लूका 20
20
यहूदीमिमकु ङाउमिमका येशूकु साखामकु दुथाम हिलाबेम्डिम
(मत्ती २१:२३-२७; मर्कूस ११:२७-३३)
1कोलेम येशूका सो़रनेमगोडा मु़चु़मिमलाई सीत्तो नुङ जो़पा-सेला थो़बेत्तोङा लेट्मिडिम बाइडा। ङाउ डु़म्लाचो़मिम, यहूदीकु डु़म्ला सीपा पातु़म्रीमिम मा ङाउमिम उनीमाडा रोम्डी, 2मा मेर्मिमका गुमीनुङ हिलाबेम्डी, “उहेम साखामका गाना ओराम खारी बेत्तोङा लेना, गानालाई ओराम साखाम सु़का ग्वाना? गुकुनुङ र्वाका।”
3येशूका मेर्मिमलाई र्वाम्डी, “गो गानीलाई वो कोले ल्वा हिलाबेउ, मा गोलाई सो़नी। 4यूहन्नाका कु-रु़दु़म ग्वाक्पा साखाम माम्चु़नीलाम ल्वास्तु़म बाइडा डे मु़चु़मिमलाम डे?”
5ओराम ल्वा थो़म्डिमा मेर्मिमका उनी त्वाप-त्वापडा आरे र्वा बोमु चो़म्मिडी, “माम्चु़नीका र्वाक्ति माला, ‘गानी हेङा गुडला थो़रमेलु़निवा?’ र्वा 6मु़चु़लाम र्वाकी माला खोत्ले मु़चु़मिमका गुइलाई लुङका ओप्सामी हेङालोने यूहन्ना आच्छाङा माम्चु़नीलाम-जेपा मु़चु़ र्वाक्साका मेर्मिमका थो़र लु़म्डिम बु।”
7मेम्मिमका मेर्मिमका र्वाम्डी, “यूहन्नाका बालामका साखाम ल्वास्तु़म मेराम गुकु मेचकु।”
8मेकोतिमा येशूका मेर्मिमलाई र्वाम्डी, “मेम माला गो उहेम साखामका ओराम खारी बेत्तोङा लेट्पु र्वाक्साका गानीनुङ मेसो़उ।”
बोम्था बेपा मु़चु़मिमकु सीसि-सो़म्दी
(मत्ती २१:३३-४६; मर्कूस १२:१-१२)
9येशूका मु़चु़मिमनुङ ओराम सीसि-सो़म्दी र्वाम्डी: “कोले मु़चु़का उ ये-दडा अङ्गूर ख्लियु़डु़। मेम्मा बोम्था बेपा मु़चु़मिमलाई ग्वाक्जो़ल्लु़मा हापा थकाम लागि गु वाङमिङा नेब्दीडा बाप्डा लस्ता।#यशै ५:१ 10अङ्गूर प्रो़न्मु थारीका उ ये-दकु मु़चु़का अङ्गूरकु दो़दो़वा माल्ला कोले उ डु़ल्चो़लाई मे बोम्था बेपा मु़चु़मिमकाडा थु़र्स्तु़। लावो बोम्था बेपा मु़चु़मिमका मे डु़ल्चो़लाई याल्मिडिमा मेडेङा थु़र्सोम्डी। 11गुका कोङमी डु़ल्चो़लाई थु़र्स्तु़, लावो मेर्मिमका मेरामलाई वो उ साम्ती मेजु़ल्साका याल्मिडिमा मेडेङा थु़र्सोम्डी। 12गुका आथावो कोङमी डु़ल्चो़लाई मेर्मिमकाडा थु़र्स्तु़। लावो मेर्मिमका मेरामलाई वो छो़म याल्मिडिमा खान्सोम्डी।
13“मेकोतिमा अङ्गूर ये-दकु मु़चु़का मिम्स्ता, ‘गो हाम बोमु? गो छो़म द्वाक्पुमिम आ तारापाचो़लाई मेर्मिमकाडा थु़रु। गुलाई ने मेर्मिमका डोक्पु मिम्मी डे।’
14“लावो मे बोम्था बेपा मु़चु़मिमका मेरामकु तारापाचो़ बिक्तोङा बेपा ल्वाम्डिमा उनी त्वाप-त्वापडा आरे र्वा बेम्डी, ‘होनो बिक्तोङा बेपा मु़चु़ ने अङ्गूर ये-द डार्पा उ चो़ सो़। गुइ मेरामलाई सेडी, मा खोत्ले ओर्मिम ये-द इकीमाङा दु़म।’ 15मेम्मिमका मेर्मिमका गुलाई अङ्गूर येलामका थु़त्तो पाखा ख्लुम्डिमा सेट्मिडी। ये-दकु मु़चु़का मेर्मिमलाई हे बु़मी? 16गु रोमा मे बोम्था बेपा मु़चु़मिमलाई सेडु़मी, मा अङ्गूर ये कोङमीलाई ङा ग्वाकु़मी।” मु़चु़मिमका ओराम थो़म्डिमा र्वाम्डी, “आरेप्माम हेल्लो वो मेदु़म्नु़।”
17मेकोतिमा येशूका मु़चु़मिमथो़ रेप्तो र्वाम्डी, “मेम माला माम्चु़नीकु ओराम सिजेमका हाम र्वामु मालु़मिम?
‘नेम बनेबेपा मु़चु़मिमका पार्मिडिम लुङङा
नेमकु फारगोयु़म डोक्पु सुरलुङ दु़स्ता।’#भज ११८:२२
18“उहेम मु़चु़ मेराम लुङडला दुडु़, मेराम मु़चु़ स्याकारिसी, मा मेराम लुङ कोङनिम मु़चु़डला आल्स्ता माला योप्डु़मा सेडु़।”
19मेकोतिमा यहूदीकु डु़म्ला सीपा पातु़म्रीमिम नुङ ङाउ डु़म्लाचो़मिमका ओराम सीसि-सो़म्दी आकी कोर्थो़लाम र्वाक्तो लेन्मी र्वाक्पा चम्डी। मेम्मिमका मेर्मिमका मेकोतिलोङा येशूलाई चु़म्मु माल्मिडी। लावो मे मु़चु़मिमडाम मेर्मिम ङिम्डी।
रोमी हप कैसरलाई सोमु कर
(मत्ती २२:१५-२२; मर्कूस १२:१३-१७)
20मेर्मिमका खाप रेम्बाल्मिडी, मा मेर्मिमका थो़रलु़इमिम लिसिक्पा चो़पाचो़मिमलाई येशूकाडा ल्वा खुप्डा थु़र्मिडी। येशूका जेमिमिम कोङनिम ल्वाडा लु-फेले बेसाका चु़म्मुमा रोमी सरकारकु ल्वाडा ग्वामुकाम बाम्डी। 21मेकोतिमा मे ल्वा खुपा मु़चु़मिमका हिलाबेम्डी, “ङाचो़, गानी र्वानिमिम नुङ सीनिमिम ल्वा जो़पा बु, मा सु़लाई वो चोमिक्सी मेबोनी, लावो आच्छाङा माम्चु़नीकु लाम्दी सीनिमी र्वाक्पा गुकु चकु। 22गुकु रोमी हप कैसरलाई कर सोक्सी नु़ डे मेनु़ डे?”
23लावो गुमीका मेर्मिमकु लु-फेले थेसिथेट्मिडिमा मेर्मिमलाई र्वाम्डी, 24“गोलाई कोले खउलुङ रेम्बेट्ङिनी। आसिन्डा सु़कु ङाली नुङ नङ र्याक्मा बु?” मेर्मिमका र्वाम्डी, “कैसरकाम।” 25येशूका मेर्मिमलाई र्वाम्डी, “मेम माला कैसरकाम कैसरलाई ङा ग्वाक्नी, मा माम्चु़नीकाम ने माम्चु़नीलाई ङा ग्वाक्नी।” 26मेम्मिमका मु़चु़मिमकु ङादोडा मेर्मिमका येशूका जेम्डिम ल्वालाम चु़म्मु मेचाप्मिवा। मेम्मा गुमीका र्वाम्डिम ल्वा थो़म्डिमा मेर्मिम ङाङाया दु़म्साका बाम्डी।
सिमुलाम बम्गेमु नुङ लालीकुन्दाकु दुथाम हिलाहिसी
(मत्ती २२:२३-३३; मर्कूस १२:१८-२७)
27मेकोतिमा कोले-नले सदुकीमिम येशूकाडा रोम्डी। सिपा मु़चु़ बगे र्वाक्पा ल्वाडा मेर्मिम थो़र मेलु़म्थाल्मिवामका मेर्मिमका येशूनुङ हिलाबेम्डी,#थु़र्मा २३:८ 28“ङाचो़, मोशाका गुइलाई डु़म्ला र्याक्साड्डाम बाइडा, कोले मु़चु़कु उ वाका लालीकुन्दा बु़डु़, मा उ चो़ मेदु़म्साकाङा सिडा माला, उ ल्वाकका मेरामकु नाइमेनुङ लालीकुन्दा बेसाका उ वाकाम लागि वो चो़ कम्सामु बासी।#व्य २५:५ 29कोङ नेमडा येतले (७) तारापा वा-ल्वाक बाम्डी। उनी वाका लालीकुन्दा बु़डु़ लावो उ चो़ मेदु़म्साकाङा सिडा। 30मेम्मिमका लु़न्देका उ वा-देल्मीनुङ लालीकुन्दा बु़डु़, लावो गु वो सिडा। 31मेकोतिमा उ ल्वाक चु़न्देका वो वा-देल्मीलाई लालीकुन्दा बु़डु़ मा येतले (७) वामिम खोत्लेकाङा मे मेसेमनुङ लालीकुन्दा बेम्डी। लावो खोत्लेकाम ङा उनी चो़-मा मेदु़प्साकाङा सिम्डी। 32चङडा मेराम मेसेम वो सिडा। 33मेम्मिमका सिमुलामका बम्गेमु नेम मेराम मेसेम मेर्मिमगोडाम उहेमकाम नाइमे दु़म? हेङालोने मेराम खोत्लेकामङा नाइमे दु़स्ताम बाइडा।”
34येशूका मेर्मिमनुङ र्वाम्डी, “ओ सुबुडा मु़चु़मिमका लालीकुन्दा बोमी, मा बोम्सामी। 35लावो सिमुलामका बक्साका पाह्रीथो़ लमु घ्रेट्पा मु़चु़मिम ने मेम्साका लालीकुन्दा मेबोमी मा मेबोम्सामी वो। 36मेर्मिम पाह्रीचो़ होप्मामङा दु़म्मी, मा मेसिमी। हेङालोने सिमुलामका बम्गेम्डिमका मेर्मिम माम्चु़नीकु चो-चु़सु़ सो़। 37मु़चु़मिम सिमुलामका बम्गेमी र्वाक्साका मोशाका घ्रु़पाम बाट्पा भुत्राकु दुथाम र्याक्तु़म ल्वाडा जो़होमका रेम्बु़डु़म बु। हेङालोने मिप्रङमालाई मोशाका ‘अब्राहामकु माम्चु़नी, इसहाककु माम्चु़नी मा याकूबकु माम्चु़नी’ र्वाक्ताम बु।#प्रस ३:६ 38गुमी सिपा मु़चु़मिमकु माम्चु़नी मेएँ। लावो नु़पा मु़चु़मिमकु माम्चु़नी सो़। हेङालोने उनीमा लागि खोत्ले मु़चु़मिम नु़पा बुमी।”
39मेसिन्डा येम्तासिट्पा यहूदीकु डु़म्ला सीपा पातु़म्रीमिम कोङ-कोङका र्वाम्डी, “ङाचो़, गानी र्वाक्निम जो़पा ङा।” 40मेकोतिमा सु़का वो गुमीलाई आथावो कोङनिम ल्वा हिलाबोमु ङिम्डी।
ख्रीष्ट सु़कु चो़?
(मत्ती २२:४१-४६; २३:१-३६; मर्कूस १२:३५-४०)
41येशूका मेर्मिमलाई र्वाम्डी, “हेसाका मु़चु़मिमका ख्रीष्टलाई हप दाऊदकु चो़ र्वामिमिम? 42#भज ११०:१हेङालोने कोमु काम्सोकु खाजेमडा दाऊद उ त्वाकाङा र्वा,
‘मिप्रङमा माम्चु़नीका आमा ङाचो़ ख्रीष्टनुङ र्वाम्डी,
43“गो इमा मिक्सीकु पिमिमलाई इ फेमखेलगोयु़ मेबेथु़मसम्म
गाना आमा जो़पलामका बाया”।’
44आरेसाका दाऊदका ख्रीष्टलाई ‘ङाचो़’#२०:४४ दाऊद हपका रोक्पा मसीहलाई उ चो़-चु़सु़डाम वो डोक्पु मिम्डु़म। र्वा मा हेसाका ख्रीष्ट उ चो़ दु़स्ता मा?”
45मेकोतिमा सेर्पा मु़चु़मिमका गुमी जेम्डिम थो़म्डिम बाम्डिलो गुमीका उनी सीसिपामिमलाई र्वाम्डी, 46“मोशाकु डु़म्ला सीपा पातु़म्रीमिमडाम चङचङया बानी वो, माम्चु़नीकु लाम्दीडा लाम्दिपा होङङा ल्वाम्सिमु लागि क्वा लु़पा हुम-ये फसिक्साका आनो-मेनो लाम्दिपा, मा मु़चु़मिमकु ङादोडा सेव सान्ला सो़सिक्पा, घ्रो़म्दीनेमडा ङादोनोम डोक्पु ङाउमिम गन्खोपडा गन्मु माल्पा, मा ग्रुला पेखोपडाम डोक्पु मु़चु़ गन्खोपडा गन्मु माल्मी। 47मेर्मिमका अर्दोमेकु खाप्ची लु-फेले बोमिमा पोम्सामी, माम्चु़नीकु लाम्दीडा लाम्दिपा लिम्सिमु लागि छो़म दु़पा सो़म्दी बोमी। माम्चु़नीका मेर्मिमलाई छो़म इम्मु मेझापा देन्दे ग्वामी।”
ప్రస్తుతం ఎంపిక చేయబడింది:
लूका 20: THUL
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Wycliffe Bible Translators, Inc. All rights reserved.
