लूका 14
14
येशूका ङेम्सिमुनेम उ ल्वा-खेल होम्पा मु़चु़लाई सबेट्मिडिम
1कोङ ङेम्सिमु नेम येशू कोले डोक्पु फरिसीकु नेमडा ग्रुला पेप्डा लम्डी। मेसिन्डा खोम्सिक्पा फरिसीमिमका उनी चो़पा बेत्तोङा लेट्डिम बाइडा। 2उ ल्वा-खेल होम्पा कोले मु़चु़ येशूकु ङादोडा गन्तासिट्डाम बाइडा। 3गुमीका मोशाकु डु़म्ला छो़म थेट्पा मु़चु़मिम नुङ फरिसीमिमलाई हिलाबेम्डी, “ङेम्सिमुनेम नो़पामिमलाई सबेन्मु डु़म्लानुङ घ्रो़म डे मेएँ?” 4लावो मेर्मिम लिबा बाम्डी, मा गुमीका मे नो़पा मु़चु़डला ल्वा जु़ल्साका सबेट्मिडी, मा थु़र्सोम्डी।
5मेकोतिमा येशूका मेर्मिमलाई र्वाम्डी, “गानीगोडाम सु़का इनी त्वाकु बेनो लोवो गधा लोवो ङेम्सिमुनेम पोलु़मगोयु़ आल्स्ता माला दाला-दाला पाखाला मेख्लुकु़ मा?”#मत्ती १२:११ 6मेर्मिमका ओराम ल्वाकु दुथाम हाम वो र्वामु मेचाप्मिवा।
7मेसिन्डा ग्रुला पेप्डा रोक्पा बोच्चो़मिमका डोक्पु मु़चु़मिम गन्खोपडा गन्मु माल्मिडिम ल्वाम्डिमा येशूका ओराम सीसि-सो़म्दी र्वाम्डी: 8#हितो २५:६-७“लालीकुन्दा बोमिमिम नेमडा गानीलाई कोङनिमका ग्रुला पेप्डा येट्नी माला डोक्पु मु़चु़ गन्खोपडा मेगन्नी। हेङालोने गानीडाम डोक्पु मु़चु़लाई वो मेसिन्डा येड्डु़म दु़म्मु चाप्सु़। 9गानी मेम्साका गन्नी माला, गानीलाई येट्पा मु़चु़का रोमा र्वा, ‘इ गन्खोपडा गुमीलाई गन्मु ग्वाका।’ मेम्मा गानीलाई मेलामका फनी, मा गानी मेलामका इनी क्रो़मलु़त्तो याक्के मु़चु़ गन्खोपडा गन्मु बासी। 10लावो गानी मेम्साका येनिमिलो याक्के मु़चु़ गन्खोपडा गन्नी, मा गानीलाई येट्पा मु़चु़ रोमा र्वा, ‘ङोप्सो़, ङादोनो डोक्पु मु़चु़ गन्खोपडा गन्नीका।’ मेकोतिलो खोत्ले बोच्चो़मिमकु ङादोडा इनीमा नो़-कल जु़ल्सी। 11हेङालोने उहेम मु़चु़का डोक्पु मिम्सी मेराम याक्के दु़म, मा उ त्वाप याक्के दु़म्पा मु़चु़ ने डोक्पु दु़म।”#मत्ती २३:१२; लूक १८:१४
12मेकोतिमा येशूलाई ग्रुला पेप्डा येट्पा फरिसीलाई वो गुमीका र्वाम्डी, “इमा नेमडा नेम्फुम लावो सिन्थाम लावो ग्रुला पेप्डा येनामिलो इ वा-ल्वाकमिम, इ ङोप्सो़मिम, इ त्वाकु मु़चु़मिम नुङ खाप्चीचो़ साउखोरेमिमलाई कोङङा मेयेडामी। येट्नामी माला ने मेर्मिमका वो गानालाई येनामिमा इ फुली सोमी। 13लावो गाना ग्रुला पेप्डा उनी हाम वो मेबाट्पामिम, ल्वा-खेल ब्लेट्पा, मेचापामिमलाई, मा उनी मिक्सीका मेल्वापामिमलाई येडामी, 14मा इमा फुली सोमु मेचापा मु़चु़मिमलाई येट्नामिमका माम्चु़नीकु न-गो होप्माम मु़चु़मिम सिमुलाम बमिमिमनेम माम्चु़नीका गानालाई पुरस्कार ग्वानामी।”
डोक्पु ग्रुलाकु सीसि-सो़म्दी
(मत्ती २२:१-१०)
15येशूनुङ ग्रुला पेप्डा गन्पामिमगोडाम कोले मु़चु़का ओराम ल्वा थो़स्तु़मा गुमीलाई र्वाक्ता, “उहेमका माम्चु़नीकु किब्दीडा ग्रुला पु़ मेराम आलाकाम सो़।” 16लावो गुमीका मेराम मु़चु़लाई र्वाम्डी, “कोले मु़चु़का डोक्पु ग्रुला खोक्तु़मा हापा मु़चु़मिमलाई येड्डु़मी। 17ग्रुला थिक्ता, मा मेराम मु़चु़का उ डु़ल्चो़लाई आरे बु़डु़मा बोच्चो़मिमलाई येड्डा थु़र्स्तु़, ‘खोत्ले पोमु-डुमु थिक्ता पेप्डा रोक्नी।’
18“लावो मेर्मिम खोत्ले बोच्चो़मिम मेपोसिक्पा लिसिम्डी। कोलेका मे डु़ल्चो़लाई र्वाक्ता, ‘गो किचो़ ब्याङसी भ्रेउतोम बु, मे रेप्डा लमु बासी। मेम्मिमका रोमु मेयु़ट्पु गोलाई पाचो ग्वाङनी।’
19“मेकोतिमा कोङमीका र्वाक्ता, ‘गो ङो हल बेनो भ्रेउतोम बु, मेर्मिमका हाङको जो़पा झोमी गो मेराम रेम्मु बासिक्पा बु। रोमु मेयु़ट्पु गोलाई पाचो ग्वाङनी।’
20“कोङमीका र्वाक्ता, ‘गो मालो लालीकुन्दा बेउतोम बु, मेम्मिमका गो मेरोङु।’
21“मेकोतिमा डु़ल्चो़ ख्लोसिक्साका रोक्तामा नेमहपनुङ ओराम ल्वा सो़यु़डु़। मेम्मा उ नेमहपकु छोक्चो बक्तामा उ डु़ल्चो़लाई र्वाक्ता, ‘दाला लक्सामा शहरडाम डोक्पु याक्के लाम्दी-गुदीबाडेम उनी हाम वो मेबाट्पामिम, मेचापामिम, ल्वा-खेल ब्लेट्पामिम, मा मिक्सीका मेल्वापामिमलाई आसिन्डा रेडामी।’
22“मेकोतिमा डु़ल्चो़का उ नेमहपलाई र्वाक्ता, ‘ङाचो़का र्वाक्निम होप्माम खोत्ले मु़चु़मिमलाई रेत्तोमिम बु। लोवो आथावो बोच्चो़मिम गन्खोप खोम ने हापाङा बु।’
23“नेमहपका उ डु़ल्चो़लाई र्वाक्ता, ‘हापा भापा लाम्दी नुङ याक्के लाम्दीबाडे लक्सामा मु़चु़मिमलाई रोक्नीमा रोक्नी बेमी, मा मे मु़चु़मिमका आमा नेम देम्नु़। 24हेङालोने गो ङादो येत्तोमिम मु़चु़मिमगोडाम कोलेका वो आमा ग्रुला दो़म्मु मेल्वामी’।”
येशू ख्रीष्टकु सीसिपामिम
(मत्ती १०:३७-३८)
25कोलेम छो़म सेर्पा मु़चु़मिम येशूकु चङचङ लक्तोङा बेम्डी, मा गुमीका मेर्मिमथो़ ख्लोसिम्डिमा र्वाम्डी, 26“कोङनिम मु़चु़ आमा सीसिपा दु़म्मु न बु़ माला, मेराम मु़चु़का वो उ त्वाकु माम-पाप, उ नाइमे, उ चो़च्चो़मिम, उ वा-ल्वाकमिम, मा उ त्वापडाम वो हापा गोलाई रिखाम बोमु बासी। मेएँ माला मेराम मु़चु़ आमा सीसिपा मेदु़म।#मत्ती १०:३७ 27उहेम मु़चु़का उ त्वाकु क्रूस कुर्साका#१४:२७ क्रूस कुर्साका लाम्दिमु र्वाक्मा त्वाकु दु़खा इम्साका माम्चु़नीकु चङचङ लाम्दिमु सो़। आमा चङचङ मेलाम्दी मेराम आमा सीसिपा दु़म्मु मेचाप्सु़।#मत्ती १०:३८; १६:२४; मर्क ८:३४; लूक ९:२३
28“गानीगोडाम कोङनिमका कोले नेम बनेबोमु न बु़लो मे नेम बनेबोमु दु़म्मिमसम्म लिट्पा खउलुङ गुनुङ बु डे मिबु र्वाक्साका ङादोङा ङार्जो़लु़। 29मेएँ माला ने मेरामका नेमकु फार गडु़मिम चङडा उ खउलुङ हुक्तामा बनेबोमु मेचाप्सु़वा माला ल्वापा मु़चु़मिम खोत्लेका आरे र्वाक्तो सेम्ला बेन्मी। 30‘ओराम मु़चु़का नेम बनेबोमु ने चो़म्डु़, लावो बनेबोम्सोमु मेचाप्सु़वा।’
31“कोले हप कोङमी हपनुङ क्वाल्बा बोमु खाप्डु़लो को सङसङ (१०,०००) सिपाहीमिमका नक सङसङ (२०,०००) सिपाहीमिमलाई घ्ल्वामु चाम्मी डे मेएँ र्वाक्साका ङादो मुलु़ बोमु ख्लो़पामिमनुङ मुलु़ बु। 32गुका मे कोङमी हपलाई घ्ल्वामु मेचाप्सु़ माला हे बेसाका होनोवा बाट्पा उ कोर्थो़लाममिम हपनुङ न-थो़म घ्रो़म्बेन्मु झाम मेरामकाम लागि ङादोङा उ मु़चु़मिम थु़रु़मी। 33मेम्मिमका गानीगोडाम उहेमका उ त्वापनुङ बाट्पा खोत्ले ङेन्मु मेचाप्सु़, मेराम आमा सीसिपा मेदु़म।
34“पोमु-डुमु भ्रपा बु़मिमका यो जो़पा दु़म। लावो योड्डाङा यो मेलु़ माला ने हामका योलु़पा दु़म्बेन्मु मा? 35मेराम ने क्वाकाम लागि जो़पा मेदु़म, मल बनेबोमु वो जो़पा मेदु़म। मु़चु़मिमका मेरामलाई घ्रोम्सोमी। उहेमकाम थो़पा नोफ्ला बु, मेरामका थो़स्नु़मा थेसिथेट्नु़।”
ప్రస్తుతం ఎంపిక చేయబడింది:
लूका 14: THUL
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Wycliffe Bible Translators, Inc. All rights reserved.
