Luka 9
9
Eipaayie ꞉Yeso lkipaareta 12
(Matayo 10:5–15; Marko 6:7–13)
1Neipot ꞉Yeso loochi 12 aitutum tenebo, neicho ngolon o nkitoria naamirarie lairiruani pooki, neichiunyie moyianitin, 2neipaaya metilikoi nkitoria e Nkai, neichiunyie ltamoyia. 3Nejoki ninche, <<Eminap hoo pito to nkoitiei, peera sobua, anaa mbene, anaa ndaa, anaa sii ropiyiani, niminapnap nankan maare. 4Naa kore nkaji nijing'jing, entewueni teinie ana empung'o. 5#Asat 13:51#Luka 10:4–11Naa kore too lolo lemeitoomon ntae, tinimpung'pung aing'uaa ilo kerenket, empiripiroi nterit ee nkejek inchi, payie eaku limunoto torno tee ninche.>> 6Nemanaa aapuo taatua nkang'ite, elikoo lomon supati neichiunyie ltung'ana too ng'ojitin pooki.
Etanyamala Erode
(Matayo 14:1–12; Marko 6:14–29)
7 #
Mat 16:14; Mrk 8:28; Luka 9:19 Kore payie ening Erode larikoni le Galilaya nenia baa pooki naataasate, nenyamalu oleng tankaraki ketii lkulie ootejo, <<Yoana eitipiwuaki taatua lootuata>>, 8nejo lkulikae, <<Elija oipung'ua>>, nejo lkulie, <<Kebaki naa lobo loo loibonok le apa eitipiwuaki.>> 9Kake nejo Erode, <<Katara apa Yoana adung'oo nkue. Ng'ae dei ilo laning'ito mbaa naijo kuna?>> Nenyok ayiaya adol ninye.
Eitiemua ꞉Yeso ltung'ana 5,000
(Matayo 14:13–21; Marko 6:30–44; Yoana 6:1–14)
10Kore payie echukunyie ꞉lkipaareta, neliki Yeso mbaa naataasa. Neiwuang'ie ninche, neiriamari tenebo aapuo aapeny lkerenket oji Betesaida. 11Kore payie eyielou ꞉lturrurri aajo echomo, neirukurukore. Neitoomon ninche, neliki mbaa naaipirita nkitoria e Nkai, neichiunyie lolo oomoyiaa.
12Kore payie emutu, nepuonu loochi 12 netii nejoki ninye, <<Nchoo lturrur mechomo nkang'ite o lchampai oataana payie etum ng'oji neperie o ndaa nanya, amu kore ene nikitii naa loliyio.>> 13Nejoki, <<Enchoo ntae ntoki nanya.>>
Nejo, <<Mikiata iyioo ae toki mara ake mukateni imiet o sinkirri oare. Meatae hae, mara tinikipuo aainyiang'aki kulo tung'ana pooki ndaa.>> 14Amu kore lewa ootii inie naa kebaki 5,000. Nejoki ꞉Yeso looiteng'eni lenyena, <<Entowuana ltung'ana too lturrurri maa onom, meturruticho.>> 15Neiko ninche nejia, neitowuon ltung'ana pooki. 16Nerrapu Yeso nenia mukateni imiet o lolo sinkirri oare, neing'or chumata, nemayian, negil, neicho looiteng'eni lenyena meichoo ltung'ana. 17Nenya pooki, neimu, nerrapu ꞉lkipaareta nkikapuni 12 ee ng'urrot naatelekunye.
Eibalunyie ꞉Petero Yeso
(Matayo 16:13–20; Marko 8:27–30)
18Kore mparri nabo eomonito Yeso apeny, eboitiere looiteng'eni lenyena, neipar ninche ajoki, <<Ng'ae dei ejo ꞉lturrurri kara nanu?>> 19#Mat 14:1,2; Mrk 6:14,15; Luka 9:7,8Newoliki aajoki, <<Yoana Laipatisani, nejo lkulie Elija, nejo lkulie lobo loo lolo oibonok le apa le Nkai otipiwua.>> 20#Yoa 6:68,69Nejoki ꞉Yeso ninche, <<Oo ntae, ijoijo ng'ae ara nanu?>> Newoliki ꞉Petero ajoki, <<Ira iyie Kristo#9:20 Kore Kristo keidimi aatejo Mesia. ilo le lekutuk#9:20 Kore lekutuk naa ketoponikaki payie eibalai kipirte. le Nkai.>> 21Neing'ode Yeso, ninche ajoki payie meliki hoo ltung'ani obo ilo rerei.
Etilimua ꞉Yeso sina o lkiye o mpiunoto enye
(Matayo 16:21–28; Marko 8:31—9:1)
22Nejoki, <<Kore Nkerai e ltung'ani, meata ajo metum sina kitok, neany ꞉lpayiani kutuaa o laitainok kutuaa la lasar o laiteng'enak loo nkitanapat, neri metua, kake kore ta mparri e uni naa keitipiuni.>>
23 #
Mat 10:38; Luka 14:27 Nejoki ninche pooki, <<Tenetii ltung'ani oyieu naairukurukore, nchoo emiki koon, nenap lmusalaba lenye mparri pooki, naairukurukore. 24#Mat 10:39; Luka 17:33; Yoa 12:25Amu kore loyieu neitejeu nkichui enye, neiminie, naa kore loiminie nkichui enye tankaraki nanu, naa keitejeu. 25Nyo dupoto natum ltung'ani tenetum nkop pooki, neiminie anaa eidakie koon? 26Amu kore ilo odol anyit tankaraki nanu o rereii lainien, naa kedol abaki ꞉Nkerai e ltung'ani anyit te ninye, tenelotu to wong'an e nkitoo enye o ne Papa o nee lmalaikani sinyat. 27Kake kajoki ntae sipata nadede, kore atua kulo tung'ana ooitachoo tene, ketii ltung'ana ooitachoo lemedol lkiye, eitu edol nkitoria e Nkai.>>
Yeso to wong'an e nkitoo enye
(Matayo 17:1–8; Marko 9:2–8)
28Kore payie eichunye mperot naabaya isiet eidipa Yeso atejo kulo omon, neya Petero o Yoana o Yakobo, nedir ilo owua aaomon. 29Kore ake eomonito ꞉ninye, neibelekenya nkomom enye, neiborru aaitintilu nankan enyena ana nkiwuang'ata. 30Kore ake inia kata, netii ꞉ltung'ana oare ooirorie ninye, Musa taa o Elija, 31elioo ninche to wong'an e nkitoo e chumata, eimaki lkiye lenye#9:31 Kore apa too Lgirriki naa kejo naidurra enye. oitabari kenya te Yerusalem. 32Kore Petero o lboitieii lenyena, neyiasai, neilura. Kore payie ening'u king'a, nedol wong'an e nkitoo enye o laaduo payiani oare ooitachoo o ninye. 33Kore epuoito lolo payiani aaing'uaa Yeso, nejoki ꞉Petero, <<Lokitok, keisupat taa kitii iyioo ene! Maitibira nkorrimpani uni, nabo ino, o ne Musa o ne Elija!>> Kake meyielo Petero nejoito. 34Kore ejoito ninye nejia, nedou nkidis neimulaa ninche, neiputukuny eimulaa inia kidis. 35#Isa 42:1; Mat 3:17, 12:18; Mrk 1:11; Luka 3:22#2Pet 1:17,18Neipung'u ltoilo taatua inia kidis ejo, <<Ana Nkerai ai gelunoti, entining ninye!>> 36Kore payie egira ltoilo, nedol ꞉ninche Yeso aa ninye apeny. Negira ninche inia ng'amata pooki, eitu eliki ltung'ani nenia baa naatoduaa.
Eichiunyie ꞉Yeso layieni oata lairiruai
(Matayo 17:14–18; Marko 9:14–27)
37Kore ta mparri naijipita inia etodoutua ninche to lowua, nenang'are ꞉lturrur kitok ninye. 38Nebuaaki ꞉ltung'ani taatua ilo turrur ajoki, <<Laiteng'enani, aateleja ng'urai ele ayieni lai obo amu ninye ake apeny nkerai ai natiiwua. 39Naa kore chiaake keirrachu ninye ꞉lairiruai, kore meitekini nebuak neiterreyie, neirujurujie laburra to nkutuk nemesioki aing'uaa ninye, kake kear ana metachala. 40Naa kateleja looiteng'eni linono metimirai, kake etalakinete.>> 41Newoliki ꞉Yeso ajoki, <<Oi ntae ltung'ana lemeata nkurukoto, netopong'ori! Anu kenya aboitiere ntae, nang'iri o ntae? Iyau nkerai ino ene.>> 42Kore ewuon elotuta netii ninye, nenang'ie ꞉lairiruai nkop neiterreyie. Neing'ode ꞉Yeso abuaaki ilo airirua, neichiunyie ilo ayieni, nerrinyoki papa lenye. 43Neing'asia pooki oleng payie edol nkitoo e Nkai.
Eimaka Yeso mbaa naipirita lkiye lenye
(Matayo 17:22–23; Marko 9:30–32)
Kore ewuon eing'asia pooki taa mbaa naataasa, nejoki ꞉ninye looiteng'eni lenyena, 44<<Entipik kulo rereii ltauja linchi. Amu kore Nkerai e ltung'ani, naa keichoori metipiki nkaik ee ltung'ana.>> 45Kake eitu ening'u ninche ilo rerei, amu keisudoyieki payie mening'u ninche. Neurie eipar ninye inia.
Ng'ae oidim ataa kitok?
(Matayo 18:1–5; Marko 9:33–37)
46 #
Luka 22:24
Neng'asu ninche aaikarnyasa maate aajo, ng'ae sa tee ninche oidim ataa kitok? 47Kake keteyielo ꞉Yeso mparrunot ee ltauja lenche, neibung nkerai kini ayau, neitacheyie tabata koon. 48#Mat 10:40; Luka 10:16; Yoa 13:20Nejoki ninche, <<Kore pooki ng'ae ong'amaa ana kerai tankaraki nkarna ai, naa nanu etang'amayie. Naa kore pooki laang'amaa nanu, naa etang'amayie ilo laaterewua nanu. Amu kore lkini taa ntae pooki naa ninye lkitok.>>
Kore pooki ng'ae limikirare naa ikitii tenebo
(Marko 9:38–40)
49Newoliki ꞉Yoana ajoki, <<Lokitok! ikitoduaa ltung'ani omiraa lairiruani ta nkarna ino, naa ikitimitikita tankaraki mara ninye lobo lang.>> 50Nejoki ꞉Yeso ninche, <<Emimitiki amu kore lemeany ntae naa linchi.>>
Etanya nkang'ite e Samaria eng'amaa Yeso
51Kore payie enyiku mperot naailiepieki ninye aaya chumata#9:51 Kore chumata naa, lkiye le Yeso olotu eipirita., nemut ajo kelo Yerusalem. 52Nereu lkipaareta mechomo tekue ninye. Nepuo nejing nkang'ite ee Samaria#9:52 Kore apa ltung'ana loo Lyiaudi naa kemen ltung'ana loo Samaria. Kore sii apa ltung'ana loo Samaria kera apa ninche Lyiaudi tekue, kake keotuo aomon Nkai to nkoitiei nemeichiaakino. aaitibiraki ninye ng'oji, 53kake eitu eitoomon Yeso ꞉ltung'ana, tankaraki ketumuta ajo kelo Yerusalem. 54#2Lki 1:9–16Kore payie edol ꞉looiteng'eni lenyena, aa Yakobo o Yoana ana nejo, <<Laitoriani, iyieu nikimpotu nkima metodou te chumata, metumuta ninche?>> 55Neiwuatuwuatakino ninche, neing'ode nekusakan, 56nepuo nkae ang.
Neikoni teneirukurukoreki Yeso
(Matayo 8:19–22)
57Kore epuoito ninche to nkoitiei, nejoki ꞉ltung'ani obo Yeso, <<Kaairukurukore iyie ng'oji pooki nilo.>> 58Nejoki ꞉Yeso, <<Keata mbariak udot, neata nkueeny e ai nkajijik enche, kake kore Nkerai e Ltung'ani meata neitepetaa nkue enye.>> 59Nejoki likae, <<Rukurukoreeki nanu!>>
Kake nejoki ꞉ilo, <<Laitoriani, nchooki ang'as machomo anukaa papa lai!>> 60Nejoki ninye, <<Nchoo lmeneng'a enukaa lmeneng'a lenche. Kake kore iyie, chomo tilikoi lomon le nkitoria e Nkai!>> 61#1Lki 19:20Nejoki sii ꞉likae tung'ani, <<Laitoriani, kaairukurukore iyie, kake nchooki ang'as maichoo lesere ltung'ana le nkang ai!>> 62Nejoki ꞉Yeso ninye, <<Kore ltung'ani otang'asa apik nkaina enye nturet e lchampa#9:62 Todua picha e nturet e lchampa tene, ana netiu apa ta ng'amata e Yeso., neitoki aiwuatuwuata anang silig, naa meichiaakino ninye nkitoria e Nkai.>>
ప్రస్తుతం ఎంపిక చేయబడింది:
Luka 9: saq
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2021, Bible Translation and Literacy
