A Luk koe‑noogo 24
24
A Zeezi vʋʋgre
(Mat 28.1-10, Mark 16.1-8, Zã 20.1-10)
1Dimaas daar yibeoog pĩnda, pagbã talla tɩdar-dambã b sẽn dag n seglã n kẽng yaoogẽ wã. 2B mikame tɩ b bilga kugrã n bas yaoogã noore. 3Bãmb kẽeme la b ka yã Zu-soab a Zeezi kũumã ye 4Bãmb sẽn dag n ka mi b sẽn tagsd tɩ bũmb ningã, ade, raop a yiib sẽn yer fut sẽn pɩnd puka b meng ne bãmba. 5Rabeem yõka bãmb tɩ b yĩgimd n sulg b nens tẽnga. La raopã yeel-b lame yaa: Yaa bõe tɩ yãmb baood nin-vɩɩg kũum sʋka? 6#Mat 16.21, 17.22,23, 20.18,19, Mark 8.31, 9.31, 10.33,34, Luk 9.22, 18.31-33[Bãmb ka be ka ye, b vʋʋgame.] Tẽeg-y bũmb ning bãmb sẽn dag n gom ne yãmb b sẽn da ket n be Galɩle wã. 7B yeelame tɩ yaa tɩlɛ tɩ b zãmb Ninsaal Bi-riblã n yõk n kõ yel-wẽn maandbã tɩ b ka-b da-pɩk zugu, la tɩ rasem a tãab daare bãmb na n vʋʋgame. 8La pagbã tẽega a Zeezi goamã.
9La bãmb yii yaoogẽ wã n kẽng n tɩ togs karen-biis piig la a yembrã ne neb a taabã fãa bõn-kãens fãa. 10Da yaa a Maari sẽn yit Magdala, ne a Zan la a Zak ma a Maari, n paas pagb a taab sẽn da be ne bãmbã n tɩ togs tʋmtʋmdbã bõn-kãnga. 11La tʋmtʋmdbã tagsame tɩ pagbã sẽn dag n gomdã yaa zʋbsgo, la b ka tẽ-b ye. 12La a Pɩyɛɛr yikame n wudg n kẽng yaoogẽ wã. Yẽnda sẽn zõonde, a ka yã bũmb tɩ sã n ka pɛɛlã sẽn dʋr tẽngã. La bũmb ning sẽn maanã yɛɛsa yẽ, la a lebg n leba a yiri.
Emayuus kẽnde
(Mark 16.12-13)
13La mikame tɩ badaare, karen-biis a yiib n da rabd tẽn-bil a yembr sẽn boond tɩ Emayuusi, n zems kɩlometr piig la a yembr ne Zeruzalɛm. 14Bãmb da gomda bũmb nins fãa sẽn maanã yell ne taaba. 15La bãmb sẽn gomd n kɩɩsd taaba, a Zeezi meng waame n kẽn ne bãmba. 16La bãmb yam ludame tɩ b ka bãng a Zeezi ye. 17A Zeezi soka bãmb tɩ yaa bõe yell la b gomd ne taab la b kẽnda. La b yalsame tɩ b nensã gãnem. 18La bãmb ned a yembr sẽn boond t'a Keleopaas soka a Zeezi yaa: Yãmb y yembr bal n be Zeruzalɛm n ka bãng bũmb ning sẽn maan be rasmã noorã? 19A Zeezi soka bãmb tɩ yaa bõe yelle. La b leoka bãmb yaa: Yell ning sẽn paam Nazarɛt dao a Zeezi wã. Sẽn da yaa Wẽnnaam no-rɛɛs sẽn tar pãng ne b tʋʋmã la b goamã, Wẽnnaam la nebã fãa taoorã. 20Tɩ tõnd maan-kʋʋdbã kãsem-dãmb ne tõnd nanambsã sẽn yɩ to-to n yõk bãmb n kɩs tɩ b kao b bʋʋd n yeel tɩ b zemsa kũumã, n ka-b da-pɩk zugã. 21Tõnd da tẽedame tɩ yaa bãmb n na n fãag Israyɛlle, la sẽn paas rẽ fãa, ad yaa rasem a tãab rũndã la bõn-kãens maan yã. 22Yaa sɩd tɩ pagb kẽer sẽn be tõnd sʋk yɛɛsa tõnd wʋsgo. B kẽnga yaoogẽ wã yibeoogẽ pĩnda, 23n tɩ ka yã a Zeezi kũumã ye. B waa n yeelame tɩ malegs n puk b mens ne bãmba, n yeel bãmb t'a Zeezi vɩɩme. 24La neb kẽer sẽn da be ne tõndã kẽnga yaoogẽ wã n tɩ mik tɩ bũmbã fãa yaa wa pagbã sẽn dag togsã bala. La bãmb ka yãnd a Zeezi ye. 25Dẽ, a Zeezi yeel-b lame yaa: Neb yam sẽn ka weke, yãmb ka tẽed bũmb nins fãa Wẽnnaam no-rɛɛsdbã sẽn togsã tao-tao ye! 26Dẽ yĩnga, Kiris rag n ka tog n nams a woto n yaool n deeg b naamã sɩda? 27A Zeezi bilga bãmb bũmb nins sẽn be gʋls-sõamyã fãa pʋgẽ n gomd bãmb yellã, sẽn sɩng ne a Moyiis tɩ ta Wẽnnaam no-rɛɛsdbã fãa.
28La b sẽn kolg tẽn-bil ning bãmb sẽn dag n dabdã, a Zeezi maana wa bãmb dat n taa taoore. 29La karen-biis a yiibã pẽdga bãmb n yeel tɩ b pa ne bãmba, bala, yʋng kolgame la wĩndgã dat n kẽeme. A Zeezi kẽe n siga ne bãmba. 30A Zeezi sẽn zĩ ne bãmb n na n dɩ, b rɩka burã n pʋʋs Wẽnnaam bark n kao-a n kõ bãmba. 31Dẽ, karen-biisã yamã vẽnegame tɩ b bãng tɩ yaa a Zeezi, la a Zeezi menema bãmb taoor bala. 32La bãmb goma ne taab n yeel yaa: Bãmb sẽn dag n gomd ne tõnd sorã zug la b bilgd tõnd gʋls-sõamyã, tõnd ka paam sũ-no-kãseng sɩda?
33La bãmb yika wakat-kãng bal n leb Zeruzalɛm n tɩ yã karen-biis piig la a yembrã ne b tũud-n-taas sẽn tigim taaba, 34la b yeela bãmb tɩ hakɩɩka! Zu-soabã vʋʋgame la b vẽnega b meng ne a Sɩmo. 35Bãmb me togsa bũmb ning sẽn maan bãmb sorã zugã, la bãmb sẽn bãng a Zeezi to-to b sẽn wa n kaood burã.
A Zeezi puka b meng ne b karen-biisã
(Mat 28.16-20, Mark 16.14-18, Zã 20.19-23, Tʋʋm 1.6-8)
36Bãmb sẽn dag n ket n gomd a woto, a Zeezi meng puka bãmb sʋk [n yeel-b yaa: Bɩ laafɩ zĩnd ne yãmba]. 37Dabeem yõka bãmb la b yɛɛsame n tẽed tɩ b yãnda kɩɩma. 38La a Zeezi yeel-b lame yaa: Bõe yĩng tɩ yãmb yɛɛsdẽ, la yaa bõe tɩ y sãmbd y sũyã pʋsẽ a woto? 39Ges-y mam nusã ne m naoã. Yaa maam bala, Sɩɩs-y maam n gese. Kɩɩm ka tar nemd wall kõab wa mam sẽn tarã ye. 40A Zeezi sẽn gom a woto, b wilga karen-biisã b nusã la b naoã. 41Karen-biisã sẽn ket n ka tẽeda, b sũ-noogã yĩnga, la sẽn yaa lingr ne bãmbã, a Zeezi sok-b lame b sã n tara rɩɩb be sẽn na rɩ. 42Bãmb kõo a Zeezi zĩm-sẽedgo ne sɩɩd bilfu. 43A Zeezi reeg-a lame n dɩ bãmb nifẽ.
44Dẽ poore, a Zeezi yeel-b lame yaa: «Yaa woto la mam sẽn da togs yãmb mam sẽn dag n ket n be ne yãmbã: Ra yaa tɩlɛ tɩ bũmb nins fãa sẽn gʋls a Moyiis tõogã pʋgẽ, la Wẽnnaam no-rɛɛsdbã sɛb pʋsẽ, la yɩɩn-sõamyã pʋgẽ n gomd mam yellã paam pidsgu.» 45Dẽ, a Zeezi vẽnega b yamã tɩ b tõog n wʋm Wẽnnaam gʋls sõamyã võore. 46La a Zeezi yeel-b lame yaa: Woto, b gʋlsame n yeel tɩ Kirisã tog n namsame, la b na n vʋʋg n basa kũum rasem a tãab daare. 47La tɩ sẽn sɩng ne Zeruzalɛm, b na n moona yam tekr koɛɛg buudã fãa sʋk ne bãmb yʋʋr tɩ b tõe n paam yel-wẽnã sugri. 48Yãmb yaa bõn-kãng kaset-dãmba. 49#Tʋʋm 1.4La ade, mam na n tʋma yãmb bũmb ningã m ba sẽn dag n kãabã. Pa-y Zeruzalɛm hal tɩ y wa pid ne pãng sẽn yit yĩngri.
A Zeezi zẽkre
(Mark 16.19-20, Tʋʋm 1.9-11)
50 #
Tʋʋm 1.9-11
La a Zeezi peega bãmb n kẽng Betani sẽnẽ, la b zẽka b nus n ning karen-biisã zut barka. 51La barkã ningr wakate, a Zeezi basa karen-biisã n zẽk n kẽng arzãna.
52La karen-biisã waooga a Zeezi, la b leb Zeruzalɛm ne sũ-no-kãsenga. 53La bãmb bee wẽnd doogã pʋg wakat fãa n pẽgd Wẽnnaam.
ప్రస్తుతం ఎంపిక చేయబడింది:
A Luk koe‑noogo 24: MPBU
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Moore Bible © Bible Society of Burkina Faso, 2014.
