NAANAA 6
6
Bisãsirinɔ yakanaa
1Kũ bisãsirinɔ nà kɛna nà òtɛn dagula òtɛn nɛ́nɔgbɛ̃nɔ i, 2akũ Luda nɛ́nɔ è bisãsiri nɛ́nɔgbɛ̃ pìnɔ mana, akũ òtɛni ń sɛ́ ń pɔyeinaaa. 3Akũ Dikiri pì: Ma Nini nigɔ̃ kú bisãsirinɔ gũn gɔrɔ sĩnda pínkiro, zaakũ mɛ̀barademɛ. Ń gɔrɔnɔ nigɔ̃ wɛ̃̀ basuddomɛ. 4Gbɛ̃ gbã̀nanɔn kú andunia gũn gɔrɔ birea kũ gɔrɔ bire gbɛrao dɔ, gɔrɔ kũ Luda nɛ́ pìnɔ bisãsiri nɛ́nɔgbɛ̃nɔ dɔ̃̀ nɔgbɛ̃nɔ ũ ò nɛ́nɔ ì kũńwo. Ń nɛ́ pìnɔmɛ gɔ̃sa gbãna kũ ń tɔ́ bò zaa káakunɔ ũ.
5Dikiri è kũ bisãsirinɔ yã vãni kɛna dasi andunia gũn. Gɔrɔ sĩnda pínki yã bɛ̃̀nɛ laasunn òdigɔ̃ lɛ́ ado, 6akũ a pɔ yàka bisãsiri kũ à kɛ̀ zĩtɛ yã musu. À laasun pãnde lɛ̀, 7akũ à pì: Mani bisãsiri kũ ma kɛ̀ zĩtɛ wara, bisãsirinɔ kũ nɔ̀bɔnɔ kũ pɔ́ kũ òdi táa o kũ kùaonɔ kũ bãnɔo, zaakũ ma pɔ yàka ń kɛna yã musu. 8Ama Nuhu Dikiri pɔnna lè.
Nuhu yã
9Nuhu burinɔ yãn dí. Nuhu bi gbɛ̃ manamɛ. Kũ à kun, a mɛ̀n do mɛ́ à taari vĩro à táa ò kũ Ludao. 10Nuhu nɛ́gɔ̃gbɛ̃nɔ ì gbɛ̃nɔn aakɔ̃, Sɛmu kũ Hamuo kũ Yafɛtio. 11Luda è andunia gbɛ̃nɔ yàka ń pínki, taarikɛna andunia pà. 12Kũ Luda andunia gwà, à è à yàka, zaakũ gbɛ̃ sĩnda pínki zã̀ zɛ́a.
13Akũ Luda pì Nuhunɛ: Mani gbɛ̃ sĩnda pínki kakatɛ, kũ ń yãin taarikɛna dà anduniala. Mani ń kakatɛ lɛɛlɛ kũ anduniaomɛ. 14Ǹ gó'itɛ kɛkɛ kũ lí lɛ̀kɛtɛɛo ǹ kpɛ́nɛnɔ kɛ a gũn ǹ ɔ̀da maa a gũn kũ a kpɛo. 15Ĩni gó pì kɛ lán dí bà. A gbã̀na gã̀sãkuru wàa do kpɛ́ basɔɔro, a yàasa gã̀sãkuru bupla akuri, a lei sɔ̃ gã̀sãkuru baraakuri. 16Ǹ gó pìi musu pápa, gbasa ǹ guforo tó a dagura gwe gã̀sãkuru do zaa a musu kpa. Ǹ gbà da gó pì kpado ǹ gó pì kɛ didikɔ̃ana lɛu aakɔ̃.
17Makũ sɔ̃ mani tó í da anduniala, de mà pɔ́ wɛ̃̀ndide kũ òdi wesa bonɔ kakatɛ ń pínki. Pɔ́ kũ ò kú andunia gũnnɔ ni gaga pínki. 18Ama ma bàka nigɔ̃ kú kũnwo. Ĩni gɛ̃ gó pìi gũn kũ n nɛ́gɔ̃gbɛ̃nɔ kũ n nanɔo kũ n nɛ́nɔ nɔnɔo. 19Ĩni pɔ́ wɛ̃̀ndide pínki sɛ́ ǹ gɛ̃ kũńwo mɛ̀n plapla de onigɔ̃ kun kũ wɛ̃̀ndiio. 20Bã burinɔ kũ nɔ̀bɔ burinɔ kũ pɔ́ kũ òdi táa o kũ kùao burinɔ pínki oni su n kĩnaa mɛ̀n plapla de ògɔ̃ kun. 21Ǹ pɔ́ble kũ òdi ble sĩnda pínki sɛ́tɛ ǹ kakara á zàna ũ, ákɔ̃nɔ kũ pɔ́ pìnɔ. 22Akũ Nuhu kɛ̀ lɛ à yã kũ Luda ònɛɛ kɛ̀ pínki.
ప్రస్తుతం ఎంపిక చేయబడింది:
NAANAA 6: BB2005
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bisã Bible © SIM International, 2005.
