यूहन्ना 2
2
येशूका कु अङ्गूरकु बिलाम बनेम्डिम
1उ नहाद्दामनेम गालील क्षेत्रडाम काना देलडा लालीकुन्दा दु़स्ताम बाइडा। येशूकु माम मेसिन्डा बाइडा। 2येशू नुङ उनी सीसिपामिम वो मेराम लालीकुन्दाडा येट्मिडिम बाइडा। 3अङ्गूरकु बिलाम हुक्ता, मा येशूकु मामका गुमीलाई र्वाक्ता, “ओर्मिमनुङ अङ्गूरकु बिलाम मिबु।”
4येशूका गुलाई र्वाम्डी, “वा छापा,#२:४ डोक्पु बेसाका डाट्मिडिम ल्वा। गो हाम बोमु बासी गोलाई मेर्वाक्नी। आमा थारी आथावो रोक्फाड्डाम मिबु।” 5उनी मामका ख्लो़पा मु़चु़मिमलाई र्वाक्ता, “गुमीका गानीलाई र्वामिमिम होङङा बेनी।”
6यहूदीमिमकाम सेपा दु़म्मु लागि सो़ल्सिक्पा डु़म्ला बाइडा। मेरामकाम लागि लुङकाम रुले (६) कु जु़ल्खोप मेसिन्डा बाइडा। मेर्मिम खोत्लेडा लेत धु़मडाम को सङ न धु़म लिटरसम्म हिसिक्पा बाइडा। 7येशूका ख्लो़पा मु़चु़मिमलाई र्वाम्डी, “कु जु़ल्खोपमिम कुका देम्बेट्नी।” मेर्मिमका कु जु़ल्खोपमिम कुका देम्बेट्मिडी।
8गुमीका मेर्मिमलाई र्वाम्डी, “कतिकलङ वाप्नी, मा ग्रुलाकु ङाउलाई कोर्नी।” मेर्मिमका कोर्मिडी। 9ग्रुलाकु ङाउका मे कु दो़प्डु़। मेराम अङ्गूरकु बिलाम दु़स्ल्याड्डाम बाइडा। मेराम बालामका रोक्ताम र्वाक्पा गुका चडु़म मेबायावा। मेमङा लोवो कु वापा ख्लो़पा मु़चु़मिमका ने चम्डिम बाइडा।
मेकोतिमा ग्रुलाकु ङाउका लारेपालाई कोर्थो़ येड्डु़, 10मा र्वाक्ता, “खोत्ले मु़चु़मिमका ङादो भ्रपा अङ्गूरकु बिलाम थो़मी, मा बोच्चो़मिमका अङ्गूरकु बिलाम हापा डुमिमिम चङडा मेभ्रपा अङ्गूरकु बिलाम थो़मी। लावो गाना ने ओम्लोसम्म भ्रपाङा अङ्गूरकु बिलाम जु़ल्थाट्नाम रेछा।”
11हेल्लो वो मेल्वाम्मा ओराम उनी खारी खोत्लेडाम ङादो येशूका गालीलडाम काना देलडा रेम्बेम्डी। आरेसाका गुमीका उनी यु़म-झ्वाक्सी रेम्बेम्डी, मा उनीमा सीसिपामिमका गुमीडला थो़र लु़म्डी।
येशूका सो़रनेम सेपा बनेबेम्डिम
(मत्ती २१:१२-१३; मर्कूस ११:१५-१७; लूका १९:४५-४६)
12मेकोतिमा गुमी उनी माम, ल्वाकमिम मा उनी सीसिपामिमनुङ कफर्नहुम शहरयु़ लम्डी। मेम्मा कोलेम नलेम मेसिन्डा बाम्डी।#मत्ती ४:१३
13यहूदीमिमकाम सेल्सिक्पानेमकु चाड रोम्फामु खाप्स्तु़म बाइडा। मेम्मिमका येशू यरूशलेमडा लम्डी।#प्रस १२:१-२७ 14सो़रनेम गोडा बेनोमिम, भेन्दामिम नुङ तुक्तुकुरमिम भ्रेट्पा मु़चु़मिम नुङ टेबलडला खउलुङ फात्तोङा लेट्पा मु़चु़मिमलाई गुमीका डार्मिडी। 15मेम्मा येशूका रिबाकाम याल्खोप बनेबेम्डिमा मेर्मिम खोत्लेलाई सो़रनेमलामका खान्सोम्डी। गुमीका बेनोमिम, भेन्दामिमलाई कोल्मिडी। मेम्मा खउलुङ फाट्पामिमकु खउलुङ फोन्साम्डी, मा मेर्मिमकु टेबल चार्सोम्डी। 16तुक्तुकुरमिम भ्रेट्पा मु़चु़मिमलाई गुमीका र्वाम्डी, “ओर्मिम पाखानो लक्नी। आमा पापकु नेमलाई गानी बजार बनेमेबेनी।”
17मेकोतिमा माम्चु़नीकु सिजेमडा र्याक्मा ओराम ल्वा उनी सीसिपामिमका मिम्मिडी, “इनीमा बाखोपडलाम आमा सो हन्सीका गोलाई चाङी।”#भज ६९:९
18यहूदीमिमकु डोक्पुमिमका ओराम ल्वा गुमीनुङ बिम्डी, “गाना हाम बोनामिम? ओराम खारी बोमु माम्चु़नीका साखाम ग्वानामिम बु माला हेल्लो वो मेल्वाम्मा छेखोपका मेराम आच्छाङा र्वाक्पा रेम्बेट्की।”
19येशूका मेर्मिमलाई र्वाम्डी, “ओराम सो़रनेमलाई फाल्नी, मा गो ओरामलाई सुलेमका आथावो बनेबेउसोक्पु।”#मत्ती २६:६१; २६:४०; मर्क १४:५८; १५:२९
20मेकोतिमा यहूदीमिमकु डोक्पुमिमका र्वाम्डी, “ब्ल-रु (४६) थका ओराम सो़रनेम बनेबोम्सोमु दु़स्ता, मा हाम गाना सुलेमका आथावो बनेबोम्सोमु चाम्ना?” 21लावो येशूका “सो़रनेम” र्वाम्डिम ने उनी त्वाकु मिरो़मकु दुथाम र्वाम्डिम बाइडा। 22सिमुलामका येशू बम्गेम्डिम चङडा गुमीका र्वाम्डिम ल्वा उनी सीसिपामिमका मिम्मिडी। मेम्मा माम्चु़नीकु सिजेमडा नुङ येशूका र्वाम्डिम ल्वाडा मेर्मिमका थो़र लु़म्डी।
23सेल्सिक्पानेमकु चाडकाम थारीका गुमी यरूशलेमडा बाम्डी। मेकोतिलो गुमीका बेम्डिम हेल्लो वो मेल्वाम्मा खारीमिम ल्वाम्डिमका हापा मु़चु़मिमका गुमीडला थो़र लु़म्डी। 24लावो येशूका उनी त्वापलाई ने मु़चु़मिमकु थेर्मा-थेर्सीडा मेजु़ल्मिवा। मु़चु़मिमकु दुथाम गुमीका चम्डिम बाइडा। 25मु़चु़ आच्छाङा हेप्माम दु़म्मी र्वाक्साका सु़का वो गुमीनुङ सो़मुम बुमु बासिक्पा मेबायावा। हेङालोने मु़चु़मिमकु न हेप्माम बु र्वाक्साका गुमीका चम्डिम बाइडा।
ప్రస్తుతం ఎంపిక చేయబడింది:
यूहन्ना 2: THUL
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Wycliffe Bible Translators, Inc. All rights reserved.
