Jɛnɛsis 5
5
Adam In Jɛnareshɔn
(1 Kronikuls 1:1-4)
1Dis na di wan dɛn na Adam in Jɛnareshɔn. We PAPA GƆD mek mɔtalman, i mek dɛn lɛkɛ insɛf. 2I mek man ɛn uman, i blɛs dɛn, ɛn i kɔl dɛn “Mɔtalman.” 3We Adam bin ol wan ɔndrɛd ɛn tati ia, i bɔn wan bɔypikin we tan lɛkɛ am, ɛn i gi am nem Sɛth. 4Afta dat, Adam de fɔ et ɔndrɛd ia mɔ, ɛn bɔn ɔda bɔy ɛn gyal pikin dɛn. 5Adam ol nayn ɔndrɛd ɛn tati ia we i day.
6We Sɛth bin ol wan ɔndrɛd ɛn fayv ia, i bɔn wan bɔypikin we nem Inɔsh. 7Afta dat, i de fɔ et ɔndrɛd ɛn sɛvin ia mɔ. Sɛth bɔn ɔda bɔy ɛn gyal pikin dɛn, 8ɛn day we i ol nayn ɔndrɛd ɛn twɛlv ia.
9We Inɔsh ol naynti ia, i bɔn wan bɔypikin we nem Kenan. 10Afta dat, i de fɔ et ɔndrɛd ɛn fiftin ia mɔ. I bɔn ɔda bɔy ɛn gyal pikin dɛn. 11Inɔsh ol nayn ɔndrɛd ɛn fayv ia we i day.
12We Kenan ol sɛvinti ia, i bɔn wan bɔypikin we nem Maalalɛl. 13Afta dat, i de fɔ et ɔndrɛd ɛn fɔti ia mɔ. I bɔn ɔda bɔy ɛn gyal pikin dɛn. 14Kenan day we i ol nayn ɔndrɛd ɛn tɛn ia.
15We Maalalɛl ol siksti-fayv ia, i bɔn wan bɔypikin we nem Jarɛd. 16Afta dat, i de fɔ et ɔndrɛd ɛn tati ia mɔ. Insɛf bɔn ɔda bɔy ɛn gyal pikin dɛn. 17Maalalɛl day we i ol et ɔndrɛd ɛn naynti-fayv ia.
18We Jarɛd ol wan ɔndrɛd ɛn siksti-tu ia, i bɔn wan bɔypikin we nem Inɔk. 19Afta dat, i de fɔ et ɔndrɛd ia mɔ. I bɔn ɔda bɔy ɛn gyal pikin dɛn. 20Jarɛd day we i ol nayn ɔndrɛd ɛn siksti-tu ia.
21We Inɔk ol siksti-fayv ia, i bɔn wan bɔypikin we nem Mɛtyusila. 22Inɔk ɛn PAPA GƆD na bin padi fɔ tri ɔndrɛd ia, ɛn na da tɛm de i bɔn ɔda bɔy ɛn gyal pikin dɛn. 23Inɔk ol tri ɔndrɛd ɛn siksti-fayv ia. 24Inɔk ɛn PAPA GƆD na bin padi; wande i jɛs lɔs, bikɔs PAPA GƆD bin tek am go.
25We Mɛtyusila ol wan ɔndrɛd ɛn eti-sɛvin ia, i bɔn wan bɔypikin we nem Lamɛk. 26Afta dat, Mɛtyusila de fɔ sɛvin ɔndrɛd ɛn eti-tu ia mɔ. I bɔn ɔda bɔy ɛn gyal pikin dɛn, 27Mɛtyusila day we i ol nayn ɔndrɛd ɛn siksti-nayn ia.
28We Lamɛk ol wan ɔndrɛd ɛn eti-tu ia, i bɔn wan bɔypikin, 29ɛn i se, “PAPA GƆD bin dɔn swɛ dis grɔn se i nɔ go bɛtɛ. Dis pikin ya so go ɛp pul wi pan di traŋa wok we wi bin dɔn de du. Fɔseka, dat i gi am nem Noa.#5:29 Noa I fiba di Ibru min rilif frɔm pen, waala ɔ trɔbul 30Afta dat, Lamɛk de fɔ fayv ɔndrɛd ɛn naynti-fayv ia mɔ. I bɔn ɔda bɔy ɛn gyal pikin dɛn. 31I day we i ol sɛvin ɔndrɛd ɛn sɛvinti-sɛvin ia. 32Bay di tɛm we Noa de ol fayv ɔndrɛd ia, i bin dɔn bɔn tri bɔypikin dɛn we i gi nem Shɛm, Am ɛn Jefɛt.
ప్రస్తుతం ఎంపిక చేయబడింది:
Jɛnɛsis 5: KRIO13
హైలైట్
షేర్ చేయి
కాపీ
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fte.png&w=128&q=75)
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.