Lucas 24

Jechu judi ja̧boa̧remȩrȩ bëdürëremȩde

Mateo 28:1-10; Marco 16:1-8; Juan 20:1-10

1Jabo ja̧dëa ji̧ järätä chjaparea̧ do üdë chjätäa̧ duri oa dopea̧rä, chemana peaja̧ üdë pea tarupea̧rä, Domingo domȩ ju̧i̧iä peadai̧rä, ivi jini̧ro̧ Jechu ja̧ icjararemȩ oa joapea̧ oa goa järëreji̧ri̧ni̧rȩ jënȩro̧ jabërä jëdano̧a̧ mirerea̧ pio ju̧i̧ ta̧dë cjararäpȩ ju̧ri̧. 2Ado jini̧ro̧ go̧düdäräa̧rä, jabechji̧ ya ina̧rea̧ ta̧dë chacha üdë cja̧rȩmo̧räpȩ ano̧ mire chamȩ oa daea̧ni̧ro̧jo̧ȩ, jini̧ro̧ chjaodëri̧ yu̧a̧rea̧mi̧ dari̧. 3Jabo jini̧ro̧ yu̧a̧rä, Ano̧mȩ Jechu ja̧ icjararemȩ pio ju̧i̧ dadärädëa̧ni̧ro̧jo̧ȩ. 4Ado jini̧ro̧ ana̧ri̧ jo̧rȩtaji̧ri̧rȩ dae cjia̧ nö̧ta, chjaodëri̧ idëpea̧ oa cjiaji̧ri̧pea̧dirȩ oari̧ judiro̧ yo̧a̧ri̧rȩ, a̧dë chjäte tatari̧ cjiamȩ chjibo oa ina̧ji̧ri̧rȩ. 5Ado ivi jini̧ro̧ pio ji̧ri̧ daea̧ oaiä, uapa tjamo̧ji̧ri̧pea̧ni̧rȩ, juchatura̧ tjätjäpë china̧därärea̧mi̧ dari̧ jibëa̧ daito oa daburäpȩ yuro. Ja̧dëa ji̧ oari pio judiro̧ iëno̧ë ta̧rëa̧diro̧jȩrȩ:

—¿Tjana̧ ju̧i̧iä na̧tanȩro̧ cjo̧ro̧mȩ pio ju̧i̧ ja̧boa̧ji̧ri̧ ja̧ chjarerä? 6Danȩro̧, pio yidëdi. Bëdüa̧ oa cjiadi. Ja̧boa̧remȩrȩ bëdüa̧ oa cjiadi —yo̧a̧diro̧jȩrȩ—. Jabo danȩro̧, judi dibë Garirearäpȩ ju̧ri̧ jabërä ni̧bä chjaorërea̧ pio ju̧i̧ jo̧rȩtadëni̧ro̧? 7Danȩro̧, ni̧bä chjaorëremȩdidibë pio jȩa chjiari. 'Aja̧, chjai̧dëri̧ japaji̧ri̧ pio judiro̧ mitërea̧mi̧ dari̧ yürüa̧ oa cjiapaquëda, Pumȩrȩ Ara̧ Tjamo̧ pio judi toro cji̧de ja̧bo tänȩa̧ oa cjiapea̧ chiaquëda, ado ja̧dëa ji̧ tjarari̧ do chjätä ëte bëdüa̧ oa cjiapaquëda' quëna̧ jo̧rȩtamȩrȩ ni̧bä chjaorëremȩdidibë jabërä. ¿Jo̧rȩta̧dënȩro̧? —yo̧ji̧ri̧rȩ iëno̧ë ta̧rërëreji̧ri̧diro̧jȩrȩ a̧dëriji̧ri̧ mu̧i̧tjoi̧ pio judiro̧ ivi pio ji̧ri̧iäpȩmo̧.

8Ado ja̧dëa ji̧ ivi jini̧ro̧ pio ju̧i̧ ta̧rëa̧ oaiä, chjaodëri̧ jo̧rȩtaji̧ri̧pea̧ni̧rȩ Jechu pio judi jabërä yo̧rërea̧ pio ju̧i̧. 9Ado pio ju̧i̧iä jëreea tjamo̧ji̧ri̧rȩ ta̧dë cjara tjori pio judiri go̧dü ëte cuchupë baäeno̧a̧ni̧rȩ Jechu ja̧ jadü pio ji̧ri̧ ta̧rë tänȩpea̧ oa, 11 pio ji̧ri̧ daba tänȩpea̧ oa. Ado ji̧ri̧mo̧i̧dë jabo Jechu oa cho̧rë jäa̧ji̧ri̧ ütëbo oa ta̧rë tänȩpea̧ oa baäeno̧a̧ni̧rȩ, jënȩro̧ daea̧ pio ju̧i̧ chjadëri̧ ni̧bä chjaopea̧ oa. 10Ado pio jiro ivi jini̧ro̧, ¿chjiarëreji̧ri̧ni̧rȩ? Chjiani̧rȩdë, jabechji̧ Maria Madarena pio jini̧, ado Juana pio jini̧, ado Santiago arayi̧ pio jini̧borë cjiarëreyi̧nȩ, Maria quȩyi̧ pio jini̧. Ado pio ji̧ri̧ uëri peaja̧dirëreji̧ri̧ni̧rȩ ado cja̧rȩmo̧ ivi jini̧ro̧. Ado pio jiro ivi pio jini̧ro̧rëreji̧ri̧ni̧rȩ Jechurë chjadüa̧ pio ji̧ri̧ ta̧rë tänȩrëreji̧ri̧ jini̧ro̧. 11Jabo cjäri̧ madiro̧jȩrȩ, judiro̧ chjaodëri̧ ta̧rë ja̧botärea̧ ji̧, ta̧rë ja̧bodëa̧diro̧jȩrȩ. Jabechji̧ ivi pio ji̧ri̧ ja̧ ma̧ȩ oa ta̧rëa̧ oaiä, 'jabomo̧ teracaba jirodida, tjamo̧dëpamȩ jirodida' quëna̧ jo̧rȩtaji̧ri̧rȩ ta̧rërëreji̧ri̧diro̧jȩrȩ. 12Jabo ja̧dëa ji̧ Pedro pio judi chjaodëri̧ cjitëmȩrȩ bagureno̧rëremȩde ta̧dë cjararäpȩ ju̧ri̧ chjadëri̧ ütarë dapea̧ oa. Ado go̧düdäräa̧mȩrȩ yu̧a̧dëa̧de, jabo dairäpȩ uëdai̧ garë dae cjiamȩrȩ daea̧dejȩ puria̧rea̧ chjibo coto oa, Jechu pio ju̧i̧ joë puria̧rea̧ chjibo coto oa. Ado pio ju̧i̧ da ëte, ado chjereno̧ cuchupë baäeno̧rëremȩde ana̧ tjamo̧ri̧ jo̧rȩtamȩrȩ, dacho bëremi̧ cjiami̧ dari̧.

Jechu judi idëpea̧ oa cjiarëremȩde Emau quȩmȩräpȩ baärea̧ no̧ro jibëa̧ jadü yo̧a̧ri̧ oa ni̧bä chjaopea̧ oa

Marco 16:12-13

13Ji̧dë duri oa pio jiro doro, Jechu pio ju̧i̧ cho̧rë järëreji̧ri̧ pio judiro̧ yo̧a̧ri̧rȩ järëreji̧ri̧dirȩ Emau quȩmȩ bë ma̧ri̧räpȩmo̧ a̧rȩmȩ no̧ro, Jerucharȩ bë ma̧ri̧ri pio judiri jachi tjamo̧dëräpȩ, 11 kilometro jachi oa cjiamȩ bë ma̧ri̧räpȩ. 14Ado ana̧ tjamo̧ri̧ jo̧rȩtaji̧ri̧rȩ jibëa̧ dëbëti̧ra̧ chia ni̧bä chjaoriä järëreji̧ri̧dirȩ Jechu pio ju̧i̧ chjiari, Jechurë pea chjätäa̧ pio ju̧i̧ chjiari. 15Ado judiro̧ ana̧ri̧ ni̧bä chjaoriä jäji̧ri̧ oa, Jechu pio judi duriri pio judiri cho̧rë järëremȩdejȩrȩ, pio ji̧ri̧ nö̧ta ëba tai̧tämi̧ cjiamȩrȩ. 16Jabo judiro̧ yo̧a̧ri̧borë Jechu pio ju̧i̧ daea̧ ji̧, 'Aja̧, Jechu pio judidida' quëna̧ dabatärea̧ ji̧, cjäri̧ madiro̧jo̧ȩ, 'pio judidida' quëna̧ dadëa̧diro̧jo̧ȩ. Jabechji̧ Ütë tjamo̧ pio judi tänȩa̧ oaiä, 'pio judi tjamo̧dida' quëna̧ jo̧rȩtarea̧ dadëa̧diro̧jo̧ȩ. 17Ado ja̧dëa ji̧ Jechu judi pio ji̧ri̧iäpȩmo̧ iëno̧ë ta̧rëmȩrȩ iëno̧ë ta̧rërëremȩdejȩrȩ:

—Danȩrȩ, chjadëri̧ yo̧chji̧coe —yo̧a̧dejȩrȩ—. Mȩnȩro̧ jäa̧mi̧ nö̧ta, ¿tjana̧ oa ana̧ri̧ jo̧rȩtaji̧ri̧rȩ ni̧bä chjaoriä tai̧nȩrȩ —iëno̧ë ta̧rëa̧dejȩrȩ.

Ado judiro̧ pio ju̧i̧ ta̧rëa̧ oaiä, chjaodëri̧ cjiadiäa̧dirȩ no̧ro, gito ana̧ri̧ jo̧rȩtaji̧ri̧rȩ chamacho coëta̧ cjiari̧.

18Ja̧dëa ji̧ cja̧rȩmȩrȩ, Queopa quȩmȩ pio judi dëbë yo̧a̧dejȩ:

—Chia chia, ¿pio mȩnȩmo̧rȩ tjamo̧ri̧ dabadëmȩ judi Jechurea̧rȩ ja̧boa̧ pio ju̧i̧ chjiari? —iëno̧ë ta̧rëa̧dejȩ—. Danȩrȩ, no̧i̧dë tjamo̧reji̧ri̧dirȩ Jerucharȩräpȩ go̧düdäräreji̧ri̧ pio judiro̧ uëmo̧ a̧dë chjätärea̧ do pio ju̧i̧ jo̧rȩtaji̧ri̧rȩ a̧dopapea̧ oa, jabo pio ju̧i̧ chjiari daba maeadirȩ. Jabechji̧ Jerucharȩräpȩ ju̧ri̧ chjätäa̧ pio ju̧i̧ chjiari daba maeadirȩ jabo ¿tjana̧ ju̧i̧iä ta̧rëdëa̧renȩ pio mȩnȩ Jechurea̧ pio ju̧i̧ chjiari? —iëno̧ë ta̧rëa̧dejȩ.

19Ado Jechu judi dabadëcji̧ quëna̧ japamȩrȩ dëbë iëno̧ë ta̧rëa̧dejȩ:

—Jabo chjadëri̧ yo̧chji̧coe. ¿Tjana̧ oa chjätäa̧de? Yo̧chji̧coe —yo̧a̧dejȩrȩ.

Ado ja̧dëa ji̧ judiro̧ yo̧a̧ri̧borë dëbë yo̧rëreji̧ri̧diro̧jo̧ȩ:

—Tjana̧dë, danȩ, Jechurea̧ pio judi, Nachare bë ma̧ri̧rimȩ pio judi chjätäa̧ pio ju̧i̧ chjiari ni̧bä chjaorea̧rȩ —yo̧a̧diro̧jo̧ȩ—. Danȩ, Ütërë ea jana̧ chjadüa̧ oa ni̧bämȩrȩ cjo̧ro̧rëremȩde. Ado pumȩ ütëbo ja̧ dachoro jauëchja cjiari̧ na̧rȩ chjaomȩrȩ cjo̧ro̧rëremȩde, ana̧ri̧ na̧rȩmȩrȩ. Ado pio ju̧i̧iä pumȩ judiro̧ ütëborë, 'Aja̧, ju chia tjamo̧mȩrȩ ja̧bepamȩdida, Ütë tjamo̧ ja̧ ma̧ȩ oa goae tarari̧ a̧ra̧ano̧mȩdida, pumȩ ji̧ri̧ ana̧ri̧ jo̧rȩta tänȩrea̧mi̧ dari̧ a̧ra̧ano̧mȩdida' quëna̧ jo̧rȩtaji̧ri̧rȩ darëreji̧ri̧diro̧jo̧ȩ. Ado peaja̧dimi̧ dari̧ jo̧rȩtamȩrȩ dadejȩ Ütë tjamo̧ pio judi —yo̧a̧diro̧jo̧ȩ—. 20Jabo ibëa̧ ütëti̧ pio judiro̧, ado pio ibë chjiari tjamo̧ goë tuti ja̧bepaji̧ri̧ pio judiro̧borë, cjäri̧ madiro̧jo̧ȩ, domano̧ ütëti̧ pio ji̧ri̧iäpȩmo̧ yürüa̧diro̧jo̧ȩ. Ado tjamo̧ ütaramȩ ütë pio judi "ja̧bo tänȩpea̧de" yo̧a̧ oaiä, jabechji̧ yürüa̧ oa cjiarëremȩde toro cji̧de ja̧bo tänȩpea̧ oa. 21Jabo a̧ro̧rȩ, 'jabechji̧ pio judi tjamo̧pamȩdida' quëna̧ jo̧rȩtaji̧ri̧rȩ jidatatea̧rearo̧jo̧ȩ. Tjamo̧ davä. 'Ütërë mitëa̧ Chjätä Tänȩmȩ pio judipamȩ jirodida, Icharai pio judiri ja̧ji̧ri̧ ütëbodärä oa jare ano̧mi̧ dari̧ go̧dü tänȩpamȩ pio judipamȩ jirodida' quëna̧ jidatatea̧rea̧o̧jo̧ȩ —yo̧a̧diro̧jo̧ȩ—. Ado danȩ, tjarari̧ dode yaba̧. Pio yoa chjö̧na̧i̧ oa chjätäa̧ri ja̧, Jechurea̧ pio ju̧i̧ ja̧bo tänȩa̧ri ja̧, jabechji̧ tjarari̧ dode. 22Jabo danȩ, ana̧ tjamo̧ri̧ jo̧rȩta tänȩa̧ni̧ro̧ibe. Aja̧, pio ibë nö̧ta ji̧dë ma ëba cjiaji̧ri̧ ivi pio jini̧ro̧ ana̧ tjamo̧ri̧ jo̧rȩta tänȩa̧ni̧ro̧ibe, dacho bëremi̧ cjiari̧. Jabechji̧ peadai̧rä jätea̧ni̧rȩ davä ta̧dë cjararäpȩ ju̧ri̧. 23Jabo Jechu ja̧ icjararemȩ pio ju̧i̧ datärea̧ ji̧, cjäri̧ mani̧ro̧jo̧ȩ, dadëa̧ni̧ro̧jo̧ȩ. Jiro decjiaremȩde. Ado pio ju̧i̧iä cuchupë ma̧neno̧a̧ni̧ro̧ibe pio ibë ta̧rë tänȩpea̧ oa. Ado yo̧a̧ni̧ro̧ibe jënȩro̧ daea̧ pio ju̧i̧ chjiari, jënȩro̧ a̧dëriji̧ri̧ mu̧i̧tjoi̧ pio ji̧ri̧ daea̧rämi̧ cjia̧ pio ju̧i̧ chjiari. Ado judiro̧ pio jibëiäpȩmo̧ yo̧a̧ pio ju̧i̧bo yo̧a̧ni̧ro̧ibe. "Aja̧, Jechu pio judi cjo̧ro̧de" yo̧a̧ pio ju̧i̧bo yo̧a̧ni̧ro̧ibe ivi jini̧ro̧. 24Ado pio ju̧i̧ ta̧rëa̧ oaiä, ibë nö̧ta ëba cjiaji̧ri̧ pio judiro̧ orë ta̧dë cjararäpȩ bagureno̧a̧ ji̧, peaja̧di dari̧ dadäräa̧diro̧jo̧ȩ, ivi pio jini̧ro̧ yo̧a̧mi̧. Icjara decjiamȩ oa daea̧diro̧jo̧ȩ —yo̧ji̧ri̧rȩ ni̧bä chjaorëreji̧ri̧diro̧jo̧ȩ Jechu pio ju̧i̧iäpȩmo̧, 'pio judidida' jabë quëna̧dëji̧ri̧rȩ.

25Ja̧dëa ji̧ Jechu judi yo̧rëremȩdejȩrȩ:

—Jabo cjäri̧ manȩrȩ ca̧ pumȩ —yo̧a̧dejȩrȩ—. Chjadëri̧ jo̧rȩtarea̧ chji̧ chiadëji̧ri̧mi̧ dari̧ jo̧rȩtanȩrȩ. Jabechji̧ mȩnȩro̧ Ütërë ea jana̧ chjadüa̧ oa ni̧bärëreji̧ri̧ pio judiro̧ jabërä yo̧rërea̧ pio ju̧i̧ chjaodëri̧ quëna̧tärea̧ ji̧, chjao tjamo̧didibe davä judiro̧ go̧ȩparërea̧ ma̧ȩ duri pio ju̧i̧ quëna̧pea̧ ji̧ —yo̧a̧dejȩrȩ—. 26Danȩrȩ, Ütërë ea jana̧ chjadüa̧ oa ni̧bärëreji̧ri̧ pio judiro̧ jabërä ma̧ȩ yürürërea̧ ji̧, Ütërë mitëa̧ Chjätä Tänȩmȩ pio ju̧i̧ chjiari jabërä ma̧ȩ yürürërea̧ ji̧, ¿peaja̧di ma̧ȩ yürüdëa̧dirȩ judi chjai̧dë oa chjätäpea̧ pio ju̧i̧ chjiari? Ado judi chjai̧dë oa chjätä ëte a̧dë chjäte tatari̧ cjiamȩräpȩ ado chjereno̧ baäpea̧ pio ju̧i̧ chjiaribo ¿jabërä go̧ȩpadëa̧dirȩ? Dëdë, jabërä go̧ȩpea̧ oa cjia marëremȩde mȩnȩro̧ ütëborë chjaodëri̧ dabaparea̧mi̧ dari̧ —ni̧bä chjaoa̧dejȩrȩ.

27Ado ja̧dëa ji̧ Jechu judi taruparea̧ ma̧ȩra̧ pio ju̧ri̧ra̧ tarupamȩrȩ ana̧ri̧ ni̧bä chjaorëremȩdejȩrȩ Ütërë go̧ȩpa tänȩrërea̧ ma̧ȩ pio ju̧i̧. Jabechji̧ Moicherea̧rȩ go̧ȩparërea̧ ma̧ȩ pio judiri yurori Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩpea̧rä yuro ana̧ri̧ ni̧bä chjaorëremȩdejȩrȩ pio jȩa chjiari. Tjamo̧ davä. Pio jȩa chjiari go̧ȩpea̧ oa cjiarëremȩ ma̧ȩ chjö̧na̧i̧ oa chjadëri̧ a̧ra̧ano̧rëremȩdejȩrȩ areiami̧ dari̧, judiro̧ pio jȩa chjiari chjadëri̧ dabarea̧mi̧ dari̧.

28Ado japamitë chjätä ëte, Jechu pio ju̧i̧ japamitë ana̧ri̧ ta̧rë ëte, pio jiro oari judiro̧ Emau quȩmȩ bë ma̧ri̧ queri̧räpȩ go̧düdärärëreji̧ri̧dirȩ. Ado Jechu judi ji̧dë u̧i̧ jachi oa jäpamȩmi̧ da oa yo̧mȩ oa yo̧a̧diro̧jo̧ȩ:

29—Danȩ, do üdë chjiaräpȩmo̧diäa̧ oaiä, gȩnȩpapea̧ ji̧ querediäa̧ oaiä, jabechji̧ pio ibë nö̧ta cja̧rȩmȩ gȩnȩ ëba cjo̧ro̧ibe —yo̧a̧diro̧jo̧ȩ.

Ado pio ju̧i̧ ta̧rëa̧ oaiä, Jechu judi baäa̧de jibëa̧ bëräpȩ pio ji̧ri̧ nö̧ta. 30Ado pio ji̧ri̧ nö̧ta mechjaräpȩ ëba cha̧ ji̧, chja̧pe oa mitërëremȩdejȩ. Ado Ütë tjamo̧ pio ju̧i̧iäpȩmo̧ ni̧bä ëte, "Aja̧ Ama̧i̧, chjadëri̧ japea̧renȩibe" yo̧ ëte, mu̧i̧ quirë yürüa̧dejȩrȩ. 31Ado judiro̧ dabadërërea̧ ji̧, 'Aja̧, Jechu pio judidida' quëna̧ dabadërërea̧ ji̧, chjaodëri̧ na̧e chiaji̧ri̧pea̧dirȩ. Da cotomi̧ dari̧ cjiarërea̧ ji̧, areiami̧ dari̧ cjiamȩpea̧de jibëa̧ dacho üdë, Jechu pio ju̧i̧ chjadëri̧ dabarea̧mi̧ dari̧. Ado ja̧dëa ji̧ chjaodëri̧ a̧dë cjaraparëremȩdejȩrȩ, judiro̧ pio ju̧i̧ darea̧mi̧dëpe bagari̧.

32Ado judi jauëchja cjiari̧ a̧dë baäa̧ duri oa, cjiadiäa̧ji̧ri̧ pio judiro̧ yo̧a̧ri̧rȩ ana̧ri̧ jo̧rȩtaji̧ri̧rȩ ja̧di ta̧rëri̧ yo̧rëreji̧ri̧dirȩ jibëa̧ dëbëti̧ra̧ chia:

—Chia chia, judi no̧räpȩ ju̧ri̧ pio ibë a̧ra̧ano̧a̧ ji̧, a̧dë chjäte goae tjamo̧remȩdiibe. Tjamo̧ davä. Judi pio ibë nö̧ta ëba tai̧mȩrȩ ni̧bä chjaoa̧ ji̧, Ütërë go̧ȩpa tänȩrërea̧ ma̧ȩ pio ju̧i̧ areiarea̧mi̧ dari̧ ni̧bä chjaoa̧ ji̧, a̧ro̧rȩ dadiäpe bagarea̧mi̧ dari̧ a̧ra̧ano̧a̧ ji̧, chia chia, a̧dë chjäte ma̧ chiadëri̧ cjiape bagarea̧mi̧ dari̧ ta̧rë ja̧boa̧rea̧ro̧jo̧ȩ davä, a̧dë chjäte järi tjamo̧pe bagarea̧mi̧ dari̧. Jabechji̧ cjo̧dë üdë ibëa̧ chji̧rä gäri cjitëmi̧ dari̧ järi tjamo̧ji̧ri̧rȩ ta̧rëa̧rea̧ro̧jo̧ȩ —yo̧a̧dirȩ.

33Ado pio ju̧i̧iä chjaodëri̧ go̧deno̧rëreji̧ri̧dirȩ Jerucharȩräpȩmo̧ ado chjereno̧ baäpea̧ oa chjadëri̧ ta̧rë tänȩpea̧ oa jibëa̧ jadü pio ji̧ri̧. Ado ju̧ri̧pȩ go̧düdärä ëte, Jechu ja̧ jadü pio ji̧ri̧ dadäräa̧diro̧jȩrȩ 11 oa. Ado pio ji̧ri̧ nö̧ta ëba a̧dopera̧pea̧ji̧ri̧ pio ji̧ri̧bo dadäräa̧diro̧jȩrȩ. 34Jabo pio jiro pumȩ judiro̧ yo̧a̧ri̧rȩ ma̧ȩ yürütärea̧ ji̧, o judiro̧ pio jibëiäpȩmo̧ yo̧a̧diro̧jȩrȩ yabochja:

—Danȩrȩ, Jechu judi bëdüa̧ oa cjiade. Jabechji̧ pio jȩaiäpȩmo̧ darea̧mi̧ dari̧ na̧rȩremȩdejȩ Pedro pio ju̧i̧ —yo̧a̧diro̧jȩrȩ.

35Ado ja̧dëa ji̧ pumȩ judiro̧ yo̧a̧ri̧rȩ ano̧ mire ni̧bä chjaoji̧ri̧pea̧diro̧jȩrȩ jënȩro̧ pea daea̧ pio ju̧i̧ chjiari, jënȩro̧ järea̧ no̧räpȩ ju̧ri̧ pea chjätäa̧ pio ju̧i̧ chjiari. Tjamo̧ davä. Jënȩro̧ järea̧ no̧räpȩ ju̧ri̧ Jechu pio ju̧i̧iäpȩmo̧ daea̧ pio ju̧i̧ chjiari, 'jabo pio judi tjamo̧dida' quëna̧ dabadëa̧ pio ju̧i̧ chjiari, jabo ja̧dëa ji̧ judi chja̧pe oa mitëmȩrȩ mu̧i̧ quirë yürüa̧ pio ju̧i̧iämo̧i̧ na̧e chiape baga̧ pio ju̧i̧ chjiari ni̧bä chjaoji̧ri̧pea̧diro̧jȩrȩ.

Jechu judi jibëa̧ jadü ja̧ charerä jauëchja cjiari̧ idëpea̧ oa cjiarërea̧de

36Ado judiro̧ ni̧bä chjaoa̧ nö̧ta, chjaodëri̧ idëpamȩrȩ cjiamȩpea̧de Jechu judi jibëa̧ chjarerä. Ado yo̧a̧dejȩrȩ:

—Ma̧ chjupi̧ cjiari̧ jo̧rȩtachji̧vä.

37Ado judiro̧ pio ju̧i̧ daea̧ ji̧, uaparea̧ üdë chjaodëri̧ boadärärëremȩdejȩrȩ jibëa̧ chji̧ oa. Jabechji̧ judi joë ya oaiä yu̧a̧dëa̧ oaiä, jabo chjaodëri̧ idëpea̧ oa cjia̧ oaiä, jabechji̧ uapaji̧ri̧pea̧dirȩ, 'ja̧borëremȩbea pio ju̧i̧ ja̧ tjo oa da jiroa̧ro̧da' quëna̧ jo̧rȩtaji̧ri̧rȩ.

38Jabo Jechu judi iëno̧ë ta̧rëa̧dejȩrȩ:

—¿Tjana̧ ju̧i̧iä uapanȩrȩ? ¿Tjana̧ ju̧i̧iä baebaeami̧ dari̧ jo̧rȩtanȩrȩ? 39Danȩrȩ, chjadëri̧ ütarë dachji̧coe ca̧ ichi oa. Ca̧ tabo chjadëri̧ ütarë dachji̧vä. Jabomo̧ pumȩ tjorämi̧ cjiachea oa, ga̧re tarachji̧coe —yo̧a̧dejȩrȩ—. Jabechji̧ ja̧boa̧mȩ ja̧ tjo üdë icjara decjiade. Jabo cüdë, danȩrȩ, ca̧ icjara oa chiamȩrȩ cjo̧ro̧requede —yo̧a̧dejȩrȩ.

40Ado judi pio ji̧ri̧ nö̧ta ni̧bä chjaoa̧rä, na̧rȩrëremȩdejȩrȩ jibëa̧ ichi oa, jibëa̧ tabo. 41Jabo judiro̧ Jechu pio ju̧i̧ ma̧ chiadëri̧ cjiaji̧ri̧rȩ daea̧räbo, ya yabëcjiami̧ dari̧ jo̧rȩtaji̧ri̧rȩ daea̧räbo, jabechji̧ jaejaeami̧ dari̧ jo̧rȩtarëreji̧ri̧dirȩ, 'Jechu pio judi tjamo̧dëdiibëda' quëna̧ jo̧rȩtaji̧ri̧rȩ. Ado pio ju̧i̧iä Jechu judi iëno̧ë ta̧rëa̧dejȩrȩ:

—Danȩrȩ, ¿eami̧ jurarea̧ oa goadënȩrȩ?

42Ado pio ju̧i̧ ta̧rëa̧ oaiä, yürüa̧diro̧jo̧ȩ tja̧rea̧ oa cjiamȩ cho̧ oa. 43Ado jura̧dejȩ. Ütëbo ja̧ dachoro jura̧dejȩ judiro̧ 'jabomo̧ tjo maeadida' quëna̧chea oa.

44Ja̧dëa ji̧ Jechu judi yo̧a̧dejȩrȩ:

—Danȩrȩ, cüdë pio dibë pearä yo̧rërea̧ pio ju̧i̧ ado chjereno̧ ni̧bä chjaotämi̧ cjiarequededibe —yo̧a̧dejȩrȩ—. Danȩrȩ, pio coa chjiari jabërä go̧ȩparërea̧ ma̧ȩ pio judi chjö̧na̧i̧rȩ tjamo̧i̧padäräa̧ oa cjiapea̧ chia maeade, a̧dë cjiadiärea̧ decjiari̧. Tjamo̧ davä. Moicherea̧rȩ go̧ȩparërea̧ ma̧ȩ pio judiri yurori Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩpea̧rä yuro cjiamȩ ma̧ȩ pio judi, jabechji̧ tjamo̧i̧padäräa̧ oa cjiapea̧ chia maeade. Ado Go̧a̧rea̧ ma̧ȩ pio judi peaja̧di tjamo̧i̧padäräa̧ oa cjiapea̧ chiade —yo̧rëremȩdejȩrȩ.

45Ado ja̧dëa ji̧ Ütërë jabërä go̧ȩpa tänȩrërea̧ ma̧ȩ pio ju̧i̧ a̧ra̧ano̧rëremȩdejȩrȩ Jechu judi. Chjaodëri̧ dabaparea̧mi̧ dari̧, tatarä jo̧rȩtarea̧mi̧ dari̧ a̧ra̧ano̧rëremȩdejȩrȩ, jibëa̧ chji̧rä chjaodëri̧ chadiärea̧mi̧ dari̧. Jabechji̧ judiro̧ chjadëri̧ dabadërërea̧ ji̧, 'Aja̧, pio jiro ma̧ȩ pio judi ¿tjana̧ oa yo̧cjivadi' quëna̧ jo̧rȩtarërea̧ ji̧, jabechji̧ coëma cjiari̧ jo̧rȩtaji̧ri̧pe bagarëreji̧ri̧dirȩ, Jechu pio judi areiami̧ dari̧ a̧ra̧ano̧a̧ oaiä. 46Ado pio ju̧i̧ uëri yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:

—Danȩrȩ ca̧ pumȩ, jabërä go̧ȩpea̧ oa cjiarëremȩde ma̧ȩ üdë Ütërë mitëa̧ Chjätä Tänȩmȩ pio ju̧i̧ chjiari. Aja̧, jënȩ ja̧bopea̧ pio ju̧i̧ chjiari, jënȩ ma̧i̧ dari̧ conȩda̧ oa cjiapea̧ pio ju̧i̧ chjiari, ado jënȩ tjarari̧ do chjätä ëte bëdüpea̧ pio ju̧i̧ chjiari jabërä go̧ȩpea̧ oa cjiarëremȩde ma̧ȩ üdë pio coa chjiari. 47Ado pio jiro ma̧ȩ üdë a̧ra̧ano̧pea̧de. Peaja̧di ta̧rëri̧ yo̧diibe ma̧ȩ üdë. Jabechji̧ chiriräpȩti̧ oa cjo̧ro̧ji̧ri̧ pumȩ pio ji̧ri̧iäpȩmo̧, tjaoëpai̧ dari̧ ni̧bäji̧ri̧ pio ji̧ri̧iäpȩmo̧ a̧ra̧ano̧pea̧de. Aja̧, pumȩ judiro̧ chjadëri̧ ano̧ mire jo̧rȩtarea̧ dapea̧ oa, judiro̧ chjai̧dëri̧ japea̧ üdë chjadëri̧ duridëparȩa̧ oa cjiapea̧ oa, jabechji̧ a̧ra̧ano̧pea̧de Ütërë mitëa̧ Chjätä Tänȩmȩ pio ju̧i̧ chjiari ma̧ȩ üdë. Aja̧ ca̧ pumȩ, ja̧di ta̧rëri̧ yo̧diibe. Ado danȩrȩ, pio jiro ma̧ȩ üdë, cjäri̧ made, ibëa̧ra̧ pio ju̧ri̧ra̧ a̧ra̧ano̧dëpea̧de, jabo Ütërë mitëa̧ Chjätä Tänȩmȩ pio judi tjamo̧ yo̧rea̧ yürüa̧ra̧ pio ju̧ri̧ra̧ a̧ra̧ano̧pea̧de. Ado Jerucharȩräpȩ tarupë a̧ra̧ano̧pea̧de. Ado pio judiri chiriräpȩti̧ oa cjo̧ro̧ji̧ri̧ pio ji̧ri̧iäpȩmo̧ a̧ra̧ano̧pea̧de. Aja̧, ja̧di ta̧rëri̧ yo̧diibe ma̧ȩ üdë. 48Jabechji̧ pio mȩnȩro̧ chjö̧na̧i̧ oa irä daea̧nȩrȩ. Pio coa chjiari chjö̧na̧i̧ oa irä daea̧nȩrȩ. Ado irä ta̧rëa̧nȩrȩ peaja̧di. Ado pio ju̧i̧iä pumȩ pio ji̧ri̧iäpȩmo̧ a̧ra̧ano̧pea̧ chianȩrȩ —yo̧a̧dejȩrȩ—. 49Ado danȩrȩ, chjadüparequededibe Tjo tjamo̧ pio ju̧i̧. Jabechji̧ ca̧ Ama̧i pio judi yo̧ë cji̧därërea̧mi̧ chjadüpareconȩ. Jabo danȩrȩ, pio yoa bë ma̧ri̧räpȩ cjiadiächji̧vä Tjo tjamo̧ pio judi birë ma̧na̧rä yuro. Aja̧, pio dibë ju chiarea̧ yürüa̧rä yuro, mȩnȩro̧ a̧dëri pio judiri ma̧na̧mȩ jauëchjarea̧ oa chiaji̧ri̧pea̧rä yuro, jabechji̧ pio yoaiä cjiadiächji̧vä, mȩnȩro̧ pio coa chjiari chjadëri̧ ni̧bä chjaorea̧ dapea̧ oa —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧.

Jechu judi ado chjereno̧ baärëremȩde a̧dëräpȩ

Marco 16:19-20

50Ado Jechu judi pio ji̧ri̧iäpȩmo̧ ni̧bä chjaoa̧ duri oa, yabo ëba baärëremȩdejȩrȩ Betania quȩmȩ bë ma̧ri̧ queri̧räpȩ. Ado pio ju̧ri̧pȩ jibëa̧ jadü pio ji̧ri̧iäpȩmo̧ ni̧bärëremȩdejȩrȩ. Aja̧, dëbëribo ichipë cjiamȩrȩ ni̧bärëremȩdejȩrȩ, judiro̧ chjadëri̧ a̧doa̧ oa cjiatä. 51Ado judi pio ji̧ri̧iäpȩmo̧ ja̧di dari̧ ni̧bäa̧rä, cjitë tänȩa̧ oa cjiarëremȩde a̧dëräpȩ yuro. 52Ado pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ dae cjiarëreji̧ri̧dirȩ. Ado ja̧dëa ji̧ ado chjereno̧ baärëreji̧ri̧dirȩ Jerucharȩräpȩ, a̧dë chjäte ma̧ chiadëri̧ cjiaji̧ri̧rȩ. 53Ado judiro̧ ju̧ri̧pȩ go̧düdäräa̧rä, jabechji̧ doti̧mi̧ jädiärëreji̧ri̧dirȩ Ütë tjamo̧ ja̧ bëräpȩ Ütë tjamo̧ pio ju̧i̧iäpȩmo̧ chjacjiamȩri̧ ni̧bäpea̧ oa.

ప్రస్తుతం ఎంపిక చేయబడింది:

Lucas 24: Pume

హైలైట్

షేర్ చేయి

కాపీ