LUKA 23
23
Komi Jesu taitab Pilato, bounindet ne bo Rom
1King’eetyo anyun tuiyet komugul, ak komutyi inendet Pilato. 2Ak kitoi anyun kotaam inendet, kole, Kiginyoru chichi komaasi bororiennyo, ak koetei kigochi Kaisari kodi, ak komwaei inendet kole, A Kristo laitoriat. 3Ak kiteebe inendet Pilato, kole, I laitoriatab Yahudik? Ak kiwolji kole, Kaimwa. 4Ak kilenji Pilato tisiik che eechen ak tuiyosiek, Ma anyorji lelutiet chichi. 5Ago kiisimji mising’, kole, Kiinde chaamset bik, konetoti eng’ Judea komugul, kotoune Galili agoi koit oli.
Komi Jesu taitab Herod
6Ago kingogas Pilato ng’olyondonoto, koteeb kole, Tos Galilindet chichi? 7Ak kingonai kole bo bounatet ne bo Herod, koyokto kimutyi Herod, ne kimi agine Jerusalem betusiechoto.
8Kingogeer Herod Jesu, kobaibait mising’: amu kimachei koboch keny kogeer inendet, amu kiga kogas tuguk che chang’ agobo inendet; ak kimachei kogeer kwong’utiet age koyaak eng’ inendet. 9Ak kiteepse inendet eng’ ng’alek che chang’; ago ma wolji kiy. 10Ak kitonondos tisiik che eechen ak sirik, ak kotaam inendet eng’ kimnatet. 11Ak kiiming’in inendet Herod ak askarikyik, ak kochombil, ak kolaakyi ngoriet ne kararan mising’ ak koweekyi Pilato kogeny. 12Ak kiek choronoi Herod ak Pilato eng’ betunoto: amu kita kosurtos ichegei eng’ tai.
Pilato, Baraba ak Jesu
13Kiguur anyun Pilato tisiik che eechen ak bounik koboto bik kobwa tugul, 14ak kilenji ichek, Komutwa chichi, ak komwa ole imaasi bik: ak ogeero, kaatebe anendet eng’ taing’wong’, ak ma anyorji chichi lelutiet eng’ ng’alechato otaame inendet: 15achicha, agot Herod agine; amu kaweekwech inendet; ak ogeero, ma yai kiy inendet ne nyoljin meet. 16Noto anyun, abire inendet, si atiach. 17Amu ki ng’atutiet kotiakyi agenge eng’ betutab igorta. 18Ago kibolyo tugul, kole, Iste chichi, ak itiakwech Baraba: 19ne kiga kitoorji korgoret, amu chaamset ne kiyai eng’ nganaset, ak rumisiet.
20Ak king’alalji Pilato icheget kogeny, komachei kotiach Jesu; 21ago kibolyo ichek, kole, Igartat eng’ kimurtoiyot, igartat inendet eng’ kimurtoiyot. 22Ak kimwachi ichek ne bo somok, kolenji, Kalya, nee yaitiet ne kiyai chichi? Ma anyorji ng’olyot inendet ne nyoljin kome: noto anyun abire inendet si atiach.
23Ago kites kobolyo mising’, komachei kole kigartat. Ak kiiterteris kutuswekwak. 24Ak kitil anyun Pilato kiruoget koyaak ko u ye kimach ichek. 25Ak kiitiach inendet ne kiga kitoorji korgoret agobo chaamset ak rumisiet, ne kaga kosom ichek; ago kiigoito inendet Jesu si kobiit koyachi ko u ye kimachei.
Kigartati Jesu
26Ak kingota komuti inendet, konam Simon, Kurenindet, ne kibunu koret age, ak kosutyi kimurtoiyot, si kobiit koib kosubi Jesu. 27Ak kiisubi tuiyet ne o ne bo bik, koboto kobogorisiek che kiiteiyoti ak korirjinoti inendet. 28Ago kiweleljigei Jesu ichek kolenji, Tibikab Jerusalem, amoririe agobo ane, ago orirjige, ak lagokwok. 29Amu, ogeero, bwanei betusiek, che tun len ichek, Kiberuri sonotinwek, ak mootinwek che ma iiyo, ak kinaik che ma kireri. 30Yeityo kotoi ichek kolenji tulonok, Oluuljech; ak kolenji tulonok che mengech, Otuchech. 31Amu ngot koyai tuguchu eng’ ketit ne tuon, koteptoi ano anyun eng’ ne yaamat?
32Ak kimitei kiptengeginik aeng’u, che kigimuti koboto inendet, koba kebar. 33Ak kingoit ye kiguure Terta, ko yoto ole kigigartate inendet ak kiptengeginichoto, age eng’ komostab tai ak age eng’ komostab katam. 34Ak kile Jesu, Baba, nyochi kaat ichek; amu ma nai kit ne yaei. Ak kipchechigei ngoroikyik, eng’ seretab barbarek. 35Ak kitonondos bik kogeerei. Ak kororechi inendet bounik kole, Kisoru alak; ingosorgei ibak, ngo Kristo nito, ne lewenot ne bo Jehovah. 36Ak kichurachur agichek askarik inendet, kobwanei ye mi inendet, kogochin siki, 37kolen, Ngo i Laitoriatab Yahudik, isoruge.
38Ak kimi sirutik metinnyi barak, che mwaei kolen, NI KO LAITORIAT NE BO YAHUDIK.
39Ak kichurachur inendet age eng’ kiptengeginichoto kiga kigartat, kole, Tos ma i Kristo inye? Soruge ak isoruech ak achek. 40Ago kiwol age, ak koger kong’ kole, Meiywei Jehovah, agot inye, ak imi kagikyinonoto? 41Ago bo iman nenyo; amu kagigonech ko u boisionikyok: ago ma yai chichi kiy ne ma nyolu. 42Ak kile, Jesu, ibwata ye tun inyone eng’ bounateng’ung’. 43Ak kilenji Jesu inendet, Amwaun iman, ale, Kitebye tuwai rani eng’ Paradis.
Meetab Jesu
44Ak ki olo bo sait lo, koimenit emet komugul agoi sait sogol, 45ak kima kota koluu asista: ak kigerer kwenutab anget ne kiga kioiye ole tilil. 46Ak kitwek Jesu eng’ kutit ne o, kole, Baba, kande tamirmiriennyu euneguk: ak kingo kagomwa ni, kogoito tamirmiriet.
47Ak kingogeer kiptaiyatab bogol tuguk che kayaagis, kolos Jehovah, kole, Koga bo iman chichi. 48Ak kingogeer tuguk che kayaagis tuiyosiek tugul che kiga koyumgei si korat setio, koweeigei kolugotegei tegetik. 49Ak kitonondos eng’ ye loo tugul che kiingengei, ak kobogorisiek che kiisubu inendet kobunu Galili, kole si kogeer tuguchuto.
Tubetab Jesu
50Ak ogeero, chito ne kigiguure Josep, chitab kapkiruok, chito ne mie, ak ko bo imanda 51(ak kima kochamei chichoto kiruogenywa ak boisienywa), ki bo Arimatea inendet, nganaset ne bo Yahudik, ne kiigeni agine bounatetab Jehovah: 52kiwa chichito ole mi Pilato, kwo kosom bortab Jesu. 53Kochoor konyo ng’ony, ak kotaae anget ne bo katanit, ak konde kererit ne kigibal ruandet, ne kitom ketupchi chi. 54Ak ki betutab Chobet, ak kiga rik sabato.
55Ak kiisubu kobogorisiek, che kigabwa koboto inendet kobunu Galili, ak kogeer kererit, ak ole kigindoitoi bortanyi. 56Ak kiweeigei, koba kochob nyamdutik ak mwanik. Ak kiimuuny eng’ betutab sabato ko u ng’atutiet.
ప్రస్తుతం ఎంపిక చేయబడింది:
LUKA 23: BUKUIT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
God's word open for all
©Bible Society of Kenya, 2020
