लूका 17
17
पाचो नुङ थो़र
(मत्ती १८:६-७,२१-२२; मर्कूस ९:४२)
1येशूका उनी सीसिपामिमलाई र्वाम्डी, “मु़चु़मिमलाई छु़ल बेबेट्पा मेजो़पा ल्वामिम रोमी। लावो मु़चु़मिमलाई मेम बेबेट्पा मेराम मु़चु़ ने वाइतो! 2उहेम मु़चु़का गोडला थो़रलु़पा ओ याक्के मु़चु़मिमगोडाम कोलेलाई छु़ल बेबेडु़, मेरामकु लक्चाडा खुरुक लुङ चेन्मुमा दिरिदिनगोयु़ घ्रोम्सोमु ङा मेरामकाम लागि जो़पा दु़म। 3मेम्मिमका चङचङया बानी! गोडला थो़र बेपा कोलेका छु़ल बु़डु़म बु माला मेरामलाई उ छु़ल मिम्सिबेट्नी। गुका उ छु़ल न-गोलामका मिम्सिक्साका माम्चु़नीडा ख्लोस्ता माला मेरामलाई पाचो ग्वाक्नी।#मत्ती १८:१५ 4मेराम मु़चु़का कोलेमका येतले खेप गानीलाई मेजो़पा बेन्नी, मा उ छु़ल येतले खेपङा न-गोलामका मिम्सिक्साका ख्लोसिमा इनीमाडा रोमा पाचो बिइयु़ माला मेरामलाई पाचो ग्वाक्नी।”
5उनी थु़र्मामिमका ङाचो़नुङ र्वाम्डी, “आकीमा थो़र बर्बेसाट्की।”
6ङाचो़ येशूका मेर्मिमलाई र्वाम्डी, “गानीनुङ रायोकु कोले मा कोतिम याक्के थो़र बु माला ने गानी ओ नापातु़मकु धक्सालाई ‘बुल्सामा दिरिदिनयु़ क्रोसा’ र्वानी माला मेरामका गानी र्वानिमिम होङङा बु़।
7“गानीगोडाम कोङनिमकु डु़ल्चो़ ब्याङसी जोसाका लावो भेन्दा रेप्साका लावो ख्लोसिसाका रोलो, मेरामका उ डु़ल्चो़लाई ‘जाम पेप्डा गन्सा’ बु़ मा? 8हाम गुका आरे मेर्वा मा? ‘आमा लागि जाम खोङसाक्ङी, मा थ्वाक्पुरी खिम्सामा गो पोमु-डुमु दु़म्पुमिमसम्म आमा चापे-डुपे बे। मेम्मा कोङङा गाना पे-डुङा।’ 9गुका र्वाक्ताम होम्साका खारी बु़डु़मका हाम गुका उ डु़ल्चो़लाई आलासो़ ग्वाकु़ मा? मेग्वाकु़। 10मेम्साकाङा गो गानीलाई बेबेट्निनिम खोत्ले खारी बोमु दु़म्निमा र्वाक्नी, ‘गुकु आला-तोमा र्वामु घ्रेट्पा डु़ल्चो़ मेएँ। गुकु ने हाम बोमु बासिक्पा बाइडा, मेराम कोङङा बेत्तोकोम सो़’।”
येशूका जोन बेट्पा को धु़म (१०) मु़चु़मिमलाई सबेट्मिडिम
11येशू यरूशलेमथो़ लक्तोङा लेट्मिडिलो, गुमी सामरिया नुङ गालीलकु थेतेडाम रिमोकोम्सी दु़म्तो लम्डी। 12गुमी मेसिन्डाम कोले देलडा हुम्डिलो जोन बेट्पा को धु़म (१०) मु़चु़मिम उनीमाडा बिक्तोङा बेम्डी। किचो़ होनोङा येम्सिम्डिमा, 13मेर्मिमका डोक्पु लो़लामका र्वाम्डी, “ए येशू ङाचो़, गुकुडला न-थो़म रेम्बेनी।”
14येशूका मेर्मिमलाई ल्वाम्डिमा र्वाम्डी, “लक्निमा डु़म्लाचो़काडा इनी त्वापङा रेम्बेसिट्नी।”#१७:१४ यहूदीमिमगोडा जोन बेट्पा मु़चु़मिमलाई उनी त्वापनुङ कोदेप बुमु उनी डु़म्लाका मेग्वाक्थालु़वा। जोन बेट्पा मु़चु़ सस्ताम रेम्बोमु ङादो डु़म्लाचो़का गुलाई रेमु, छाम्मु बास्थाल्ला, मेम्मा कोङङा गु वो वाङमिम यहूदीमिमनुङ कोदेप बुमु ल्वास्थाल्लु़। लेवी १४:२-३२ डा रेप्नी। मेकोतिमा मेर्मिम लम्डी होङङा सम्डी।#लेवी १४:१-३२
15मेर्मिमगोडाम कोलेका उ त्वाप सस्ताम चडु़मा येशूकाडा ख्लोस्तामा डोक्पु लो़लामका माम्चु़नीकु नङ कोस्तु़। 16मेकोतिमा येशूका मेरामलाई सबेट्मिडिमका गुमीलाई आलासो़ ग्वाक्तो उनी खेल चु़म्डु़। मेराम सामरियाडाम मु़चु़ बाइडा।
17येशूका र्वाम्डी, “हाम गो को धु़म (१०) मु़चु़मिम खोत्लेङा सबेत्तोमिम मेएँ मा? वाङमिम गुले (९) मु़चु़मिम बान्ते लम्डी? 18ओ मेयहूदी मु़चु़डाम वाङमिम सु़ वो मु़चु़मिम हाम माम्चु़नीकु नङ कोप्डा मेख्लोसिक्मिवा?” 19मेकोतिमा येशूका सामरियाडाम मु़चु़लाई र्वाम्डी, “बका, मा गाना लक्सा, गोडला थो़र लु़न्नामका गाना सेल्सिट्नाम बु।”
रोक्तोङा बेपा माम्चु़नीकु किब्दी
(मत्ती २४:२३-२८,३७-४१)
20माम्चु़नीकु किब्दी हाम्सी रो र्वाक्साका फरिसीमिमका हिलाहिसी बेम्डिलो येशूका र्वाम्डी, “मु़चु़कु मिक्सीका ल्वासिक्पा बेसाका माम्चु़नीकु किब्दी मेरो, 21सु़का वो माम्चु़नीकु किब्दी ‘रेप्नी, आसिन्डा बु! मेसिन्डा बु!’ र्वामु मेचाप्सु़। हेङालोने माम्चु़नीका गानीगोडा साखाम थो़मी।”
22मेकोतिमा गुमीका उनी सीसिपामिमलाई र्वाम्डी, “मिनीचो़ रोक्पा थारीकु कोङ थारी ल्वापा न बोनिमिम थारी रो, लावो गानी मेल्वानी। 23मु़चु़मिमका गानीलाई मिनीचो़ आसिन्डा बु, मेसिन्डा बु र्वामी। लावो मेर्मिमकु ल्वा मेथो़नी, मा मेर्मिमकु चङचङ मेलाम्दिनी। 24हेङालोने ब्ल्याक्ची ओप्डु़लो धामुकु फारलामका धामु बिर्खोपसम्म दो़मिम होङङा मिनीचो़ योमिमनेम दु़म। 25लावो ङादो गुका हापा दु़खा इम्मु बासी, मा आथामबिलिम मु़चु़मिमलामका नाप्छु़न्ला सो़म्सिमु बासी।
26“नोआ बाइडाम थारीका दु़स्ताम होङङा मिनीचो़ योमिमनेम वो दु़म।#उत ६:५-८ 27नोआ कुबी-बोक्सागोनो मेहुथु़मसम्म मु़चु़मिमका ग्रुला पेत्तो-डुत्तोङा लेट्मिडी, लालीकुन्दा बेम्डिम बाम्डी। मेकोतिलो डोक्पु होङकोर्मा योक्तामा खोत्ले मु़चु़मिमलाई लडु़मी, मा सिम्डी।#उत ७:६-२४
28 #
उत १८:२०–१९:२५
“लोत बाइडाम थारीका दु़स्ताम होङङा ओराम सु़म्दिसेरडा दु़म, मु़चु़मिमका पेत्तो-डुत्तो लेट्मिडी, भ्रेट्पा, भ्रेपा बेत्तोङा लेट्मिडी, मा-के ख्लित्तो नुङ नेम बनेबेत्तोङा लेट्मिडी। 29लोतका सदोम शहर डिड्डु़म थारीकाङा पाह्रीलामका मु नुङ गन्धक योक्तामा मेर्मिम खोत्ले मु़चु़ ख्याम्डी।
30“मिनीचो़ योमिमनेम वो मेम्साकाङा मु़चु़मिम मेझो़म्सिट्मी। 31मे नेम उहेम मु़चु़ नेमकु कौसीडला बु मेराम मु़चु़ उ खाप्ची माल्ला नेमगोयु़ मेयोनु़। मेम्साकाङा उ ये-दडा बाट्पा मु़चु़ हाम-हुम माल्ला उ नेमडा मेरोनु़।#मत्ती २४:१७-१८; मर्क १३:१५-१६ 32लोतकु नाइमेलाई हाम दु़स्ताम बाइडा मिम्नी!#उत १९:२६ 33उहेम मु़चु़का उ साम जु़ल्मु न बु़ मेरामका त्वारो़म मेल्वासु़। लोवो उहेम मु़चु़का आमा लागि उ साम फ्याक्सु़ मेरामका त्वारो़म ल्वासु़।#मत्ती १०:३९; १६:२५; मर्क ८:२४; यूह १२:२५
34“गो गानीलाई र्वाङु, मेराम सिन्था नले मु़चु़ कोले प्लानडा अम्ल्याक्पा दु़म्ची। माम्चु़नीका कोलेलाई पाह्रीला लमी, मा कोलेलाई डिन्जो़ल्मी। 35नले मेसेमका कोयोङा खुरुकडा फुल हिक्तोङा बेपा दु़म्ची। कोलेलाई माम्चु़नीका पाह्रीला लमी, मा कोङमीलाई डिन्जो़ल्मी। 36[नले मु़चु़ ये-दडा खारी बेत्तोङा बेपा दु़म्ची, कोलेलाई माम्चु़नीका पाह्रीला लमी, मा कोङमीलाई डिन्जो़ल्मी।”]#१७:३६ ओराम पद माके-माकेम कोङनिम ग्रीक बाइबलडा मेडार्सी।
37मेकोतिमा मे सीसिपामिमका येशूनुङ हिलाबेम्डी, “ङाचो़, ओर्मिम ल्वा बान्ते दु़म?”
गुमीका मेर्मिमलाई र्वाम्डी, “खिरिजङमामिम खोम्सिमिलो मेसिन्डा सिनो दु़म र्वाक्पा छेखोप दु़म्मिम होङङा मिनीचो़ योलो वो छेखोप दु़म सो़।”
ప్రస్తుతం ఎంపిక చేయబడింది:
लूका 17: THUL
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Wycliffe Bible Translators, Inc. All rights reserved.
