Fakasigadan 11
11
Tagsis Babilunya fag Bale Ngabat
1Ginanya, fagayu taw sas fagdaul daga sadi way at fangaringang. 2Kaduge ngay taw gadgalinan at fagbanwanan siginans fakamenitan sas fakayabian, kanya fagayu andasug sa sik datag sas talun Sinar,#11:2 Sinar: talun Babilunya. ay gbanwan sanya. 3-4Kanya fag ngay taw gkamatoan te, “Nangawat tam sik furuan daul at ke bale ngabat gdasug sas banwa, laman kadungug tam ay wa tam gsaruayan sas fagdaul daga.” Ay kanya fagayu at famale, abat ngate gang, lutuk way at mafasugban fia laman matugas mandi. Ay at fandafut at madai fag langis malayung.
5Nu katanya, Yawi natustus siginans banwa laman nanlag kafag ngay taw nu kawat kafag furuan daul ay bale ngabat. 6Yawi nalong te, “Kanya fag ngay taw masadi anggan at fangaringang. Tuy at famagsigad yay lang at fagnamakamulunun ban! Ay wa glugo ya namakamulun wan nusnge wain at fakaylatun. 7Nu katanya, gtustus watam laman namasadsamanan tam at ngay fangaringang laman ban wa gtodtogdungugan ya.” 8Nu katanya, Yawi nafasadsamanan kanya fag ngay taw at fangaringang ay nasalag wan nu kawat kafag furuan daul. 9Kafag furuan daul nafangayan te, Babel.#11:9 Babel: furuan Babilunya. Sas Ebreu, Babel at masuad te, Masagsagan. Kata kafag ngayan, Yawi nafasadsamanan taw at ngay fangaringang, ay sanya ginan fag furuan, Yawi nafasaruayan anya fagayu sas fagdaul daga.
Sem at ngay Kasugfunanan
10Katatuy at fansulitan sabaliwa Sem at ngay kasugfunanan. Nu nlangfe lino daul, Sem at banwa sadik sandan, ay ginanya at baguama Arfaksad ansalug.
11Ay siginan Arfaksad nu kasalug, Sem nu gleleg limak sandan yak banwa ay anfamut yay at ngay sisian.
12Arfaksad at banwa gina tuluk safulu e lima, ansalug at baguama Sela. 13Ay siginan Sela nu kasalug, Arfaksad nu gleleg ufatk sandan tulu yak banwa ay anfamut yay at ngay sisian.
14Sela at banwa gina tuluk safulu, ansalug at baguama Eber. 15Ay siginan Eber nu kasalug, Sela nu gleleg ufatk sandan tulu yak banwa ay anfamut yay at ngay sisian.
16Eber at banwa gina tuluk safulu e ufat, ansalug at baguama Peleg. 17Ay siginan Peleg nu kasalug, Eber nu gleleg ufatk sandan tuluk safulu yak banwa ay anfamut yay at ngay sisian.
18Peleg at banwa gina tuluk safulu, ansalug at baguama Reu. 19Ay siginan Reu nu kasalug, Peleg nu gleleg duak sandan siam yak banwa ay anfamut yay at ngay sisian.
20Reu at banwa gina tuluk safulu e dua, ansalug at baguama Serug. 21Ay siginan Serug nu kasalug, Reu nu gleleg duak sandan fitu yak banwa ay anfamut yay at ngay sisian.
22Serug at banwa gina tuluk safulu, ansalug at baguama Nakur. 23Ay siginan Nakur nu kasalug, Serug nu gleleg duak sandan yak banwa ay anfamut yay at ngay sisian.
24Nakur at banwa gina duak safulu e siam, ansalug at baguama Tera. 25Ay siginan Tera nu kasalug, Nakur nu gleleg sadik sandan labi siam yak banwa ay anfamut yay at ngay sisian.
26Tera at banwa gina fituk safulu, ansalug at ngay baguama: Abram, Nakur ay Aran.
Tera at ngay Kasugfunanan
27Katatuy at fansulitan sabaliwas Tera at ngay kasugfunanan.
Tera at baguama tulu: Abram, Nakur ay Aran. Ay Aran, Lut at mama.
28Aran anbul sis furuan Ur, si sangay taw Kaldea#11:28 taw Kaldea: Ngay taw tagbanwan ebi sas fakayabian sis talun Babilunya. Abandi kafag ngay taw Kaldea ansik ngay taw Babilunya. at talun, ay sit fakasalugan fag furuan. Kanya anbul gina yay at mama Tera gleleg. 29Abram nafamubay Saray, ay Nakur nafamubay Milka. Milka ay Iska at mama Aran. 30Saray wa gsisian aroro garanas.
31Tera nalao siginans Ur, taw Kaldea at furuan daul, gadgaloan at baguama Abram ay at nugang Saray ay at fufu Lut. Lut, Karan at baguama. Kanya fagayu at algan gtaglayun sas Kanaan, ay dewa katanya, nu ndasug sas furuan daul Karan, kanya fagayu sanya wan nu gbanwan. 32Ay sanya wan Tera nu kabul, gina at banwa duak sandan lima.
ప్రస్తుతం ఎంపిక చేయబడింది:
Fakasigadan 11: OCCT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Copyright © 2021 by OMF International, Philippines
