Luka 7
7
Eichiunyieki laisiaayiani lo lkitok loo sikarini
(Matayo 8:5–13)
1Kore payie eidip Yeso atiliki ltung'ana lomon lenyena pooki oyieu nening, nejing lkerenket le Kapernaum. 2Netii apa lkitok obo oyanyit laisiaayiani lenye oleng. Kore ele kitok, naa keitacheki sikarini oobaya ip nabo. Nemuai ꞉ilo aisiaayiani lenye, metaa keye. 3Kore payie ening ꞉ninye lomon oipirita Yeso, nereu lpayiani loo Lyiaudi neti ninye, aomon meeu aichiunyie laisiaayiani lenye. 4Kore payie epuonu ninche neti Yeso, nelej oleng aajoki, <<Keiririkino ele payie intaas ele payian nayieu, 5amu kore ninye, naa kecham locho lang, netechetaka iyioo Sinagogi.>> 6Nelo Yeso tenebo o ninche.
Kore ewuon elakuaniki Yeso nkaji enye, neipaaya ꞉ilo kitok loo sikarini lkulie choreta lenyena neti ninye nejoki, <<Laitoriani, miirrana, amu meichiaakino eji tanaaku iyie likincho nkanyit nawuenyi alotu ajing'u nkaji ai. 7Naa inia naa payie atoduaa nanu ajo maairirikino tanalotu niti iyie. Kake tejo ake rerei obo, neichiu laisiaayiani lai. 8Amu kara nanu ltung'ani otii taabori nkitoria, naata sii sikarini laatii taabori nanu. Kore payie ajoki ele, <Chomo!>, nelo, najoki elde, <Wou!>, nelotu, najoki laisiaayiani lai, <Taasa ana!>, neas.>> 9Kore payie ening ꞉Yeso inia, neing'asia tankaraki ninye, neiwuatuwuatakino lturrur oijipita nejoki, <<Kajoki ntae, kore abaki taatua Isirael, eitu aikata atum nkurukoto kitok natuwuana ana.>> 10Kore payie errinyunyie lolo choreta ooipaayieki duo aapuonu nkaji, neirrachu laisiaayiani era bioto.
Eitipiwua ꞉Yeso layieni le nkoiliai
11Kore te nkiti kata nelo Yeso lkerenket oji Nain, neiriamari o looiteng'eni lenyena o lturrur kitok tenebo. 12Kore payie enyikaki ꞉ninye ltim le ilo kerenket, netum ltung'ana oyaita lmeneng'ai aulo. Naa ninye ake apeny layieni oata ng'otonye, nera nkoiliai. Netii ltung'ana kumo le ilo kerenket tenebo o inia oiliai. 13Kore payie edol ꞉Laitoriani ninye, neduaaki lng'er, nejoki, <<Minchir!>> 14Nelo anyikaki aiseyie ilo choni oti sesen, neitachoo lolo oonapita. Nejo, <<Lobarnoti, Kaajoki iyie, inyuo!>> 15Neinyuototo ilo meneng'ai, newuon, neng'asu airo. Neicho ꞉Yeso ninye ng'otonye. 16Neguretu pooki, nerrep Nkai ejo, <<Eipung'ua taatua iyioo loiboni kitok>>, naa <<Keisabaka Nkai ltung'ana lenyena.>> 17Kore ilo rerei, nebulaa to nkop pooki e Yudea#7:17 Kore Yudea keidimi aitoki aatejo nkop pooki e Isirael. o lubot pooki naanyikita.
Yeso o Yoana Laipatisani
(Matayo 11:2–19)
18Neliki ꞉looiteng'eni le Yoana, Yoana kuna baa pooki. Neipotu ninye looiteng'eni lenyena oare, 19nerewaki Laitoriani ejo, <<Aa iyie dei ilo olotu, tana ikianyuta likae?>> 20Kore payie ebaki lewa netii Yeso, nejoki, <<Keipaawua iyioo Yoana Laipatisani nitii ejo, <Aa iyie dei ilo olotu, tana ikianyuta likae?> >> 21Kore inia kata neichiunyie ꞉Yeso ltung'ana kumo oomoyiaa o looibisiong o loaata lairiruani, nebol lmodook kumo nkonyek metodolicho. 22#Isa 35:5,6, Isa 61:1Newoliki ajoki, <<Enchom entiliki Yoana nana nitoduaa o nitining'o: Aajo kedolicho lmodook, kepuoito lootigiligilete tee nkejek, keichiunyieitae loaata moyian ee lbolot, kening'icho lming'anak, naa keitipiutae lootuata, nelikitae laisinak Lomon Supati. 23Emayiana pooki ng'ae lamaajur nanu.>>
24Kore payie errinyo lolo ooipaawua ꞉Yoana, neng'asu Yeso aliki lturrurri lomon oipirita ninye ejo, <<Nyo apa impung'o aapuo aadol to lkees? Loperriai oyukuto ꞉siwuo? 25Oo taa, nyo impung'o aapuo aaing'or? Ltung'ani oichopito nkilani naapuyiapui? Mara! Kore lolo oaata nkilani naagol nkinyang'a, ninche oaanya rraa, newuenie nkajijik ee laitoriak. 26Kake nyo impung'o aapuo aaing'or? Loiboni le Nkai? Ee, kajoki ntae, kelang ꞉Yoana loiboni le Nkai. 27#Mal 3:1Aa kore ninye, naa keimakita ꞉Lkigerot Sinyat aajo,
<Teyielo ajo kareu lkipaaret lai tekue iyie,
likintibiraki nkoitiei.>
28<<Kajoki ntae, kore too pooki otiiwua ꞉ng'oriei, meatae hoo lkitok alang Yoana, kake kore lara kini te nkitoria e Nkai, keikitok alang ninye.>> 29#Mat 21:32; Luka 3:12Kore payie ening ꞉ltung'ana pooki o laitalakunok le kodi inia natejo Yeso, neiken aajo kore mbaa e Nkai naa kedede, tankaraki keipatisaki te nkipatisare e Yoana. 30Kake kore Lparisayo o laiteng'enak loo nkitanapat, naa ketanya ninche maate yieunoto e Nkai, tankaraki eitu eipatis ꞉Yoana.
31Nejoki Yeso, <<Nyo sa aitunyunyukie kulo tung'ana le ana pukunoto? Nyo enyunyukore ninche? 32Kenyinyukore nkera naawueni to ng'oji nemirichiereki eipotuno aajo,
<Ikitukutakita ntae ndulen,
neitu iranyrany,
nikitaranyakita ntae sinkoliotin lo lkichiret
neitu inchirchir.>
33<<Amu keyewuo Yoana Laipatisani, menya ndaa nanyeitae, nememat naichuo, kake nijoijo ntae, <Lairirua eata.> 34Naa keyewuo nkerai e Ltung'ani, nerrutucho, nematicho, kake nijoijo ntae, <Eng'ura ele ogut naa lamerani, nera lchore laa laitalakunok le kodi o loo ng'ok.> 35Kake kore ng'eno e Nkai, naa keinyiaakita ꞉nkera enyena pooki aayielou, neiken aajo kedede.>>
Etubukoka Yeso ꞉nkitok ee ng'ok lata
36Kore ltung'ani obo loo Lparisayo, naa keitoomono Yeso metama ndaa ta nkaji enye. Nejing Yeso atua nkaji e ilo Parisayoi, newuon,#7:36 Kore Lyiaudi tenenya ndaa naa kewuenie eirichakino lpiloii. nenya ndaa. 37#Mat 26:7; Mrk 14:3; Yoa 12:3Netii apa ntomononi aing'okoni ilo kerenket. Kore payie eyielou ajo, ketii Yeso nkaji e ilo Parisayoi anyeita ndaa, neyau lkidong oitibirunyieki soit oji alabasta, oti lata narropili. 38Neitache tooriong Yeso, tankalo nkejek enyena eichirita, neng'asu aitong'tong'aki nkejek enyena lkiyio. Nejut taa lpapit le nkue enye, negus nkejek enyena, neelie inia lata narropili. 39Kore payie edol ꞉ilo Parisayoi oitoomono ninye ana, nejo ta ltau lenye, <<Kore tanaa loiboni le Nkai ele tung'ani, anata eteyielo ajo ng'ae ana naiseyie ninye, anaa aji etiu mpukunoto ena kitok, amu kera ninye nkaing'okoni.>> 40Newoliki ꞉Yeso ninye ajoki, <<Simon! Kaata mbae nayieu naaliki.>>
Nejoki, <<Laiteng'enani, tilikaaki.>> 41Nejoki Yeso, <<Eatae apa ltung'ani obo oichoo ltung'ana oare sile, neicho lobo dinarini 500,#7:41 Kore dinari nabo naa laata e mparri nabo. neicho likae 50. 42Kore payie elakino aatalak, nepaliki ninche pukura oare. Amaa, alo too kulo pukura oare, ochamu ninye oleng?>> 43Newoliki ꞉Simon ajoki, <<Kajo ake, ilo otapalikaki nkumo.>>
Nejoki, <<Itowolua sipata.>> 44Neiwuatuwuatakino ꞉Yeso naduo kitok, nejoki Simon, <<Idolita ana kitok? Katijing'ua nkaji ino, neitu kincho nkare naitukie nkejek ainien, kake kaaitachala ninye nkejek ainien too lkiyio lenyena, naajut taa lpapit le nkue enye. 45Eitu kintoomon nanu iyie to ngusoto,#7:45 Kore ngusoto te lkerreti loo Lyiaudi naa nkoitiei e nkirorokino. kake kore ana kitok, ang'asu paajing'u, eitu aapal maagusuto nkejek ainien. 46Eitu kielie lata nkue ai, kake kore ninye, kaaelie lata narropili nkejek ainien. 47Naa tankaraki inia paajoki ntae, etapalikaki nenia ng'ok enyena kumo, naa inia payie eata nchaman kitok. Kake kore ilo otapalikaki ng'ok kuni, naa keikini nchaman enye.>> 48Nejoki ꞉Yeso inia kitok, <<Ikitapalikaki iyie ng'ok inono.>> 49Kore lolo oowueni tenebo o ninye aanya ndaa neng'asu aajo taa ltauja lenche, <<Ng'ae dei ele opaliki abaki ng'ok?>> 50Nejoki ꞉Yeso inia kitok, <<Ikintejewua nkurukoto ino, chomo te seriani.>>
ప్రస్తుతం ఎంపిక చేయబడింది:
Luka 7: saq
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2021, Bible Translation and Literacy
