A Zã koe‑noogo 9
9
A Zeezi maaga ned sẽn dog ne zondo
1A Zeezi sẽn loogda, b yãnda rao a yembr sẽn dog ne zondo. 2Bãmb karen-biisã soka bãmb yaa: Karen-saamba, yaa ãnda soab n maan yel-wẽnd tɩ raoã rog ne zondo? Yaa yẽnda meng bɩ, bɩ yaa a ba-rãmbã? 3A Zeezi leokame n yeele: «Ka tɩ yaa yẽnda bɩ a ba-rãmbã n maan yel-wẽnd ye, la yaa tɩ Wẽnnaam tʋʋmã na tũnug yẽnda n puki. 4Tõnd tog n tʋma sẽn tʋm-a maamã tʋʋma, tɩ wĩndg ket n beẽ. Yʋng watame tɩ ned baa a yembr ka tõe n leb n tʋm ye. 5#Mat 5.14, Zã 8.12Mam sẽn ket dũniyã pʋgã, mam yaa dũniyã vẽenem.»
6A Zeezi sẽn gom woto n sɛ, b tʋbsa tẽnga, n kalem tãndã ne kolkoodã tɩ lebg begdo, n dɩk n bɛ zoangã nini 7n yeel-a: «Kẽng Siloe bãkẽ wã n tɩ widg f nengã.» (Siloe dat n yeelame t'a soab b sẽn tʋme) Zoangã kẽnga be n tɩ widg a nengã, la a sẽn lebg n watẽ wã, a rag n neeme. 8A yagsã ne neb nins sẽn dag n yãnd t'a yaa bõasã yetame yaa: Ka rao ning sẽn dag n zĩ n bõosdẽ wã la woto sɩda? 9Neb kẽer dag n yetame tɩ yaa yẽnda, tɩ kẽer yetẽ tɩ ayo, tɩ yaa a wẽnego. La yẽnda mengã rag n yetame: «Yaa mam meng bal vã.» 10Dẽ, b sok-a lame t'a ninã maana a wãn n puki? 11A leokame n yeele: Dao ning b sẽn boond t'a Zeezi wã n bui tom n bɛ mam ninã, la b yeel maam tɩ m kẽng Siloe bãkẽ wã n tɩ widg m nenga. Mam kẽngame n tɩ widg m nenga, la m ninã pukame. 12La nebã soka raoã yaa: Rao-kãng bee yɛ? La a leokame: «Mam ka mi ye.»
Fariizẽ-dãmbã sokda raoã sẽn paam maagrã
13Nebã talla ned ning sẽn dag n yaa-a zoangã n kẽng Fariizẽ-dãmbã nengẽ. 14Yaool n dag n yaa Zʋɩf-rãmbã vʋʋsg daar la a Zeezi bui tomã n puk raoã ninã. 15Fariizẽ-dãmbã me soka rao wã a ninã sẽn maan to-to n puki. La a yeela bãmba: «Sẽn maag-a maamã bɛɛ mam ninã ne tãndo, tɩ mam tɩ widg a nenga, la masã mam neeme.» 16Fariizẽ-dãmbã sẽn wʋm woto, kẽer yeelame: «Rao-kãngã ka yit Wẽnnaam nengẽ ye. Bala, a ka sakd vʋʋsg daar tõodã ye.» Neb a taab dag n yetame: «Yel-wẽn-maand tõe n yɩɩ a wãn n maan bõn-bãn a woto?» 17La welgr kẽe bãmb sʋka. B leb n soka zoangã yaa: «Fo kaset yaa bõe ne ned ning sẽn puk-a fo ninã?» A leokame: «Yaa Wẽnnaam no-rɛɛsa.»
18Sẽn deng b sẽn na n bool dao wã ba-rãmba, Zʋɩf-rãmbã ka tẽ tɩ raoã dag n yɩɩ zoang t'a ninã yaool n puk ye. 19B soka a ba-rãmbã yaa: Yaa yãmb bi-ribl la woto, yãmb yet t'a roga ne zondã bɩ? Maana a wãn t'a yãtẽ moasã? 20A ba-rãmbã leokame n yeele: «Tõnd miime t'a yaa tõnd bi-ribla, la t'a roga ne zondo. 21La sẽn yɩ to-to t'a yãt moasã wã, tõnd ka mi ye. Tõnd ka mi ned ning sẽn puk-a a ninã me ye. Sok-y-yã-a t'a yʋʋmã seka a sẽn na gom a mengã yelle.» 22Raoã ba-rãmbã goma a woto, bala, b rag n zoeta Zʋɩf-rãmbã. Bala, Zʋɩf-rãmbã dag n seda ne taab n yeel tɩ ned sã n yeel t'a Zeezi yaa Kirisã, bɩ b rig-a n yiis karen-doogẽ wã. 23Rẽnda n kɩt t'a ba-rãmbã yeel t'a yʋʋmã yaa wʋsg la b sok-a wã.
24Fariizẽ-dãmbã leb n boola rao ning sẽn dag n yaa-a zoangã n yeel-a: Togs sɩd Wẽnnaam waoogr yĩnga. Tõnd yẽ miime tɩ rao-kãngã yaa yel-wẽn-maanda. 25A leokame n yeele: A sã n yaa yel-wẽn-maanda, mam ka mi ye. Bũmb a yembr la mam mi: Yaa tɩ mam dag n yaa zoanga, la tɩ moasã mam neeme. 26B soka yẽnda yaa: «A maana foom bõe? A puka fo ninã wãn-wãna?» 27Sẽn dag n yaa-a zoangã leoka bãmb n yeele: «Mam zoe n togsa yãmba, la yãmb ka kelg maam ye. Bõe tɩ yãmb dat tɩ mam leb n togs yãmb yɛs tɩ y kelge? Yãmb me dat n lebga bãmb karen-biis la?» 28Fariizẽ-dãmbã tʋʋ raoã n yeel-a yaa: «Foom la bãmb karen-biiga. Tõnd yẽ yaa a Moyiis karen-biisi. 29Tõnd miime tɩ Wẽnnaam goma ne a Moyiisi, la yõwã soabã, tõnd ka mi a sẽn yitẽ ye.» 30Raoã leoka bãmb yaa: «Ad bõn‑kãng sɩd yaa lingr ne maam tɩ yãmb ka mi a sẽn yitẽ ye. Tɩ b yaool n puka mam nini. 31Tõnd miime tɩ Wẽnnaam ka leokd yel-wẽn-maandb pʋʋsg ye. La ned sã n waoogd Wẽnnaam la a tũud bãmb daabã, Wẽnnaam leokda a soaba. 32Ned nan ka wʋm tɩ ned n puk ned sẽn dog ne zond nin ye. 33Dao-kãngã sã n dag n ka yitẽ Wẽnnaam nengẽ, a dag n kõn tõog n maan baa fɩ ye.» 34B leok-a lame n yeele: «Fo yĩngã tõr bee yel-wẽn pʋgẽ, hal f rogem wakat tɩ ta moasã, tɩ fo wa yɛs n na n zãms tõndo?» La b rig-a lame n yiis yɩnga.
Sɩɩg zondo
35A Zeezi wʋmame tɩ b riga raoã n yiis karen-doogẽ wã. A Zeezi yãnd-a lame n yeel-a yaa: «Dẽ yĩnga, fo tẽeda Ninsaal Bi-riblã?» 36A leokame n yeele: «Zu-soaba, bãmb yaa ãnda, tɩ mam na n tẽ bãmba?» 37A Zeezi yeel-a lame: Fo yãnd-a lame, sẽn gomd-a ne foomã, yaa yẽnda. 38Dẽ, dao wã yeelame yaa: «Zu-soaba, mam tẽedame.» La a wõgemdame n waoog bãmba.
39Dẽ poore, a Zeezi yeela raoã yaa: «Mam waa dũni-kãngã pʋgẽ bʋʋd yĩnga, tɩ neb nins sẽn ka yãtã na yã, tɩ neb nins sẽn yãtã na lebg zoense.» 40Fariizẽ-dãmb kẽer sẽn dag n be beenẽ ne a Zeezi, n wʋm gom-kãensã soka bãmb yaa: «Dẽ yĩnga, tõnd me yaa zoense bɩ?» 41A Zeezi leoka bãmb n yeele: Yãmb sã n dag n yaẽ zoense, yãmb dag n kõn tallẽ yel-wẽn ye. La Moasã, yãmb yetame: «Tõnd yaa nin‑dãmba.» Woto yĩng n kɩt tɩ y yel-wẽnã paad ne-yã.
ప్రస్తుతం ఎంపిక చేయబడింది:
A Zã koe‑noogo 9: MPBU
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Moore Bible © Bible Society of Burkina Faso, 2014.
