ƐSLA 5
5
1Kiahuna Ngewɔ layialebleisia, Hagai kɛ Sɛkalaya Ido hindoloi, ti fasai wailɔ Juublei nasia gama ti yɛ Juda kɛ Jelusalɛmi, Isleɛl Yewɔi biyei hu na yɛ ti mahu. 2Na wooma Sɛlubabɛl Sealtiɛl hindoloi kɛ Jɛsua Josedaki hindoloi ti gbuailɔ Ngewɔ wɛlei loo va gbɔma Jelusalɛmi; tawao Ngewɔ layialebleisia ti yɛ ti gblanga ta gbɔ ti ma.
3Yee watii na gbɔma Tatɛnai talatahu gɔminei Yufletisi yei wooma kɛ Sɛtaa Bɔsɛnai kɛ ti magbɛlɛmableisia ti wailɔ ti gama kɛ ti ndenga ti ma tɛ, “Yee lɔ ndeni wu ma pɛlei ji loo va tawao wu yee bundi ji gbɔyɔ a too la?” 4Ti ti mɔlilɔ gbɔma a ji tɛ, “Hingei nasia ti yee pɛlei loo ma ti biyeisia?” 5Kɛɛ ti Yewɔi yamei yɛlɔ Juubleisia ti gbakoisia ma, tawao tii gbekpani ti gulɔ haaŋ gowili i foo Dalɔsi gama tawao na wooma ti kpɛmbo majɔɔilɔ a kɔlɔ nyɛingɔ hu wee kɔloongɔ ma.
6Kɔlɔ nyɛingɔi na Tatɛnai kpaalata hu gɔminei Yufletisi yei wooma kɛ Sɛtaa Bɔsɛnai, kɛ ngi magbɛlɛmableisia tutui nasia ti ti looni Mahei Dalɔsi gama; 7ti kɔlɔ nyɛingɔ yoyoilɔ ngi gama, jisia mia yɛ nyɛingɔ hu: “Ndiilɛli i yɛ Mahei Dalɔsi ma! 8Mahei i kɔɔ naa kɛ mu lilɔ Juda gbalatɛi hu, Ngewɔ wai wɛlei gama, na ti tooni a kɔtu wawangaa, tawao ti gbengbelei lailɔ yee bundisia hu; ti yee ngengei ji wielɔ a nɛmahulewe tawao i lɛlɔ gulɔma ti yeya. 9Na wooma mu yɛpɛilɔ yee kpakoi nasia gama kɛ mu ti mɔlinga muɛɛ, ‘Yee lɔ i sawa veni wu wɛ pɛlei ji loo va tawao wu kpɔyɔ a too la?’ 10Mu ti mɔlilɔ gbɔma a ti biyeisia, kɔ wu kɔɔ panda, kɔ nahi mu yee hingeisia kɛ ti gulɔbleisia biyeisia nyɛin. 11Ji mia ti ndeni mu ma tɛ, ‘Mu yɛni a bɔilopoisia lɔ ngelegohu kɛ ndunya Yewɔi va, tawao mua pɛlei ji loo ma gbɔma ti yɛ tooni govama, na Isleɛl maha wai tooni kɛ i kpɔyɔnga. 12Kɛɛ ajifa mu kɛkɛni ti ngelegohu Yewɔi lii leweni i ti wailɔ Babilɔn mahei Nɛbukadnɛsa, Kaldiamɔi yeya, na yee pɛlei ji nyanini kɛ i ya a yee nungeisia Babilɔn. 13Na hu gbi, Babilɔn mahei Sailɔsi mahayei fooi yee haalayei hu, i sawa lailɔ yɛ ti Ngewɔ wɛlei ji loo gbɔma. 14I gbɛlɛ na ma, kanigbɔlui kɛ kanigolei hakeisia Ngewɔ wɛlei va, nasia Nɛbukadnɛsa ti gbuani Ngewɔ wɛlei bu na i yɛ Jelusalɛmi kɛ i wanga a tie Babilɔn hɛwɛlei bu, Mahei Sailɔsi i jisia wumbuilɔ Babilɔn hɛwɛlei bu, kɛ i ti venga hindo yila wɛ na ngi biyei mia Sɛsbasaa, na i ngi woteni a gɔminei. 15I ndeilɔ ngi ma yɛ, “Yee hakeisia wumbu; tawao bi ti wu Ngewɔ wɛlei bu Jelusalɛmi, tawao wu Ngewɔ wɛlei loo gbɔma ngi lomei.” 16Na wooma Sɛsbasaa ji weilɔ kɛ i Ngewɔ wɛlei valamei loonga Jelusalɛmi; tawao i gbua watii na ma haaŋ i too foloi ji ma tia lɛ too ma, tawao tii yaa a kpɔyɔni.’ 17Kɛ naa, ina i nɛɛlɔ mahei wɛ, pie ti kɔkɔli mahei ngɔlɔ lamagbatɛngɔisia hu mia Babilɔn, kɔ ti tɔ ina Mahei Sailɔsi i yɛ sawa lailɔ Ngewɔ wɛlei loo va gbɔma Jelusalɛmi. Mahei i pie mu hu gɔɔ na ngi lii hu kɔloongɔ yee hindei ji ma.”
ప్రస్తుతం ఎంపిక చేయబడింది:
ƐSLA 5: RMB
హైలైట్
షేర్ చేయి
కాపీ
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
