Maj 7
7
Ntûmîîri ya Stefano
1Rîu mûthînjîri-Mûrungu ûrîa mûnene aramûûria, “Mantû jau jarî o?” 2#Kîam 12.1 Stefano arauga, “Aarî na ataana ba baaba, thikîîreeni! Mûrungu mwene ûkuumio, nî aacionanîrie kîrî kîûjûjû gîeetû Abrahamu rîrîa aarî Mesopotamia mbere ya eeta gûtûûra kûrîa Harani, 3na aramwîra atîrî, ‘Uma nthîgûrû yaaku na ûtige antû ba mûciî jweenu na wîte nthîgûrû îrîa ngakwonia!’ 4#Kîam 11.31; 12.4 Tontû bûû, Abrahamu arauma nthîgûrû îrîa Akalidayo baatûûraga na areeta gûtûûra Harani. Îthe agûkua, Mûrungu nî aamûritîre ku na aramûreeta nthîgûrû îîjî buî bûrî nandî. 5#Kîam 12.7; 13.15; 15.18; 17.8 Mûrungu aatamwere kinya gachunchî kamwe ka nthîgûrû îîjî, kaa kiigai kîaawe. Îndî nî eekîre wîrane nawe atî akamwaa nthîgûrû îîjî yee yaawe na nchiarwa ciaawe, kinya këethîra kagiiteene kau ataarî na mwana. 6#Kîam 15.13-14 Mûrungu aramwîra ûjû, ‘Nchiarwa ciaaku igaikua nthîgûrû ya antû bangî, na ikaethua nkombo na kûthithîrua mantû jamathûûku îgiita rîa mîaka magana jana. 7#Kum 3.12 Îndî nkagambithia nthîgûrû îîu bagatumîkîra na mbarite nthîgûrû îîu beeje banthaathagîrie aja.’ 8#Kîam 17.10-14; 21.2-4; 25.26; 29.31—35.18 Rîu Mûrungu araethia rûtaano rwano rwa kîrîkanîro. Tontû bûû, Abrahamu arataana mwana waawe Isaaka, ntukû inyanya nyuma ya agûciarwa. Isaaka nawe arataana mwana waawe Jakubu na Jakubu arataana biûjûjû bieetû birîa îkûmi na biîrî birî îgweta.
9 #
Kîam 37.11,28; 39.2,21 “Biûjûjû biu bieetû biraigîîrua Josefu rûriitho, biramwendia Misri. Îndî Mûrungu nî aarî amwe nawe na 10#Kîam 41.39-41 aramwonokia kuuma mathîînene jonthe. Mûrungu aramwaa ûûme na aratûma eetîkîrîka mbere ya Farao, mûnene wa Misri, ûrîa waamweetherie mûrûngamîîri wa Misri na wa mûciî jwaawe. 11#Kîam 42.1-2 Rîu kûragîa mpara înene nthîgûrûûne ya Misri na ya Kanaani, mwanka biûjûjû bieetû biraaga gîntû gîa kûrîa. 12Rîrîa Jakubu aaigîrue atî nî kwaarî na irio Misri, aratûma ataana baawe, tabo biûjûjû bieetû, bareeta Misri îgiita rîa mbere. 13#Kîam 45.1,16 Rîrîa beetîre ku rîa jaîrî, Josefu araimenyithania kîrî ataana ba îthe, na Farao aramenya ataana ba ng'ina ba Josefu. 14#Kîam 45.9-10; 17.18; Kîam 46.27 Josefu aratûmana na areeterwa îthe na antû bonthe ba mûciî jwaao. Bonthe baarî antû mîrongo mûgwanja na batano. 15#Kîam 46.1-7; 49.33 Rîu Jakubu areeta Misri, kûrîa we na biûjûjû bieetû baakuîrîre. 16#Kîam 23.3-16; 33.19; 50.7-13; Josh 24.32 Mîîrî yaao nî yaareeterwe mwanka Shekemu, na îrathikwa kaburiine karîa Abrahamu aagûrîte na mbeecha ing'anona cia fetha, kuuma kîrî ataana ba Hamori.
17 #
Kum 1.7-8
“Rîrîa îgiita rîakinyîre rîa Mûrungu kûûjûria wîrane bûrîa eekîte na Abrahamu, antû barîa baarî Misri nî baarî bakwongeereka baingîa mono. 18Mûthieene, mûnene ûmwe ûtaijî Josefu nî aambîrîrie kwaathana kûu Misri. 19#Kum 1.10-11,22 Nî aaîrîrie antû beetû na arabathangîkia arakinyîîria biûjûjû bieetû gûtiga tûkenke twaao oome nîkenda tûkua. 20#Kum 2.2 Musa aaciarîrwe igiitene rîu na nî aarî mwana ûmûthongi mono. Nî aarereerwe mûciî jwaao mîeri îthatû. 21#Kum 2.3-10 Rîrîa aumagarîrue mûciî, mwarî wa Farao nî aamwojere na aramûrera ta mûtaana waawe. 22Musa nî aaritanîrwe ûûme bunthe bwa antû ba Misri, na araa muntû waarî na înya înene akîarîa na kîrî mathithio jaawe.
23 #
Kum 2.11-15
“Rîrîa aakinyîrie mîaka mîrongo îna, nî aathûgaanîrie gwîta kûriûngîra ataana ba îthe, tabo Aisraeli. 24Rîu aroona ûmwe waabo akîthithîrua bûbûûî na areeta kûmûteethia na arooraga Mûmisri ûu. 25Musa aathûgaanagia atî Aisraeli nî baamenyaga ûrîa Mûrungu aamûtumagîra nîkenda aboonokia, îndî bo bataijî. 26Rûûneene aroona Aisraeli baîrî bagîtetania na arageria kûbaigithania na arabeera, ‘Anga buî bûtî ba îthe ûmwe. Nîkî îndî gîgûtûma bûteta bwingwa?’ 27Ûrîa wathithagîria ûrîa ûngî ûntû bûbûthûûku aratindîka Musa gateere na aramûûria, ‘Nûû ûkweethetie mûtongeeria weetû na mûtûgambîri? 28Ka ûkwenda kûmbûraga o ta ûrîa ûrooragîre Mûmisri îgoro?’ 29#Kum 18.3-4 Musa akwigua nteto iu aramatûka na areeta gûtûûra nthîgûrû ya Midiani. Arî kûû nî aagîîre na ataana baîrî.
30 #
Kum 3.1-10
“Rîrîa mîaka mîrongo îna yaathirîre, mûraîka wa Mwathani araumîîra Musa kathakeene kamwe gaakanaga mwanki rwanda, akuî na kîrîma kîa Sinai. 31Rîrîa Musa oonere ûntû bûu nî aarigarîre mono mwanka areetaîta akuî nîkenda ategeera bwega îndî araigua kajû ka Mwathani gakiuga: 32‘Ûûni nî ni Mûrungu wa biûjûjû biaaku, Mûrungu wa Abrahamu, na Isaaka na Jakubu!’ Musa arainaina agîkîraga na aatomîrîîrie gûtegeera kaîrî. 33Mwathani aramwîra: ‘Rita iraatû biaaku nîûntû aja ûrûngi nî antû aatheru. 34Nî mboneete mantû jamathûûku jarîa antû baakwa bakûthithîrua kûrîa Misri. Nî mbigîtue kîrîro kîaao, naani nkwîja kûboonokia. Tontû bûû, njû aja ngûtûme Misri.’
35 #
Kum 2.14
“Musa ûûjû nîwe antû ba Israeli baaregere bakiugaga: ‘Nûû ûkweethetie mûtongeeria kana mûtûgambîri?’ Nîwe Mûrungu aatûmîre arî mûtongeeria na mûkûûri agîteethagua nî mûraîka ûrîa wamumîrîîre kathakeene karîa gaakanaga mwanki. 36#Kum 7.3; 14.21; Gût 14.33 Nîwe waatongeererie antû bau barauma Misri nyuma ya kûringa biama na kûthithia mantû ja kûrigaria nthîgûrûûne ya Misri, na kûu Îria Îtuune na kûu rwanda îgiita rîa mîaka mîrongo îna. 37#Kûr 8.15,18 Musa ûûjû nîwe weerîre Aisraeli: ‘Mûrungu akabûthuurîra kîroria taani kuuma kîrî buî o ta ûrîa aanthuurîre.’ 38#Kum 19.1—20.17; Kûr 5.1-33 Noo we waarî na kîûthûrano gîa antû ba Israeli rîrîa baacemanîtie amwe kûrîa rwanda. Aarî kûu amwe na biûjûjû bieetû na amwe na mûraîka ûrîa waarîrie nawe kîrîmeene gîa Sinai. Ningî nîwe waanenkeerwe maathana jarîa jaretaga mwoyo nîkenda atûnenkera jo.
39“Îndî we nîwe biûjûjû bieetû biaaregere kûthikîîra na biramûtindîka gateere birairîrîîria gûcoka Misri. 40#Kum 32.1 Ningî bareera Aaroni: ‘Tûthithîrie mîrungu îrîa îgatûtongeeria njîreene, nîûntû tûtîkûmenya ûrîa Musa, ûrîa ûratûtongeeretie kuuma Misri arakarîre?’ 41#Kum 32.2-6 Rîu baraithithîria mûrungu jwa mîng'uanano jwa kajaû, na barakaritîra kîgongwana na baragwîrîrua gîntû kîrîa baathithîtie bongwa. 42#Amo 5.25-27 Îndî Mûrungu arabeerûkîra na aratûma bathaathagia njota cia îgûrû, o ta ûrîa kwaandîki yukuune rîa iroria atî:
‘Îbuî antû ba Israeli!
Nî ni bwathînjagîra na kûritîra igongwana mîaka mîrongo îna îrîa bwaarî rwanda?
43Buî nî bwaakamatîre îema rîa Moloki,
na Refani, mûrungu jwa mûng'uanano jwa njota.
Bwathithîrie mîrungu îîu ya mûng'uanano nîkenda bûmîthaathagia.
Tontû bûû, nkabûthamia bwee nkombo na mbwikie mberabere ya Babiloni.’
44 #
Kum 25.9,40 “Biûjûjû bieetû nî biaarî na îema rîa kwonania atî Mûrungu arî amwe nabio, birî kûu rwanda. Îema rîu rîathithîtue o ta ûrîa Musa ooneetue nî Mûrungu. 45#Josh 3.14-17 Biûjûjû bieetû nî bieetaga bigîtiganagîra îema rîu mwanka rîrîa Joshua aataîre antû ba nthîgûrû îrîa Mûrungu aamwîrîte eenge baume ku. Rîu îema rîu rîrakara ku mwanka îgiita rîa Daudi. 46#2Sam 7.1-16; 1Ma 17.1-14 Daudi nî eendi nî Mûrungu; nî aarombere Mûrungu rûûtha rwa kûmwakîra gîkaro, we ûrîa ûrî Mûrungu wa Jakubu. 47#1Ane 6.1-38; 2Ma 3.1-17 Îndî Solomoni nîwe waakîîre Mûrungu nyomba.
48“Tontû Mûrungu Ûrîa Ûrî Îgûrû buru atîtûûraga nyomba ciaki nî antû, o ta ûrîa kîroria kiugîîte:
49 #
Isa 66.1-2
‘Mwathani ariuga: Îgûrû nî rûriga rwaakwa,
na nthîgûrû nî gîkinyithio kîa magûrû jaakwa.
Nî nyomba ya mûthemba jûrîkû bûûmba kûmbakîra,
na nîkû mpûûmba kuurûka?
50Anga tî ni nthithîtie into bibi bionthe?’
51 #
Isa 63.10
“Îbuî bûûmîtie nkoro ta iiga! Buî bûrî na matû jatiigagua na bûrî nkoro ta cia antû barîa batîîtîkîtie Mûrungu! Buî bûkari ta biûjûjû bieenu, magiita jonthe bûrûjaga na Roho Ûmûtheru. 52Nî kîroria noo kîrîkû gîtaathangîkua nî biûjûjû bieenu? Nî booragîre bonthe barîa Mûrungu aatûmîte batûmîîria kwîja kwa Ûrîa Mwagîru, ûrîa buî bwakunyanîre na bûramûûraga. 53Buî nî bwareeterwe Waatho nî araîka îndî bûtîthingataga Waatho bûu.”
Stefano kûûragwa
54Rîrîa akûrû ba Kîama baigîrue mantû jau, barathûûra mono na barakabakaba maîgo nîûntû bwa mûthûûro. 55Îndî Stefano, oojûri Roho Ûmûtheru aratega îgûrû, na aroona mwago jwa Mûrungu, na Jesû arûngi rûteere rwa ûrîo rwa Mûrungu na 56arauga atîrî, “Tegeeni! Nî nkwona îgûrû rîrugûki na Mûtaana wa Muntû arûngi rûteere rwa ûrîo rwa Mûrungu.”
57Rîu antû bonthe barîa baarî Kîameene, bararinga gîtuma gîkînene, na barakunîka matû jaao na njara na bonthe baramûthûngûthîra baramûgwata. 58Baramuumagaria oome ya ntûûra, na baramûûraga na maiga. Akûûjî baranenkera mûthaka ûmwe weetagwa Saûlû nguû ciaao abamenyerera. 59Rîrîa baaûûraga Stefano na maiga nî aarombaga ûjû, “Mwathani Jesû, îtîkîîria roho waakwa.” 60Araturia maru arakaya na kajû gakanene, “Mwathani, ûkábarîyia ûthûûku bûbû.” Akûthiria kuuga ûu, arakua.
ప్రస్తుతం ఎంపిక చేయబడింది:
Maj 7: KIMERUBIBLE
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
KIMERU BIBLE WITH DC
©Bible Society of Kenya, 2009, 218
