Génesis 1
1
Tä jaba lä
wacacablamaleno wei tä a̦
1Jaba däjä, judu mösö ma cui, bita a ma cui, Yai Bada tänö tä bluca bädamalema. 2A bita wa̦lidio balöoma. A ca̦i bloque nö quilijioma. Mau o̦qui u bada feyaca jamö, mö didi tä cuoma. Ö̦jö u feyaca jamö, Yai Bada a Bufi cadäaö cuaama. 3Ö̦jö däjä, Yai Bada a wa̦ falayoma.
—Bei. Tä da wacacablalu —a fa cunö, tä wacacablaliyoma.
4Tä lä wacacai tä dodijidawä fa dalalönö, tä ayablamalema. Ai tä mö dödöobä, ai tä mö wacacao mö feduobä, ö̦jö Yai Bada tänö täcöbö tabou shedequeoma. 5Tä lä wacacai, mö jalu tä a̦fa jilaquema. Tä lä suble wei, mö didi tä a̦fa jilaa mö feduquema. Ö̦jö däjä, tä mö fa weyalönö, bei tä mö jaba dödölayoma.
Mösö lä lelemaquedayono
wei tä a̦
6Ö̦jö tä fena ja, Yai Bada a wa̦ faö co̦oma.
—Bei. Mau u möamo jamö, judu mösö da cublalu. Wa mösö fa cublalunö, mau wa ubä shedequemabobä. Ai wa ubä bäfätämabobä, ai wa ubä feyacamabou mö feduobä —a cuma.
Einaja lä tä cublou showadalayoma. 7Inaja Yai Bada tänö mösö fa tamacönö, mau ubä shedequeblamalema. Bäfätä jamö u lä cuinö, tä ulifi shododoo fa showaonö, mösö lä lelemaquedayono wei mösönö, ai u ja̦maquedayoma. Inaja lä tä cublou showadalayoma. 8Mösö lä lelemaquedayono wei mösö lä cui, judu bei mösö a̦fa jilaquema. Ö̦jö däjä, tä mö weyaa fa co̦lunö, bolacabö bei tä mö jaba dödölayoma.
Tä ulifi lä
wawäblamaleno wei tä a̦
9Ö̦jö tä fena ja, Yai Bada a wa̦ faö co̦oma.
—Bei. Bäfätä jamö wa u lä cui, ubä da co̦camolu, ulifi wejediwä tä wawäblobä —a cuma.
Inaja lä tä cublou showadalayoma. 10Tä wejediwä lä wawäblaliyono wei, mashita a wa̦fa jilaquema. U lä co̦camolayono wei, modu u a̦fa jilaa mö feduquema. Inaja tä fa cublalunö, Yai Bada tänö tä dodijidawä dalalema.
Täbä bluca caumaö
lä bufino wei tä a̦
11Ö̦jö däjä, Yai Bada a wa̦ faö co̦oma.
—Bei. Ulifi jamö, bä bluca da faolalu. Bei tä mobä lä cublai defibä ca̦i, fimo fimo bä jamö mobä lä didiblai defibä ca̦i da faolalu —a cuma.
Inaja lä tä cublou showadalayoma. 12Ulifi a jamö bä bluca lä cauu wei, bä bluca fao showaolaliyoma. Bei tä mobä lä cublai defibä ca̦i, fimo fimo bä jamö mobä lä didiblai defibä ca̦i bluca fao showaolaliyoma. Inaja tä fa cublalunö, Yai Bada tänö tä dodijidawä dalalema. 13Ö̦jö däjä, tä mö weyaa fa co̦lunö, 3 bei tä mö jaba dödölayoma.
Tä shi̦i jilajaobä,
täbä lä wawämano wei tä a̦
14Ö̦jö tä fena ja, Yai Bada a wa̦ faö co̦oma.
—Bei. Wamacö shi̦i wacacaobä, judu mösö jamö bä da cuicudu. Didi däjä, ai wa shi̦i lä cuinö, wa tä wacacamabou fe yadiobä. Jalu däjä, ai wa shi̦i yai li wacacawä cuobä. Belibo wa lä cui, motoca wa ma cui, tä no nia lä cublou wei wafäcö wababeje. Täbä nia lä cuaaö wei tä ja, tä nö dabobeje. Wamacö nosi lä blacäcou wei tä ja, täbä moyawäobä. 15Judu mösö jamö wamacö culanö, bita wama a wacacamabobä —a cuma.
Inaja lä tä cublou showadalayoma. 16Tä shi̦i jilajaobä, bolacabö cäcöbö wawämalema. Mö jalu däjä, tä shi̦i bada lä yobli wei tä shi̦i bufiblamobä cätä. Mö didi däjä, tä shi̦i lä wacacao wei tä shi̦i bufiblamou mö feduobä cätä. Shidicali bä ca̦i mö feduwä malä cui.
17Bita a wacacaobä, judu mösö jamö bä shadimaquema. 18Jalu däjä ma cui, didi däjä ma cui, bä shi̦i bufiblamobä bä taquedayoma. Tä mö lä didi wei jamö, jalu tä coyocoo mlaobä, ö̦jö bä ca̦i wawämalema. Inaja tä fa cublalunö, Yai Bada tänö tä dodijidawä dalalema. 19Ö̦jö däjä, tä mö weyaa fa co̦lunö, 4 bei tä mö jaba dödölayoma.
Bä lä yäö wei bä wawämaö
lä nomöjöono wei tä a̦
20Ö̦jö tä fena ja, Yai Bada a wa̦ faö co̦oma.
—Bei. Mau u jamö wamacö shulilobä, bä da wawäolalu. Ösö jamö wamacö yäaabä, bä bluca wawäblou mö fedua da showadalo —a cuma.
21Einaja Yai Bada tä fa cudalunö, modu u jamö bä nö bada lä quiliaö wei bä sho, mau u jamö bä shulilobä bä ca̦i bluca lä juu wei bä sho, ö̦jö bä jödödöwä bädamaö showalayoma. Bä lä yäö wei bä ca̦i bluca bädamaö mö fedua showalayoma. Inaja tä fa cublalunö, Yai Bada tänö tä dodijidawä dalalema.
22Ö̦jö däjä, Yai Bada tänö bä nia fa bayeliblanö, bä balamaö bufima.
—Mau u jamö wamacö lä juu wei, bä da balalö. Wamacö fa blucablalunö, modu u jamö wamacö juu jödödöblobä. Wamacö yalo lä yäö wei, ulifi jamö bä ca̦i da balaolalu —a cuma.
23Ö̦jö däjä, tä mö weyaa fa co̦lunö, 5 bei tä mö jaba dödölayoma.
Bä bluca lä juu wei bä
wawämaö lä nomöjöono wei tä a̦
24Ö̦jö tä fena ja, Yai Bada a wa̦ faö co̦oma.
—Bei. Mashita jamö yalo wamacö jubä, bä wawäblou da showadalo. Yalo ji̦ima bä sho, ulifi jamö bä lä juu wei bä sho, wajaquemi bä wai lä joleaö wei bä sho, bä jödödöwä da wawäblalu—a cuma.
Inaja lä tä cublou showadalayoma. 25Yalo bä bluca tablaö showalayoma. Ulifi jamö bä yalo bluca lä juu wei bä sho, yalo bä tabobeje bä sho, wajaquemi bä wai lä joleaö wei bä sho, bä bluca tablalema. Inaja tä fa cublalunö, Yai Bada tänö tä dodijidawä dalalema.
Yanowamö a lä
tablaleno wei tä a̦
26Ö̦jö däjä, Yai Bada a wa̦ faö co̦oma.
—Camiyä bämacö lä culenaja a cuwä, yanowamö bäma a da tabla, bämalecö owäbobä. Ö̦jö däjä, jödödöwä bäma täbä lä tablalöfe, yanowamö bä nija bäma täbä fa jöbäcönö, cama etäbä cuobä. Modu u jamö bä lä juu wei bä ma cui, bä yalo lä yäö wei bä ma cui, bä yalo tabobeje bä ma cui, wajaquemi bä wai lä joleaö wei bä ma cui, ö̦jö bä nofi bluca tabobeje —a cuma.
27¿Ö̦jö tawä? Cama Yai Bada tä lä culenaja a cuwä, a yanowamö tablalema. Wa̦lo a, suwä a, cäcöbö tablalema. 28Ö̦jö däjä, Yai Bada tänö cäcöbö nia fa bayeliblanö, cäcöbö balamaö bufima.
—Bei. Cäcöbö da balalö. Wamacö balaa fa dodijilönö, wamacö bälöjou fa cuaanö, wama tä ulifi nofi tabou jödödobä. Modu u jamö bä bluca lä juu wei bä ma cui, bä yalo lä yäö wei bä ma cui, mashita jamö bä yalo bluca lä juu wei bä ma cui, afä lä täbä, wama täbä nofi bluca tabobä —a cuma.
Bä iyabä, täbä nabä lä
shömöqueno wei tä a̦
29Ö̦jö däjä, Yai Bada a wa̦ faö co̦oma.
—Bei. Wamacö iyabä, bluca täbä lä faö wei täbä ja, bämacö dobäö waiquia lä cule. Jödödöwä tä jamö, bei tä mobä lä cublai defibä ma cui ja, fimo fimo bä jamö mobä lä didiblai defibä ma cui ja, wamacö iyabä, ya defibä nabä bluca shömöaö lä cule. 30Bä yalo iyaö mö feduobä, tä jenabä lä shididii, ya defi jenabä nabä ca̦i shömöaö mö fedua lä cule. Mashita jamö bä yalo bluca lä juu wei bä ma cui, bä bluca lä yäö wei bä ma cui, wajaquemi bä wai lä joleaö wei bä ca̦i bluca ma cui, ö̦jö jenabä ja, ya bä dobäö mö fedua waiquia lä cule —a cuma.
Inaja lä tä cublou showadalayoma. 31Ö̦jö däjä, camanö bä bluca lä tablaleno wei, bä möö fa cuaanö, jödödöwä tä dodijidao fe balojooma. Ö̦jö däjä, tä mö weyaa fa co̦lunö, 6 bei tä mö jaba dödölayoma.
ప్రస్తుతం ఎంపిక చేయబడింది:
Génesis 1: GUU
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
©2012, All Rights Reserved
