Mi cilima 11
11
Babeli diefoagili
1Lanyogunu ki tinga niba kuli den maadi mabuoyendu leni mayenma. 2Bi den ñani puoli diema ki ban pundi yaa joaloangu n ye Sineari diema nni, ki kali lankani. 3Bi den yedi biyaba: «Cua mani tin pua i tankonkuomi ki puli yi.» I tankonkuomi den tie bi po nani a tana yeni, ki tinga sinboanma mo den tie bi po nani mi tankpama yeni. 4Bi go den yedi: «Cua mani tin cili ki maa u dogu leni li diefoagili, yaali n baa kpedi ki pundi tanpoli. Lani n tie ti yeli n ña hali boncianla. Yeni, ti kan go yadi ki tinga nni mo.»
5O Diedo den ñani tanpoli ki jiidi ki baa le u dociamu leni bi nisaaliba n maa yaa diefoagili. 6O Diedo den yedi: «Diidi, bi tie nibuoyendu, bikuli go taa mabuoyendu mo. Lani n teni ke bi cili laa tuonli. Moala, puu kan go yie bi po ban jagi ke bi baa tieni yaala kuli yaa niinni. 7Cua mani tin jiidi ki ŋmadi bi maama, lani n tie ban da go gbadi biyaba maama.» 8O Diedo den yadi ba hali foagima mi tinfanma po, ke bi den cedi kaa go maa u dogu yeni. 9Lani yaa po n teni, ke bi yini u dogu yeni Babeli, kelima o Diedo den ŋmadi ki tinga yaaba kuli maama lankane. Li go den tie lankane ke o Diedo den yadi ba mi tinfanma kuli nni.
Sem leni o puoliŋuani togida
10Bine n tie Sem yaabila, ki tabolinkaaga n den pendi ke li tieni binalie. Sem n den pia bina kobiga, o den mali Alipakisadi. 11Sem n den mali Alipakisadi, o den tieni bina kobimuu, ki mali a bonjala leni a bonpola.
12Alipakisadi n den pia piitaa n binamuu yaa yogunu, o den mali Sela. 13Alipakisadi n den mali Sela, o go den tieni kobinaa n binataa, ki mali a bonjala leni a bonpola.
14Sela n den pia bina piitaa yaa yogunu, o den mali Heberi. 15Sela n den mali Heberi, o go den tieni kobinaa n binataa, ki mali a bonjala leni a bonpola.
16Heberi n den pia piitaa n binanaa yaa yogunu, o den mali Pelegi. 17Heberi n den mali Pelegi, o go den tieni bina kobinaa n piitaa, ki mali a bonjala leni a bonpola.
18Pelegi n den pia bina piitaa yaa yogunu, o den mali Reu. 19Pelegi n den mali Reu, o go den tieni kobilie n binayia, ki mali a bonjala leni a bonpola.
20Reu n den pia piitaa n binalie yaa yogunu, o den mali Serugi. 21Reu n den mali Serugi, o go den tieni kobilie n binalele, ki mali a bonjala leni a bonpola.
22Serugi n den pia bina piitaa yaa yogunu, o den mali Nahori. 23Serugi n den mali Nahori, o go den tieni bina kobilie, ki mali a bonjala leni a bonpola.
24Nahori n den pia piilie n binayia yaa yogunu, o den mali Tera. 25Nahori n den mali Tera, o go den tieni kobiga n piiga n binayia, ki mali a bonjala leni a bonpola.
26Tera n den pia bina piilele yaa yogunu, o den mali Abalama, Nahori leni Harani.
Line n tie Tera leni Abalama togida
27Mine n tie Tera yaabila maama. Tera den mali Abalama, Nahori leni Harani. Harani mo den mali Loti. 28Harani den kpe o maadogu Uri nni, Kalide diema nni ke o baa Tera da ye. 29Abalama leni Nahori den taa bi puoba. Abalama pua den yi Sarayi, Nahori yaa pua mo den yi Milika, Harani bisalo. Harani den tie Milika leni Jisika baa. 30Sarayi den tie ŋoaliga, kaa pia biga.
31Tera den taa o bijua Abalama leni Loti, o bijua Harani bijua, ki go taa o biyuaga Sarayi, o bijua Abalama pua, ke bi fii ki gedi u dogu. Bi den taani ki fii Uri dogu nni, Kalide diema nni ki baa gedi hali Kanana diema nni. Bi den pundi Harani dogu, ki jiidi ki baa yaa ye lankani. 32Tera bina kuli den tie kobilie n binamuu. Tera den kpe Harani dogu nni.
ప్రస్తుతం ఎంపిక చేయబడింది:
Mi cilima 11: BGP
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Gulmancema Protestant Bible © Bible Society of Burkina Faso, 2013.
