LIRAANGA 5
5
Vitsukhulu va Adamu
(1 Tsiny 1:1-4)
1Yaka nako mira ka vitsukhulu va Adamu. Lwa Nyasaye yalomba mundu, yamulomba mu likoondo lielie. 2Yalomba musatsa nu mukhali, navakasitsa. Niyakhamala khuvalomba, yavaha lira “Mundu.” 3Lwa Adamu yali niyakhamala mihika imia indala na makhomi kavaka, yivula mwana wi shiyayi wasasananga naye. Yamukulikha lira Setsu. 4Setsu niyakhivulwa, Adamu yamenya mihika chindi tsimia munane. Yivula vaana vandi vi shiyayi nende vi shikhana. 5Adamu yakhutsa, nali ni mihika tsimia tisa na makhomi kavaka.
6Lwa Setsu yali nali ni mihika imia indala na chiranu, yivula Enoshi. 7Lwa Setsu yali niyakhivula Enoshi, yamenya mihika tsimia munane na saba. Yivula vaana vandi vi shiyayi nende vi shikhana. 8Setsu yamenya mihika tsimia tisa likhomi na chivili, nakhutsa.
9Lwa Enoshi yali nali ni mihika makhomi tisa, yivula Kenani. 10Niyakhivula Kenani, Enoshi yamenya mihika tsimia munane likhomi na chiranu. Yivula vaana vandi vi shikhana nende vi shiyayi. 11Yakhutsa nali ni mihika tsimia tisa na chiranu.
12Lwa Kenani yali nali ni mihika makhomi saba, yivula Mahalaleli. 13Niyakhivula Mahalaleli, Kenani yamenya mihika tsimia munane na makhomi kane. Yivula vaana vandi vi shiyayi nende vi shikhana. 14Kenani yakhutsa namali mihika tsimia tisa ni likhomi.
15Lwa Mahalaleli yali nali ni mihika makhomi sitsa na chiranu, yivula Yaredi. 16Niyakhivula Yaredi, Mahalaleli yamala mihika tsimia munane na makhomi kavaka. Yivula vaana vandi vi shiyayi nende vi shikhana. 17Mahalaleli yakhutsa namali mihika tsimia munane na makhomi tisa na chiranu.
18Lwa Yaredi yali nali ni mihika imia indala na makhomi sita na chivili, yivula Enoko. 19Niyakhivula Enoko, Yaredi yamala mihika tsimia munane. Yivula vaana vandi vi shiyayi nende vi shikhana. 20Yaredi yakhutsa nali ni mihika tsimia tisa na makhomi sita na chivili.
21Lwa Enoko yali nali ni mihika makhomi sita na chiranu, yivula mwana wi shiyayi namukulikha lira Metsusela. 22Niyakhivula Metsusela, yakwa mundu wa Nyasaye. Niyakhamala mihika tsimia tsivaka, yivula vaana vandi vi shiyayi nende vi shikhana. 23Enoko yamenya mihika tsimia tsivaka na makhomi sita na chiranu. 24Enoko yali wayaanza Nyasaye, navula khulolekhakhu, shichila Nyasaye yamuvukula.
25Lwa Metsusela yali nali ni mihika imia indala na makhomi munane na saba, yivula Lameki. 26Niyakhivula Lameki, yamenya mihika tsimia saba na makhomi munane na chivili. Yivula vaana vandi vi shiyayi nende vi shikhana. 27Khulwa yako, Metsusela yamenya mihika tsimia tisa makhomi sita na tisa; nakhutsa.
28Lwa Lameki yali niyakhamala mihika imia indala makhomi munane na chivili, yivula mwana wi shiyayi. 29Lameki yamukulikha lira Nuhu navoola, “Mwana uyu aliitsa khukhuleminya mwoyo, shichila muhinzilu kweru mutinyu, kwa khukholanga mu mulimi ku Mwami Nyasaye yamala khulaama.” 30Nuhu niyakhivulwa, Lameki yamenya mihika tsimia tsiranu na makhomi tisa na chiranu. Yivula vaana vandi vi shiyayi nende vi shikhana. 31Khulwa yako, Lameki yamenya mihika tsimia saba na makhomi saba na saba; nakhutsa.
32Lwa Nuhu yali nali ni mihika tsimia tsiranu, yivula Shemu, Hamu nende Yafetsa.
ప్రస్తుతం ఎంపిక చేయబడింది:
LIRAANGA 5: LLLPRO
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© The Bible Society of Kenya, 2013
