urakng jaro di hadapan urakng banya' di boko rumah sombayakng huatan di jalatn. Sia' molabuhannyo agatn caro nantai oca' urakng bukai mohormati sia'. Kotakng bondar inyo Aku pandiran ni'in: Sia' udah bodapat upah doi' sosamo monsio. 3Apo, timpu kaitn moonju' sumbakan pakai' urakng jaro, labuhan nantai socaro bototapu'. 4Ongko bayo Allah Bopai kaitn inyo ulih mongotohu'i hal nantai, kinyo urakng bukai. Ongko, Sio paca'an moonji'i upah ko kaitn.”
Tujuan doa
(6:5-15)
(Luk. 11:2-4)
5“Watu kaitn bodoa, jangan sama'an boko urakng inyo pompadah boi'. Sia' gala' bodoa agatn bodiritn di hadapan urakng banya' di boko rumah sombayakng huatan di boko simpakng jalatn bosar. Sia' bodoa agatn caro nantai oca' urakng bukai moniant sia'. Kotakng bondar inyo Aku pandiran ni'in: Sia' udah bodapat upah sia' doi' sosamo monsio. 6Apo watu kaitn bodoa, mansu'cam ko dalapm kamar kaitn, ongko tutupcam lawakng. Bodoacam ko Allah Bopai kaitn inyo ado di tompat tobumbutn nantai. Ongko bayo Allah Bopai kaitn inyo ulih mongotohu'i hal nantai, Sio paca'an moonji'i upah ko kaitn.
7Solaitn nantai, watu kaitn bodoa, jangan bokomanahan. Boko urakng inyo bolupm mongonal Allah pan molabuhan sama'an nantai jam. Sia' bopikir aman sia' momakai banya' pomandiran boulakng-ulakng kali ongko doa sia' paca'an dikabulan. 8Jadi, padohan kaitn bodoa sama'an sia'. Obai, Allah Bopai kaitn udah mongotohu'i kopontikan kaitn sobolupm kaitn mominto ko Sio. 9Obai nantai, kohonda'nyo kaitn bodoa sama'an ni'in:#6:9: Bukainyo bayo ni'in doa inyo ulih diucapan boko murid Yesus, Apo Yesus moonji'i kito contoh doa. Rotinyo inyo pontikng.
‘Bopai koi inyo ado di sorugo,
suciam damo Duatn.
10Datakngcam Koraja'an Duatn.#6:10: Memang Allah Bopai udah jadi Rajo sokarakng, apo Rajo Sitatn ija' ado kuaso di dunia ni'in. Suatu watu nononyo, Yesus paca'an datakng doi' sorugo bobali' ko dunia ni'in. Yesus mongajar boko murid-Nyo bodoa oca' kodatakan-Nyo koduo kalinyo nantai tojadi dalapm watu kinyo manah agi'. Watu nantai, Rajo Sitatn paca'an dikalahan huatan kinyo bokuaso agi' di dunia ni'in.
Jadicam kohonda' Duatn di dunia samo sama'an di sorugo.
11Onji'icam koi ari ni'in pomakatn socukupnyo.
12Amputicam kosalahan koi, samo sama'an koi pan moamputi sotiap urakng inyo bosalah ko koi.
13Jangan mombaba' koi ko dalapm poncoba'an
apo lopasan koi doi' kuaso jahat.
Obai Duatn inyo umputn koraja'an, kuaso agatn komulia'an sampai somanah-manahnyo. Amin’.
14Jadi, amputicam boko urakng inyo bulah kosalahan ko kaitn. Obai aman kaitn moamputi sia', ongko Allah Bopai kaitn di sorugo pan paca'an moamputi boko dosa kaitn. 15Apo aman kaitn co moamputi urakng inyo bulah kosalahan ko kaitn, ongko Allah Bopai kaitn di sorugo pan kinyo paca'an moamputi boko dosa kaitn.”
Tujuan bolampah
(6:16-18)
16“Watu kaitn bolampah, jangan mato-muho kaitn kotiat'an salu'. Boko urakng inyo pompadah boi' molabuhan sama'an nantai. Sia' songajo bulah mato-muho sia' kotiat'an salu' oca' urakng bukai tohu obai sia' tongahan bolampah. Kotakng bondar inyo Aku pandiran ni'in: Sia' udah mondapat upah sia' doi' sosamo monsio. 17Apo watu kaitn bolampah, tapusi mato-muho agatn minya'i kopala' kaitn sama'an biaso. 18Ongko, urakng bukai kinyo mongotohu'i obai kaitn tongahan bolampah. Obai Allah Bopai kaitn inyo kinyo kotiat'an inyo ulih moniant hal nantai. Ongko, Sio paca'an moonji'i upah ko kaitn.”
Jangan mongumpulan kodampuan di dunia
(6:19-24)
(Luk. 12:33-34, 11:34-36, 16:13)
19“Jangan mongumpulan kodampuan pakai' diri kaitn di dunia ni'in. Bubu' ongko togar morusa' bando barakng di dunia ni'in.#6:19: Timpu joman nantai urakng dampu ulih mongumpulan koitn damo logapm inyo mahal. Bubu' ulih bopua' koitn nantai huatan togar ulih morusa' logapm nantai. Apotolagi', pongolit ulih mansu' ko tompat ponyimpatan bando barakng nantai ongko mongolitnyo. 20Apo kaitn gola' mongumpulan kodampuan pakai' di sorugo. Bubu' ongko togar kinyo morusa' bando barakng di sorugo. Pongolit kinyo ulih mansu' ongko mongolitnyo. 21Obai di mono kodampuan kaitn ado, di santai jam hati kaitn ado.”
22“Mato samo sama'an pompolitoan pakai' bukakng-tubuh. Aman mato urakng boi', boroti somuo bukakng-tubuhnyo torakng. 23Apo aman mato urakng jahat, boroti somuo bukakng-tubuhnyo potakng. Jadi, aman pompolitoan umputn kaitn nantai jahat, kojahatan kolai kotakng jahat.”#6:23: Yesus momakai poumpamoan ni'in pakai' mongajar banya' hal. (Tiat catatan di Lukas 11:34.) Mungkitn di si'itn ‘torakng’ boroti urakng inyo hala moonji'i. ‘Golap’ boroti urakng inyo kaha'.
24“Co mungkitn siku' urakng hulutn bokorojo pakai' duo urakng habakng. Aman io molabuhan hal nantai, io bayo paca'an mongasihi salah siku' habakngnyo apo bonci' agatn inyo siku'nyo. Io bayo paca'an sotia ko siku' habakng, apo kinyo sotia agatn inyo siku'nyo. Ubo nian jam agatn kaitn. Co mungkitn kaitn monjadi hulutn Allah huatan co mungkitn monjadi hulutn kodampuan kaitn.”
Jangan kuatir apo bosandar ko Allah
(6:25-34)
(Luk. 12:22-31)
25“Obai nantai, jangan kuatir mongona'i makatan damo minuman pakai' hidup kaitn. Jangan kuatir mongona'i pakai'an pakai' bukakng-tubuh kaitn. Hidup lobih pontikng doi' pomakatn. Bukakng-tubuh lobih pontikng doi' pakai'an. 26Porotiancam boko burukng inyo trobakng. Sia' kinyo botanam-bocuba', huatan kinyo bohanyi di lakau. Sia' kinyo monyimpatn pomakatn dalapm jurukng. Apo Allah Bopai kaitn di sorugo moonji'i pomakatn oca' sia' ulih hidup. Pasti kaitn jouh lobih borogo daripado boko burukng nantai! 27Aman kaitn kuatir pan kaitn co dapat monambah umur kaitn soari pan.
28Jangan kaitn kuatir mongona'i pakai'an. Porotian jam boko kombakng bakukng inyo tumbuh. Boko kombakng bakukng nantai kinyo bokorojo kinyo monjohit. 29Apo dinga'anbo: Sotiap kombakng nantai jouh lobih boi' daripado pakai'an mahal sama'an inyo dipakai Rajo Salomo joman komai! 30Rumput di padakng tumbuh somontaro mo, opat ditota' ongko dicucul,#6:30: Sobagi'an urakng Timur Tongah momakai rumput pakai' suluh ponggonti kayu. tomansu' boko kombakng bakukng nantai. Apo Allah totap bulahnyo boi'. Pasti Allah paca'an monulukng kaitn lobih daripado rumput huatan kombakng di padakng. Apo kaitn kurakng pocayo! 31Obai nantai, jangan kuatir huatan bopandir, ‘La'apo inyo paca'an koi pua'i’? ‘La'apo inyo paca'an koi minum’? ‘La'apo inyo paca'an koi pakai’? 32Boko urakng inyo kinyo konal Allah hala bogoyap somuonyo nantai. Apo Allah Bopai kaitn di sorugo udah tohu somuo kopontikan kaitn nantai. 33Jadi, tolobih doholu goyapcam Koraja'an Allah huatan kobondaran-Nyo. Somuonyo paca'an ditambahan ko kolai. Ongko lopas nantai, somuo kopontikan kaitn paca'an dionju' ko kaitn jam. 34Obai nantai, ari ni'in jangan kuatir mongona'i ari hobu'. Hobu' urusan hobu'. Ado cukup banya' kosusahan dalapm soari pakai' dipikiran.”#6:34: Ayat ni'in kinyo boroti kito ulih bogoyap kosonangan sotiap ari apo co bopikir mongona'i ari hobu'. Pikiran nantai salah (1Kor. 15:32; Luk. 12:19-20). Ayat ni'in boroti, aman kito bosandar ko Allah, sotiap ari kito ulih moatasi kosusahan inyo ado.
ప్రస్తుతం ఎంపిక చేయబడింది:
Matius 6: TBDS
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
