JOHANA 7
7
Jesu koboto tupchosiekyik
1Ak kingobata tuguchu kowendot Jesu eng’ Galili: amu ma cham kowendot eng’ Judea, amu kicheng’ei Yahudik kobar inendet. 2Ak kiga rik igortab Yahudik, igorta ne bo keriosiek. 3Kilenji anyun tupchosiekyik, Ui eng’ oli, ui agoi Judea, si kogeer alamalyeng’ung’ agichek boisioniguk che iyae. 4Amu mami chi ne yaei kiy eng’ ung’ot, ak kocheng’ kobartagei. Ngiyai tuguchu, iborjige ng’ony. 5Amu agot tupchosiekyik agichek, ko ma iyan inendet. 6Kolenji anyun Jesu ichek, Tom koit betunnyu; ago mi betung’wong’ kotugul. 7Maimuchi ng’ony kowechok; ago wecha ane, amu abaoriani agobo ng’ony, ale, yaach boisionikyik. 8Otogosyi okwek igorta: tom atogosyini ane igorita; amu tom kosulda betunnyu. 9Ak kingo kagomwachi tuguchuto, kota kotebi eng’ Galili.
10Ago ye kingotogosta tupchosiekyik igorta, kotogosta agine, ago ma ibartaatgei, ago kiwa ko u ne ung’otegei. 11Kicheng’ anyun Yahudik inendet eng’ igorta, ak kole, Mi ano inendet?
12Ak kimi kang’unyng’unyet ne o eng’ tuiyosiek agobo inendet: amu kile alak, Mie chichi; kole alak, Achicha, ago imaasi tuiyet. 13Ago ma mwa chi ng’olyo kotook agobo inendet amu kiiywei Yahudik.
Konetisiei Jesu eng’ Jerusalem kole bunu inendet Jehovah
14Ago ye kingo kagoit kwenutab igorta kotogosta Jesu kwo hekalut, ak konetis. 15Kokwong’io anyun Yahudik kole, Kinaita ano chichi sirutik, ago tom konetgei? 16Kowolji anyun Jesu kolenji, Konetisiennyu ko ma nenyu, ago bo inendet ne kiiyokwa. 17Ngo machei chi age tugul koyai magetab Jehovah, konai konetisioni, ngo bo Jehovah, anan ngamwae anege. 18Inendet ne mwaei che chechik inegei kocheng’ei torornatennyi: ago ne cheng’ei torornatetab ne kiiyok inendet ko bo iman, ama mi kiy ne ma bo imanda eng’ inendet. 19Tos kima konok Musa Ng’atutiet, ago mami chi eng’ okwek ne yaei Ng’atutiet? Amu nee si ocheng’e obara? 20Kowol tuiyet, kole, Itinye oindet: cheng’ei ng’o kobarin?
21Kowolji Jesu kolenji, Kiayai boisiet agenge, ak okwong’ie okwek tugul. 22Kigonok Musa kamuratanet amu noto (ago ma bo Musa, bo kwanisiek); ak omuratani chi eng’ saboto. 23Ngeyatitoi chi eng’ betutab sabato, si mabutok Ng’atutietab Musa, ko tos onerekyina, amu kaasoob chi komie eng’ betutab sabato? 24Amoruoch ko u ye ogeere, ago oruoch kiruoget ne bo imanda.
25Kimwa alak eng’ choto bo Jerusalem kole, Ma inendet ni ne kocheng’ei ichek kobar? 26Ak ogeero, mwaitooti kotook, ama mwachi kiy ichek inendet. Tos ingen bounik komie kole, nito ko Kristo? 27Ago kingen ole bunu chichi: ago ye nyo Kristo, ko manaei chi ole bunu.
28King’alal anyun Jesu eng’ kutit ne o eng’ hekalut, konetisiei, kole, Ongena, ak ongen ole abunu; ak kama anyo anege, ago bo iman inendet ne kiiyokwa, ne mongen okwek. 29Angen inendet; amu abunu inendet, ak kiiyokwa inendet.
30Kicheng’ anyun bichoto konam inendet: ama nam chi inendet, amu kitom koit betunnyi. 31Ak kiiyan inendet che chang’ che bo tuiyet; ak kile, Ye nyo Kristo, ko tos yai kaborunoik che siirei cho koyaei chichi?
32Kigasei Parisaik kong’unyng’ung’jin tuiyet tuguchuto agobo inendet; ak kiiyok tisiik che eechen ak Parisaik kiptainik kobwa konam inendet. 33Kole Jesu anyun, Ta ami kobotok ne matia, si awa ole mi inendet ne kiiyokwa. 34Tun ocheng’a, amonyorua: ak ole ami, ko momuchi obwa. 35Komwachigei anyun Yahudik kole, Wendi ano chichi si ma kinyoru inendet? Tos wendi ole mi icheget che kigoiyestochi Yunanik, si konet Yunanik? 36Nee anyun ng’olyondoni kamwa, kole, Ocheng’a, amonyorua: ak ole ami, ko momuchi obwa?
Beek che soptos
37Eng’ betut ne bo let, betunoto o bo igorta, kotonon Jesu ak komwa eng’ kutit ne o, kole, Ngo amei chi melel, ko ingonyonja, ak koee. 38Inendet ne iyana, ko u ye kigomwa sirutiet, kole, bunu moennyi ainosiekab beek che sobei. 39Ago kimwaei nito agobo Tamirmiriet, ne tun taachei ichek che iyani inendet: amu kitom kegon Tamirmiriet; amu kitom kitoror Jesu.
40Ye kingogas alak che bo tuiyet ng’alechuto, kole, Nito maotiot iman. 41Kole alak, Nito ko Kristo. Ago kile alage, Tos bunu Kristo Galili? 42Ma mwa sirutiet, kole, mong’une Kristo keswek che bo Daudi, ak kobun Betlehem, nganaset ole kimi Daudi? 43Kibiit anyun toiyet eng’ tuiyet agobo inendet. 44Ak kimach alak konam inendet; ago ma nam chi inendet.
45Kibwa anyun kiptainik ole mi tisiik che eechen ak Parisaik; ak kolenji, Kalya si momutu inendet? 46Kowol kiptainik kole, Kitom kong’alali chi ko u ni. 47Kowolji anyun Parisaik ichek, kolenji, Kagibeetok ak okwek? 48Kigoyan inendet age tugul eng’ bounik, anan eng’ Parisaik? 49Ago chubotin bichu che manaei Ng’atutiet.
50Kilenji Nikodemo (ne kigawa ole mi inendet atkinye tai, ne ki age eng’ ichek), 51Tos iruokyin chi Ng’atutiennyo, kotom kegas ng’alekyik ak kenai kit ne yaei? 52Kowolji anyun inendet kolenji, I bo Galili aginye? Cheng’, ak igeer amu mamong’une Galili maotiondo.
[ 53Kiwa chi ktugul anyun gonnyi:
Kobogoriot ne kiginamji ibetab
ప్రస్తుతం ఎంపిక చేయబడింది:
JOHANA 7: BUKUIT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
God's word open for all
©Bible Society of Kenya, 2020
