HLIMI 8
8
1Ki kruʔu ma Nyɛʔɛlɛ à li lama to Nowe nì we ní ajobo pì bɛfu ní, ba nya wobo ní kàʔà wobo ní, ba pi dá bo wa wi ní nyumu kɔrɔkpɔʔɔ ni mà tiflɛʔɛ hanri, àʔa tra fɛ de. Nyumu à miʔi hli na cɛrɛ. 2Tra ti noʔo na nyumu wyeʔe ní, ní namuru nyumu wyeʔe kè bɛfu à ke tón. Hɔgɔ àʔa yere. 3Nyumu à mi na wari wa tra na de. Ki dá hanri ban mà kpe wlɛrɛ too nasyɛn ní kprɔʔɔ na. Nyufafaʔama à mi cɛrɛ. 4Yere nasyɛnwoʔo ki wlɛrɛ kɛ̂ ma kɛ̀ nasyɛnwoʔo na, nyumu kɔrɔkpɔʔɔ àʔa trigi mà bâ glɛn wa Arara angogoo na ge. 5Nyumu mi dáa waari na sye fɔ mà bâ no yere kɛ̂woʔo na. Ki wlɛgblɛʔɛ na, à pe angogoo ke tɔɔ yuru nya tí ma nyini.
6Wlɛrɛ too syɛn da gâ doro kɔ, Nowe wɔ̀ɔ finɛtri nyɛʔɛ ŋa wi da gón wa nyumu kɔrɔkpɔʔɔ na ge, 7mà kajɛnʔɛ ga pé na yeri duba yrigi màʔa wa. Àʔa kɛri mà yâ hru mà pan nyifafaʔa na fɔ nyumu à mi ba waʔa wa tra na de. 8Ki kruʔu ma, Nowe wɔ̀ɔ kòtolo yrigi mà li wa, jango bìʔi cɛn nàʔa po nyumu mí ma waʔa ge. 9Di li ìn yà deʔe ta bì glɛn, mɛjɛn nyumu mi dá bo mí ma tra ton deʔe kì bɛfu na. À li hru mà pan nyumu kɔrɔkpɔʔɔ tanla Nowe krugu we. Wɔ̀ɔ bâ kyɛʔɛ yrigi mà li co mà li le wa nyumu kɔrɔkpɔʔɔ ni ge. 10Wɔɔ wlɛrɛ nasyɛn yaʔa, à ti toro mà lì yrigi mà li wa nɛ. 11Kòtolo à li bâ hru mà pan wi krugu ki yaakwɔʔɔ na Olife tiʔi wɛbunru ní wa li no nî ge. Nowe wɔ̀ɔ ki cɛn mà yo nyumu mí ma cɛrɛ wa tra na de. 12Wɔ̀ɔ ní ma ko wa nɛ nyumu kɔrɔkpɔʔɔ ni mà ta wlɛrɛ nasyɛn nɛ. Ki kruʔu ma wɔ̀ɔ ní ma kòtolo yrigi le nɛ mà li wa. Ki tɔ na, li ìn hru bì ban adi.
13Nowe wi da gâ da yɛʔɛ́ saa tanri ní yɛlɛ nigbe wolo na yegblɛʔɛ ki wlɛgblɛʔɛ na, nyumu mi dá bo mí ma waʔa wa tra na de. Nowe wɔ̀ɔ nyumu kɔrɔkpɔʔɔ nyɛʔɛ wa ki yugu deʔe na mà wele naʔa tra na de màʔa nya deʔe kí ma waʔa wa ti yugu na. 14Ki yɛlɛ li yere syɛnwoʔo ki wlɛrɛ fonɛrɛ ma kɛ̀ nasyɛnwoʔo na, tra tì bɛfu à ti po ti ma waʔa.
15Nyɛʔɛlɛ à liʔi yo Nowe ma we mà yo: 16«Ma nyini wa nyumu kɔrɔkpɔʔɔ ni ma cɔ nì, ma pii ní, pe cɛɛ ní be kpo. 17Ma ajobo pì bɛfu yrigi ba pí nyɛ wa ma ní ge. Kajɛnʔɛ ní, ajobo nì, ní aflolobo pì bɛfu ní jango pi craʔa naʔa tra na de, pi nyɛʔɛ.» 18Nowe wɔ̀ɔ nyini wa nyumu kɔrɔkpɔʔɔ ni wi cɔ nì, wi pii ní, ní wi pii pe cɛɛ ní be. 19Ajobo pì bɛfu, aflolobo pì bɛfu, kajɛnʔɛ kè bɛfu, ní yrɛbɛ pì bɛfu ní ba pí na flolo tra na de mà yala pi tyɛnʔɛ ní ge, à pi nyini wa nyumu kɔrɔkpɔʔɔ ni ge.
20Nowe wɔ̀ɔ sraʔá farahaʔa fan màʔa kán Bajegɔ Nyɛʔɛlɛ ma le. Wa ajokpandobo ni be, kajɛnʔɛ ní, wɔ̀ɔ ki ajobo pà kpe nigbe nigbe ba pi dá bo ylɛbɛ Bajegɔ Nyɛʔɛlɛ ma le mà pi fara li ma sraʔá wa sraʔá farahaʔa na ge.
21Bajegɔ Nyɛʔɛlɛ à li ki sràʔá wi nudanʔa syɔ màʔa yo li lama ni mà yo: Mi ìn bi je gá tra danŋa de hɛɛn pe kala na adi, mɛjɛn mà kpe hɛn wi pimi nyiŋi na, wi dihon wí na honri tipeʔe hranma miì na. Mi ìn bi je ga ní bì nyuwyeʔe yrɛbɛ tón be ki pomo ma na me adi nɛ pa mí maʔa hanri ge.
22Bì tra yaʔa ti pomo na
akaba falima ní, pi konmo nì,
wyere nì, kafuʔu nì,
nyoro nyiŋi ní, kanʔa nì,
kpɛntomo ní, yebliʔi nì
pi ìn bi gà gɔ fyeu!
ప్రస్తుతం ఎంపిక చేయబడింది:
HLIMI 8: NLK10
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible Society of Côte d'Ivoire
